Si Pablo nga nagahimo sang sulat

Agosto 7–13

Mga Taga-Roma 1–6

“Ang Gahum sang Dios sa Kaluwasan”

Ang pagsulat sang mga pagpabatyag makabulig sa imo nga madumduman ang ginatudlo sang Espiritu sa imo. Pamensara man nga isulat ang imo balatyagon parte sa sining mga pagpabatyag.

Isulat Ang Imo Mga Panghunahuna

Sang tion nga ginahimo ni Pablo ang iya sulat sa mga miyembro sang Simbahan sa Roma, nga samo-samo nga grupo sang mga Judio kag mga Gentil, ang Simbahan ni Jesucristo mas dako na sangsa gamay nga grupo sang mga tumuluo sa Galilea. Mga 20 ka tuig pagkatapos sang Pagkabanhaw sang Manluluwas, may mga kongregasyon na sang mga Cristohanon sa halos tanan nga lugar nga sarang kadtuan sang mga Apostoles—lakip na sa Roma, ang kapitolyo sang gamhanan nga imperyo. Sa gihapon, kon ikumparar sa kadakuon sang imperyo sang Roma, ang Simbahan gamay kag masami ginapuntirya sang pagpamigos. Sa sini nga kahimtangan, ang iban mahimo nga nakabatyag sing “kahuya tungod sa ebanghelyo ni Cristo”—pero, siyempre, magluwas kay Pablo. Nakahibalo sia kag nagpamatuod nga ang matuod nga gahum, “ang gahum sang Dios sa kaluwasan,” makita sa ebanghelyo ni Jesucristo (Mga Taga-Roma 1:16).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Ano ang mga Epistle, kag paano ini ginplastar?

Ang mga Epistle mga sulat nga ginhimo sang mga lider sang Simbahan sa mga Santos sa lainlain nga parte sang kalibutan. Si Apostoles Pablo ang nagsulat sang kalabanan sang mga epistle sa Bag-ong Katipan—nga nagsugod sa mga taga-Roma kag natapos sa mga Hebreo. Ang iya mga sulat ginpasunod sa kalabaon, magluwas sa Mga Hebreo. Bisan ang Mga Taga-Roma amo ang una nga sulat sa Bag-ong Katipan, sa matuod sinulat ini sa manugtapos na ang pang-misyonero nga mga biyahe ni Pablo.

Mga Taga-Roma 1–6

“Ang matarong magakabuhi paagi sa pagtuo.”

Ang masunod nga mga kahulugan mahimo nga makabulig sa imo nga maintiendihan ang Sulat sa mga Taga-Roma:

Ang layi.Sang ginsulat ni Pablo “ang layi,” ginatumod niya ang kasuguan ni Moises. Ang tinaga nga “mga buhat” sa mga sinulatan ni Pablo sa masami nagatumod sa panggwa nga mga aksyon may angot sa layi ni Moises. Pamensara kon paano ang layi ni Moises kag ang mga buhat nga ginapangayo sa idalom sini nangin lain sa “kasugoan sang pagtuo” nga ginalaragway sa Mga Taga-Roma 3:23–31.

Circuncision, di-circuncidado.Sang una nga panahon, ang circuncision isa ka tanda ukon simbolo sang kasugtanan nga ginhimo sang Dios kay Abraham. Gingamit ni Pablo ang tinaga nga “circuncision” sa pagtumod sa mga Judio (ang katawhan sang kasugtanan) kag “di-circuncidado” agud tumuron ang mga Gentil. Binagbinaga kon ano ang ginatudlo sang Mga Taga-Roma 2:25–29 parte sa kon ano gid ang kahulugan sang mangin katawhan sang Dios sa kasugtanan. Tandai nga ang circuncision indi na karon tanda sang kasugtanan sang Dios sa Iya katawhan (tan-awa sa Mga Binuhatan 15:23–29).

Pagpakamatarong, pakatarungon, ginpakatarong.Ang ining mga tinaga nagatumod sa kapatawaran, ukon pagpatawad, sang sala. Kon kita ginpakatarong, ginpatawad kita, gindeklarar nga wala sing sala, kag hilway sa wala katapusan nga silot para sa aton mga sala. Kon makita mo ining mga termino, tandai ang gintudlo ni Pablo kon paano nangin posible ang pagpakamatarong. Sa Mga Taga-Roma, ang mga tinaga pareho sang “matarong” kag “pagkamatarong” ginakabig nga pareho ang kahulugan sa mga tinaga nga “husto” kag “pagpakamatarong.”

