tatlo ka babayi nga nagalakat sa gwa sang templo

Oktubre 23–29

1 kag 2 Timoteo; Tito; Filemon

“Magmangin Huwaran Ka sa mga Nagatuo”

Kon kaisa makabulig ang pagsugod sang imo pagtuon sang balaan nga mga kasulatan nga may isa ukon duha ka mga pamangkot sa imo pensar. Imbitaha ang Espiritu nga giyahan ka sa mga sabat samtang ikaw nagatuon, kag irekord ang bisan ano nga inspirasyon nga imo mabaton.

Isulat Ang Imo Mga Panghunahuna

Sa mga sulat ni Pablo kanday Timoteo, Tito, kag Filemon, maintiendihan naton diutay ang unod sang tagipusuon sang isa ka alagad sang Ginuo. Indi pareho sa iban nga sulat ni Pablo sa bilog nga mga kongregasyon, ang mga ini ginsulat sa mga indibidwal—mga suod nga abyan kag mga kaupod sa buluhaton sang Dios—kag ang pagbasa sini daw pareho sang pagpamati sang paghinambalanay. Makita naton si Pablo nga ginapaisog sanday Timoteo kag Tito, duha ka lider sang mga kongregasyon, sa ila pagserbisyo sa Simbahan. Makita naton sia nga ginapangabay ang iya abyan nga si Filemon nga makig-uli sa kapareho nga Santos kag kabigon sia nga utod sa ebanghelyo. Ang mga pulong ni Pablo wala nagatumod sa aton sing direkta, kag mahimo nga wala sia nagpaabot nga isa ka adlaw madamo kaayo nga mga tawo ang magabasa sang mga ini. Pero makita naton sa sining mga sulat ang laygay kag pagpaisog sa aton, bisan ano man ang aton personal nga pag-alagad kay Cristo.

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Sin-o sanday Timoteo kag Tito?

Si Timoteo kag Tito nag-alagad upod kay Pablo sa pila niya ka pangmisyonaryo nga mga biyahe. Sa ila pagserbisyo, nakuha nila ang respeto kag pagsalig ni Pablo. Sang ulihi si Timoteo gintawag nga lider sang Simbahan sa Efeso, kag si Tito gintawag nga lider sa Creta. Sa sining mga sulat, ginhatagan ni Pablo si Timoteo kag Tito sang mga panulin kag pagpaisog nahanungod sa ila mga responsibilidad, nga nagalakip sang pagwali sang ebanghelyo kag pagtawag sang mga tawo nga mag-alagad nga mga obispo.

 

duha ka misyonero nga nagaistorya sa isa ka tawo

“[Indi pagtugoti ang bisan sin-o nga [tamayon] ang imo pagkapamatan-on, kundi magmangin huwaran ka sa mga nagatuo” (1 Timoteo 4:12).

1 Timoteo 4:10–16

“Magmangin huwaran ka sa mga nagatuo”

Medyo hubin pa si Timoteo, pero nahibal-an ni Pablo nga mangin maayo sia nga lider sang Simbahan wala sapayan sang iya kahubin. Ano nga laygay ang ginhatag ni Pablo kay Timoteo sa 1 Timoteo 4:10–16? Paano ining laygay makabulig sa imo sa pagtuytoy sa iban sa Manluluwas kag sa Iya ebanghelyo?

Tan-awa man sa Alma 17:11.

2 Timoteo

“Kay ang Dios wala maghatag sa aton sang espiritu sang katalaw; kundi sang gahum, kag gugma, kag kabut-anan.”

Ang 2 Timoteo ginapatihan nga amo ang katapusan nga sulat nga ginhimo ni Pablo, kag daw nakahibalo sia nga ang iya tion sa duta malip-ot na lang (tan-awa sa 2 Timoteo 4:6–8). Ano ayhan ang nabatyagan ni Timoteo, nga nakahibalo nga basi dugay-dugay madula na ang iya sinaligan nga manunudlo kag lider? Ano ang ginhambal ni Pablo para paisugon sia? Pwede ka man magbasa nga ginapanumdom ang imo kaugalingon nga mga kabudlayan kag mga kahadlok. Ano nga mga mensahe sang paglaum kag pagpaisog ang ginatigana sang Ginuo para sa imo sa 2 Timoteo?

 

2 Timoteo 3

Ang pagpangabuhi sang ebanghelyo nagahatag sang proteksyon sa espirituhanon nga mga katalagman sa ulihing mga adlaw.

Nagakabuhi kita sa “ulihing mga adlaw” nga ginsiling ni Pablo, kag nag-abot na ang “makahalanguyos nga mga tion” (2 Timoteo 3:1). Samtang imo ginabasa ang 2 Timoteo 3, isulat ang mga peligro sa ulihing mga adlaw nga ginmitlang (tan-awa man sa 1 Timoteo 4:1–3):

May mapensaran ka bala nga mga halimbawa sining mga peligro sa kalibutan sa imo palibot—ukon sa imo mismo kabuhi? Paano ining mga peligro, pareho sa mga tawo nga ginlaragway sa bersikulo 6, “nagasulod [sa inyo balay], kag nagapamihag [sa inyo]”? Ano nga laygay ang imo makita sa 2 Timoteo 3, kag sa iban pa nga bahin sining mga sulat, nga mahimo mag-amlig sa imo kag sa imo pamilya sa sining espirituhanon nga mga peligro? (tan-awa, halimbawa sa, 1 Timoteo 1:3–11; 2 Timoteo 2:15–16; Tito 2:1–8).

