Agosto 28–Septyembre 3

1 Mga Taga-Corinto 8–13

“Kamo ang Lawas ni Cristo”

Samtang mainampuon mo nga ginabasa ang 1 Mga Taga-Corinto 8–13, ang Balaan nga Espiritu mahimo nga makighambal sa imo sa tingug nga mahinay (tan-awa sa 1 Mga Hari 19:11–12). Ang pagsulat sining mga panghunahuna makabulig sa imo nga dumdumon ang mga balatyagon kag pamensaron nga imo mabaton sa tion sang imo pagtuon.

Isulat Ang Imo Mga Panghunahuna

Sang tiyempo ni Pablo, ang Corinto isa ka manggaranon nga sentro sang negosyo nga ang mga pumuluyo naghalin sa tanan nga bahin sang Imperyo sang Roma. Nga may madamo nga lainlain nga mga kultura kag relihiyon sa siyudad, ang mga miyembro sang Simbahan sa Corinto ginbudlayan sa pagpabilin nga nagaisa, gani gintinguhaan ni Pablo nga buligan sila nga makakita sang pag-isa sa ila pagpati kay Cristo. Ining pag-isa masobra pa sangsa malinong nga pag-inupdanay; wala lang si Pablo nagpangayo nga batunon nila ang mga kinalain sang kada isa. Kundi, nagpanudlo sia nga kon magsulod ka sa Simbahan ni Jesucristo, “ginabunyagan ka sa isa ka lawas,” kag ang tagsa ka bahin sang lawas kinahanglanon (1 Mga Taga-Corinto 12:13). Kon madula ang isa ka miyembro, daw pareho ini sang madulaan sang tiil, kag ang lawas mangin mas mahuyang bilang resulta. Kon ang isa ka miyembro nagaantos, dapat naton ini tanan batyagon kag himuon ang aton bahin para maghagan-hagan ini. Sa sini nga klase sang pag-isa, ang mga kinalain wala lang ginabaton kundi ginahatagan sang bili, tungod kon wala sang mga miyembro nga may lainlain nga talento kag abilidad, ang lawas mangin limitado. Gani bisan kon sa pamatyag mo komportable ka sa Simbahan halin pa sang una ukon nagapamensar ka kon bala diri ka gid dapat, ang mensahe ni Pablo amo nga ang pag-isa indi pagkapalareho. Kinahanglan mo ang imo isigka-Santos, kag ang imo isigka-Santos nagakinahanglan sa imo.

Mga Ideya para sa Personal nga Pagtuon sang Balaan nga mga Kasulatan

1 Mga Taga-Corinto 10:1–13

Ang Dios nagatigana sang paagi nga makalikaw sa tentasyon.

Ang espirituhanon nga mga eksperiyensya, bisan pa inang mga milagroso, wala nagahilway sa aton sa mga tentasyon nga “nagaabot sa mga tawo” (1 Mga Taga-Corinto 10:13). Siguro isa ina ka rason kon ngaa nagsulat si Pablo parte sa kon paano ang mga Israelnon sa tiyempo ni Moises ginbudlayan sa mga tentasyon, bisan pa nga nakasaksi sila sang dalagko nga mga milagro (tan-awa sa Exodo 13:21; 14:13–31). Samtang imo ginabasa ang 1 Mga Taga-Corinto 10:1–13, ano nga mga paandam sa mga eksperiyensya sang mga Israelnon ang daw bagay sa imo? Ano nga mga klase sang “paglikaw” sa tentasyon ang gintigana sang Amay nga Langitnon para sa imo? (tan-awa man sa Alma 13:27–30; 3 Nefi 18:18–19).

1 Mga Taga-Corinto 10:16–17; 11:16–30

Ang sakramento nagaisa sa aton bilang mga miyembro sang Simbahan ni Cristo.

Bisan ang sakramento nagalakip sang personal nga pangako sa tunga mo kag sang Ginuo, isa man ini ka eksperiyensya nga ginapaambit mo sa iban. Halos pirme kita nagaambit sang sakramento nga ululupod, bilang isa ka grupo sang mga Santos. Basaha ang gintudlo ni Pablo parte sa sakramento, kag pamensara kon paano ining sagrado nga ordinansa makabulig sa “madamo” nga mangin “isa” kay Cristo (1 Mga Taga-Corinto 10:17). Paano nagabulig sa imo ang pag-ambit sang sakramento nga makabatyag nga mas malapit kay Cristo kag sa iban nga tumuluo? Sa ano nakaimpluwensya ining mga bersikulo sa imo balatyagon parte sa sakramento kag sa paagi nga nagahanda ka para diri?

1 Mga Taga-Corinto 11:11

Sa plano sang Dios, kinahanglan sang mga lalaki kag mga babayi ang isa kag isa.

Sa 1 Mga Taga-Corinto 11:4–15, ginatumod ni Pablo ang kultural nga mga kustombre nga wala naton ginasunod sa karon. Ugaling, nagtudlo man si Pablo sang importante nga kamatuoran nga magamit sa katubtuban, nga makita sa bersikulo 11. Ano sa banta mo ang kahulugan sining bersikulo, kag ngaa importante ini? Si Elder David A. Bednar nagtudlo, “Ang lalaki kag ang babayi gintuyo nga magtuon sa, magpabakod, magbugay, kag magkompleto sang kada isa” (“Nagapati Kita sa Pagkaputli,” Liahona, Mayo 2013, 42). Paano dapat ining kamatuoran mag-impluwensya sa pag-asawahay? Paano sini dapat maapektuhan ang paagi nga nagaalagad kita sa Simbahan?

