Si Jesus nga nagapakighambal kay Pedro sa baybayon

Feed My Sheep [Pahalba ang Akon mga Carnero], ni Kamille Corry

Hunyo 26–Hulyo 2

Mateo 28; Marcos 16; Lucas 24; Juan 20–21

“Nabanhaw Sia”

Basaha sing mainampuon ang Mateo 28; Marcos 16; Lucas 24; kag Juan 20–21, nga ginapamensar ang kalipay nga imo naangkon tungod sang Pagkabanhaw ni Cristo. Sin-o ayhan ang mabugayan sa pagpamati sa imo testimonya parte sa sining hitabo?

Isulat Ang Imo Mga Panghunahuna

Sa madamo nga nagatan-aw, ang kamatayon ni Jesus sang Nazaret daw indi mapatihan nga katapusan sang isa ka indi kinaandan nga kabuhi. Indi bala ini ang tawo nga nagbangon kay Lazaro sa minatay? Indi bala Sia ining sulit-sulit nga naglikaw sa madamo nga mga pagpamahog nga patyon sang mga Fariseo? Nagpakita Sia sang gahum sa pagpang-ayo sang bulag, aruon, kag lupog. Bisan ang mga hangin kag kadagatan nagpati sa Iya. Pero ara Sia, nalansang sa krus, nga nagasiling, “Natapos na” (Juan 19:30). Ayhan may matuod-tuod nga kakibot sa nagapangyaguta nga mga tinaga “Sa iban nagluwas sia; sa iya kaugalingon indi sia makaluwas” (Mateo 27:42). Pero nahibal-an naton nga ang kamatayon ni Jesus indi ang katapusan sang istorya. Nakahibalo kita nga ang kalinong sang lulubngan temporaryo kag ang nagapangluwas nga buluhaton ni Cristo nagasugod pa lang. Nakita Sia karon indi “sa tunga sang mga patay” kundi upod sa mga buhi (Lucas 24:5). Ang Iya mga pinanudlo indi mapahipos, kay ang Iya tampad nga mga disipulo magawali sang ebanghelyo sa “tanan nga kapungsuran,” nga nagasalig sa Iya promisa nga Sia mangin “kaupod [nila] sa gihapon, tubtob sa katapusan sang [kalibutan]” (Mateo 28:19–20).

icon sang personal nga pagtuon

Mga Ideya para sa Personal nga Pagtuon sang Balaan nga Mga Kasulatan

Mateo 28; Marcos 16; Lucas 24; Juan 20

Si Jesucristo nabanhaw.

Sa sining mga dinalan, mabasa mo ang parte sa isa sa pinakaimportante nga mga hitabo sa kasaysayan sang katawhan: ang Pagkabanhaw ni Jesucristo. Sa imo pagbasa, ibutang ang imo kaugalingon sa lugar sang mga tawo nga nakasaksi sang mga hitabo nga nagapalibot sang Pagkabanhaw. Ano ang imo matun-an sa ila mga eksperiyensya?

Ano ang imo nabatyagan samtang imo ginabasa ang parte sa Pagkabanhaw sang Manluluwas? Hunahunaa kon ano ang nangin epekto sini sa imo—sa imo panulok sa kabuhi, sa imo mga relasyon, sa imo pagtuo kay Cristo, kag sa imo pagtuo sa iban pa nga mga kamatuoran sang ebanghelyo.

 

Lucas 24:13–35

Mahimo ko imbitahon ang Manluluwas nga “magpabilin sa [akon].”

Samtang imo ginabasa ang eksperiyensya sang duha ka nagalakat nga mga disipulo nga nakasugata sang nabanhaw nga Manluluwas, pangitaa ang mga pagpalareho sa imo mga eksperiyensya bilang sumulunod ni Cristo. Paano ka maglakat upod sa Iya karon kag imbitahon Sia nga “[mag]pabilin” anay? (Lucas 24:29). Paano mo mahibal-an ang Iya presensya sa imo kabuhi? Sa ano nga mga paagi nagpamatuod ang Balaan nga Espiritu sa imo sang pagkadiosnon ni Jesucristo?

 

Lucas 24:36–43; Juan 20

Ang pagkabanhaw amo ang permanente nga pag-upod liwat sang espiritu sa lawas.

Ang mga sinulatan parte sa Pagkabanhaw ni Jesucristo makabulig sa imo nga maintiendihan kon ano ang kahulugan sang mabanhaw. Halimbawa, ano nga mga kamatuoran ang imo makita sa Lucas 24:36–43 kag Juan 20 parte sa nabanhaw nga mga lawas? Pwede mo man basahon ang iban pa nga balaan nga mga kasulatan parte sa pagkabanhaw, pareho sang 1 Mga Taga-Corinto 15:35–44; Mga Taga-Filipos 3:20–21; 3 Nefi 11:13–15; Doktrina kag mga Kasugtanan 88:27–31; 110:2–3; 130:1, 22.

