Oktubre 9–15

Mga Taga-Filipos; Mga Taga-Colosas

“Mahimo Ko ang Tanan nga Butang paagi kay Cristo nga Nagapabakod sa Akon”

Sang san-o ang pinakaulihi nga ginbasa mo ang espirituhanon nga mga panghunahuna nga imo ginsulat sa tion nga nagatuon ka sang Bag-ong Katipan? Basi makabulig nga rebyuhon ang mga pagpabatyag nga imo na nabaton.

Isulat Ang Imo Mga Panghunahuna

Ginhimo ni Pablo ang iya mga sulat sa mga taga-Filipos kag mga taga-Colosas samtang priso sia sa Roma. Pero wala sa tono sining mga sulat nga naghalin ini sa isa ka tawo nga ara sa sulod sang prisuhan. Mas naghambal si Pablo parte sa kalipay, pagkasadya, kag pagpasalamat sangsa mga kabudlayan kag pagtilaw: “Ginawali si Cristo,” siling niya, “kag sa sini nagakalipay ako” (Mga Taga-Filipos 1:18). Kag “bisan wala ako nagaupod sa inyo sa lawas, apang sa espiritu yara ako sa inyo, nga nagakalipay sa pagtan-aw … sang kalig-on sang inyo pagtuo kay Cristo” (Mga Taga-Colosas 2:5). Sigurado, “ang paghidaet sang Dios” nga naeksperiyensyahan ni Pablo sa tunga sang iya mabudlay nga sitwasyon “nagalabaw sa tanan nga paghangop” (Mga Taga-Filipos 4:7), pero nangin matuod ini para sa iya. Sa aton kaugalingon nga mga pagtilaw, mabatyagan naton ang pareho nga paghidaet kag “magkalipay sa gihapon sa Ginuo” (Mga Taga-Filipos 4:4). Sarang kita, pareho kay Pablo, nga magsalig sing lubos kay Jesucristo, “nga sa iya gintubos kita” (Mga Taga-Colosas 1:14). Makasiling kita pareho kay Pablo, “Mahimo ko ang tanan nga butang paagi kay Cristo nga nagapabakod sa akon” (Mga Taga-Filipos 4:13; tan-awa man sa Mga Taga-Colosas 1:11).

Mga Ideya para sa Personal nga Pagtuon sang Balaan nga mga Kasulatan

Mga Taga-Filipos 2:5–11; Mga Taga-Colosas 1:12–23

Ang akon pagtuo natukod kay Jesucristo.

Si Pangulong Russell M. Nelson nagsiling nga kon itutok niya ang iya pagtuon sang balaan nga mga kasulatan sa mga bersikulo nga parte kay Jesucristo, kadako sang epekto sini sa iya nga pamatyagan niya daw “lain sia nga tawo!” (“Ang Pagkuha sang Gahum ni Jesucristo Pasulod sa Aton mga Kabuhi,” Liahona, Mayo 2017, 39). Pamensara ang pagsunod sa iya ehemplo samtang imo ginabasa ang Mga Taga-Filipos kag Mga Taga-Colosas (ilabi na ang Mga Taga-Filipos 2:5–11; Mga Taga-Colosas 1:12–23). Ano ang imo matun-an parte sa Manluluwas? Paano makabulig sa imo ining mga kamatuoran nga mangin “lain nga lalaki” ukon babayi?

Mga Taga-Filipos 2:12–13

Paano naton “panikasugan ang [aton] kaluwasan”?

May mga tawo nga nagagamit sang dinalan nga “panikasugi ang inyo kaluwasan” (

Mga Taga-Filipos 3:4–14

Ang ebanghelyo ni Jesucristo takos nga kabaylo sa tanan nga sakripisyo.

Kadako sang ginbaylo ni Pablo sang mahaylo sia sa ebanghelyo ni Jesucristo, lakip na ang iya posisyon sa sosyedad sang Judio bilang isa ka Fariseo. Sa Mga Taga-Filipos 3:5–14, pangitaa kon ano ang naagom ni Pablo tungod nga handa sia magsakripisyo para sa ebanghelyo. Ano ang iya nabatyagan sa iya mga sakripisyo?

Dayon pamensara ang imo kaugalingon nga pagkadisipulo. Ano ang imo ginsakripisyo para sa ebanghelyo ni Jesucristo? Ano ang imo nabaton? May mga pagsakripisyo pa bala nga pamatyag mo kinahanglan mo himuon para mangin mas maukod nga disipulo sang Manluluwas?

Tan-awa man sa 3 Nefi 9:19–20; Doktrina kag mga Kasugtanan 58:2–5; Taylor G. Godoy, “Isa Na Lang ka Adlaw,” Liahona, Mayo 2018, 34–36.

