Ang nabanhaw nga Manluluwas nagbisita kay Pablo sa prisuhan (tan-awa sa Mga Binuhatan 23:11). Sarang kita hilwayon ni Jesucristo sa “gota sang [pagkaulipon] (Mga Taga-Galacia 5:1).

Septyembre 25–Oktubre 1

Mga Taga-Galacia

“Maggawi sa Espiritu”

Samtang imo ginabasa ang Mga Taga-Galacia, irekord ang mga panghunahuna nga imo mabaton. Ang paghimo sini makabulig sa imo nga madumduman kag pamensaron ini sang maayo sa palaabuton.

Isulat Ang Imo Mga Panghunahuna

Ang ebanghelyo ni Jesucristo nagatanyag sang kahilwayan sa espirituhanon nga pagkagapos. Pero kon kaisa ang mga tawo nga nakaeksperiyensya na sang kahilwayan sang ebanghelyo nagatalikod sini kag “buot nga magpaulipon liwat” (Mga Taga-Galacia 4:9). Amo ini ang ginahimo sang pila ka mga Santos sa Galacia—nagatalikod sila sa kahilwayan nga gintanyag ni Cristo sa ila (tan-awa sa Mga Taga-Galacia 1:6). Gani, ang Sulat ni Pablo sa Mga Taga-Galacia, isa ka ginadalian nga imbitasyon nga magbalik sa “kahilwayan nga ginhilway kita ni Cristo” (Mga Taga-Galacia 5:1). Ini man ang panawagan nga dapat naton pamatian kag tumanon tungod nga bisan lain ang mga sirkumstansya, ang away sa tunga sang kahilwayan kag pagkaulipon nagapadayon. Sa gintudlo ni Pablo, kulang pa nga kita “gintawag sa kahilwayan” (Mga Taga-Galacia 5:13); kinahanglan man naton “magtindog sing malig-on” diri (Mga Taga-Galacia 5:1) paagi sa pagsalig kay Cristo.

Mga Ideya para sa Personal nga Pagtuon sang Balaan nga Mga Kasulatan

Mga Taga-Galacia 1–5

Ang layi ni Cristo nagahilway sa akon.

Si Pablo nagsulat sa mga Santos sa Galacia sang iya mahibal-an nga nagakadala sila sang sayop nga mga panudlo (tan-awa sa Mga Taga-Galacia 1:6–9). Isa sining mga pinanudlo amo nga para maluwas, ang mga Gentil nga nagbaton sang ebanghelyo kinahanglan nga macircuncidar [circumcized] kag magsunod sa iban pa nga mga tradisyon sang layi ni Moises (tan-awa sa Mga Taga-Galacia 2). Gintawag ni Pablo ining mga tradisyon nga “gota sang [pagkaulipon] (Mga Taga-Galacia 5:1). Samtang imo ginabasa ang laygay ni Pablo sa mga taga-Galacia, pangitaa ang mga prinsipyo nga makabulig sa imo nga maintiendihan kon ano ang matuod-tuod nga kahilwayan. Pwede mo man binagbinagon kon ano nga sayop nga mga tradisyon ukon iban pa nga mga gota sang pagkaulipon ang ara sa imo kabuhi. May butang bala nga nagapugong sa imo nga maeksperiyensyahan ang kahilwayan nga ginatanyag sang ebanghelyo? Paano “[ka] ginhilway” ni Cristo kag sang Iya ebanghelyo? (Mga Taga-Galacia 5:1).

Tan-awa man sa 2 Nefi 2:27; 9:10–12.

Mga Taga-Galacia 3

Manunubli ako sang mga bugay nga ginpromisa kay Abraham.

Ang pila sa mga Santos sa Galacia nabalaka nga tungod indi sila literal nga mga anak (“kaliwat ”) ni Abraham, indi nila mabaton ang mga bugay nga ginpromisa kay Abraham, lakip na ang pagkahitaas. Suno sa Mga Taga-Galacia 3:7–9, 13–14, 27–29, ano ang kinahanglan sang isa ka tawo para mangin “kaliwat ni Abraham”?

  Ngaa importante sa imo ang mga bugay nga ginpromisa kay Abraham?

Mga Taga-Galacia 3:6–25

May ebanghelyo ni Jesucristo si Abraham.

Ang Propeta nga si Joseph Smith nagpaathag: “Indi kita makapati nga ang sinang-una nga mga tawo sa nagliligad nga mga dinag-on wala gid sing ihibalo sang sistema sang langit pareho sang pagdumdom sang kalabanan, tungod nga ang tanan nga naluwas, naluwas paagi sa gahum sining dako nga plano sang kaluwasan, subong sang antes pa sang pagkari ni Cristo. … Si Abraham naghalad sang sakripisyo, kag wala sapayan sini, ang Ebanghelyo ginwali sa iya” (“The Elders of the Church in Kirtland to Their Brethren Abroad,” The Evening and the Morning Star, Mar. 1834, 143, JosephSmithPapers.org). Ngaa sa banta mo nga importante para sa mga Santos sang tiyempo ni Pablo nga mahibal-an nga si Abraham kag ang iban pa nga dumaan nga mga propeta may ebanghelyo ni Jesucristo? Ngaa importante sa imo nga mahibal-an ini? (Tan-awa sa Helaman 8:13–20; Moises 5:58–59; 6:50–66.)