Tan-awa man sa Jean B. Bingham, “Nagaisa sa Pagtuman sang Buluhaton sang Dios,” Liahona, Mayo 2020, 60–63.

1 Mga Taga-Corinto 12–13

Ang espirituhanon nga mga dulot ginhatag para makabenepisyo ang tanan nga mga anak sang Amay nga Langitnon.

Ang listahan sang espirituhanon nga mga dulot sa 1 Mga Taga-Corinto 12–13 indi pa kompleto. Pero isa ini ka maayo nga lugar para magsugod samtang imo ginadiskubre kag ginahunahuna sing maayo ang espirituhanon nga mga dulot nga ginhatag sa imo sang Amay nga Langitnon.   Samtang imo ginabasa ang listahan ni Pablo sang mga dulot, mahimo mo idugang ang mga natalupangdan mo sa iban, sa imo kaugalingon, ukon sa mga tawo sa balaan nga mga kasulatan. Kon may imo ka nga patriarchal blessing, mahimo nga nagasambit ini sang pila sa imo espirituhanon nga mga dulot. Paano nakabulig sa imo ining mga dulot nga bugayan ang iban? Pamensara kon paano mo handumon sing “hanuot ang dalagko pa nga mga hiyas” (1 Mga Taga-Corinto 12:31).

Tan-awa sa 1 Mga Taga-Corinto 14; Moroni 10:8–21, 30; Doktrina kag mga Kasugtanan 46:8–26; Mga Artikulo sang Pagtuo 1:7.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

1 Mga Taga-Corinto 9:24–27.Tungod nga ginkumparar ni Pablo ang pagpangabuhi sang ebanghelyo sa palumbaanay, pwede kamo magpalumba sa pamilya para ipakita ang iya punto. Premyuhi sang korona ang kada isa nga makatapos sa palumba, kag hambali kon paano ang tanan nga matutom sa pagsunod kay Jesucristo sa sining kabuhi magadaog sang “indi madunot” nga premyo (1 Mga Taga-Corinto 9:25; tan-awa man sa 2 Timoteo 4:7–8). Ano ang ginahimo sang manugpalumba sa dalaganay agud maghanda para sa palumba? Ano ang pwede naton himuon para maghanda sa pagbalik sa Amay nga Langitnon?

Ginkumparar ni Pablo ang pagpangabuhi sang ebanghelyo sa palumba sang dalagan.

1 Mga Taga-Corinto 12:1–11.Pagkatapos nga basahon ining mga bersikulo sing ululupod, pamensara nga hatagan ang kada isa sang isa ka panid sang papel nga may ngalan sang isa pa ka miyembro sang pamilya sa ibabaw. Pangabaya ang kada isa nga ilista ang espirituhanon nga mga dulot nga ila natalupangdan sa sina nga tawo. Dayon pwede mo ipasa ang mga papel palibot hasta nga ang kada isa nakasulat parte sa mga dulot sang tagsa ka miyembro sang pamilya.

1 Mga Taga-Corinto 12:3.Ngaa kinahanglanon ang Balaan nga Espiritu sa pag-angkon sang testimonya parte kay Jesucristo? Ano ang pwede naton himuon para imbitaron ang Balaan nga Espiritu sa pagpabakod sang aton mga testimonya parte sa Iya?

1 Mga Taga-Corinto 12:12–27.Ang paanggid ni Pablo sang lawas mahimo nga isa ka indi malimtan nga paagi para hambalan ang pag-isa sang pamilya. Halimbawa, pwede nga magdrowing ang mga miyembro sang pamilya sang lawas nga may mata lang ukon dulunggan (tan-awa sa bersikulo 17). Ano ang ginapanugyan sining mga bersikulo sa kon paano naton trataron ang kada isa bilang mga miyembro sang pamilya?

1 Mga Taga-Corinto 13:4–8.Ang pakahulugan ni Pablo sang gugma sa isigkatawo [charity] pwede himuon nga makainspirar nga motto para sa imo pamilya. Pwede mo tokahan ang tagsa ka miyembro sang pamilya nga tun-an ang isa ka dinalan sa mga bersikulo 4–8 kag tudloan ang bilog nga pamilya kon ano ang kahulugan sini nga nagagamit sang mga kahulugan, mga halimbawa, kag personal nga mga eksperiyensya. Paano ang Manluluwas nangin ehemplo sining mga kinaiya? Pwede man kamo maghimo sang mga poster sing ululupod para sa tagsa sining mga dinalan kag i-display ini sa bilog ninyo nga balay. Mangin matugahon [creative]!

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Love at Home [Gugma sa Balay],” Mga Himno kag mga Ambahanon sang Kabataan, 44.

Pagpauswag sang Aton Pagpanudlo

Mag-display sang balaan nga kasulatan. Mag-display sang isa ka bersikulo nga makahulugan para sa imo sa lugar nga makita pirme sang mga miyembro sang pamilya. Agdaha ang iban nga mga miyembro sang pamilya nga magbulos-bulos pili sang balaan nga kasulatan nga i-display.

“Ang tinapay nga aton ginatipik-tipik, indi bala ini ang pagpakig-ambit sa lawas ni Cristo? Bangud kita nga madamo isa ka tinapay, kag isa ka lawas” (1 Mga Taga-Corinto 10:16–17).