Si Pablo sa prisohan

Hulyo 31–Agosto 6

Mga Binuhatan 22–28

“Manug-alagad kag Manugsaksi”

Ang mga pagpabatyag sang Balaan nga Espiritu masami malinong kag kon kaisa nagalabay lang. Ang pagsulat sang imo mga panghunahuna nagatugot sa imo nga padaluman ini sang imo pensar. Samtang imo ginabasa ang Mga Binuhatan 22–28, isulat ang mga panghunahuna kag balatyagon nga nagaabot sa imo, kag hatagi sang tiyempo nga pamensaron ang mga ini.

Isulat Ang Imo Mga Panghunahuna

“Kon yara kita sa buluhaton sang Ginuo,” ginpromisa ni Pangulong Thomas S. Monson, “may kinamatarong kita sa bulig sang Ginuo” (To Learn, to Do, to Be,”,” Liahona, Nob. 2008, 62). Ugaling wala kita sang kinamatarong sa kabuhi nga wala sing mga pagtilaw kag may wala untat nga mga kadalag-an. Bilang pruweba sini, indi na naton kinahanglan magtulok sang malayo pa sangsa kay Pablo nga Apostoles. Ang iya buluhaton halin sa Manluluwas amo ang “pagdala sang akon ngalan sa atubangan sang mga Gentil kag mga hari kag sa mga anak sang Israel” (Mga Binuhatan 9:15). Sa mga kapitulo 22–28 sang Mga Binuhatan, makita naton si Pablo nga ginatuman ining buluhaton kag nagapangatubang sang dako nga oposisyon—mga kadena, pagkapriso, pisikal nga pagpang-abuso, pagkalunod sang barko, kag bisan pa gani pag-atake sang man-og. Pero makita man naton nga si Jesus “nagtupad sa iya, kag nagsiling, Magpakaisog ka, Pablo” (Mga Binuhatan 23:11). Ang mga eksperiyensya ni Pablo mga makainspirar nga pahanumdom nga ang tawag sang Ginuo sa “pagpahayag sang [Iya] ebanghelyo nga may tunog sang pagsinadya” may upod sining promisa: “Ibayaw ang inyo mga tagipusuon kag magkalipay kay yara ako sa tunga ninyo” (Doktrina kag mga Kasugtanan 29:4–5; tan-awa man sa Mateo 28:19–20).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mga Binuhatan 22:1–21; 26:1–29

Ang mga disipulo ni Jesucristo nagapaambit sang ila mga panaksihon sing maisog.

Sang si Pablo naghatag sang mabaskog nga mga panaksihon nga nasulat sa Mga Binuhatan 22 kag 26, priso sia sadto sang mga soldado nga Romano. Ang mga tawo nga nakahambal niya may gahum nga sentensyahan sia sang kamatayon. Pero ginpili niya nga maisog nga magsaksi kay Jesucristo kag sang “langitnon nga palanan-awon” (Mga Binuhatan 26:19) nga iya nabaton. Ano ang nagainspirar sa imo sa iya mga pulong? Pamensara ang imo mga oportunidad sa pagpaambit sang imo panaksihon. Halimbawa, nakahibalo bala ang imo kaabyanan parte sa imo nabatyagan parte kay Jesucristo? Ukon sang san-o ang pinakaulihi nga tion nga ginsugid mo sa imo pamilya kon paano mo naangkon ang imo testimonya sang ebanghelyo?

Sang ginyaguta ang lamharon nga si Joseph Smith tungod sa pagsugid sang iya Unang Panan-awon, nainspirar sia sa paagi nga nagpamatuod si Pablo parte sa iya panan-awon (tan-awa sa Joseph Smith—Kasaysayan 1:24–25). Paano mo palip-uton ang natun-an ni Joseph Smith kay Pablo? Ano ang imo matun-an sa sining duha ka mga saksi ni Jesucristo?

Mga Binuhatan 23:10–11; 27:13–25, 40–44

Ang Ginuo nagatindog sa tupad sang mga nagatinguha nga magserbisyo sa Iya.

Pareho sa maathag nga ginpakita sang pag-alagad ni Pablo, ang mga kabudlayan sa aton mga kabuhi indi tanda nga ang Dios wala nalipay sa aton ukon sa aton ginahimo. Ang matuod, kon kaisa sa tion sang mga kabudlayan nga mas mabaskog naton nga mabatyagan ang Iya suporta. Manami nga rebyuhon ang imo nabasa sang nagligad lang parte sa pagpangalagad ni Pablo kag ilista ang pila sa mga butang nga iya ginbatas (tan-awa, halimbawa, sa Mga Binuhatan 14:19–20; 16:19–27; 21:31–34; 23:10–11; 27:13–25, 40–44). Paano ang Ginuo nagtindog sa iya tupad? Paano Sia nagtindog sa tupad nimo?

Mga Binuhatan 24:24–27; 26:1–3, 24–29; 27

May kahilwayan sa katalagman kag paghidaet sa pagpamati sa mga pulong sang mga alagad sang Dios.

