Si Melquisedec nga nagahatag sang bendisyon kay Abram

Melchizedek Blesses Abram [Si Melquisedec nga Ginabendisyunan si Abram], ni Walter Rane. Regalo sang nagdibuho

Nobyembre 6–12

Mga Hebreo 7–13

“Pinakamataas nga [Pari] sang Maayong mga Butang nga Nag-abot Na”

Samtang imo ginabasa ang Mga Hebreo 7–13, mahimo nga makabaton ka sang mga pagpabatyag halin sa Balaan nga Espiritu. Magpamensar sang mga paagi nga marekord mo ini; halimbawa, pwede mo ini isulat sa sining outline, sa mga kilid sang imo balaan nga mga kasulatan, ukon sa notbuk ukon journal.

Isulat Ang Imo Mga Panghunahuna

Bisan ang matinuohon nga mga Santos kon kaisa nagaantos sang “mga pasipala kag kabudlayan” nga pwede mag-uyog sang ila kompiyansa (tan-awa sa Mga Hebreo 10:32–38). Nahibal-an ni Pablo nga ang mga Judio nga nahaylo sa Kristiyanismo nagaeksperiyensya sang seryoso nga pagpamigos tungod sang ila bag-o nga relihiyon. Para paisugon sila nga magmatutom sa ila mga testimonya, ginpahanumdom niya sila sang malawig nga tradisyon sang matutom nga mga tumuluo sa ila mismo kasaysayan: Sanday Abel, Enoc, Noe, Abraham, Sara, Jose, Moises —“panganod sang mga saksi” nga ginpromisa sang Dios nga matuod kag bagay gid nga hulaton (tan-awa sa Mga Hebreo 11; 12:1). Ining tradisyon imo man. Isa ini ka palanublion sang pagtuo nga ginaambit sang tanan nga nagatulok “kay Jesus [nga] pangulo kag manughimpit sang aton pagtuo” (Mga Hebreo 12:2). Tungod sa Iya, kon daw gusto naton nga “mag-isol” tungod sa mga kabudlayan, pwede kita nga “magpalapit nga may bunayag nga tagipusuon sa bug-os nga kalig-unan sang pagtuo” (Mga Hebreo 10:22, 38). Para sa aton, pareho sa dumaan nga mga Santos, si Jesucristo amo ang aton “pinakamataas nga [pari] sang maayong mga butang nga nag-abot na” (Mga Hebreo 9:11).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mga Hebreo 7

Ang Pagkapari ni Melquisedec nagatudlo sa akon kay Jesucristo.

Sa sulod sang mga dinag-on, ginagamit sang mga Judio ang Pagkapari ni Levi, nga nakilala man bilang ang Aaronic Priesthood. Pero upod sa kabug-osan sang ebanghelyo ni Jesucristo nag-abot ang pagpanumbalik sang Pagkapari ni Melquisedec, nga nagatanyag sang mas dalagko pa nga mga bugay. Ano ang imo natun-an parte sa Pagkapari ni Melquisedec sa Mga Hebreo 7? Nga ginatandaan nga ang katuyuan sining sulat—pareho sang tanan nga balaan nga kasulatan—amo ang magtukod sang pagtuo kay Jesucristo, basi gusto mo nga pat-inan ang mga dinalan nga nagapamatuod sa Iya.

Ari ang pila ka mga halimbawa sang iban pa nga mga kamatuoran nga pwede mo makita:

• Ang mga gin-ordinan sa Pagkapari ni Melquisedec ginhimo nga daw kasubong sang Anak sang Dios kag mga sacerdote sa katubtuban (tan-awa sa Mga Hebreo 7:3, 21).

• Mga Hebrero 7:11: Ang Pagkapari ni Levi wala nagatanyag sang “kahimpitan” kag gani ginbuslan na sang iya ni Melquisedec (tan-awa sa Doktrina kag mga Kasugtanan 84:18–22).

• Mga Hebrero 7:20–21: Ang Pagkapari ni Melquisedec ginabaton paagi sa “panumpa kag kasugtanan” (tan-awa sa Doktrina kag mga Kasugtanan 84:33–44).

Ano nga mga bugay ang imo nabaton paagi sa Pagkapari ni Melquisedec kag “sa mga ordinansa sini”? (Doktrina kag mga Kasugtanan 84:20). Paano ang Pagkapari ni Melquisedec nakabulig sa imo nga magkari kay Cristo?

Tan-awa man sa ; Russell M. Nelson, “Espirituhanon nga mga Manggad,” Liahona, Nob. 2019, 76–79; Dallin H. Oaks, “Ang Melchizedek Priesthood kag ang mga Yabi,” Liahona, Mayo 2020, 69–72.

Mga Hebreo 9; 10:1–22

Ang dumaan kag moderno nga mga ordinansa nagatudlo sa aton kay Jesucristo.

Ang orihinal nga Hebreo nga mga manugbasa sining sulat nakakilala sang dumaan nga layang-layang [tabernacle] kag sang mga ordinansa nga ginlaragway ni Pablo. Pero may pila nga wala makakilala sang lubos nga ang katuyuan sining mga ordinansa amo ang pagtutok sa nagabayad-sala nga sakripisyo ni Jesucristo.

