Septyembre 11–17

2 Mga Taga-Corinto 1–7

“Magpakig-uli Kamo sa Dios”

Samtang imo ginatun-an ang mga sulat ni Pablo sa mga taga-Corinto, isulat ang pila sa mga prinsipyo sang ebanghelyo nga imo matukiban kag pamensara sing maayo kon paano mo ini gamiton sa imo kabuhi.

Isulat Ang Imo Mga Panghunahuna

Kon kaisa, ang pagkalider sa Simbahan nagakahulugan sang paghambal sang pila ka mabudlay nga mga butang. Matuod ini sang tiyempo ni Pablo pareho sa karon. Maathag nga ang nagligad nga sulat ni Pablo sa mga Santos sang Corinto nagaunod sang pagsaway kag nakahatag sang sakit sang buot. Sa sulat nga ginatawag na karon nga 2 Mga Taga-Corinto, gintinguhaan niya nga ipaathag kon ano ang nagtulod sa iya nga maghambal sang masakit nga mga tinaga: “Kay gikan sa madamo nga kapipit-an kag kasakitan sang tagipusuon nagsulat ako sa inyo nga may madamo nga luha, nga indi kamo pagpasubuon kundi nga mahibaluan ninyo ang akon bugana nga gugma sa inyo” (2 Mga Taga-Corinto 2:4). Kon ikaw nagabaton sang pagtadlong halin sa isa ka lider, makabulig gid ang mahibal-an nga gin-inspirar ini sang Cristohanon nga gugma. Kag bisan pa sa mga sitwasyon nga indi, kon handa kita nga tulukon ang iban nga may pagpalangga nga nabatyagan ni Pablo, mas mahapos mag-akto sing nagakabagay sa bisan ano nga pagsaklaw. Sa ginlaygay ni Elder Jeffrey R. Holland, “Mangin mahinangpanon sa tawhanon nga kahuyang—sa imo kahuyang amo man sa mga kahuyang sang mga nagaserbisyo upod sa imo sa Simbahan nga ginapangunahan sing boluntaryo sang mortal nga mga lalaki kag babayi. Magluwas sa kaso sang Iya bugtong nga perpekto nga Pinalangga nga Anak, ang indi perpekto nga mga tawo lamang ang mga kaupod sang Dios sa trabaho” (“Lord, I Believe,” Liahona, Mayo 2013, 94).

Mga Ideya para sa Personal nga Pagtuon sang Balaan nga mga Kasulatan

2 Mga Taga-Corinto 1:3–7; 4:6–10, 17–18; 7:4–7

Ang akon mga pagtilaw pwede nga mangin bugay.

Tungod sang tanan nga gin-atubang ni Pablo sa iya kabuhi, indi katilingalahan nga madamo sia sang sinulat parte sa mga katuyuan kag bugay sang mga kabudlayan. Samtang imo ginabasa ang 2 Mga Taga-Corinto 1:3–7; 4:6–10, 17–18; kag 7:4–7, hunahunaa ang mga paagi nga mangin bugay ang imo mga pagtilaw. Halimbawa, pwede mo pamensaron sang maayo kon paano ang Dios “nagalipay sa [imo] sa tanan [mo] nga kapipit-an” kag kon paano ka, bilang balos, “makalipay sa ila nga yara sa bisan anong kapipit-an” (2 Mga Taga-Corinto 1:4 Ukon pwede mo tutokan kon paano ang kasanag ni Jesucristo “nagsilak” sa imo tagipusuon, bisan pa nga “ginaipit” kag “ginapalibog” ka (2 Mga Taga-Corinto 4:6, 8).

Tan-awa man sa Mosias 24:13–17.

2 Mga Taga-Corinto 2:5–11

Ang kapatawaran isa ka bugay nga sarang ko ihatag kag batunon.

Diutay lang ang nahibal-an naton parte sa tawo nga ginatumod ni Pablo sa 2 Mga Taga-Corinto 2:5–11—magluwas lang nga sia nakasala (tan-awa sa mga bersikulo 5–6) kag gusto ni Pablo nga patawaron sia sang mga Santos (tan-awa sa mga bersikulo 7–8). Ngaa kon kaisa nagakulang kita nga “lig-unon ang [aton] gugma sa” aton pinalangga nga nakasala sa aton? (bersikulo 8). Paano ang pagdalok sang kapatawaran nagahalit sa iban kag sa aton kaugalingon? (tan-awa sa mga bersikulo 7, 10–11 Paano ang pagdalok sang kapatawaran nagahatag kay “Satanas … [sang bentaha] nga madaug kita”? (bersikulo 11).

Tan-awa man sa Doktrina kag mga Kasugtanan 64:9–11.

2 Mga Taga-Corinto 5:14–21

Paagi sa Pagbayad-Sala ni Jesucristo, pwede ako magpakig-uli sa Dios.