Grasya.Ang grasya isa ka “diosnon nga … bulig ukon kusog, nga ginhatag paagi sa bugana nga kaluoy kag pagpalangga ni Jesucristo.” Paagi sa grasya, ang tanan nga tawo mabanhaw kag makabaton sang imortalidad. Dugang pa sini, “ang grasya nagapabakod nga gahum nga nagatugot sa mga lalaki kag babayi nga mabaton ang wala katapusan nga kabuhi kag pagpahitaas pagkatapos nila mahatag ang kutob sa ila masarangan.” Wala kita nagabaton sang grasya paagi sa aton mga pagpaninguha; kundi, ang grasya amo ang nagahatag sa aton sing “kusog kag bulig nga himuon ang maayo nga mga binuhatan nga indi [naton] mapadayon nga kita lang” (Bible Dictionary, “Grace”; tan-awa man sa 2 Nefi 25:23. Samtang imo ginabasa ang Mga Taga-Roma, isulat kon ano ang imo natun-an parte sa grasya sang Manluluwas.

Mga Taga-Roma 2:17–29

Ang akon mga aksyon dapat magpakita kag magpadugang sang akon pagkahaylo.

Ang pila sa Cristohanon nga mga Judio sa Roma maathag nga nagapati gihapon nga ang mga seremonya kag ritwal sang layi ni Moises nagadala sang kaluwasan. Daw problema ini nga wala na nagakaigo tungod wala kita nagasunod sa layi ni Moises. Pero samtang imo ginabasa ang mga sulat ni Pablo, labi na sa Mga Taga-Roma 2:17–29, pamensara ang imo kaugalingon nga mga pagpaninguha agud ipangabuhi ang ebanghelyo. Ang imo bala panggwa nga mga aksyon, pareho sang pag-ambit sang sakramento ukon pagtambong sa templo, nagapadalom sang imo pagkahaylo kag nagapabakod sang imo pagtuo kay Cristo? (tan-awa sa Alma 25:15–16). May dapat ka bala nga bag-uhon agud ang imo panggwa nga mga aksyon nagapadulong sa pagbag-o sang tagipusuon?

 

Mga Taga-Roma 3:10–31; 5

Paagi kay Jesucristo, sarang ako mapatawad sang akon mga sala.

Ang iban nga tawo mahimo nga maluyahan sa maisog nga deklarasyon ni Pablo nga “wala sing bisan sin-o nga matarong, wala, bisan isa” (Mga Taga-Roma 3:10). Pero may mga mensahe man nga puno sing paglaum sa Mga Taga-Roma. Pangitaa ang mga ini sa mga kapitulo 3 kag 5, kag hunahunaa kon ngaa ang pagdumdom nga ang “tanan nagpakasala, kag nawad-an sang himaya sang Dios” (Mga Taga-Roma 3:23) isa ka importante nga tikang padulong sa “paghimaya sa paglaum” paagi kay Jesucristo (Mga Taga-Roma 5:2).

Mga Taga-Roma 6

Si Jesucristo nagaimbitar sa akon nga “magginawi sa bag-ong pagkabuhi.”

Si Pablo nagpanudlo nga ang ebanghelyo ni Jesucristo dapat magbag-o sang pamaagi sang aton pagpangabuhi. Ano nga mga pahayag sa Mga Taga-Roma 6 ang nagalaragway kon paano ang pagsunod sa Manluluwas nakabulig sa imo nga “magginawi sa bag-ong pagkabuhi”? (bersikulo 4).

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Taga-Roma 1:16–17.Paano naton ipakita nga kita “wala nagakahuya sang maayong balita ni Cristo”?

Mga Taga-Roma 3:23–28.Samtang ginabasa ninyo ining mga bersikulo, mahimo ninyo hambalan ang kinalain sang “pag-agom” sang grasya sang Dios, nga indi gid naton mahimo, kag pagbaton sini, nga kinahanglan gid naton himuon. Sang san-o bala naton nabatyagan ang grasya sang Dios? Paano naton ini mabaton sing mas lubos?

Mga Taga-Roma 5:3–5.Ano nga mga kabudlayan ang aton naeksperiyensyahan? Paano nakabulig sa aton ining mga kabudlayan nga magpatubo sang pasensya, eksperiyensya, kag paglaum?

Mga Taga-Roma 6:3–6.Ano ang ginhambal ni Pablo sa sining mga bersikulo parte sa simbolismo sang bunyag? Ayhan pwede magplano ang imo pamilya nga magkadto sa maabot nga bunyag. Ukon may isa sa inyo pamilya nga magpakita sang mga litrato ukon handumanan sa iya bunyag. Paano nagabulig sa aton ang paghimo kag pagtuman sang aton mga pangako sa bunyag nga “magginawi sa bag-ong pagkabuhi.”

lalaki nga nagabunyag sang isa ka tawo sa linaw

Ang bunyag nagasimbolo sang bag-o nga kabuhi bilang disipulo ni Cristo.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Personal nga Pagtuon

Magpamangkot samtang nagatuon. Sa imo pagtuon sang balaan nga mga kasulatan, mahimo nga may mapamensaran ka nga mga pamangkot. Hunahunaa sing maayo ining mga pamangkot kag magpangita sang mga sabat. Halimbawa, sa Mga Taga-Roma 1–6 pwede mo pangitaon ang mga sabat sa pamangkot nga “Ano ang grasya?”

Si Cristo nga ginaalsa ang bata nga babayi halin sa suba

Be Not Afraid [Indi Magkahadlok], ni Greg K. Olsen