Si Cristo sa atubang ni Pilato

Ecce Homo, ni Antonio Ciseri

Hunyo 19–25

Mateo 27; Marcos 15; Lucas 23; Juan 19

“Natapos Na”

Ang Mateo 27; Marcos 15; Lucas 23; kag Juan 19 nagalakip sang mga paglaragway sang katapusan nga inoras sang dutan-on nga kabuhi sang Manluluwas. Pangayoa nga mabatyagan ang Iya pagpalangga sa imo samtang imo ginatun-an ang Iya sakripisyo kag kamatayon.

Isulat Ang Imo Mga Panghunahuna

Sa kada pulong kag buhat, ginpakita ni Jesucristo ang putli nga gugma—nga gintawag ni Apostoles Pablo nga gugma sa isigkatawo [charity] (tan-awa sa 1 Mga Taga-Corinto 13). Wala na sang iban pa nga tion nga mas kitaon ini sangsa katapusan nga inoras sang dutan-on nga kabuhi sang Manluluwas. Ang Iya dungganon nga paghipos sa atubang sang butig nga mga akusasyon nagpakita nga Sia “indi maakigon” (1 Mga Taga-Corinto 13:5). Ang Iya kahanda nga magpaidalom sa pagsakit, pagyaguta, kag paglansang sa krus—samtang ginapunggan ang Iya gahum nga tapuson ang Iya pag-antos—nagapakita nga Sia “mapailubon” kag “nagabatas sang tanan” (1 Mga Taga-Corinto 13:4, 7). Ang Iya kaayo sa Iya iloy kag ang Iya kaluoy sa mga naglansang sa Iya—bisan pa sa tion sang Iya indi matupungan nga pag-antos—nagapakita nga Sia “wala nagapangita sang [Iya] kaugalingon” (1 Mga Taga-Corinto 13:5). Sa Iya katapusan nga tinion sa duta, ginhimo ni Jesus ang Iya ginahimo sa bilog Niya nga dutan-on nga pag-alagad—ginatudloan kita paagi sa pagpakita sa aton. Matuod gid, ang gugma sa isigkatawo amo ang “ang putli nga gugma ni Cristo” (Moroni 7:47).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mateo 27; Marcos 15; Lucas 23; Juan 19

Ang kahanda ni Jesucristo nga mag-antos nagapakita sang Iya pagpalangga sa Amay kag sa aton tanan.

Bisan pa nga ang Manluluwas may gahum nga tawgon ang “mga legion sang mga angheles” (Mateo 26:53), boluntaryo Niya nga ginpili nga batason ang indi matarong nga mga akusasyon, mapintas nga pagyaguta, kag indi mahunahuna nga pisikal nga kasakit. Ngaa ginhimo Niya ini? “Tungod sang iya mahigugmaon nga kaluoy,” pamatuod ni Nefi “kag sang iya pagkamainantuson tuhoy sa mga anak sang tawo” (1 Nefi 19:9).

Si Cristo nga nagapas-an sang krus

“Kag naggwa sia nga nagapas-an sang iya krus pakadto sa … Golgota” (Juan 19:17).

Pwede mo nga sugdan ang imo pagtuon sang katapusan nga inoras sang Manluluwas paagi sa pagbasa sang 1 Nefi 19:9. Diin mo makita sa Mateo 27; Marcos 15; Lucas 23; kag Juan 19 ang mga halimbawa sang tagsa ka butang nga ginhambal ni Nefi nga antuson ni Jesus?

• “[Sila] nagahukom sa iya nga isa ka butang nga bale-wala”

• “Bunalon nila sia”

• “Hampakon nila sia”

• “Duplaan nila sia”

Diin nga mga dinalan ang nagabulig sa imo nga mabatyagan ang ’“mahigugmaon nga kaluoy” sang Manluluwas sa imo? Ano pa ang imo mga panghunahuna kag balatyagon samtang imo ginabasa ining mga sinulatan? Pamensara nga isulat ang mga ini ukon ipaambit sa isa ka tawo.

 

Mateo 27:27–49, 54; Marcos 15:16–32; Lucas 23:11, 35–39; Juan 19:1–5

Ang pagyaguta indi makaliwat sang kamatuoran.

Bisan pa nagbatas na ang Manluluwas sang pagpangyaguta sa bilog Niya nga pag-alagad, mas naglala pa gid ini sa tion sang pagsakit kag Paglansang sa Iya. Pero ining pagpangyaguta indi makaliwat sang kamatuoran: si Jesus Anak sang Dios. Sa imo pagbasa parte sa pagpakahuya nga ginbatas ni Jesus, pamensara ang oposisyon kag pagpangyaguta nga ginaatubang sang Iya buluhaton sa karon. Ano nga mga panghunahuna ang imo naagom parte sa pagbatas sang oposisyon? Ano ang nanamian mo sa mga tinaga sang kapitan sa Mateo 27:54?