Sin-o si Filemon?

Si Filemon isa ka Cristohanon nga nahaylo ni Pablo sa ebanghelyo. Si Filemon may ulipon nga ang ngalan Onesimo, nga sa nahibal-an nalagyo pa-Roma. Didto nakilala ni Onesimo si Pablo kag nahaylo sa ebanghelyo. Ginpabalik ni Pablo si Onesimo kay Filemon dala ang sulat nga nagapaisog kay Filemon nga batunon si Onesimo “indi na subong nga ulipon kundi labaw pa sa ulipon, subong nga utod nga hinigugma” (Filemon 1:16).

Filemon

Ginatrato sang mga disipulo ni Jesucristo ang kada isa nga mga kauturan.

Samtang imo ginabasa ang sulat ni Pablo kay Filemon, binagbinaga kon paano mo gamiton ang iya laygay sa imo mga kaangtanan sa iban. Sa idalom ang pila ka mga pamangkot nga mahimo mo pamensaron:

• Mga bersikulo 1–7: Ano ang ginapanugyan sang mga tinaga pareho sang “masigkamanugpangabudlay” kag “masigkasoldado” sa imo parte sa mga kaangtanan sa tunga sang mga Santos? Sang san-o ka nakabatyag nga “naumpawan paagi” sa isa ka utod nga lalaki ukon babayi kay Cristo?

• Mga bersikulo 8–16: Ano ang buot silingon sang “pagsugo” kag “pagpakitluoy”? Ngaa ginpili ni Pablo nga magpakitluoy kay Filemon imbes nga suguon sia? Ano ang ginalauman ni Pablo nga matabo sa pagpabalik kay Onesimo sa kay Filemon?

• Bersikulo 16: Ano ang buot silingon sang mangin “utod [nga lalaki ukon babayi] nga hinigugma … sa Ginuo”? May kilala ka bala nga kinahanglan mo batunon sa sini nga paagi?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

1 Timoteo 2:9–10.Ano ang buot silingon sang “[magpatahum sang aton kaugalingon] … sa mga buhat nga maayo”? Ano ang pila sa maayong mga binuhatan nga pwede himuon sang aton pamilya sini nga semana? Pwede kamo magkanta sing kanta parte sa paghimo sang maayo , pareho sang “Do What Is Right [Himoa Ang Husto]” (Mga Himno kag mga Ambahanon sang Kabataan, no. 34.

1 Timoteo 4:12Para buligan ang mga miyembro sang imo pamilya nga maghandum nga mangin “huwaran sa mga nagatuo,” pamensara nga imbitaron sila sa pagdrowing sang mga litrato sang mga tawo nga nangin maayong mga halimbawa sa ila. Paano kita gin-inspirar sining mga tawo nga sundon si Jesucristo?  

1 Timoteo 6:7–12.Ngaa sa banta mo nga ang “gugma sa kuwarta amo ang gamot sang tanan nga kalainan”? Ano ang katalagman sang pagtutok sang aton mga kabuhi sa kuwarta ukon propiyedad? Paano kita mangin kontento sa mga bugay nga ara sa aton?

2 Timoteo 3:14–17.Suno sa sining mga bersikulo, ano nga mga bugay ang nagaabot sa mga nakahibalo kag nagatuon sang balaan nga mga kasulatan? Ayhan pwede mag-istorya ang mga miyembro sang pamilya sang balaan nga mga kasulatan nga nakita nila nga labi ka “mapuslanon.”

Filemon 1:17–21.Ano ang handa himuon ni Pablo para kay Onesimo? Sa ano ini magkaanggid sa kon ano ang handa himuon sang Manluluwas para sa aton? (tan-awa man sa 1 Timoteo 2:5–6; Doktrina kag mga Kasugtanan 45:3–5). Paano naton sundon ang mga ehemplo ni Pablo kag sang Manluluwas?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Kindness Begins with Me [Kaluoy Sugod sa Akon],” Mga Himno kag mga Ambahanon sang Kabataan, 63.

Pagpauswag sang Aton Pagpanudlo

Magtudlo sang maathag kag simple nga doktrina. Ang ebanghelyo matahum sa iya kasimple (tan-awa sa Doktrina kag mga Kasugtanan 133:57). Imbes nga tinguhaan nga lingawon ang imo pamilya sang mga leksyon nga nagakinahanglan sang madamo nga pagpanghanda, tinguhai nga itudlo ang puro kag simple nga doktrina (tan-awa sa 1 Timoteo 1:3–7).

duha ka kabataan nga nagatuon sang balaan nga mga kasulatan

“[Halin] sang imo pagkabata nahibaloan mo ang balaan nga mga kasulatan nga makapaalam sa imo sa kaluwasan paagi sa pagtuo kay Cristo Jesus” (2 Timoteo 3:15).