Juan 20:19–29

“Bulahan ang wala makakita kag walay sapayan nagatuo.”

May mga tawo nga nagabatyag pareho kay Tomas, nga nagsiling, “Kon indi ko makita … indi ako magtuo” (Juan 20:25). Sa imo opinyon, ngaa nga mangin bugay ang magpati bisan wala makakita? (tan-awa sa Juan 20:29). Binagbinaga kon paano ka ginbugayan sa pagpati sa mga butang nga indi mo makita. Ano ang nagabulig sa imo nga magtuo sa Manluluwas bisan pa nga indi mo Sia makita? Paano mo padayunon sa pagpabakod ang imo pagtuo “sa mga butang nga indi makita apang matuod”? (tan-awa sa Alma 32:16–21; Eter 12:6). Hunahunaa nga isulat sa isa ka journal ang mga eksperiyensya nga nagbulig sa imo nga magtuo kay Jesucristo, ukon isugid ang mga ini sa imo kakilala.

Juan 21:1–17

Ang Manluluwas nagaimbitar sa akon nga pahalbon ang Iya carnero.

Mahimo nga manami nga ikumparar ang inter-aksyon sang Manluluwas sa Iya mga Apostoles sa Juan 21 sa una nga tion nga ginsugo Niya sila nga ipapanaog ang ila mga pukot nga nasulat sa Lucas 5:1–11. Ano ang pagpalareho kag kinalain nga imo makita? Ano nga mga ihibalo parte sa pagkadisipulo ang imo makita?

Pamensara kon paano ang mga pulong sang Manluluwas kay Pedro sa Juan 21:15–17 madapat sa imo. May nagapugong bala sa imo sa pag-minister sa mga carnero sang Ginuo? Ano ang imo mangin sabat kon ang Ginuo mamangkot sa imo, “Ginahigugma mo bala ako?” Hunahunaa sing maayo kon paano mo ipakita ang imo pagpalangga sa Ginuo.

Tan-awa man sa 1 Pedro 5:2–4, 8.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Lucas 24:5–6.Si Pangulong Thomas S. Monson nagsiling parte sa Lucas 24:5–6, “Wala na sing tinaga sa bilog nga Cristohanon nga kalibutan nga mas makahulugan pa para sa akon” (“He Is Risen!,” Liahona, Mayo 2010, 89). Ano ang kahulugan sining mga tinaga para sa imo kag sa inyo pamilya?

Mateo 28; Marcos 16; Lucas 24; Juan 20–21.Samtang ginabasa sang imo pamilya ining mga kapitulo, tandai ang mga tawo nga nakigsimpon kay Jesus sa tagsa ka istorya. Halimbawa, ano ang inyo nanamian parte sa mga tawo nga nagbisita sa lulubngan sang Manluluwas? Ano ang inyo matun-an sa mga pulong kag aksyon sang mga Apostoles ukon sang mga disipulo sa dalanon pa-Emaus?

   Hambali ang parte sa kilala sang inyo pamilya nga napatay na, kag istoryahi kon paano nakadala sing kaumpawan ang mga kamatuoran sa sining mga bersikulo.

Si Jesus nga nagalakat upod ang duha ka tawo sa dalan

Road to Emmaus [Dalanon pa-Emaus], ni Wendy Keller

Mateo 28:16–20; Marcos 16:14–20; Lucas 24:44–53.Sa sining mga bersikulo, ano ang ginapangabay ni Jesus nga himuon sang Iya mga Apostoles? Paano kita makabulig sa pagtuman sining buluhaton? Pwede mag-istorya ang mga miyembro sang pamilya sang mga eksperiyensya sang nabatyagan nila nga “ang Ginuo nagpanghikot kaupod nila” agud matuman ang Iya mga katuyuan (Marcos 16:20).

Juan 21:15–17.Pamensara nga basahon ining mga bersikulo samtang nagakaon sing ululupod. Pwede ini maghatag sang dugang nga kahulugan sa mga pulong sang Manluluwas nga “pahalba ang akon mga carnero.” Base sa pinanudlo ni Jesus parte sa mga carnero sa Bag-ong Katipan (tan-awa, halimbawa, sa Mateo 9:35–36; 10:5–6; 25:31–46; Lucas 15:4–7; Juan 10:1–16), ngaa ang pagpahalab sang mga carnero isa ka maayo nga paagi agud ilaragway ang pag-atipan sa mga anak sang Dios? Ano ang ginatudlo sang paanggid parte sa nabatyagan sang Amay nga Langitnon kag ni Jesus para sa aton?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Personal nga Pagtuon

Maggamit sang musika para imbitahon ang Espiritu kag magtuon sang doktrina.  Ang pagpamati ukon pagkanta sang mga himno parte sa Manluluwas makaimbitar sang Espiritu kag makabulig sa imo nga magtuon parte sa Iya.

Babayi nga nakakita sang nabanhaw nga Cristo sa tupad sang lulubngan

The Resurrected Christ [Ang Nabanhaw nga Cristo], ni Walter Rane