Balm of Gilead [Banyus sang Galaad], ni Annie Henrie

Oktubre 30–Nobyembre 5

Mga Hebreo 1–6

Si Jesucristo, “ang Ginhalinan sang Kaluwasan nga Dayon”

Ang pagsulat sang espirituhanon nga mga pagpabatyag makabulig sa imo nga mahibal-an kon ano ang gusto itudlo sa imo sang Balaan nga Espiritu. Ang pag-akto sa mga pagpabatyag nagapakita sang imo pagtuo nga inang mga pagpabatyag matuod.

Isulat Ang Imo Mga Panghunahuna

Ang kada isa sa aton may kinahanglan buy-an para batunon ang ebanghelyo ni Jesucristo—malain nga mga nakagawian, sala nga mga pagpati, indi maayo nga mga kaangtanan, ukon iban pa. Para sa mga Gentil sang bag-o pa nga Cristohanon nga Simbahan, ang pagkahaylo masami nagakahulugan sang pagbiya sa mga dios-dios. Ugaling para sa mga Hebreo (ukon mga Judio), napamatud-an nga ang pagkahaylo, kon indi mas mabudlay, medyo mas komplikado. Kon pamensaron, ang ila ginapakamahal nga pagtuluohan kag mga tradisyon nabase sa pagsimba sa matuod nga Dios kag sa mga pinanudlo sang Iya mga propeta, nga nagsugod linibo na katuig antes. Pero ang mga Apostoles nagpanudlo nga ang layi ni Moises natuman na kay Jesucristo kag ang mas mataas nga layi amo na karon ang dapat sundon sang mga nagatuo. Ang pagbaton bala sang Kristiyanismo nagakahulugan nga dapat bayaan sang mga Hebreo ang ila mga ginapatihan kag kasaysayan sang una? Ang Sulat sa mga Hebreo nagtuyo sa pagbulig klaro sang amo nga mga pamangkot paagi sa pagtudlo nga ang layi ni Moises, ang mga propeta, kag ang mga ordinansa tanan importante, pero si Jesucristo mas dako (tan-awa sa Mga Hebreo 1:1–4; 3:1–6; 7:23–28). Sa matuod, ining tanan nga mga butang nagatudlo kag nagapamatuod kay Cristo bilang Anak sang Dios kag ang ginpromisa nga Mesias nga ginahulat sang mga Judio.

Ang pagkahaylo, sang dumaan nga inadlaw kag sa karon, nagakahulugan sang paghimo kay Jesucristo nga sentro sang aton pagsimba kag sang aton mga kabuhi. Nagakahulugan ini sang pagkapyot sa kamatuoran kag pagbuya sinang nagakuha sang aton atensyon palayo sa Iya, kay Sia ang “nangin ginhalinan sang kaluwasan nga dayon sa tanan nga nagatuman sa iya” (Mga Hebreo 5:9).

Mga Ideya para sa Personal nga Pagtuon sang Balaan nga mga Kasulatan

Sin-o ang naghimo sang Sulat sa mga Hebreo?

Ang pila sa mga iskolar nagaduda kon si Pablo ang naghimo sang Sulat sa mga Hebreo. Ang estilo sang pagsulat sang Mga Hebreo daw lain sangsa iban nga mga sinulatan ni Pablo, kag ang pinakauna nga bersyon sang teksto wala naghingalan sang tagsulat. Ugaling, tungod kay ang mga ideya nga ginpahayag sa Mga Hebreo nagaugyon sa iban nga mga pinanudlo ni Pablo, ang mga Santos sa Ulihing mga Adlaw, sa pagsunod sang Cristohanon nga tradisyon, nagabaton nga si Pablo may labot sa paghimo sining sulat.

 

Mga Hebreo 1–5

Si Jesucristo amo ang “larawan gid” sang Amay nga Langitnon.

Madamo sa mga Judio ang nabudlayan magbaton nga si Jesucristo amo ang anak sang Dios. Pat-ini kon paano ang Sulat sa mga Hebreo nagapamatuod parte sa Iya. Halimbawa, samtang imo ginabasa ang una nga lima ka mga kapitulo, pwede ka maghimo sang listahan sang mga titulo, katungdanan, kinaiya, kag mga buluhaton ni Jesucristo nga nakita mo nga ginmitlang . Ano ang ginatudlo sa imo sining mga butang parte sa Manluluwas? Ano ang ginatudlo sini sa imo parte sa Amay nga Langitnon?

Anong gindugang sang masunod nga pahayag ni Elder Jeffrey R. Holland sa imo pag-intiendi sang mga pinanudlo sa sining mga kapitulo? “Si Jesus … nagkari agud pauswagon ang pag-intiendi sang tawo sa Dios kag agud pangabayon sila nga ila palanggaon ang Amay nga Langitnon pareho nga Sia padayon nga nagapalangga kag magapalangga sa ila. … Gani ang pagpakaon sa ginagutom, pagpang-ayo sa nagamasakit, pagsaway sang pagkahipokrito, pagpangabay sang pagtuo—amo ini si Cristo nga nagapakita sa aton sang dalan padulong sa Amay” (“The Grandeur of God,” Liahona, Nob. 2003, 72).

Mga Hebreo 2:9–18; 4:12–16; 5:7–8

Si Jesucristo nag-antos sang tanan nga butang agud Iya ako maintiendihan kag mabuligan kon nagaantos ako.