Pareho sa bisan sin-o, nahibal-an ni Pablo kon ano ang mangin “bag-o nga tinuga” (2 Mga Taga-Corinto 5:17). Naghalin sia sa pagka-manugpigos sang mga Cristohanon padulong sa wala kahadlok nga tagpangapin ni Cristo. Samtang imo ginabasa ang 2 Mga Taga-Corinto 5:14–21, hunahunaa ang mga pamangkot pareho sini: Ano ang buot silingon sang magpakig-uli? Ano ang buot silingon sang makig-uli sa Dios? Hunahunaa sing maayo kon ano ayhan ang nagaseparar sa imo sa Dios. Ano ang kinahanglan mo himuon para mas lubos nga makig-uli sa Iya? Paano ina ginapatigayon sang Manluluwas?

Pwede mo man binagbinagon kon ano ang buot silingon sang mangin “embajador ni Cristo” sa “pagpanghikot sang [pag-uliay]” (mga bersikulo 18, 20).   

Tan-awa man sa 2 Nefi 10:23–25.

2 Mga Taga-Corinto 7:8–11

Ang diosnon nga kasubo nagadul-ong sa paghinulsol.

Masami wala naton ginakabig ang kasubo nga makapaayo, pero si Pablo naghambal parte sa “diosnon nga kasubo” (2 Mga Taga-Corinto 7:10) bilang importante nga bahin sang paghinulsol. Pamensara ang imo matun-an parte sa diosnon nga kasubo sa masunod: 2 Mga Taga-Corinto 7:8–11; Alma 36:16–21; Mormon 2:11–15; kag sa mensahe ni Sister Michelle D. Craig “Diosnon nga Pagkadiskuntento” (Liahona, Nob. 2018, 52–55). Sang san-o ka nakabatyag sang diosnon nga kasubo, kag ano ang nangin epekto sini sa imo kabuhi?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

2 Mga Taga-Corinto 3:1–3.Nakatilaw na bala ang mga miyembro sang imo pamilya nga mangabay sa isa ka tawo nga himuan sila sang rekomendasyon, para sa trabaho ukon aplikasyon sa eskwelahan? Pangabaya sila sa pag-istorya parte sa sining eksperiyensya. Nagpanudlo si Pablo nga ang kabuhi sang mga Santos daw pareho sang mga rekomendasyon para sa ebanghelyo ni Jesucristo, “nga nasulat indi sa tinta, kundi sa Espiritu sang buhi nga Dios.” Samtang inyo ginabasa ang 2 Mga Taga-Corinto 3:1–3 sing ululupod, hambali kon paano ang aton mga halimbawa daw pareho sang mga sulat nga pwede “kilalahon kag basahon sang tanan nga tawo,” nga nagapakita sang kamatuoran kag sang bili sang ebanghelyo. Ayhan pwede ang tagsa ka miyembro sang pamilya maghimo sang sulat ukon “epistle” nga nagapaathag kon paano ang isa ka miyembro sang pamilya nangin maayo nga halimbawa sang isa ka disipulo ni Jesucristo. Pwede nila basahon ang ila mga sulat sa pamilya kag ihatag ang mga ini sa miyembro sang pamilya nga ila ginsulatan. Ngaa importante nga maintiendihan nga ang aton mga kabuhi “[mga] sulat ni Cristo”?

2 Mga Taga-Corinto 5:6–7.Ano ang buot silingon sang “nagalakat sa pagtuo, indi sa panulok”? Ano ang aton ginahimo para ipakita nga nagapati kita sa Manluluwas bisan pa nga indi naton Sia makita?

2 Mga Taga-Corinto 5:17.Makapamensar bala ang imo pamilya ukon makakita sang mga halimbawa sa duna nga kapalibotan sang mga butang nga nagaagi sa dalagko nga mga pagbag-o kag nangin bag-o nga mga tinuga? (tan-awa sa mga litrato sa punta sining outline). Paano kita bag-uhon sang ebanghelyo ni Jesucristo?

2 Mga Taga-Corinto 6:1–10.Suno sa 2 Mga Taga-Corinto 6:1–10, ano ang buot silingon sang mangin “mga manug-alagad sang Dios”? (bersikulo 4). Ano nga mga kalidad ang dapat ara sa manug-alagad sang Dios?

2 Mga Taga-Corinto 6:14–18.Paano naton sundon ang laygay ni Pablo nga “gwa kamo sa tunga nila [ang mga malaut], kag magpain kamo gikan sa ila,” samtang ginapalangga man ang mga ara sa aton palibot?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Aton Pagpanudlo

Magpaambit sang mga leksyon gamit ang isa ka bagay. Ang pila ka mga konsepto sang ebanghelyo, pareho sang Pagbayad-Sala, mahimo nga mabudlay intiendihon. Pamensara ang paggamit sang mga litrato ukon mga bagay nga makabulig sa imo pamilya nga maintiendihan ang mga prinsipyo nga imo madiskubrehan sa balaan nga mga kasulatan.

Kon nagbag-o kita sa ebanghelyo ni Cristo, ang aton pagbag-o mangin dako kaayo nga ginlaragway ini ni Pablo bilang ang pagka-“bag-o nga tinuga” (2 Mga Taga-Corinto 5:17).