Sa bilog niya nga pagpangalagad, si Pablo naghatag sang mabaskog nga testimonya parte kay Jesucristo kag sa Iya ebanghelyo. Madamo nga mga tawo ang nagbaton sang iya pamatuod, pero indi tanan nagbaton. Samtang imo ginabasa ang Mga Binuhatan 24:24–27 kag Mga Binuhatan 26:1–3, 24–29, pangitaa ang mga tinaga kag mga dinalan nga nagapakita kon ano ang nangin reaksyon sang mga tagdumala nga Romanhon sa Judea sa mga pinanudlo ni Pablo:

• Felix

• Festo

• Haring Agripa

Samtang nagapanakayon pakadto sa Roma para mangatubang kay Cesar, si Pablo nagpropesiya nga ang “kasamaran kag dako nga kadulaan” magaabot sa barko kag sa mga pasahero sini (Mga Binuhatan 27:10). Basaha ang kapitulo 27 para mahibal-an kon ano ang nangin reaksyon sang mga kaupod ni Pablo sa barko sa iya mga paandam. May nakita ka bala nga mga leksyon para sa imo kaugalingon halin sa ila eksperiyensya?

Nangin pareho man bala sining mga tawo ang imo reaksyon sang mabatian mo ang mga panudlo sang mga lider sang Simbahan? Ano ang pila sa posible nga mga konsikwensya sang pag-akto sa sini nga mga paagi? Ano ang imo matun-an sa sining duha ka mga istorya parte sa pagpati sa laygay sang Ginuo paagi sa Iya mga alagad?

Tan-awa man sa 2 Nefi 33:1–2; “Follow the Living Prophet,” Teachings of Presidents of the Church: Ezra Taft Benson (2014), 147–55.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Binuhatan 24:16.Antes sang iya pagbag-o, si Pablo may malawig nga kasaysayan sang kasal-anan sa Dios. Pero tungod kay handa sia nga maghinulsol, nakahambal sia nga, “Gani ginahimulatan ko pirme nga magmatinlo ang akon konsensya sa atubang sang Dios, kag sang mga tawo” (tan-awa man sa Doktrina kag mga Kasugtanan 135:4–5). Paano naton tinluan ang aton konsensya sa mga kasal-anan sa Dios kag sa iban?

Mga Binuhatan 26:16–18.Sa sining mga bersikulo, ano ang ginsugo sang Ginuo nga himuon ni Pablo? Ano ang mga oportunidad nga ara sa aton sa paghimo sang pareho nga mga butang?

Mga Binuhatan 28:1–9.May ara bala sa imo pamilya nga nanamian sang man-og? Pwede mo pangabayon ina nga tawo ukon ang isa pa ka miyembro sang pamilya sa pagsugid sang mga istorya nga makita sa Mga Binuhatan 28:1–9. Mahimo nga masadyahan ang imo kabataan sa pagdrowing sang mga litrato sining mga istorya ukon sa pagdrama-drama sang mga ini. Ano nga mga leksyon ang matun-an naton sa sini nga mga istorya? Ang isa pwede nga ang Ginuo nagatuman sang Iya mga promisa sa Iya mga alagad. Halimbawa, pwede mo ikumparar ang mga promisa nga ginhimo sa Marcos 16:18 sa mga katumanan sini sa eksperiyensya ni Pablo. Pwede ka man magpangita sa pamulong-pulong sa bag-o lang nga pangkabilugan nga komperensya sang promisa nga ginhimo sang isa sa mga alagad sang Ginuo—ayhan ang isa nga makahulugan para sa imo pamilya—kag i-display ini sa inyo puluy-an. Paano naton ipakita ang aton pagtuo nga ining promisa matuman?

dalitan nga man-og

Ginprotektahan sang Dios si Pablo sang ginkagat sia sang dalitan nga man-og.

Mga Binuhatan 28:22–24.Pareho sang Simbahan sa panahon ni Pablo (ginatawag nga bunghay ukon “sekta” sa bersikulo 22), ang Simbahan sa karon masami nga “ginapakalain.” Sang ginpakalain sang mga tawo ang Manluluwas kag ang Iya Simbahan, ano ang ginhimo ni Pablo? Ano ang aton matun-an sa eksperiyensya ni Pablo?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga himno: “We Thank Thee, O God, for a Prophet [Salamat, O Dios sa Manalagna],” Mga Himno kag mga Ambahanon sang Kabataan], no. 36.

Pagpauswag sang Aton Pagpanudlo

Magtutok sa mga prinsipyo nga magabugay sa imo pamilya. Samtang imo ginatun-an ang balaan nga mga kasulatan, pamangkuta ang imo kaugalingon, “Ano ang makita ko diri nga mangin makahulugan gid sa akon pamilya?” (Tan-awa sa Teaching in the Savior’s Way, 17.)

Si Pablo sa atubang ni Haring Agripa

Si Pablo sa atubang ni Haring Agripa. Valiant in the Testimony of Jesus Christ [Maisog sa Testimonya kay Jesucristo], ni Daniel A. Lewis