pamilya nga nagatan-aw sang mga litrato

Oktubre 2–8

Mga Taga-Efeso

“Sa [Pagperpekto] sang mga Santos”

May nakita ka bala nga koneksyon sa mga mensahe sa pangkabilugan nga komperensya kag sa Sulat ni Pablo sa Mga Taga-Efeso?

Isulat Ang Imo Mga Panghunahuna

Sang nagsugod nga maglapta ang ebanghelyo sa Efeso, nagtuga ini sang “indi diutay nga kagubot” (Mga Binuhatan 19:23) sa mga taga-Efeso. Ang mga manughimo sang mga altar para sa pagano nga diosa nagkabig sang Kristiyanismo nga sablag sa ila palangitan-an, kag wala madugayi “nagsingkal sila, … gani ang banwa napuno sang kagubot” (tan-awa sa Mga Binuhatan 19:27–29). Pamensara nga kuno abi bag-o ka nga nahaylo sa ebanghelyo sa amo sina nga sitwasyon. Madamo sa mga taga-Efeso ang nagbaton kag nagpangabuhi sang ebanghelyo sa tunga sining “kinagamo” (Mga Binuhatan 19:40), kag ginpasalig sila ni Pablo nga “si Cristo … amo ang aton paghidaet” (Mga Taga-Efeso 2:13–14). Ining mga tinaga, upod ang iya imbitasyon nga “isikway ang tanan nga kapait, kag kasingkal, kag kaakig, kag sininggitanay, kag pagpasipala” (Mga Taga-Efeso 4:31), daw nagakabagay kag makaulumpaw sa aton panahon pareho sa ila nga panahon. Para sa mga taga-Efeso, amo man para sa kada isa sa aton, ang kusog sa pag-atubang sang kabudlayan nagahalin “sa Ginuo, kag sa kusog sang iya gahum” (tan-awa sa Mga Taga-Efeso 6:10–13).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mga Taga-Efeso 1:4–11, 17–19

Ang Dios nagpili, ukon nagtando (foreordained), sa akon para tumanon ang pila ka mga responsibilidad sa kalibutan.

Naghambal si Pablo parte sa mga Santos nga “gintangdo (predestinated)” sang Dios kag “ginpili na nga daan … sa wala pa mapasad ang kalibutan” nga mangin Iya katawhan. Ugaling, sa nasiling ni Pangulong Henry B. Eyring, wala ini nagakahulugan nga “ginpili na nga daan sang Dios kon sin-o sa Iya mga anak ang Iya luwason kag ginpatigayon ang ebanghelyo sa ila, samtang ang mga wala nakabati sang ebanghelyo wala ‘ginpili.’… Ang plano sang Dios mas mapinalanggaon kag patas sangsa sina. Ang aton Amay nga Langitnon maluyag nga tipunon kag bugayan ang tanan Niya nga pamilya”(“Pagtipon sang Pamilya sang Dios,” Liahona, Mayo 2017, 20–21). Ang tanan nga anak sang Dios mahimo nga magbaton sang ebanghelyo kag sang mga ordinansa sini tungod sa buluhaton nga ginahimo para sa mga patay sa balaan nga mga templo.

Bisan nga wala sang pinili na nga daan nga maluwas ukon indi maluwas, ang moderno nga rebelasyon nagatudlo nga pila sa mga anak sang Dios ginpili ukon “gintangdo,” sa kalibutan antes sa mortalidad sa pagpuno sang pila ka mga responsibilidad sa pagtuman sang mga katuyuan sang Dios sa duta. Samtang imo ginabasa ang Mga Taga-Efeso 1, binagbinaga kon paano magamit sa imo ining kamatuoran.

Mga Taga-Efeso 1:10

Ang Dios “magatingob sang tanan nga butang kay Cristo.”

Ngaa sa banta mo nga ginatawag ang aton panahon nga “dispensasyon sang kabug-osan sang kapanahunan”? Ano ayhan ang buot silingon sang “magatingob sang tanan nga butang kay Cristo”? Samtang imo ginapadaluman sang pamensaron ining mga dinalan, basaha ang masunod nga balaan nga mga kasulatan: Mga Taga-Efeso 4:13; 2 Nefi 30:7–8; Doktrina kag mga Kasugtanan 110:11–16; 112:30–32; 128:18–21. Mahimo nga mainspirar ka nga isulat ang imo kaugalingon nga mga paathag sa sining mga dinalan.

Tan-awa man sa David A. Bednar, “Magatingob sang Tanan nga Butang kay Cristo,” Liahona, Nob. 2018, 21–24.

Mga Taga-Efeso 2:19–22; 3:1–7; 4:11–16

Ang Simbahan gintukod sa pundasyon sang mga apostoles kag mga propeta, kag si Jesucristo amo ang puno nga salandigan [cornerstone].

Suno sa Mga Taga-Efeso 2:19–22; 3:1–7; 4:11–16, ngaa may mga propeta kita kag mga apostoles? Hunahunaa ang mga mensahe halin sa mga propeta kag mga apostoles nga imo nabatian sa tion sang pangkabilogan nga komperensya. Paano gintuman sang ila mga pinanudlo ang mga katuyuan nga ginlaragway ni Pablo? Halimbawa, paano nakabulig sa imo ining mga pinanudlo nga indi “mapalid-palid sang tagsa ka hangin sang pagtulun-an”?

