Si Pablo nga nagatudlo sa bungyod

Hulyo 24–30

Mga Binuhatan 16–21

“Ang Ginuo Nagtawag sa Amon sa Pagwali sang Maayong Balita”

Samtang imo ginabasa ang parte sa mga pagpaninguha ni Pablo sa pagpangwali sang ebanghelyo, ang Espiritu mahimo nga magpabatyag sa imo sang mga panghunahuna ukon mga balatyagon. Isulat ang ining mga pagpabatyag, kag magplano nga aktuhan ang mga ini.

Isulat Ang Imo Mga Panghunahuna

Kaupod sa katapusan nga mga tinaga sang Ginuo sa Iya mga Apostoles amo ang sugo nga “Busa lakat kamo, kag magtudlo sa tanan nga nasyon, nga nagabunyag sa ila sa ngalan sang Amay, kag sang Anak, kag sang Espiritu Santo: nga nagapanudlo sa ila sa pagtuman sang tanan nga ginsugo ko sa inyo” (Mateo 28:19–20). Bisan pa nga ang mga Apostoles wala makalab-ot sa tanan nga mga nasyon, ginapakita sa Mga Binuhatan 16–21 nga si Pablo kag ang iya mga kaupod nakahimo matuod sang dako nga pag-uswag sa pagtukod sang Simbahan. Nagpanudlo sila, nagbunyag, kag naghatag sang dulot sang Balaan nga Espiritu. Naghikot sila sang mga milagro, bisan pa ang pagbangon sang isa ka tawo sa minatay, kag pagpropesiya sang Dako nga Apostasiya (Mga Binuhatan 20:7–12, 28–31). Kag ang buluhaton nga ila ginsugdan nagapadayon sa buhi nga mga Apostoles sa karon, upod sa matutom nga mga disipulo pareho sa imo, nga nagabulig tuman sang sugo sang Manluluwas sa pamaagi nga indi malab-ot sang pensar ni Pablo. Ayhan may kilala ka nga mga tawo nga wala makakilala sa ila Amay nga Langitnon ukon sang Iya ebanghelyo. Ayhan nakabatyag ka na nga ang imo “espiritu naghulag sa sulod [nimo]” sa pagpaambit sa ila sang imo nahibal-an parte sa Iya (Mga Binuhatan 17:16). Kon imo sundon ang ehemplo ni Pablo sang pagkamapainubuson kag kaisog sa pagpaambit sang ebanghelyo, mahimo ka nga makakita sang tawo nga “ang tagipusuon [gin]buksan sang Ginuo” (Mga Binuhatan 16:14).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mga Binuhatan 16–21

Ang Espiritu magagiya sa akon sa akon pagpaninguha nga ipaambit ang ebanghelyo.

Ang Propeta nga si Joseph Smith nagsiling, “Wala sing tawo nga makawali sang Ebanghelyo nga wala ang Balaan nga Espiritu” (Teachings of Presidents of the Church: Joseph Smith [2007], 332). Samtang imo ginabasa ang Mga Binuhatan 16–21, pamensara kon ngaa matuod ang pahayag sang Propeta. Tandai ang mga tion sang ang Espiritu nagbulig kay Pablo kag sa iya mga kaupod. Ano nga mga bugay ang nag-abot samtang ginasunod nila ang Espiritu? Sang san-o ka nakabatyag sang Espiritu nga nagapabatyag sa imo sa imo mga pagpaninguha nga ipaambit ang ebanghelyo?

Mga Binuhatan 16–21

Mahimo ko ipahayag ang ebanghelyo sa tanan nga sitwasyon.

Ang pagkapriso bangud sa pagpangwali sang ebanghelyo daw maintiendihan nga rason para mag-untat sa pagpangwali. Pero para sa ila ni Pablo kag Silas, nangin isa ini ka oportunidad para hayluhon ang bantay sa prisuhan (tan-awa sa Mga Binuhatan 16:16–34). Sa bilog nga Mga Binuhatan 16–21, magpangita sang iban pa nga mga halimbawa sang kahanda ni Pablo sa pagpamatuod sa tanan nga tawo. Ngaa sa banta mo tama sa iya ka isog kag wala sing kahadlok? Ano ang imo matun-an sa ehemplo ni Pablo?

May madamo pa gid nga mga mensahe parte sa pagpaambit sang ebanghelyo sa Mga Binuhatan 16–21. Samtang ginatun-an mo ining mga kapitulo, pangitaa ang pila nga mas nagakabagay gid sa imo.

Tan-awa man sa Dieter F. Uchtdorf, “Pang-misyonaryo nga Buluhaton: Pagpaambit sang Kon Ano nga Ara sa Imo Tagipusuon,” Liahona, Mayo 2019, 15–18.

lapsag nga ginakugos

Ang kada isa sa aton anak sang Dios.

Mga Binuhatan 17:16–34

“Kita mga kaliwat sang Dios.”