Mga Taga-Filipos 4:1–13

Makakita ako sang kalipay kay Cristo, bisan ano pa ang akon sirkumstansya.

Ang kabuhi ni Pablo isa ka mabaskog nga halimbawa sang kamatuoran nga ginpahayag ni Pangulong Russell M. Nelson: “Kon ang tutok sang aton mga kabuhi ara … kay Jesucristo kag sa Iya ebanghelyo, makabatyag kita sang kalipay bisan ano pa ang nagakatabo—ukon wala nagakatabo—sa aton mga kabuhi. Ang kalipay nagaabot halin kag bangud sa Iya” (“Joy and Spiritual Survival,” Liahona, Nob. 2016, 82).

Sa imo pagbasa sang Mga Taga-Filipos—labi na sa kapitulo 4—pangitaa ang mga pahayag nga makabulig sa imo nga makakita sang kalipay sa bisan ano nga sitwasyon sa imo kabuhi. Naeksperiyensyahan mo na bala ang “paghidaet sang Dios” sa tion sang kabudlayan? (bersikulo 7). Sang san-o ka nakakita sang kusog “paagi kay Cristo” sa paghimo sang mabudlay nga mga butang? (bersikulo 13). Ngaa sa banta mo nga importante ang mangin “kontento” sa tanan nga sitwasyon? (bersikulo 11). Paano ang pagpangabuhi sang mga kinaiya sa bersikulo 8 nagabulig sa imo nga makakita sang kalipay sa imo mga sirkumstansya?

Tan-awa sa Alma 33:23.

Mga Taga-Colosas 3:1–17

Ang mga disipulo ni Jesucristo nangin “bag-o” samtang ila ginapangabuhi ang Iya ebanghelyo.

Paano mo masiling nga si Jesucristo nagabulig sa imo nga mangin “bag-o nga [lalaki] [ukon babayi]”? Isa sa mga paagi nga binagbinagon ini amo nga tun-an ang Mga Taga-Colosas 3:1–17 kag maghimo sang listahan sang mga pamatasan, kinaugali, kag mga aksyon sang “daan nga tawo” kag isa pa ka listahan sang mga pamatasan, kinaugali, kag mga aksyon sang “bag-o nga tawo.”

Isulat ang imo mga panghunahuna kon paano ka ginabag-o sang Manluluwas, para marebyu mo ang mga ini sa palaabuton kag binagbinagon kon paano ka nagauswag.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Taga-Filipos.Mahimo nga natalupangdan sang imo pamilya ang mga tinaga nga kalipay ukon pagkinasadya nga masami ginasulit sa Mga Taga-Filipos. Tagsa ka tion nga masugata ninyo ang isa sining mga tinaga, pwede kamo magpundo kag hambalan kon ano ang gintudlo ni Pablo kon paano makakita sang kalipay.

Mga Taga-Filipos 2:14–16.Paano kita “magsiga subong nga mga sulo sa kalibutan”?

Mga Taga-Filipos 4:8.Pwede nga hibaluon sang imo pamilya ang mga butang nga “panumdumon” nga sigo sa mga paglaragway sa sining bersikulo (tan-awa man sa Mga Artikulo sang Pagtuo 1:13). Paano mabugayan ang imo pamilya paagi sa pagsunod sang laygay ni Pablo?

Mga Taga-Colosas 1:23; 2:7.Basi pwede nga basahon sang imo pamilya ining mga bersikulo nga nagapungko palibot sa isa ka puno sang kahoy ukon samtang nagatulok sa litrato sang isa ka kahoy (pareho sang naupod sa sining outline). Ano ang buot silingon sang mangin “mapasad” kag “nakapanggamot” kay Cristo? Paano naton buligan ang kada isa nga pabakuron ang aton espirituhanon nga mga gamot?

Mga Taga-Colosas 2:2–3.Basi masadyahan ang imo pamilya sa pagpuno sang isa ka “baul” sang mga butang nga nagatiglawas sang “manggad” kag sang “kamanggaran sang paghangop kag [ihibalo]” nga imo makita sa ebanghelyo.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Aton Pagpanudlo

Ipangabuhi ang imo panaksihon. “Ginatudlo mo kon ano ka,” panudlo ni Elder Neal A. Maxwell. “Ang imo mga kinaiya mas madumduman … sangsa isa ka partikular nga kamatuoran sa isa ka partikular nga leksyon (sa Teaching in the Savior’s Way, 13).

Nagpanudlo si Pablo nga ang aton pagtuo dapat “nakapanggamot” kay Jesucristo (Mga Taga-Colosas 2:7