Paano si Jesucristo nangin daw pamusod nga bato para sa Simbahan? Paano Sia nangin daw pamusod nga bato sa imo kabuhi?

Tan-awa man sa Mga Binuhatan 4:10–12.

pamusod nga bato sang bilding

Si Jesucristo amo ang pamusod nga bato sang Simbahan.

Mga Taga-Efeso 5:21–6:4

Ang pagsunod sang ehemplo sang Manluluwas makapabakod sang mga relasyon sa akon pamilya.

Samtang imo ginabasa ang Mga Taga-Efeso 5:21–6:4, hunahunaa kon paano pabakuron sang laygay sa sining mga bersikulo ang mga relasyon sa imo pamilya.

Importante nga tandaan nga ang mga pulong ni Pablo sa Mga Taga-Efeso 5:22–24 ginsulat sa konteksto sang mga kustombre sang sosyedad sa iya panahon. Ang mga propeta kag mga apostoles sa karon nagatudlo nga ang mga lalaki indi labaw sangsa mga babayi kag ang mga mag-asawa “palareho nga magkatuwang” (tan-awa sa “Ang Panimalay: Isa ka Proklamasyon sa Kalibutan,” ChurchofJesusChrist.org). Bisan pa, makakita ka gihapon sang nagakabagay nga laygay sa Mga Taga-Efeso 5:25–33. Halimbawa, paano ni Cristo ginpakita ang Iya pagpalangga sa mga Santos? Ano ang ginapaintiendi sini parte sa kon paano dapat tratuhon sang mag-asawa, bilang palareho nga magkatuwang, ang kada isa? Ano nga mga mensahe ang imo makita para sa imo kaugalingon sa sining dinalan?

Mga Taga-Efeso 6:10–18

Ang taming sang Dios magabulig amlig sa akon batok sa malain.

Samtang imo ginabasa ang Mga Taga-Efeso 6:10–18, pamensara kon ngaa gin-ngalanan ni Pablo sang amo sadto ang tagsa ka parte sang panaming. Sa ano ka ginaamligan sang “bug-os nga hinganib sang Dios”? Ano ang pwede mo himuon para mas masul-ob ang tagsa ka bahin sang panaming adlaw-adlaw?

Tan-awa man sa 2 Nefi 1:23; Doktrina kag mga Kasugtanan 27:15–18.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Taga-Efeso 1:10.Agud itudlo ining bersikulo, gingamit ni Elder David A. Bednar ang halimbawa sang lubid (tan-awa sa “Tipunon sing Isa ang Tanan kay Cristo”). Pamensara nga magpakita sa mga miyembro sang pamilya sang lubid kag pakapti kag pahimutari ini sa ila samtang imo ginapaambit ang mga bahin sang mensahe ni Elder Bednar. Paano ginatipon sang Dios ang tanan nga butang kay Cristo? Paano kita ginabugayan tungod sining pagtipon?

Mga Taga-Efeso 2:4–10; 3:14–21.Imbitaha ang mga miyembro sang pamilya sa pag-istorya sang mga eksperiyensya nga nabatyagan nila ang pagpalangga kag kaluoy sang Dios kag ni Jesucristo nga nalaragway sa sining mga bersikulo.

Mga Taga-Efeso 2:12–19.Mahimo nga masadyahan ang imo pamilya sa pagpatindog sang mga pader gamit ang mga ulunan ukon iban pa nga mga bagay sa inyo balay kag dayon panumbahon ang mga ini. Samtang gintumod ni Pablo ang “pader” sa tunga sang mga Gentil kag mga Judio, ano nga klase sang mga pader ang nagaseparar sang mga tawo karon? Paano “ginguba” ni Jesucristo ining mga pader? Paano Niya [kita] “mapasag-uli sa Dios”? (bersikulo 16).

Mga Taga-Efeso 6:10–18.Pwede nga mag-obra ang imo pamilya sang ila kaugalingon nga “hinganib sang Dios” gamit ang mga butang sa balay.   Paano kita ginaproteksyunan sa espirituhanon sang tagsa ka parte sang taming? Ano ang pwede naton himuon para buligan ang kada isa nga “isul-ob ang bug-os nga hinganib sang Dios” (Mga Taga-Efeso 6:11) adlaw-adlaw?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Manunubos sang Israel [Redeemer of Israel],” Mga Himno kag mga Ambahanon sang Kabataan, no. 5.

Pagpauswag sang Personal nga Pagtuon

Tugoti ang Espiritu nga giyahan ang imo pagtuon. Magmangin sensitibo sa Espiritu samtang Iya ka nga ginagiyahan sa mga butang nga kinahanglan mo matun-an kada adlaw, bisan pa sa pagtuon sang topiko nga wala mo ginplanuhan sang primero.

tawo nga nagasuksok sang panaming sa panahon sang Bag-ong Katipan

Ang pagsul-ob sang hinganib sang Dios makaamlig sa akon sa espirituhanon.