mga lamharon nga nagalimpyo sang pader

Nobyembre 13–19

Santiago

“Magmangin Manugtuman Kamo sang Pulong, kag Indi Manugpamati Lamang”

Samtang imo ginabasa ang Sulat ni Santiago, hatagi sang atensyon ang mga dinalan nga daw makahulugan para sa imo. Paano ka ginatulod nga mangin “manugtuman” sining mga pulong? (Santiago 1:22).

Isulat Ang Imo Mga Panghunahuna

Kon kaisa ang isa lang ka bersikulo sa balaan nga mga kasulatan sarang magbag-o sang kalibutan. Ang Santiago 1:5 daw isa lang ka simple nga laygay—kon kinahanglan mo sang kaalam, magpamangkot sa Dios. Pero sang nabasa sang 14-anyos nga si Joseph Smith ang ina nga dinalan, “daw nagsulod ini nga may dako nga pwersa sa tagsa ka balatyagon sang [iya] tagipusuon” (Joseph Smith—Kasaysayan 1:12). Kay nainspirar, gin-aktuhan ni Joseph ang laygay ni Santiago kag nagpangayo sang kaalam sa Dios paagi sa pangamuyo. Kag matuod nga ang Dios nagahatag sing maalwan, ginhatagan si Joseph sang isa sa pinakadako nga langitnon nga pagbisita sa kasaysayan sang tawo—ang Unang Panan-awon. Ginliwat sang panan-awon ang lakat sang kabuhi ni Joseph kag nangin dalan sang Pagpanumbalik sang Simbahan ni Jesucristo sa duta. Tanan kita nabugayan sa karon tungod si Joseph Smith nagbasa kag nag-akto sa Santiago 1:5.

Ano ang imo makita sa imo pagtuon sang Sulat ni Santiago? Siguro ang isa ukon duha ka bersikulo mahimo nga magbag-o sa imo ukon sang imo pinalangga. Mahimo nga makakita ka sang giya samtang imo ginatinguhaan nga tumanon ang imo misyon sa kabuhi. Mahimo nga makakita ka sang pagpaisog nga maghambal sing malulo ukon mangin mas pasensyoso. Mahimo nga matandog ka nga himuon ang imo mga aksyon nga mas nagakabagay sa imo pagtuo. Kon ano man ang nagainspirar sa imo, pasugti ining mga pulong nga “magsulod … sa tagsa ka balatyagon sang [imo] tagipusuon.” Kag dayon, kon imo “batunon nga may pagpaubos ang … pulong,” suno sa ginsulat ni Santiago, magmangin manugtuman sang pulong, indi manugpamati lamang” (tan-awa sa Santiago 1:21–22).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Sin-o si Santiago?

Ginapatihan sang kadam-an nga ang manunulat sang Sulat ni Santiago anak ni Maria, ang iloy ni Jesucristo, kag gani utod sang Manluluwas sa iloy. Si Santiago ginmitlang sa Mateo 13:55; Marcos 6:3; Mga Binuhatan 12:17; 15:13; 21:18; kag Mga Taga-Galacia 1:19; 2:9. Makita sa sining balaan nga mga kasulatan nga si Santiago isa ka lider sang Simbahan sa Jerusalem kag gintawag bilang Apostoles (tan-awa sa Mga Taga-Galacia 1:19).

Santiago 1:2–4; 5:7–11

Ang pasensyoso nga pagpadayon nagapadulong sa pagkaperpekto.

Pagkatapos nga basahon ang Santiago 1:2–4; 5:7–11, ano ang masiling mo nga mayor nga mensahe ni Santiago parte sa pasensya?   Ano ang “[bug-os nga paghikot]” sang [pasensya]? (Santiago 1:4). Paano mo mapakita sa Ginuo nga handa ka nga mangin pasensyoso?

Santiago 1:3–8, 21–25; 2:14–26; 4:17

Ang pagtuo nagakinahanglan sang aksyon.

Paano mo mahibal-an kon may pagtuo ka kay Jesucristo? Paano ginapakita sang imo mga binuhatan ang imo pagtuo sa Dios? Hunahunaa ining mga pamangkot samtang imo ginatun-an ang mga pinanudlo ni Santiago parte sa pagtuo. Mangin manami man nga basahon ang parte kay Abraham kag Rahab, duha ka mga halimbawa nga ginmitlang ni Santiago (tan-awa sa Genesis 22:1–12; Josue 2). Paano nila ginpakita nga may pagtuo sila sa Dios?

Ang pagbasa sang Santiago 1:3–8, 21–25; 2:14–26; 4:17 mahimo nga makabulig sa imo sa pagpamensar sang mga paagi nga mangin isa ka mas maayo nga manugbuhat sang pulong. Isulat ang bisan ano nga pagpabatyag nga imo mabaton, kag magplano nga aktuhan ang mga ini.

Tan-awa man sa Alma 34:27–29; 3 Nefi 27:21.

