Gethsemane Grove [Kakahuyan sang Getsemani], ni Derek Hegsted

Hunyo 12–18

Lucas 22; Juan 18

“Indi ang Akon Pagbuot, Kundi ang Imo, ang Matuman”

Hatagi sing tiyempo ang pagbasa sang Lucas 22 kag Juan 18 sining semana. Binagbinaga kag pangamuyui ang imo ginabasa. Ang paghimo sini makahatag sa Espiritu sing oportunidad nga magpamatuod sa imo tagipusuon nga ang balaan nga mga kasulatan matuod.

Isulat Ang Imo Mga Panghunahuna

May tatlo lamang ka mortal nga mga saksi sa pag-antos ni Jesucristo sa Hardin sang Getsemani—kag halos gintulugan nila ini. Sa sina nga hardin kag sang ulihi sa krus, gindala ni Jesus sa Iya Kaugalingon ang mga sala, kasakit, kag pag-antos sang tagsa ka tawo nga nagkabuhi, bisan pa nga halos wala sang bisan isa nga nagakabuhi sa amo nga tion ang nakahibalo sa nagakatabo. Ang pinakaimportante nga mga hitabo sa wala katapusan masami nga nagalabay nga wala masyado sing kalibutanon nga atensyon. Pero ang Dios nga Amay nakahibalo. Nabatian Niya ang pangabay sang Iya matutom nga Anak: “Amay, kon buot mo, ipahilayo sa akon ining tagayan: apang indi ang akon [pagbuot], kundi ang imo, [ang matuman]. Kag nagpahayag sa iya ang isa ka [anghel] gikan sa langit, nga nagapabakod sa iya” (Lucas 22:42–43). Bisan wala kita didto agud magsaksi sa sining akto sang pagkadi-maiyaiyahon kag pagkamatinumanon, kita mga saksi sang Pagbayad-Sala ni Jesucristo. Tagsa nga maghinulsol kita kag magbaton sang kapatawaran sang aton mga sala, tagsa nga mabatyagan naton ang nagapabakod nga gahum sang Manluluwas, makapamatuod kita kon ano ang natabo sa Hardin sang Getsemani.

Mga Ideya para sa Personal nga Pagtuon sang Balaan nga mga Kasulatan

Lucas 22:31–34, 54–62; Juan 18:17–27

Ang pagbag-o isa ka nagapadayon nga proseso.

Panumduma ang mga eksperiyensya ni Pedro upod sa Manluluwas—ang mga milagro nga iya nasaksihan kag ang doktrina nga iya natun-an. Kag ngaa mahambal ang Manluluwas kay Pedro, “Kon ikaw magliso liwat [converted], palig-una ang imo mga kauturan”? (Lucas 22:32; mga italics gindugang). Samtang ginabinagbinag mo ini, pamensara kon ano ang kinalain sang pag-angkon sang testimonya kag sang matuod nga pagkahaylo.

Samtang imo ginabasa ang parte sa mga eksperiyensya ni Pedro sa Lucas 22:31–34, 54–62 (tan-awa man sa Juan 18:17–27), hunahunaa ang imo kaugalingon nga pagkahaylo. Nakabatyag ka na bala sang dedikasyon nga, pareho kay Pedro, “handa [ka] sa pag-upod sa [Manluluwas] sa bilanggoan kag sa kamatayon? (Lucas 22:33). Ngaa nagatahaw ining mga balatyagon kon kaisa? May mga oportunidad adlaw-adlaw nga ipanginwala ukon magpamatuod sa Manluluwas; ano ang imo himuon para mangin adlaw-adlaw nga saksi Niya? Ano pa nga mga leksyon ang imo matun-an sa eksperiyensya ni Pedro?

Sa pagpadayon mo basa sang Bag-ong Katipan, bantayi ang mga ebidensya sang nagapadayon nga pagkahaylo ni Pedro. Tandai man ang mga paagi nga iya ginbaton ang hangkat sang Ginuo nga “pabakura ang imo kauturan” (Lucas 22:32; tan-awa sa Mga Binuhatan 3–4).

Tan-awa man sa Marcos 14:27–31.

Lucas 22:39–46

Ang Manluluwas nag-antos para sa akon sa Getsemani.

Si Pangulong Russell M. Nelson nag-imbitar sa aton nga “maghatag sang oras sa pagtuon parte sa Manluluwas kag sa Iya nagabayad-sala nga sakripisyo” (Ang Pagkuha sang Gahum ni Jesucristo Pasulod sa Aton mga Kabuhi,” Liahona, Mayo 2017, 40).

Pamensara sing maayo kon ano ang imo himuon para batunon ang imbitasyon ni Pangulong Nelson. Mahimo mo sugdan paagi sa mainampuon nga pagpanumdom sang pag-antos sang Manluluwas sa Getsemani, nga ginlaragway sa sining mga bersikulo, kag pagsulat sang mga panghunahuna kag pamangkot nga imo mapensaran.

Para sa mas madalom nga pagtuon parte sa Manluluwas kag sa Iya Pagbayad-Sala, tilawi nga magpangita sa iban pa nga balaan nga mga kasulatan sang mga sabat para sa pareho sini nga mga pamangkot:

• Ngaa kinahanglanon ang Pagbayad-Sala sang Manluluwas? (Tan-awa sa 2 Nefi 2:5–10, 17–26; 9:5–26; Alma 34:8–16; 42:9–26.)