Sang panahon sang biblia, sa tuigan nga pista nga ginatawag Adlaw sang Pagbayad-Sala, isa ka mataas nga pari ang nagasulod sa pinakasagrado nga lugar (ukon Balaan sang mga Balaan) sa templo sang Jerusalem kag nagahalad sang kanding ukon carnero para bayran ang mga sala sang Israel.

Samtang imo ginabasa ang paglaragway ni Pablo sa sining mga ordinansa, pangitaa ang mga simbolo kag mga pinanudlo nga nagabulig sa imo nga mas maintiendihan ang nagabayad-sala nga misyon sang Manluluwas.

Ang mga ordinansa nga ginaentrahan naton sa karon lain sangsa mga ordinansa sang tiyempo ni Pablo, pero ang ila katuyuan palareho. Paano ang mga ordinansa sa karon nga panahon nagapamatuod sa imo kay Jesucristo?

Mga Hebreo 11

Ang pagtuo nagakinahanglan sang pagsalig sa mga promisa sang Dios.

Kon may mamangkot sa imo kon ano ang pagtuo, ano ang imo ihambal? Si Sister Anne C. Pingree, naggamit sang tinaga sa Mga Hebreo 11 para maghatag sining kahulugan sang pagtuo: “Ang espirituhanon nga ikasarang nga mapapati sa mga promisa nga kitaon sa ‘malayo’ pero mahimo nga indi malab-ot sa sining kabuhi” (“Seeing the Promises Afar Off,” Liahona, Nob. 2003, 14).

Hunahunaa nga pauswagon ang imo kaugalingon nga pakahulugan sang pagtuo samtang imo ginapamensar sang maayo ang mga ideya sa Mga Hebreo 11. Ano ang ginatudlo sa imo sang mga ehemplo sang mga tawo nga namitlang sa sining kapitulo parte sa pagtuo? (Tan-awa man sa Eter 12:6–22.)

Ano nga mga promisa ang imo makita sa “malayo”? Paano mo mapakita sa Ginuo nga ikaw “[nahaylo - sa mga ini, kag [nag]baton sang mga ini]”? (Mga Hebreo 11:13).

Tan-awa man sa Alma 32:21, 26–43.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Hebreo 10:32–36.Mahimo mo imbitaron ang mga miyembro sang pamilya sa pag-istorya sang espirituhanon nga mga eksperiyensya sang nakabatyag sila nga “naiwagan” sang kamatuoran. Paano makabulig sa aton ining mga eksperiyensya nga “indi pag-isikway ang [aton] pagsalig” sa tinion sang pagtilaw ukon pagpangduhaduha?

Mga Hebreo 11.Paano mo buligan ang mga miyembro sang imo pamilya nga makatuon sa matinuohon nga mga halimbawa nga ginmitlang sa Mga Hebreo 11? Mahimo nga masadya ang pagdrama-drama sang mga istorya sang pila sining mga halimbawa. Pwede ninyo rebyuhon ang pila sining mga istorya sa Mga Sugilanon sa Daan nga Katipan. Ukon basi pwede hambalan sang imo pamilya ang mga ehemplo sang iban pa nga matinuohon nga mga tawo nga inyo kilala—lakip na ang mga katigulangan, mga lider sang Simbahan, kag mga miyembro sang inyo komunidad. Pwede man kamo magkanta sang kanta parte sa pagtuo, pareho sang “I Know My Father Lives [Buhi ang Amay Ko]” (Mga Himno kag mga Ambahanon sang Kabataan, 59).

Mga Hebreo 12:2.Suno sa sining bersikulo, ngaa handa si Jesus nga magbatas sang kasakit kag pag-antos nga Iya naagyan sa krus? Ano ang ginatudlo sini sa aton parte sa pagbatas sang aton mga pagtilaw?  

Mga Hebreo 12:5–11.Ngaa ginadisiplina kita kag ginatadlong sang Ginuo? Ano ang aton matalupangdan sa sining mga bersikulo parte sa panan-aw sang Ginuo sa pagdisiplina? Paano makaapekto ining mga bersikulo sa aton paghatag ukon pagbaton sang pagdisiplina?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Aton Pagpanudlo

Maggamit sang musika para imbitahon ang Espiritu kag magtuon sang doktrina. Ang Unang Pangulohan nagsiling, “Ang musika may dako nga gahum agud dalhon [kita] sa mas dako nga pagkaespirituhanon” (“First Presidency Preface,” Hymns, x). Ayhan isa ka kanta parte sa pagtuo, pareho sang “How Firm a Foundation [Kamong mga Santos]” (Mga Himno kag mga Ambahanon sang Kabataan, no. 6–7), ang magasuplemento sang paghinambalanay sa pamilya sang Mga Hebreo 11.

modelo sang dumaan nga Jerusalem

Ang mga simbolo kag mga ordinansa sang dumaan nga templo nagatudlo parte sa tulumanon ni Jesucristo.