Si Abraham nga nagapangamuyo sa gwa sang iya tolda

“Si Abraham nagtuo sa Dios, kag ginkabig ini sa iya nga sa pagkamatarong” (Santiago 2:23). Abraham on the Plains of Mamre [Si Abraham sa Kapatagan sang Mamre], ni Grant Romney Clawson

Santiago 1:26; 3:1–18

Ang mga pulong nga akon ginahambal may gahum sa pagsakit ukon pagbugay sa iban.

Kaupod sa detalyado nga paglaragway nga gingamit ni Santiago sa bilog niya nga sulat, ang pila sa pinakamaathag niya nga lenggwahe makita sa iya laygay parte sa paghambal. Pamensara ang paglista sang tanan nga mga pamaagi nga ginlaragway ni Santiago ang dila ukon baba. Ano ang ginapanugyan sang tagsa ka pagkumparar ukon imahe parte sa mga tinaga nga aton ginahambal? Magpamensar sang isa ka butang nga pwede mo himuon agud bugayan ang isa ka tawo paagi sa imo mga tinaga (tan-awa sa Doktrina kag mga Kasugtanan 108:7).

Santiago 2:1–9

Bilang disipulo ni Jesucristo, dapat ko palanggaon ang tanan nga tawo, bisan ano pa ang ila mga sirkumstansya.

Nagpaandam si Santiago sa mga Santos labi na gid sa pagpabor sang mga manggaranon kag pagpakanubo sang mga imol, pero ang iya paandam pwede magamit sa bisan ano nga pagpabor ukon paghusga naton sa iban nga tawo. Samtang imo ginatun-an sing mainampuon ang Santiago 2:1–9, tan-awa ang imo kaugalingon nga tagipusuon kag magpamati sa mga pagpabatyag sang Balaan nga Espiritu. Basi makabulig nga islan ang mga dinalan sa sining mga bersikulo, pareho sang “imol nga tawo sa panapton nga mahigko” (bersikulo 2), sang lain nga mga tinaga ukon dinalan nga nagalaragway sa tawo nga mahimo matentar ka nga hukman sing indi patas. Nabatyagan mo bala ang mga pagbag-o nga kinahanglan mo himuon sa imo pagtratar ukon pagkabig sa iban?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Santiago 1:5.Pagkatapos nga basahon ang Santiago 1:5, pwede nga palip-uton sang inyo pamilya ang panaysayon sang Unang Panan-awon (tan-awa sa Joseph Smith—Kasaysayan 1:8–20). Imbitaha ang mga miyembro sang pamilya sa pagpaambit sang ila mga panaksihon kay Propetang Joseph Smith kag mga eksperiyensya sang ginsabat sang Amay nga Langitnon ang ila mga pangamuyo.

Santiago 1:26–27.  Dayon basaha ang pakahulugan ni Santiago sang “putli nga pagtuluohan” sa Santiago 1:26–27, kag hambali ang mga paagi nga gawion sang imo pamilya ang inyo pagtuluohan nga mas putli.

Santiago 3.Ang Santiago 3 nagalakip sang madamo nga mga ideya nga makainspirar sang indi malimtan nga mga leksyon gamit ang mga bagay para buligan ang imo pamilya sa pagdumdom nga maghambal sing malulo. Halimbawa, pwede kamo magdabok sing kalayo sing ululupod kag hambalan kon paano ang gamay, indi maayo nga tinaga makatuga sang dako nga problema (tan-awa sa mga bersikulo 5–6). Ukon pwede mo sudlan sang maaslom ang isa ka bulutangan nga masami para sa matam-is—pareho abi sang duga sang kalamunding sa botelya sang pulot. Pwede ini magpadulong sa paghinambalanay parte sa paggamit sang matam-is kag makapapagsik nga mga tinaga (tan-awa sa mga bersikulo 9–14).

Santiago 4:5–8.Ngaa dapat kita nga “magpalapit sa Dios” (Santiago 4:8) kon nagapangatubang kita sang tentasyon?

Santiago 5:14–16.Si Pangulong Dallin H. Oaks nagtudlo nga “ang mga ginikanan dapat magpaisog sang mas madamo nga bendisyon sang priesthood sa pamilya” (“Ang Gahum sang Priesthood,” Liahona, Mayo 2018, 67). Basi ang pagbasa sang Santiago 5:14–16 kag pagpaambit sang mga eksperiyensya parte sa pagbaton sang bendisyon sang priesthood makapaisog sang mga miyembro sang pamilya nga magpangayo sang bendisyon kon sila nagamasakit ukon nagakinahanglan sing espirituhanon nga kusog.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Personal nga Pagtuon

Aktuhi ang imo natun-an. Sa imo pagtuon, magpamati sa mga pagpabatyag sang Espiritu kon paano mo gamiton ang imo ginatun-an sa imo kabuhi. Magpangako nga sundon ining mga pagpabatyag kag ipangabuhi sing mas lubos ang ebanghelyo. (Tan-awa sa Teaching in the Savior’s Way, 35.)

Si Joseph Smith nga nagabasa sang Biblia

Ang laygay ni Santiago nga “papangayoa sa Dios” (Santiago 1:5) nag-inspirar kay Joseph Smith nga magpangayo sing kaalam halin sa Dios. Litrato iya ni Christina Smith.