• Ano ang naeksperiyensyahan sang Manluluwas samtang Sia nagaantos? (Tan-awa sa Isaias 53:3–5; Mosias 3:7; Alma 7:11–13; Doktrina kag mga Kasugtanan 19:16–19.)

• Paano nagaapekto ang pag-antos ni Cristo sa akon kabuhi? (Tan-awa sa Juan 10:10–11; Mga Hebreo 4:14–16; 1 Juan 1:7; Alma 34:31; Moroni 10:32–33; Dallin H. Oaks, “Ginpabakod sang [Pagbayad-Sala] ni Jesucristo,” Liahona, Nob. 2015, 61–64.)

• Iban ko nga mga pamangkot:

Sa imo pagtuon parte sa kon ano ang natabo sa Getsemani, mangin manami nga mahibaluan nga ang Getsemani isa ka hardin sang mga kahoy nga olivo kag nagalakip sang molino nga ginagamit sa pagpusa sang mga olivo, kag pagpuga sang lana nga ginagamit nga suga kag pagkaon kag amo man sa pagpang-ayo (tan-awa sa Lucas 10:34). Paano ayhan ang proseso sang pagkuha sang lana sa olivo nagasimbolo sang ginhimo sang Manluluwas para sa aton sa Getsemani? Para sa mga ideya, tan-awa sa mensahe ni Elder D. Todd Christofferson “Magpabilin sa Akon Gugma” (Liahona, Nob. 2016, 50–51).

Tan-awa man sa Mateo 26: 36–46; Marcos 14:32–42.

Juan 18:28–38

Ang “ginharian [sang Manluluwas] indi iya sining kalibutan.”

Bilang lider sa pulitika, si Poncio Pilato pamilyar sa gahum kag mga ginharian sining kalibutan. Pero si Jesus naghambal parte sa lain pa gid nga klase sang ginharian. Nga ginapanumdom ang imo nabasahan parte sa kabuhi sang Manluluwas, ano nga pamatuod ang imo nakita nga ang Iya “ginharian indi iya sining kalibutan”? (Juan 18:36). Ngaa importante sa imo nga mahibal-an ini? Ano pa ang nangibabaw sa imo parte sa mga pulong ni Jesus kay Pilato?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Lucas 22:31–32.Ano ayhan ang nabatyagan ni Pedro sang mahibal-an nga nagpangamuyo si Jesus para sa iya kag sa iya pagtuo? Sin-o ang pwede naton ipangamuyo, “agud nga indi mag-untat ang [ila] pagtuo”? (bersikulo 32).

Lucas 22:39–46.Ang pagtuon parte sa pag-antos sang Manluluwas sa Getsemani sarang nga mangin sagrado nga eksperiyensya para sa inyo pamilya. Pamensara kon ano ang sarang ninyo himuon para magtuga sang matinahuron kag malinong nga panimuot samtang inyo ginatun-an ang Lucas 22:39–46. Mahimo kamo nga magpatukar ukon magkanta sing ululupod sang pila sa inyo paborito nga mga himno ukon kalantahon sang kabataan parte sa Manluluwas, ukon magtan-aw sang kaangot nga mga litrato.   Samtang inyo ginabasa ang mga bersikulo, ang mga miyembro sang pamilya sarang nga mag-istorya sang mga dinalan nga makahulugan gid para sa ila—siguro isa ka dinalan nga nagabulig sa ila nga mabatyagan ang pagpalangga sang Manluluwas (tan-awa man sa Mateo 26:36–46; Marcos 14:32–42). Pwede mo man sila hagaron nga magpaambit sang ila mga testimonya kay Jesucristo kag sa Iya Pagbayad-Sala.

Lucas 22:42Mahimo nga magpaambit ang mga miyembro sang pamilya sang mga eksperiyensya sang natun-an nila nga magsiling, “Indi ang akon pagbuot, kundi ang imo, ang matuman.”

Lucas 22:50–51; Juan 18:10–11.Ano ang aton matun-an parte kay Jesus sa sining mga bersikulo?

Suffer Ye Thus Far [Tuman na Ini], ni Walter Rane

Juan 18:37–38.Paano naton sabton ang pamangkot ni Pilato nga “Ano bala ang kamatooran?” (bersikulo 38). Para sa pila ka mga ideya, tan-awa sa Juan 8:32; Doktrina kag mga Kasugtanan 84:45; 93:23–28.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga himno: “Ako Nahalawhaw Gid [I Stand All Amazed],” Mga Himno kag mga Ambahanon sang Kabataan, no. 22.

Pagpauswag sang Personal nga Pagtuon

Tun-i ang mga pulong sang mga propeta kag apostoles sa ulihing-mga-adlaw. Basaha ang mga pinanudlo sang mga propeta kag apostoles sa ulihing-mga-adlaw parte sa mga kamatuoran nga imo makita sa balaan nga mga kasulatan. Halimbawa, sa pinakabag-o nga isyu sang pangkabilogan nga komperensya sang Liahona, pwede mo pangitaon sa index sang mga topiko ang “Pagbayad-Sala” (tan-awa sa Teaching in the Savior’s Way, 21).

Not My Will, but Thine [Indi Akon Pagbuot, Kundi Imo], ni Walter Rane