Mateo 27:46; Marcos 15:34

Si Jesucristo nag-antos nga isahanon agud indi ako mag-antos nga isahanon.

Isa sa Iya pinakamakatalandog nga tinion sa krus, si Jesus, nga pirme nagasalig sa Iya Amay nga Langitnon, gulpi lang nakabatyag nga sinikway. Ang pagbasa sini mahimo nga makatulod sa imo nga hunahunaon ang tinion sang pamatyag mo malayo ka sa Dios. Pwede mo man binagbinagon kon paano ginpatigayon sang sakripisyo sang Manluluwas nga imo malampuwasan inang kalayuon. Sa ginpamatuod ni Elder Jeffrey R. Holland, “Tungod ginlakat ni Jesus ang inang tama kalayo, masubo nga banas nga nagaisahanon, indi na naton kinahanglan nga himuon ini. … Mabaskog nga ginpalayag sa ibabaw sang Kalbaryo ang kamatuoran nga indi gid kita pagpabay-an nga nagaisahanon ukon wala sing bulig, bisan pa nga kon kaisa pamatyag naton nagaisahanon kita” (“None Were with Him,” Liahona, Mayo 2009, 88). Pamensara kon paano ang Manluluwas makabulig sa imo nga malampuwasan ang kasubo samtang ginabasa ang bilog nga mensahe ni Elder Holland.

Lucas 23:34

Ang Manluluwas amo ang aton halimbawa sang kapatawaran.

Ano ang imo nabatyagan samtang ginabasa ang mga pulong sang Manluluwas sa Lucas 23:34? Nga nagatumod sa mga pulong sang Manluluwas, si Pangulong Henry B. Eyring nagpanudlo: “Kinahanglan naton nga magpatawad kag indi magdumot sa mga nakasakit sa aton. Si Cristo nagpahamtang sang ehemplo halin sa krus. … Wala kita makahibalo sang matuod-tuod nga balatyagon sang mga nakasakit sa aton” (That We May Be One,” Ensign, Mayo 1998, 68). Paano makabulig sa imo ining bersikulo kon ginabudlayan ka nga magpatawad sang isa ka tawo?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 27; Marcos 15; Lucas 23; Juan 19    Pagkatapos ninyo nga basahon ang mga hitabo nga ginalaragway sa sining mga kapitulo, pwede ninyo nga hagaron ang mga kabataan nga isugid liwat ang mga istorya sa ila kaugalingon nga pulong. Ang mga miyembro sang pamilya mahimo nga magpaambit sang ila nabatyagan para sa Manluluwas tungod sang Iya pag-antos para sa aton.

Mateo 27:11–26; Marcos 15:1–15; Lucas 23:12–25; Juan 19:1–16.Ngaa gintugyan ni Pilato si Jesus sa paglansang, bisan pa nga nahibal-an niya nga inosente si Jesus? Ano nga mga leksyon ang aton matun-an sa eksperiyensya ni Pilato parte sa pagpangapin sang nahibal-an naton nga matuod? Mahimo nga makabulig sa imo pamilya ang pagdrama-drama sang mga eksena nga magatudlo sa ila nga pangapinan ang husto.

Mateo 27:46; Lucas 23:34, 43, 46; Juan 19:26–28, 30.Basi pwede mo tokahan ang kada miyembro sang pamilya nga basahon ang isa ukon madamo pa nga mga pahayag nga ginhimo sang Manluluwas sa krus, nga makita sa sining mga bersikulo. Pangabaya sila nga iistorya kon ano ang ila natun-an sa sining mga pahayag parte sa Manluluwas kag sa Iya misyon.

Marcos 15:39.Paano ang pagbasa sang parte sa Paglansang sa krus nagpabakod sang inyo testimonya nga si Jesus “Anak sang Dios”?

Juan 19:25–27.Ano ang aton matun-an sa sining mga bersikulo parte sa kon paano naton palanggaon kag suportahan ang mga miyembro sang pamilya?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga himno: “There Is a Green Hill Far Away [May Berdeng Bungyod sa Layo],” mga Himno kag mga Ambahanon sang Kabataan], no. 24.

Pagpauswag sang Aton Pagpanudlo

Sunda ang kabuhi sang Manluluwas. “Makabulig nga tun-an ang mga paagi nga nagpanudlo ang Manluluwas—ang pamaagi nga Iya gingamit kag ang mga butang nga Iya ginsiling. Pero ang gahum sang Manluluwas sa pagtudlo kag pagbulig sang iban nagahalin sa paagi nga Sia nagpangabuhi kag sa klase sang Iya pagkatawo. Kon mas matutom ka nga nagatinguha nga magkabuhi pareho kay Jesucristo, mas magadugang ang imo ikasarang nga magtudlo pareho sa Iya” (Teaching in the Savior’s Way, 13).

Si Cristo sa krus

Christ on the Cross [Si Cristo sa Krus], ni Carl Heinrich Bloch