Septyembre 18–24

2 Mga Taga-Corinto 8–13

“Ang Dios Nagahigugma sa Manughatag nga Malipayon”

Ang pagsulat sang espirituhanon nga mga panghunahuna makabulig sa imo nga dumdumon ang imo natun-an sa tion sang imo pagtuon sang balaan nga mga kasulatan. Pwede ka magsulat sa sululatan sang mga tinun-an, maghimo sang mga tanda sa kilid sang imo balaan nga mga kasulatan, magdugang sang mga tanda sa Gospel Library app, ukon maghimo sang rekording sa audio sang imo mga panghunahuna.

Irekord Ang Imo Mga Panghunahuna

Ano ang imo himuon kon mabatian mo nga ang isa ka kongregasyon sang mga Santos sa lain nga lugar nagaantos sang kapigaduhon? Amo ini ang sitwasyon nga ginlaragway ni Pablo sa mga Santos sa Corinto sa 2 Mga Taga-Corinto 8–9. Naglaum sia nga makumbinsi ang mga Santos sa Corinto nga maghatag sang pila sa ila kabuganaan sa mga Santos nga nagakinahanglan. Pero masobra pa sangsa pagpangayo sang mga donasyon, ang mga pulong ni Pablo nagaunod sang dalagko nga mga kamatuoran parte sa paghatag: “Maghimo ang tagsa ka tawo suno sa gintuyo niya sa iya tagipusuon; indi nga nagaduhaduha ukon sa pagpilit: kay ang Dios nagahigugma sa manughatag nga malipayon” (2 Mga Taga-Corinto 9:7). Sa aton panahon, sa gihapon may mga Santos sa bilog nga kalibutan nga nagakinahanglan sang bulig. Kon kaisa ang mahimo lang gid naton amo ang magpuasa kag magdonar sang fast offering. Sa iban nga mga sitwasyon, ang aton paghatag mas direkta kag personal. Bisan ano nga klase sang pagsakrispisyo ang aton himuon, maayo nga tan-awon naton ang aton mga rason sa paghatag. Ang aton bala pagsakripisyo pagpahayag sang pagpalangga? Kon tan-awon gid, ang pagpalangga ang nagatulod sa malipayon nga manughatag.

Mga Ideya para sa Personal nga Pagtuon sang Balaan nga mga Kasulatan

2 Mga Taga-Corinto 8:1–15; 9:5–15

Pwede ako maghatag nga malipayon sang kon ano nga ara sa akon para bugayan ang mga imol kag nagakinahanglan.

Kadamo kaayo sang mga tawo nga nagakinahanglan sa bilog nga kalibutan. Paano ayhan kita makahimo sang kinalain? Si Elder Jeffrey R. Holland nagtanyag sining laygay: “Manggaranon ukon imol, kinahanglan naton ‘himuon ang aton masarangan’ kon nagakinahanglan ang iban [tan-awa sa Marcos 14:6, 8]. … Ang [Dios] magabulig sa inyo kag magagiya sa inyo sa maluluy-on nga mga buluhaton sang pagkadisipulo kon kamo matutom nga nagatinguha kag nagapangamuyo kag nagapangita sang mga paagi nga sundon ang kasuguan nga sulit-sulit Niya nga ginahatag sa aton” (“Indi Bala nga Tanan Kita Manugpakilimos?,” Liahona, Nob. 2014, 41).

Basaha ang 2 Mga Taga-Corinto 8:1–15; 9:6–15, nga ginatandaan ang mga prinsipyo nga gintudlo ni Pablo parte sa pag-atipan sang mga imol kag nagakinahanglan. Ano ang nagainspirar sa imo sa laygay ni Pablo? Pwede ka magpangamuyo para sa giya kon ano ang imo himuon para bugayan ang isa nga nagakinahanglan. Siguroha nga irekord ang bisan ano nga panghunahuna nga imo mabaton kag aktuhi ang mga ini.

Tan-awa man sa Mosias 4:16–27; Alma 34:27–29; Henry B. Eyring, “Indi Bala Amo Ini ang Puasa nga Akon Ginpili?,” Liahona, Mayo 2015, 22–25.

2 Mga Taga-Corinto 11:1–6, 13–15; 13:5–9

“Usisaa ninyo ang inyo kaugalingon, kon yara kamo sa pagtuo.”

Sa karon, pareho sa panahon ni Pablo, may mga nagatinguha nga patalangon kita “gikan sa [kasimple nga ara] kay Cristo” (2 Mga Taga-Corinto 11:3). Sa sina nga rason, importante nga himuon ang ginapanugyan ni Pablo: “Usisaa ninyo ang inyo kaugalingon, kon yara kamo sa pagtuo” (2 Mga Taga-Corinto 13:5). Dapat mo sugdan ini nga proseso paagi sa pagpamensar kon ano ang kahulugan sang “yara kamo sa pagtuo.” Paano mo mahibal-an nga ara ka sa pagtuo? Magpangita sang mga kahigayunan nga usisaon ang imo kaugalingon.

