Christ Preaching in the Spirit World [Si Cristo Nagawali sa Kalibutan sang Espiritu], by Robert T. Barrett

Nobyembre 20–26

1 kag 2 Pedro

“Magkalipay sang Kalipay nga Indi Malaragway Kag Puno sang Himaya”

Samtang imo ginabasa ang mga Sulat ni Pedro, mahimo nga makabaton ka sang espirituhanon nga mga pagpabatyag. Isulat gilayon ang mga ini samtang ikaw “yara pa sa Espiritu” (Doktrina kag mga Kasugtanan 76:80) para makuha mo gid kon ano ang gusto itudlo sang Dios sa imo.

Isulat Ang Imo Mga Panghunahuna

Wala madugayi pagkatapos sang Iya Pagkabanhaw, naghimo sang propesiya ang Manluluwas nga siguro nagtublag kay Pedro. Nagsiling Sia sadto nga si Pedro pagapatyon bangud sa iya pagtuo, nga pagadalhon sia “diin indi [sia] buot [magkadto] … , sa pagpakita kon sa ano nga kamatayon niya himayaon ang Dios” (Juan 21:18–19). Pagligad sang tinuig, sang ginhimo ni Pedro ang iya mga sulat, nahibal-an niya nga ang ginpropesiya nga iya kamatayon malapit na lang: “Ang pagbiya sang akon lawas magaabot sing madali, suno sa pagpahayag sa akon sang aton Ginuong Jesucristo” (2 Pedro 1:14). Pero ang mga tinaga ni Pedro wala nagaunod sang kakulba ukon kawala kompiyansa sa palaabuton. Sa baylo, gintudloan niya ang mga Santos nga “magkalipay kamo,” bisan pa nga kinahanglan nila “mag-antos sang mga sari-sari nga pagtilaw.” Ginlaygayan niya sila nga panumdumon nga “ang pagtilaw sang [ila] pagtuo” magapadulong sa “kadayawan kag himaya kag kadungganon sa pagpahayag ni Jesucristo” kag sa “kaluwasan sang [ila] mga kalag” (1 Pedro 1:6–7, 9). Sigurado nga ang pagtuo ni Pedro nakapaumpaw sa mga Santos sadto, pareho nga makapaumpaw ini sa mga Santos sa karon, nga pareho man “mga umalambit sang mga pag-antos ni Cristo; agud nga sa pagpahayag sang iya himaya, magakalipay [kita] sa tuman nga kalipay” (1 Pedro 4:13).

Mga Ideya para sa Personal nga Pagtuon sang Balaan nga mga Kasulatan

1 Pedro 1:3–9; 2:19–24; 3:14–17; 4:12–19

Makasalapo ako sang kalipay sa mga tinion sang pagtilaw ukon kalisod.

Ang panahon pagkatapos sang Paglansang kay Cristo sa krus indi mahapos nga tion agud mangin Kristiyano, kag ang una nga sulat ni Pedro nagapamatuod sina. Sa primero nga apat ka mga kapitulo, matalupangdan mo ang mga tinaga kag dinalan nga nagalaragway sang kabudlayan: kabug-at, mga pagsulay, pagbatas, nagakalayo nga mga pagtilaw, kag mga pag-antos (tan-awa sa 1 Pedro 1:6; 2:19; 4:12–13). Pero matalupangdan mo man ang mga tinaga nga daw masinadyahon—basi gusto mo nga maghimo sang listahan sang imo makita. Sa imo pagbasa sang 1 Pedro 1:3–9; 2:19–24; 3:14–17; kag 4:12–19, ano ang nagahatag sa imo sang paglaum nga makakita ka sang kalipay bisan sa tunga sang mabudlay nga mga sirkumstansya?

  Ano ang ara sa plano sang kaluwasan kag sa ebanghelyo ni Jesucristo nga nagahatag sa imo sang kalipay?

1 Pedro 3:18–20; 4:1–6

Ang ebanghelyo ginawali sa mga patay agud sila mahukman sing matarong.

Sa pila ka adlaw ang tagsa ka tawo magatindog sa hulukmanan kag “magahatag sing [panaysayon] sa iya nga handa sa paghukom sa mga buhi kag sa mga patay” (1 Pedro 4:5). Paano hukman sang Dios sing patas ang tanan nga tawo kon ang ila mga oportunidad sa pag-intiendi kag pagpangabuhi sang ebanghelyo lainlain? Talupangda kon paano ang doktrina nga gintudlo ni Pedro sa 1 Pedro 3:18–20; 4:6 nagabulig sabat sining pamangkot. Paano ginapabakod sining mga dinalan ang imo pagtuo sa pagkaalalangay kag hustisya sang Dios?

Para mas tun-an ining doktrina, basaha ang Doktrina kag mga Kasugtanan 138, rebelasyon nga nabaton ni Pangulong Joseph F. Smith samtang ginabinagbinag niya ining mga sinulatan ni Pedro. Ano pa nga mga kamatuoran ang natun-an ni Pangulong Smith?