 

Mga Taga-Galacia 5:13–26; 6:7–10

Kon ako “maggawi sa Espiritu,” mabaton ko ang “bunga sang Espiritu.”

Ang pagtuon sining mga bersikulo makabulig sa imo sa paghibalo kon daw ano ka kalubos nga nagagawi sa Espiritu. Naeksperiyensyahan mo bala ang bunga sang Espiritu nga nasambit sa mga bersikulo 22-23? Ano pa nga bunga, ukon mga resulta, sang espirituhanon nga pagpangabuhi ang imo natalupangdan? Pamensara sang maayo kon ano ang kinahanglan mo himuon para saguron pa gid ining bunga? Paano ang pagsagod sining bunga makapauswag sang importante nga mga kaangtanan sa imo kabuhi?

Kinahanglan ko pangitaon ang “bunga sang Espiritu” sa akon kabuhi.

Kon ginatinguhaan mo nga maggawi sa Espiritu pero ang imo mga pagpaninguha daw wala nagabunga sang ginpromisa nga bunga, basaha ang Mga Taga-Galacia 6:7–10. Ano nga mensahe ang nabatyagan mo nga gintigana sang Ginuo para sa imo sa sining mga bersikulo?

Tan-awa man sa Alma 32:28, 41–43; Doktrina kag mga Kasugtanan 64:32–34.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Taga-Galacia 3:11.Ano ang buot silingon sang “magkabuhi paagi sa pagtuo”? Paano bala kita nagapangabuhi nga may pagtuo bilang pamilya?

Mga Taga-Galacia 4:1–7.Mahimo mo sugdan ang Mga Taga-Galacia 4 paagi sa pag-istorya sang kinalain sang mga suluguon sang hari kag sang iya kabataan. Ano nga mga oportunidad ukon ikasarang ang ara sa anak sang hari nga wala sa suluguon? Pamensara ini samtang inyo ginabasa sing ululupod ang mga bersikulo 1–7. Ano ang ginatudlo sining mga bersikulo parte sa aton relasyon sa Amay nga Langitnon?

Mga Taga-Galacia 5:16–26.Pamensara nga hambalan ang kinalain sang “buhat sang unod” kag sang “bunga sang Espiritu.” Para mangin mas masadya ang inyo paghinambalanay, pwede nga markahan sang imo pamilya ang lainlain nga mga bunga nga gingamit ni Pablo agud ilaragway ang bunga sang Espiritu. Dayon magpili ang tagsa ka miyembro sang pamilya sang isa, ipaathag ini, kag maghambal parte sa isa ka tawo nga nagapakita sina nga bunga. Pwede ini magpadulong sa paghinambalanay kon paano imbitaron sang inyo pamilya ang Espiritu kag patubuon ini nga bunga. Pagkatapos sang paghinambalanay, pwede ninyo kaunon ang mga bunga sing ululupod.

Mga Taga-Galacia 6:1–2.May mga tiyempo nga ang isa sa imo pamilya “masapwan sa bisan anong paglapas.” Ano nga laygay ang imo makita sa Mga Taga-Galacia 6:1–2 kon ano ang himuon sa amo nga sitwasyon?

Mga Taga-Galacia 6:7–10.Kon ang imo pamilya nakatanom na sang bisan ano sing ululupod, magamit mo inang eksperiyensya para ipaathag ang prinsipyo nga “bisan ano ang ginasab-og sang tawo, ina man ang iya anihon” (bersikulo 7). Ukon pwede mo pamangkuton ang mga miyembro sang pamilya sang ila paborito nga prutas ukon utan kag hambalan kon ano ang kinahanglan himuon para patubuon ang tanom nga nagapatubas sinang pagkaon. (Tan-awa ang litrato sa katapusan sining outline.) Pwede ninyo hambalan ang mga bugay nga ginahandum nga mabaton sang imo pamilya kag kon paano “anihon” inang mga bugay.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Teach Me to Walk in the Light [Tudloi Ako sang Iya Gugma],” Mga Himno kag mga Ambahanon sang Kabataan, 66.

Pagpauswag sang Aton Pagpanudlo

Buligi ang imo pamilya nga ipaanggid ang balaan nga mga kasulatan sa ila kabuhi. Siling ni Nefi, “Gindapat ko ang tanan nga balaan nga mga kasulatan sa aton, agud nga mangin para ini sa aton kapuslanan kag tinun-an” (1 Nefi 19:23 Para buligan ang imo pamilya nga himuon ini, pwede mo sila imbitaron nga pamensaron sang maayo ang mga tiyempo nga ila naeksperiyensyahan ang bunga sang Espiritu nga ginlaragway sa Mga Taga-Galacia 5:22–23. (Tan-awa sa Teaching in the Savior’s Way, 21.)

Gintudlo ni Pablo nga kon kita maggawi sa Espiritu, maeksperiyensyahan naton ang “bunga sang Espiritu” sa aton mga kabuhi.