Oktubre 16–22

1 kag 2 Mga Taga-Tesalonica

“Pun-i ang Kakulangan sa Inyo Pagtuo”

Kon indi naton pag-isulat ang mga pagpabatyag nga aton mabaton halin sa Espiritu, basi malimtan naton ang mga ini. Ano ang ginapabatyag sang Espiritu nga imo isulat samtang imo ginabasa ang 1 kag 2 Mga Taga-Tesalonica?

Isulat Ang Imo Mga Panghunahuna

Sa Tesalonica, si Pablo kag Silas gin-akusar nga “nagpabaliskad sang kalibutan” (Mga Binuhatan 17:6). Ang ila pinanudlo nagpaakig sang pila ka mga lider sang mga Judio, kag ining mga lider naglabugay sang katawhan nga magkinagubot (tan-awa sa Mga Binuhatan 17:1–10). Bilang resulta, ginlaygayan sanday Pablo kag Silas nga magbiya sa Tesalonica. Nabalaka si Pablo para sa bag-o nga mga hinaylo sa Tesalonica kag sa pagpamigos nga ila ginaatubang, pero wala na sia makabalik para bisitahan sila. “Sang indi na ako makabatas,” ginsulat niya, “nagpadala ako agud nga makahibalo ako sang inyo pagtuo.” Bilang sabat, ang kabulig ni Pablo nga si Timoteo, nga nagaalagad sa Tesalonica, “nagdala sa amon sang malipayong mga balita sang inyo pagtuo kag paghigugma” (1 Mga Taga-Tesalonica 3:5–6). Sa matuod, ang mga Santos sa Tesalonica nakilala nga mga huwaran “sa tanan nga nagatuo” (1 Mga Taga-Tesalonica 1:7), kag ang balita sang ila pagtuo naglapta sa iban nga mga siyudad. Hunahunaa ang kalipay kag kaumpawan ni Pablo sang mabatian nga ang iya pagpangabudlay sa tunga nila “indi walay pulos” (1 Mga Taga-Tesalonica 2:1). Pero nahibal-an ni Pablo nga ang pagkamatinuohon sang nagliligad indi bastante para sa espirituhanon nga kaluwasan sa palaabuton, kag nagahalong sia sa impluwensya sang di-matuod nga mga manunudlo sa tunga sang mga Santos (tan-awa sa 2 Mga Taga-Tesalonica 2:2–3). Ang iya mensahe sa ila, kag sa aton, amo ang magpadayon “nga pun-an ang kakulangan sa [aton] pagtuo” kag “magbugana sing labi kag labi pa” sa pagpalangga (tan-awa sa 1 Mga Taga-Tesalonica 3:10; 4:10).

Mga Ideya para sa Personal nga Pagtuon sang Balaan nga mga Kasulatan

1 Mga Taga-Tesalonica 1–2

Ang mga alagad ni Jesucristo nagaserbisyo sa iban nga may sinseridad kag pagpalangga.

Sa 1 Mga Taga-Tesalonica, ang mga pulong ni Pablo nagapakita sang pareho kabalaka kag kalipay sang tawo nga naghatag sang iya bug-os nga kaugalingon sa pagserbisyo sa mga anak sang Dios. Ilabi na sa una nga duha ka kapitulo sang 1 Mga Taga-Tesalonica, makita mo ang mga tinaga kag dinalan nga nagalaragway sang mga pamatasan kag aksyon sang isa ka disipulo sang Ginuo. Halimbawa, ano ang imo matun-an sa 1 Mga Taga-Tesalonica 1:5–8; 2:1–13 parte sa pagserbisyo sa Ginuo?

Hunahunaa ang imo kaugalingon nga mga oportunidad sa pagserbisyo sa Dios kag sa Iya mga anak. Ano ang imo nakita sa sining mga kapitulo nga nakainspirar sa imo nga mas panamion pa ang imo pagserbisyo? Hunahunaa nga pamangkuton ang imo kaugalingon base sa kon anong imo makita, pareho sang “Huwaran bala ako sang mga butang nga akon nahibal-an?” (tan-awa sa 1 Mga Taga-Tesalonica 1:7).

1 Mga Taga-Tesalonica 3:7–13; 4:1–12

“Magdugang kag magpabugana sang gugma.”

Si Pablo nagpangalipay sa pagkamatinuohon sang mga Santos sa Tesalonica (tan-awa sa 1 Mga Taga-Tesalonica 3:7–9). Pero gusto man niya nga “magbugana [sila] sing labi kag labi pa” sa sinang pagkamatinuohon (1 Mga Taga-Tesalonica 4:1). Samtang imo ginabasa ang 1 Mga Taga-Tesalonica 3:7–13; 4:1–12, binagbinaga ang mga paagi nga “magbugana sing labi kag labi” sa espirituhanon (1 Mga Taga-Tesalonica 4:10). Halimbawa, pat-ini nga naggamit si Pablo sang mga tinaga nga “pagkabalaan (holiness)” kag “pagpakabalaan (sanctification).” Ano ang imo matun-an sa mga sinulatan ni Pablo parte sa mga kahulugan sining mga tinaga? Paano makabulig sa imo ang Manluluwas nga mangin mas balaan kag ginpakabalaan?

 

1 Mga Taga-Tesalonica 4:16–18; 5:1–10; 2 Mga Taga-Tesalonica 1:4–10

Kon matinuohon ako kag mahinalungon, mangin handa ako para sa Ika-duha nga Pagkari sang Manluluwas.

