“Agosto 14–20. Mga Taga-Roma 7–16: ‘Dag-a ang Malain Paagi sa Maayo,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)
“Agosto 14–20. Mga Taga-Roma 7–16,” Dali, Magsunod sa Akon—Para sa Mga Indibidwal kag Mga Pamilya: 2023
Agosto 14–20
Mga Taga-Roma 7–16
“Dag-a ang Malain Paagi sa Maayo”
Pila lang ka mga prinsipyo sang ebanghelyo sa Mga Taga-Roma 7–16 ang pwede ilakip sa sining outline, gani indi paglimitahi ang imo kaugalingon sa kon ano ang ginahambalan diri. Hatagi sing atensyon ang mga inspirasyon nga imo mabaton samtang ikaw nagatuon.
Isulat Ang Imo Mga Panghunahuna
Sang iya ginsugdan ang iya sulat sa mga taga-Roma, gintamyaw ni Pablo ang mga miyembro sang simbahan paagi sa pagtawag sa ila nga “hinigugma sang Dios” nga “ginatawag nga mga [santos].” Ginsiling niya nga ang ila “pagtuo [gin]bantala sa bug-os nga kalibutan” ( Upod inang gahum, ang nagatubos nga gahum sang Manluluwas, sarang naton “madaog ang malain”—ang kalainan sa kalibutan kag ang kalainan sa aton kaugalingon—“paagi sa maayo” (Mga Taga-Roma 12:21).
Mga Ideya para sa Personal nga Pagtuon sang Balaan nga mga Kasulatan
Ang mga nagasunod sa Espiritu sarang nga mangin “masigkamanunubli ni Cristo.”
Bisan pagkatapos nga magsulod sa “bag-ong pagkabuhi” paagi sa ordinansa sang bunyag (Mga Taga-Roma 6:4), siguro nakabatyag ka sang pagkontrahanay sa sulod nga ginlaragway ni Pablo sa Mga Taga-Roma 7—ang “pag-ilinaway” sa tunga sang kinaugali nga tawo kag sang imo matarong nga mga handum (Mga Taga-Roma 7:23). Pero naghambal man si Pablo parte sa paglaum sa Mga Taga-Roma 8:23–25. Ano nga mga rason para sa sining paglaum ang imo makita sa kapitulo 8? Mahimo ka man magpangita sang mga bugay nga nagaabot bangud nga ang “Espiritu sang Dios nagapuyo sa imo” (Mga Taga-Roma 8:9). Paano mo pangitaon sing mas lubos ang pagpakig-upod sang Balaan nga Espiritu sa imo kabuhi?
Ang dulot sang wala katapusan nga himaya mas dako pa sangsa akon mga pagtilaw sa duta.
Pila lang ka tuig pagkatapos nga ginpadala ni Pablo ining sulat, ang mga Santos sa Roma nag-antos sang indi mahunahuna nga mga pagpamigos. Ano ang imo makita sa Mga Taga-Roma 8:17–39 nga mahimo nakabulig sining mga Santos sang nag-abot ang pagpamigos? Paano ayhan magamit ining mga tinaga sa imo kag sa mga pagtilaw nga imo karon ginaatubang?
Pangitaa ang mga koneksyon sa tunga sining mga bersikulo kag sa sining laygay halin kay Sister Linda S. Reeves: “Wala ako makahibalo kon ngaa madamo kita kaayo sang mga pagtilaw, pero personal ko nga balatyagon nga ang padya tama kadako, tama ka wala katapusan kag dayon, tama ka makalilipay kag masobra pa sa aton pag-intiendi nga sa sinang adlaw sang pagpadya, mahimo nga makabatyag kita nga isiling sa aton maluluy-on, mapinalanggaon nga Amay, ‘Amo lang bala ato tanan ang kinahanglan himuon?’ Nagapati ako nga kon aton panumdumon kag kilalahon sa adlaw-adlaw ang kadalumon sang pagpalangga sang aton Amay nga Langitnon kag sang aton Manluluwas, pagahimuon naton ang tanan para makabalik sa Ila presensya, nga ginapalibutan sang Ila pagpalangga sa wala katapusan. Ano gid ang bili … sang aton mga gin-antos diri kon, sa ulihi, yadtong mga pagtilaw amo ang mga butang nga magtugot sa aton nga magbaton sang kabuhi nga wala katapusan kag sang pagkahitaas sa ginharian sang Dios upod sa aton Amay kag Manluluwas?” “Worthy of Our Promised Blessings,” Liahona, Nob. 2015, 11). Desisyuni kon ano ang imo himuon para “dumdumon kag kilalahon sa adlaw-adlaw” ang pagpalangga sang Dios sa imo.
Ano ang buot silingon ni Pablo sang “gintangdo na nga daan,” “pagpili,” kag “ginkilala na nga daan”?