Sa Atenas, nakakita si Pablo sang katawhan nga may lainlain nga mga opinyon kag panan-aw sa relihiyon. Pirme sila nagapangita “nga makabati sang bag-o nga butang,” kag ang itanyag ni Pablo sigurado gid nga bag-o sa ila (tan-awa sa Mga Binuhatan 17:19–21 Nagasimba sila sa madamo nga dios-dios, lakip na ang isa nga ila ginatawag “ang Dios nga wala makilal-i” (Mga Binuhatan 17:23), pero nagapati sila nga ang mga dios-dios mga gahum ukon pwersa, indi buhi, personal nga mga tinuga, kag siyempre indi ang aton Amay. Binagbinaga ang ginsiling ni Pablo sa ila agud buligan sila nga makilala ang Dios. Ano ang kahulugan sa imo sang mangin “kaliwat sang Dios”? Mga Binuhatan 17:29). Sa imo opinyon, ano ang kinalain sang mangin anak sang Dios sa mangin isa lang sang Iya mga tinuga? Paano makaimpluwensya ang pag-intiendi sining kamatuoran sa imo pagkabig sa imo kaugalingon kag sa iban?

Kon nagatindog ka sa tupad ni Pablo samtang nagapamatuod sia, ano ayhan ang imo nahambal sa dumaan nga mga Griyego parte sa aton Amay nga Langitnon? May kilala ka bala nga makabenepisyo sa pagpamati sang imo panaksihon?

Tan-awa man sa Mga Taga-Roma 8:16; 1 Juan 5:2.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Binuhatan 16–21.Agud padalumon ang paghangop sang imo pamilya sang Mga Binuhatan 16–21, pwede ninyo nga tun-an ang mapa sa katapusan sining outline, nga ginapangita ang mga siyudad kon diin si Pablo nagwali sang ebanghelyo sa sining mga kapitulo. Ano nga mga pamaagi ang ara sa aton karon nga makabulig sa pagdala sang ebanghelyo sa tanan nga nasyon?

Mga Binuhatan 17:10–12; 18:24–28.Paano kita mangin mas pareho sa mga Santos sa sining mga bersikulo? Ano ayhan ang buot silingon sang “[batunon] ang pulong sing hanuot”? (Mga Binuhatan 17:11). Ano ang pwede naton himuon para mangin “gamhanan sa mga kasulatan”? (Mga Binuhatan 18:24).

Mga Binuhatan 19:1–7.Ining mga bersikuko makabulig sa inyo pamilya nga makahambalanay parte sa importansya sang mabunyagan kag makumpirmahan. Para mas maintiendihan ang mga kamatuoran sa Mga Binuhatan 19:1–7, pwede ninyo hambalan ang pila ka butang nga wala sing pulos kon wala sing upod, pareho sang cell phone nga wala sing baterya. Ukon pwede mo ipaambit ining pinanudlo halin kay Propetang Joseph Smith: “Ang bunyag paagi sa tubig katunga lamang sang bunyag, kag wala ini sing kapuslanan kon wala ang katunga sini—nga amo ang, bunyag sang Balaan nga Espiritu” (Teachings: Joseph Smith, 95). Ngaa ang bunyag “wala sing kapuslanan” kon wala ang pagbaton sang dulot sang Balaan nga Espiritu? (tan-awa sa 3 Nefi 27:19–20; Moises 6:59–61).

Mga Binuhatan 19:18–20.Samtang inyo ginabasa ang Mga Binuhatan 19:18–20, pat-ini ang balor sang mga propiyedad nga handa bayaan sang mga tawo para batunon ang ebanghelyo (tan-awa sa bersikulo 19). May dutan-on nga mga pagkabutang ukon ginahimo bala kita nga kinahanglan naton untatan para makabaton sang langitnon nga mga bugay?

Mga Binuhatan 20:32–35.Sang san-o naeksperiyensyahan sang imo pamilya ang pinanudlo ni Cristo nga “Bulahan pa ang paghatag sangsa pagbaton”? (Mga Binuhatan 20:35). May tawo bala nga makabenepisyo sang serbisyo, oras, ukon regalo nga pwede ihatag sang imo pamilya? Bilang pamilya, hambali ang pila sa mga ideya kag maghimo sing plano para magserbisyo sa isa ka tawo. Ano ang aton mabatyagan kon nagaserbisyo kita sa iban? Ngaa bulahan ang paghatag sangsa pagbaton?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Ako Anak sang Dios,” Mga Himno kag mga Ambahanon sang Kabataan, 58.

Pagpauswag sang Personal nga Pagtuon

Isulat ang mga panghunahuna. “Kon imo ginasulat ang espirituhanon nga mga pagpabatyag, ginapakita mo sa Ginuo nga importante sa imo ang Iya giya, kag bugayan ka Niya sang mas pirme nga rebelasyon” (Teaching in the Savior’s Way, 12; tan-awa man sa pahina 30).

mapa sang pang-misyonaryo nga mga biyahe ni Pablo

Ang pang-misyonaryo nga mga biyahe ni Apostoles Pablo.