Sa 1 Mga Taga-Tesalonica 5:1–10, naggamit si Pablo sang pila ka mga paanggid para magtudlo parte sa tion nga magbalik si Jesus sa duta. Sa imo pagtuon sining mga paanggid, pamensara nga isulat ang mga panghunahuna nga magaabot sa imo parte sa Ika-duhang Pagkari ni Jesucristo:

• “Makawat sa kagab-ihon”:

• “Kasakit sa pag-anak sang babayi nga nagadala”:

• Iban pa nga paanggid nga imo makita:

Ano pa nga mga kamatuoran ang imo matun-an sa 1 Mga Taga-Tesalonica 4:16–18; 5:1–10; 2 Mga Taga-Tesalonica 1:4–10? Ano ang nabatyagan mo nga dapat himuon para magbantay kag maghanda para sa pag-abot sang Manluluwas?

 

2 Mga Taga-Tesalonica 2

Ang apostasiya, ukon pagtalikod sa kamatuoran, ginpropesiya nga magauna sa Ika-duha nga Pagkari.

Sa tunga sang nagadako nga pagpamigos, madamo nga mga Santos sa Tesalonica ang nagapati nga ang Ika-duha nga Pagkari sang Manluluwas malapit na. Pero nakahibalo si Pablo nga antes magbalik si Jesus sa duta may matabo nga apostasiya—isa ka rebelyon ukon “pagtalikod” sa kamatuoran (tan-awa sa 2 Mga Taga-Tesalonica 2:1–4 Mahimo mo padalumon ang imo pag-intiendi sang Dako nga Apostasiya—kag ang imo kapasalamatan sa Pagpanumbalik—paagi sa pagbinagbinag sang mga masunod:

• Balaan nga mga kasulatan nga nagapropesiya sang Apostasiya: Isaias 24:5; Amos 8:11–12; Mateo 24:4–14; 2 Timoteo 4:3–4

• Balaan nga mga kasulatan nga nagapakita nga ang Apostasiya nagasugod na sang tiyempo ni Pablo: Mga Binuhatan 20:28–30; Mga Taga-Galacia 1:6–7; 1 Timoteo 1:5–7

• Mga obserbasyon sang Kristiyano nga mga tag-reporma parte sa Dako nga Apostasiya:

  Martin Luther: “Wala ako sang gintuyo magluwas sa pagreporma sang Simbahan [Katolika] agud magsunod sa Balaan nga mga Kasulatan. … Ang mahambal ko lang nga ang Kristiyanismo nag-untat na sa pagluntad sa tunga sadtong mga dapat nagatipig sini” (sa E. G. Schweibert, Luther and His Times: The Reformation from a New Perspective [1950], 590).

  Roger Williams: “Ang apostasiya … nagliwat sang tanan [nga simbahan] nga indi na ini makalampuwas sa sina nga apostasiya tubtob nga magpadala si Cristo sang bag-o nga mga apostoles sa pagtukod liwat sang mga simbahan” (sa Philip Schaff, The Creeds of Christendom [1877], 851).

Tan-awa man sa 2 Nefi 28.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

1 Mga Taga-Tesalonica 3:9–13.Ano ang nanamian mo sa balatyagon ni Pablo para sa iya mga abyan? Paano kita “magdugang kag magpabugana sa gugma isa ayon sa isa”? (bersikulo 12).

1 Mga Taga-Tesalonica 4:13–18.Ano nga mga dinalan sa sining mga bersikulo parte sa Pagkabanhaw ang nagahatag sa imo sing kaumpawan?

1 Mga Taga-Tesalonica 5:14–25.Samtang imo ginarebyu ang laygay ni Pablo sa 1 Mga Taga-Tesalonica 5:14–25, hagara ang kada miyembro sang pamilya nga magpangita sang dinalan nga pwede tutokan sang pamilya. Magpangita sang matugahon nga paagi agud i-display ining mga dinalan sa inyo puluy-an bilang pahanumdom. Halimbawa, ang tagsa ka tawo mahimo nga magpangita ukon magdrowing sang mga litrato nga nagapakita ukon nagapabakod sang dinalan nga iya ginpili.

2 Mga Taga-Tesalonica 3:13.Nakabatyag ka bala nga “nagaluya sa paghimo sang maayo”—ayhan ginabug-atan, sang mga ginapangayo sang pagkadisipulo? Ano ang nagabulig sa aton kon makabatyag kita sang amo sini? (Tan-awa sa Mga Taga-Galacia 6:9; Doktrina kag mga Kasugtanan 64:33.) Paano naton suportahan ang kada isa kon matabo ini?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Teach Me to Walk in the Light [Tudloi Ako sang Iya Gugma],” Mga Himno kag mga Ambahanon sang Kabataan, no. 66.

Pagpauswag sang Personal nga Pagtuon

Magpangayo sang rebelasyon kada adlaw. “Ang rebelasyon masami nagaabot ‘dinalan sa dinalan’ (2 Nefi 28:30), indi tingob sa gilayon. … Indi pagpamensara [ang pagtuon sang ebanghelyo] nga isa ka butang nga ginahatagan mo sang tion kundi isa ka butang nga pirme mo ginahimo” (Teaching in the Savior’s Way, 12).

Resurrected Christ [Ang Nabanhaw nga Cristo], ni Robert T. Barrett