2 Pedro 1:1–11

Paagi sa gahum ni Jesucristo, mahimo ko pauswagon ang akon diosnon nga kinaiya.

Nakabatyag ka bala nga ang mangin pareho kay Jesucristo kag ang pagpatubo sang Iya mga kinaiya imposible? Si Elder Robert D. Hales nagtanyag sining nagapaisog nga panghunahuna kon paano kita mahimo nga magpauswag sang Cristohanon nga mga kinaiya: “Ang mga kinaiya sang Manluluwas … magkaangot nga mga kinaiya, nga ang isa ginadugang sa isa, nga nagapauswag sa aton sa mga paagi nga nagaugyonanay. Kon sayuron, indi kita makaangkon sang isa ka Cristohanon nga kinaiya nga indi man mag-angkon kag mag-impluwensya sang iban pa nga mga kinaiya. Kon ang isa ka kinaiya nagabaskog, amo man ang madamo pa nga iban” (Ang Mangin Isa ka Disipulo sang Aton Ginuong Jesucristo,” Liahona, Mayo 2017, 46).

Ang tagsa ka Cristohanon nga kalidad nga aton ginapatubo nagabulig sa aton nga maghabi sang espirituhanon nga kanbas sang pagkadisipulo.

Samtang imo ginabasa ang 2 Pedro 1:1–11, binagbinaga ang mga kinaiya sang “kinaugali nga diosnon” nga nalista sa sining mga bersikulo. Sa imo eksperiyensya, paano ini “nagaalangot,” sa ginlaragway ni Elder Hales? Paano ini nagadugang sa kada isa? Ano pa ang imo natun-an sa sining mga bersikulo parte sa proseso sang pagkamangin mas Cristohanon?

Pwede mo man binagbinagon ang “hamili kag tama kadako nga mga saad” nga ginhatag sang Dios sa Iya mga Santos—lakip na sa imo (2 Pedro 1:4).  

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

1 Pedro 2:5–10.Samtang imo ginabasa ining mga bersikulo upod ang imo pamilya, pamensara ang paggamit sang mga bato para buligan ang mga miyembro sang pamilya nga maintiendihan ang mga pinanudlo ni Pedro nga ang Manluluwas amo ang aton “pangulo nga pundasyon.” Sa ano kita nangin pareho sa “mga bato nga buhi” nga ginagamit sang Dios sa pagtukod sang Iya ginharian? Ano ang aton matun-an kay Pedro parte sa Manluluwas kag sa aton tulumanon sa Iya ginharian? Ano ang mensahe ni Pedro para sa imo pamilya?

1 Pedro 3:8–17.Paano kita “maghanda pirme sa pagsabat” sa bisan sin-o nga magpamangkot sa aton parte sa aton pagtuo? Basi masadyahan ang imo pamilya nga drama-dramahon ang mga sitwasyon sa diin may magpalapit sa ila nga may pamangkot parte sa ebanghelyo.

1 Pedro 3:18–20; 4:6.Ano ang pwede himuon sang imo pamilya para makabatyag nga konektado sa inyo mga katigulangan? Basi pwede ninyo iselebrar ang mga kaadlawan sang napatay na ninyo nga katigulangan paagi sa paghanda sang ila paborito nga mga pagkaon, pagtan-aw sang mga litrato, ukon pagsugid sang mga istorya halin sa ila mga kabuhi. Kon mahimo, pwede man kamo magplano sa pagbaton sang mga ordinansa para sa inyo mga katigulangan sa templo.

2 Pedro 1:16–21.Sa sining mga bersikulo, ginpadumdom ni Pedro ang mga Santos sang iya eksperiyensya sa Bukid sang Pagbalhin sang Dagway (Mount of Transfiguration) (tan-awa man sa Mateo 17:1–9). Ano ang aton matun-an sa sining mga bersikulo parte sa mga pinanudlo sang mga propeta? (tan-awa man sa Doktrina kag mga Kasugtanan 1:38). Ano ang nagahatag sa aton sang kompiyansa sa pagsunod sang aton buhi nga propeta sa karon?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Aton Pagpanudlo

“Maghanda pirme.” Ang indi pormal nga tinion sa pagtudlo sa balay nagaabot kag nagaligad lang dayon, gani importante nga magamit naton ini sa tion nga mag-abot ini. Paano mo tinguhaon nga “maghanda pirme” sa pagtudlo sang mga miyembro sang imo pamilya sang mga kamatuoran sang ebanghelyo kag magpaambit sang “paglaum nga yara sa imo” (1 Pedro 3:15) kon mag-abot ang tinion sang pagtudlo? (Tan-awa sa Teaching in the Savior’s Way, 16.)

Bisan pa nga nagpangatubang si Pedro sang grabe nga pagpamigos kag oposisyon, nagpabilin sia nga mabakod sa iya testimonya kay Cristo.