Nabatyagan mo bala nga mahimo ka “magpalapit nga may pagsalig sa trono sang grasya” kag magpangayo sing kaluoy? (Mga Hebreo 4:16). Isa sa mensahe sang Sulat sa Mga Hebreo amo nga wala sapayan sang aton mga sala kag kahuyang, ang Dios mahapos palapitan kag ang Iya grasya sarang malab-ot. Ano ang imo makita sa Mga Hebreo 2:9–18; 4:12–16; 5:7–8 nga nagapabakod sang imo kompiyansa nga buligan ka ni Jesucristo sa imo dutan-on nga mga kabudlayan? Pamensara nga isulat sa journal ang imo panghunahuna kag mga balatyagon sa nahimo sang Manluluwas para sa imo.

Tan-awa man sa Mosias 3:7–11; Alma 7:11–13; 34; Matthew S. Holland, “Ang Himpit nga Dulot sang Anak,” Liahona, Nob. 2020, 45–47.

Mga Hebreo 3:7–4:11

Ang mga bugay sang Dios natigana para sa mga “wala nagapatig-a sang [ila] mga tagipusuon.”

Sa pagsugid liwat sang istorya sang dumaan nga mga Israelnon, nagalaum si Pablo nga maengganyo ang mga Judio nga likawan ang paghimo sang pareho nga mga sayop nga ginhimo sang ila mga katigulanan—ang sikwayon ang mga bugay sang Dios tungod sang kawala nila sang pagtuo. (Pwede mo basahon ang istorya nga ginatumod ni Pablo sa Numeros 14:1–12, 26–35.)

Pamensara kon paano ang Mga Hebreo 3:7–4:11 mabagay sa imo. Para himuon ini, pwede mo pamensaron sing maayo ang mga pamangkot pareho sini:

• Paano ginpaakig sang mga Israelnon ang Ginuo? (tan-awa sa Mga Hebreo 3:8–11). Ano ang mga konsikwensya sang pag-angkon sang matig-a nga tagipusuon?

• Sang san-o ko gintugtan nga mangin matig-a ang akon tagipusuon? May mga bugay bala nga gusto ihatag sa akon sang Dios nga indi ko mabaton tungod sa kakulang sang pagtuo?

• Ano ang pwede ko himuon para magpatubo sang mahumok kag mahinulsulon nga tagipusuon? (tan-awa sa Eter 4:15; Mga Hulubaton 3:5–6; Alma 5:14–15).

Tan-awa man sa 1 Nefi 2:16; 15:6–11; Jacob 1:7–8; Alma 12:33–36; Neill F. Marriott, “Pagsungka sang Aton mga Tagipusuon sa Dios,” Liahona, Nob. 2015, 30–32.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Hebreo 1:8–9.Sa ano nga mga paagi nga ginpakita ni Jesus nga palangga Niya ang pagkamatarong kag ginakaugtan ang kalainan? Kon may indi husto kita nga mga handum, ano ang pwede naton himuon para bag-uhon ang mga ini?

Mga Hebreo 2:1–4.Pwede ka bala makapamensar sang leksyon nga nagagamit sang mga bagay para buligan ang imo pamilya nga maintiendihan kon ano ang kahulugan sang pagpadayon nga mabakod sa mga kamatuoran sang ebanghelyo “nga aton nabatian”? Pwede mo ini ipakita gamit ang bagay nga mabudlay kaptan. Paano ang aton mga pagpaninguha nga padayunon ang aton mga panaksihon pareho sa pagdakop kag pagkapyot sining bagay? Paano naton sigurohon nga “ang mga butang nga aton nabatian” indi “magpalayo” sa aton? (bersikulo 1).

Mga Hebreo 2:9–10.Para tun-an ang dinalan nga “kapitan sang ila kaluwasan,” pwede mo sugdan paagi sa paghambalanay kon ano ang ginahimo sang kapitan. Ano ang buot silingon sang kaluwasan? Paano si Jesucristo nangin daw kapitan para sa aton kag sang aton kaluwasan?

Mga Hebreo 5:1–5.Ining mga bersikulo makabulig sa inyo nga mahambalan kon ano ang buot silingon sang tawgon sang Dios paagi sa isa nga may awtoridad. Ano ang aton matun-an sa ehemplo ni Jesucristo parte sa pagbaton kag pagtuman sang mga calling?

“Walay tawo nga nagakuha [sining dungog sa iya kaugalingon], kundi nga gintawag sia sang Dios, subong kay Aaron” (Mga Hebreo 5:4). Moses Calls Aaron to the Ministry [Si Moises nga Ginatawag si Aaron sa Pag-alagad], ni Harry Anderson

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “I Need Thee Every Hour [Sa Tanan nga Tion],” Mga Himno kag mga Ambahanon sang Kabataan, no. 12.

Pagpauswag sang Personal nga Pagtuon

Tilawi ang lain nga mga pamaagi. Imbes nga tun-an pirme ang balaan nga mga kasulatan sa pareho nga paagi, pamensara ang iban pa nga mga ideya sa pagtuon. Para sa pila ka mga ideya, tan-awa sa “Mga Ideya sa Pagpauswag sang Imo Personal nga Pagtuon sang Balaan nga mga Kasulatan” sa umpisa sining manwal.

Light of the World [Kapawa sang Kalibutan], ni Walter Rane