Corinth, Southern Greece, the Forum and Civic Center [Corinto, Bagatnan nga Greece, ang Forum kag Civic Center], dibuho ni Balage Balogh/www.ArchaeologyIllustrated.com

Agosto 21–27

1 Mga Taga-Corinto 1–7

“Mag-isa Kamo”

Isulat ang imo mga panghunahuna samtang imo ginabasa ang 1 Mga Taga-Corinto 1–7. Ining mga panghunahuna mahimo nga maglakip sang pagpabatyag nga tun-an sing dugang pa ang isa ka ideya, iistorya sa iban ang imo natun-an, ukon maghimo sang mga pagbag-o sa imo kabuhi.

Isulat Ang Imo Mga Panghunahuna

Sa binulan nga nagtiner si Pablo sa Corinto, “madamo sang mga taga-Corinto nga nakabati [sa iya] nagtuo kag ginbunyagan” (Mga Binuhatan 18:8). Gani siguro masakit para kay Pablo ang mabatian, nga pila lang ka tuig ang nagligad, may mga “pagbinahinbahin” kag “pagsinuay” sa mga Santos sa Corinto kag sang wala sia nagsugod sila sa pagpamati sa “kaalam sang kalibutan” (1 Mga Taga-Corinto 1:10–11, 20). Bilang sabat, naghimo si Pablo sang sulat nga aton ginatawag sa karon nga 1 Mga Taga-Corinto. Puno ini sang madalom nga doktrina, kag sa amo man, daw nadismaya si Pablo nga ang mga Santos indi pa handa sa pagbaton sang tanan nga doktrina nga gusto niya ihatag sa ila. “Ako, mga kauturan, indi makahambal sa inyo subong nga espirituhanon nga mga tawo,” panghayhay niya, “kay mga lawasnon pa kamo” (1 Mga Taga-Corinto 3:1–3). Sa aton pagpanghanda sa pagbasa sang mga pulong ni Pablo, mahimo nga makabulig ang pagtan-aw sang aton kaugalingon nga kahanda sa pagbaton sang kamatuoran—lakip na ang aton kahanda sa pagsunod sa Espiritu kag pagtinguha nga makig-isa sa aton mga pamilya, sa aton isigka-Santos, kag sa Dios.

Mga Ideya para sa Personal nga Pagtuon sang Balaan nga Mga Kasulatan

1 Mga Taga-Corinto 1:10–17; 3:1–11

Ang mga miyembro sang Simbahan ni Cristo nagatinguha nga mag-isa.

Wala kita makahibalo sang tanan nga detalye parte sa kakulang sang pag-isa sa tunga sang mga Santos sa Corinto, pero nakahibalo kita parte sa kakulang sang pag-isa sa aton kaugalingon nga mga kaangtanan. Pamensara ang isa ka relasyon sa imo kabuhi nga mahimo nga makabenepisyo sa mas dako nga paghiliusa; dayon pangitaa kon ano ang gintudlo ni Pablo sa 1 Mga Taga-Corinto 1:10–17; 3:1–11 parte sa kakulang sang pag-isa sa mga Santos sa Corinto. Ano nga mga ideya ang imo maagom parte sa pagpatubo sang mas dako nga paghiliusa sa iban?

Tan-awa man sa Mosias 18:21; 4 Nefi 1:15–17; Doktrina kag mga Kasugtanan 38:23–27; 105:1–5.

1 Mga Taga-Corinto 1:17–31; 2

Agud matuman ang buluhaton sang Dios, kinahanglan ko sang kaalam sang Dios.

Bisan nga maayo—ginapaisog pa gani—ang pagpangita sang kaalam sa bisan diin nga pwede ini makita (tan-awa sa 2 Nefi 9:29; Doktrina kag mga Kasugtanan 88:118), si Pablo naghatag sang mabug-at nga mga paandam parte sa kakulangan sang kaalam sang tawo, nga iya gintawag nga “kaalam sang kalibutan.” Samtang imo ginabasa ang 1 Mga Taga-Corinto 1:17–25, pamensara sing maayo kon ano ayhan ang kahulugan sining dinalan. Ano sa banta mo ang buot silingon ni Pablo sang “kaalam sang kalibutan”? Ngaa kinahanglan naton sang kaalam sang Dios para matuman ang buluhaton sang Dios?

Sa imo mga pagpaninguha nga himuon ang imo mga responsibilidad sa pagtuman sang buluhaton sang Dios, nakaeksperiyensya ka na bala sang “kahadlok, kag … sa dakong pagkurog” nga nabatyagan ni Pablo sang nagpanudlo sia sa mga Santos sang Corinto? (1 Mga Taga-Corinto 2:3). Ano ang makita mo sa 1 Mga Taga-Corinto 2:1–5 nga nagahatag sa imo sang kaisog? Pamensara kon paano mo ipakita nga mas nagasalig ka sa “gahum sang Dios” sangsa “kaalam sang mga tawo.”

Tan-awa man sa Doktrina kag mga Kasugtanan 1:17–28.