Gingamit ni Pablo ang mga termino nga “gintangdo na nga daan,” “pagpili,” kag “ginkilala na nga daan” para magtudlo nga antes sining kabuhi, ginpili sang Dios ang pila sa Iya mga anak nga mangin bahin sang Israel, ang Iya katawhan sa kasugtanan. Nagakahulugan ini nga magabaton sila sang espesyal nga mga bugay kag katungdanan agud ila mabugayan ang tanan nga nasyon sang kalibutan. Ugaling, ginhatagan importansya ni Pablo sa Mga Taga-Roma 9–11 nga ang tanan nga anak sang Dios sarang nga mangin Iya katawhan sa kasugtanan, kag kita tanan magabaton sang kabuhi nga wala katapusan sa pareho nga paagi—paagi sa pagtuo kay Jesucristo kag pagtuman sang Iya mga kasuguan.
Tan-awa man sa Mga Taga-Efeso 1:3–4; 1 Peter 1:2; Alma 13:1–5.
Si Pablo nagaimbitar sa akon nga mangin matuod nga Santos kag sumulunod ni Jesucristo.
Ang katapusan nga lima ka kapitulo sang Mga Taga-Roma nagaunod sang dinosena ka partikular nga mga panulin parte sa pagpangabuhi bilang mga Santos. Isa ka paagi para tun-an ining mga panulin amo ang pagpangita sang mga topiko nga ginasulit. Paano mo palip-uton ang laygay ni Pablo?
Mahimo nga indi mo mapangabuhi ining tanan nga laygay sa gilayon, pero ang Espiritu makabulig sa imo nga makakita sang isa ukon duha ka prinsipyo nga pwede mo sugdan subong. Ihambal ang imo mga handum sa imo Amay nga Langitnon sa pangamuyo, kag magpangayo sang Iya bulig.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Mga Taga-Roma 8:31–39.Ano ang aton makita sa Mga Taga-Roma 8:31–39 nga nagatudlo kon ano ang nabatyagan sang Amay nga Langitnon kag ni Jesus tuhoy sa aton? Sang san-o naton nabatyagan ang gugma sang Dios?
Para ipaathag ang mga bersikulo 38–39, pwede nga magpangita ang mga miyembro sang pamilya sang mga halimbawa sang mga butang nga, pareho sa aton kag sa gugma sang Dios, indi mahimo nga bulagon.
Si Elder Wilford W. Andersen nagtudlo, “Ang musika sang ebanghelyo [isa] ka makalilipay nga espirituhanon nga pamatyagan.”
-
Mga Taga-Roma 9:31–32.Ang mensahe ni Elder Wilford W. Andersen nga “Ang Musika sang Ebanghelyo” (Liahona, Mayo 2015, 54–56); ChurchofJesusChrist.org) makabulig sa pagpaathag sang ginatudlo ni Pablo parte sa layi, mga binuhatan, kag pagtuo. Pagkatapos nga hambalan ang iya pamulong-pulong, pwede nga tilawan sang imo pamilya ang magsaot nga may ara kag wala sang musika. Paano makabulig sa aton ang pagtuo nga maeksperiyensyahan ang kalipay sang ebanghelyo?
-
Mga Taga-Roma 10:17.Ngalani ang pila ka baso sang tubig sang mga ginhalinan sang pulong sang Dios (pareho sang balaan nga mga kasulatan, personal nga rebelasyon, kag pangkabilogan nga komperensya). Hambali kon paano ang pulong sang Dios nagapadako sang aton pagtuo samtang ginaula mo ang tagsa ka baso sa suludlan nga may marka nga “Pagtuo.”
-
Mga Taga-Roma 12.Ano ang kahulugan sang himuon ang aton mga kaugalingon nga “halad nga buhi, balaan, kag ginakahamut-an sang Dios”? (bersikulo 1).
-
Mga Taga-Roma 14:13–21.Mahimo nga makabenepisyo ang imo pamilya sa pagtuon sang laygay ni Pablo parte sa paghusga kag pagpakigbais parte sa personal nga pagpili. Ayhan pwede ninyo hambalan ang nagakabagay nga himuon agud sabton kon ang iban nga tawo, lakip na ang mga miyembro sang pamilya, nagahimo sang mga pagpili nga lain sangsa imo. Paano naton “tinguhaon ang mga butang nga nagadala sing paghidaet”? (bersikulo 19).
Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.
Ginapanugyan nga kanta: “I Know My Father Lives [Buhi ang Amay Ko],” Mga Himno kag mga Ambahanon sang Kabataan, 59.
Pagpauswag sang Aton Pagpanudlo
Tugoti ang kabataan nga ipakita ang ila pagkamatugahon. “Kon inyo imbitaron ang kabataan nga maghimo sang isa ka butang nga may relasyon sa isa ka prinsipyo sang ebanghelyo, ginabuligan ninyo sila nga mas maintiendihan ang prinsipyo. … Tugoti sila nga magpatindog, magdrowing, magkolor, magsulat, kag maghimo” (Teaching in the Savior’s Way, 25).
Abide with Me [Updi Ako], ni Del Parson