Bilang bahin sang imo pagpangusisa, pwede mo man binagbinagon ang dinalan nga “ang [kasimple nga yara kay Cristo]” (2 Mga Taga-Corinto 11:3). Paano ka nakakita sang kasimple kay Cristo kag sa Iya ebanghelyo? Paano ayhan ang imo hunahuna “[mapatalang] gikan sa [sinang kasimple]”? Ano nga mabinuligon nga laygay ang imo makita sa 2 Mga Taga-Corinto 11:1–6, 13–15?

Pamensara ining laygay halin kay Pangulong Dieter F. Uchtdorf: “Kon nagahunahuna kamo nga ang ebanghelyo wala gid nagapakamaayo sa inyo, ginaagda ko kamo nga magpundo, usisaa ang inyo kabuhi halin sa mas mataas nga perspektibo, kag pahaposa ang inyo pamaagi sa pagkadisipulo. Tutoki ang basehan nga mga doktrina, mga prinsipyo, kag mga pagdapat sang ebanghelyo. Ginasaad ko nga ang Dios magagiya kag magabugay sa inyo sa inyo banas padulong sa kabuhi nga may katumanan, kag ang ebanghelyo pat-od gid nga magpakamaayo sa inyo” (“[Nagapakamaayo gid Ini]!,” Liahona, Nob. 2015, 22).

2 Mga Taga-Corinto 12:5–10

Ang grasya sang Manluluwas igo na sa pagbulig sa akon nga makakita sang kusog sa akon kahuyang.

Wala kita makahibalo kon ano ang “tunok sa unod” ni Pablo, pero tanan kita may aton mga tunok nga luyag naton kuntani nga kakason sang Dios sa aton mga kabuhi. Pamensara ang imo mga tunok samtang imo ginabasa ang 2 Mga Taga-Corinto 12:5–10, kag binagbinaga ang imo matun-an parte kay Jesucristo sa sining mga bersikulo. Ano ang gintudlo ni Pablo sa sining mga bersikulo parte sa mga pagtilaw kag kahuyang? Ano ang kahulugan sa imo nga “ang grasya [sang Dios] igo” para sa imo?

Tan-awa man sa Mosias 23:21–24; 24:10–15; Eter 12:27; Moroni 10:32–33.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

2 Mga Taga-Corinto 8–9.Ano ang aton makita sa sining mga kapitulo nga nagainspirar sa aton nga buligan ang mga imol kag iban nga nagakinahanglan? Basi husto ini nga tion nga magplano sang kahiwatan sa pagserbisyo bilang pamilya sa tawo nga nagakinahanglan.

2 Mga Taga-Corinto 9:6–7.May kilala bala ang imo pamilya nga pwede ilaragway nga “manughatag nga malipayon”? Paano naton himuon ang aton pagserbisyo sa iban nga mas malipayon? Ang mas bata pa nga mga miyembro sang pamilya sarang nga maghimo sang mga chapa nga nagasiling “Malipayon ako nga manughatag.” Pwede mo ihatag ang mga chapa bilang premyo sa mga miyembro sang pamilya tagsa nga makita mo sila nga nagaserbisyo sa isa kag isa sing masinadyahon.

2 Mga Taga-Corinto 10:3–7.Paano mo tudloan ang imo pamilya parte sa aton “pagpakig-away” batok sa kalainan? Masadyahan bala ang imo pamilya sa pagpatindog sang pader ukon baral gamit ang mga bangko kag mga habol? Posible nga magapadulong ini sa paghinambalanay parte sa pagkakas sang mga butang nga nagapalayo sa aton sa Dios kag kon paano “[bihagon] ang tagsa ka hunahuna sa pagtuman kay Cristo.” Ano ang espirituhanon nga mga “armas” nga ginagamit naton para kontrolon ang aton mga hunahuna? (tan-awa sa Mga Taga-Efeso 6:11–18

2 Mga Taga-Corinto 11:3.Ano ang pwede himuon sang imo pamilya para magtutok pa sa “[kasimple nga yara] kay Cristo”?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Dare to Do Right [Magmaisog],” Mga Himno kag mga Ambahanon sang Kabataan, 64.

Pagpauswag sang Personal nga Pagtuon

Isulat ang mga panghunahuna. Si Elder Richard G. Scott nagsiling: “Ang ihibalo nga maid-id nga ginsulat isa ka ihibalo nga magamit sa oras sang panginahanglan. … [Ang pagrekord sang espirituhanon nga giya] nagapataas sang kahigayunan sang imo pagbaton sang dugang nga kasanag” (“Acquiring Spiritual Knowledge,” Ensign, Nob. 1993, 88; tan-awa man sa Teaching in the Savior’s Way, 12, 30).

“Maghimo ang tagsa ka tawo suno sa gintuyo niya sa iya tagipusuon; indi nga nagaduhaduha ukon sa pagpilit: kay ang Dios nagahigugma sa manughatag nga malipayon” (2 Mga Taga-Corinto 9:7).