1 Mga Taga-Corinto 2:9–16

Kinahanglan ko ang Balaan nga Espiritu para maintiendihan ang mga butang sang Dios.

Kon gusto mo nga makahibalo pa parte sa isa ka butang pareho sang pagpangay-o sang salakyan ukon sinang-una nga arkitektura, paano mo ina himuon? Suno sa 1 Mga Taga-Corinto 2:9–16, paano ang pagtuon sang “mga butang sang Dios” lain sangsa pagtuon sang “mga butang sang tawo”? Ngaa nga dapat ara sa aton ang Balaan nga Espiritu para maintiendihan ang mga butang sang Dios? Matapos nga basahon ining mga bersikulo, ano ang imo nabatyagan nga dapat mo himuon para mas maintiendihan ang espirituhanon nga mga butang? Paano ayhan makabulig ang mga pulong ni Pablo sa tawo nga ginabudlayan sa iya panaksihon?

1 Mga Taga-Corinto 6:13–20

Ang akon lawas sagrado.

Pamatyag sang kadam-an sang mga tawo sa Corinto ang sekswal nga imoralidad mabaton kag ang ila mga lawas ginhimo para gid sa pagpangalipay. Sa iban nga pulong, ang Corinto indi lain sangsa kalibutan sa karon. Ano ang ginatudlo ni Pablo sa 1 Mga Taga-Corinto 6:13–20 nga makabulig sa imo paathag sa iban kon ngaa gusto mo nga mangabuhi nga matinlo?

   

1 Mga Taga-Corinto 7:29–33

Gintudlo bala ni Pablo nga mas maayo pa nga indi magpakasal sangsa magpakasal?

Pila ka mga bersikulo sa 1 Mga Taga-Corinto 7 ang daw nagapanugyan nga bisan mabaton ang pagpakasal, ang magpabilin nga indi kasado kag lubos nga maglikaw sa sekswal nga relasyon mas ginapaboran. Ugaling, ang Paglubad ni Joseph Smith sang 1 Mga Taga-Corinto 7:29–33 nagabulig sa aton nga maintiendihan nga ang ginatumod ni Pablo amo ang mga gintawag nga mangin full-time nga mga misyonero, nga nagasiling nga makaserbisyo sila sa Dios sing mas maayo kon magpabilin sila nga solo-lawas sa tion sang ila mga misyon. Ang Ginuo nagpanudlo paagi sa Iya mga alagad, lakip na kay Pablo, nga ang kasal kabahin sang Iya wala katapusan nga plano kag kinahanglanon para sa pagkahitaas (tan-awa sa 1 Mga Taga-Corinto 11:11; Doktrina kag mga Kasugtanan 131:1–4).

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

1 Mga Taga-Corinto 1:10–17; 3:1–11.Samtang ginabasa sang mga miyembro sang imo pamilya ining mga bersikulo, imbitara sila nga magpangita sang ideya nga makabulig sa ila nga mas mag-isa.

1 Mga Taga-Corinto 3:1–2.Basi pwede ninyo basahon ining mga bersikulo samtang nagainom sang gatas kag nagakaon sang karne. Pwede ninyo ikumparar ang pagdako sang mga lapsag sa hamtong nga mga tawo sa paagi nga nagadako kita sa espirituhanon.

1 Mga Taga-Corinto 3:4–9.Ginkumparar ni Pablo ang iya pang-misyonaryo nga mga pagpangabudlay sa pagtanom sang binhi. Ano ang ginatudlo sang iya pagpaanggid sa aton parte sa pagpaambit sang ebanghelyo?

1 Mga Taga-Corinto 6:19–20.Ang pagpaanggid sang aton mga lawas sa mga templo, pareho sa ginhimo ni Pablo, isa ka epektibo nga paagi sa pagtudlo parte sa kasagrado sang aton mga lawas. Ayhan pwede ka magpakita sang litrato sang mga templo, pareho sa nalakip sa sining outline. Ngaa sagrado ang mga templo? Sa ano ang aton mga lawas pareho sa mga templo? Ano ang pwede naton himuon para tratuhon ang aton mga lawas nga pareho sang mga templo?  

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “The Lord Gave Me a Temple [Ang Ginuo Naghatag sang Templo],” Mga Himno kag mga Ambahanon sang Kabataan, 62.

Pagpauswag sang Personal nga Pagtuon

Magmangin pasensyoso sa imo kaugalingon. Gintudlo ni Pablo nga ang gatas mas nauna sangsa karne kon nagatuon kita sang ebanghelyo (tan-awa sa 1 Mga Taga-Corinto 3:1–2). Kon sa banta mo ang pila sa mga doktrina mabudlay intiendihon sa karon, magmangin pasensyoso. Magsalig nga ang mga sabat magaabot samtang ikaw may pagtuo kag nagatuon sing matutom.

Ginkumparar ni Pablo ang aton mga lawas sa kasagrado sang templo. Patuo halin sa naibabaw nga wala: Templo sang Tijuana Mexico, Templo sang Taipei Taiwan, Templo sang Tegucigalpa Honduras, Templo sang Houston Texas.