Perfect Love [Perpekto nga Gugma], ni Del Parson

Nobyembre 27–Disyembre 3

1–3 Juan; Judas

“Ang Dios Gugma”

Samtang imo ginabasa ang mga Sulat ni Juan kag Judas, magpangayo sang inspirasyon kon paano mo ipakita ang imo pagpalangga sa Dios. Isulat ining mga pagpabatyag kag aktuhi ang mga ini.

Isulat Ang Imo Mga Panghunahuna

Sang ginhimo ni Juan kag Judas ang ila mga sulat, ang tiko nga doktrina nagsugod na sa pagganoy sang madamo nga Santos sa apostasiya. Pila ka di-matuod nga mga manunudlo pa gani ang nagakwestyon kon bala si Jesucristo nag-abot gid matuod “sa unod” (tan-awa halimbawa, sa 1 Juan 4:1–3; 2 Juan 1:7). Ano ang sarang himuon sang isa ka lider sang Simbahan sa amo nga sitwasyon? Si Apostoles Juan nagsabat paagi sa paghatag sang iya personal nga testimonya sang Manluluwas: “Ini ang testimonya nga amon igahatag sinang [halin] sa ginsuguran, nga amon nabatian, nga amon nakita sang amon mga mata, nga amon natan-aw, kag nakaptan sang amon mga kamot, nahanungod sang Pulong sang kabuhi” (tan-awa sa 1 Juan 1:1). Kag dayon nagtudlo si Juan parte sa gugma: gugma sang Dios para sa aton kag ang gugma nga dapat may ara kita para sa Iya kag sa tanan Niya nga mga kabataan. Tungod ang matuod, si Juan nangin saksi man sina. Personal niya nga naeksperiyensyahan ang pagpalangga sang Manluluwas (tan-awa sa Juan 13:23; 20:2), kag gusto niya nga mabatyagan man sang mga Santos ang pareho nga gugma. Ang testimonya kag pinanudlo ni Juan parte sa gugma pareho gid ka kinahanglanon sa karon, nga ang pagtuo kay Jesucristo ginakwestyon kag nagalapta ang sayop nga mga pinanudlo. Ang pagbasa sang mga sulat ni Juan makabulig sa aton nga atubangon ang mga kabudlayan sa karon nga panahon nga may kaisog, kay “sa gugma walay kahadlok, kundi ang himpit nga gugma [nagakuha] sang [tanan nga] kahadlok” (1 Juan 4:18).

Mga Ideya para sa Personal nga Pagtuon sang Balaan nga mga Kasulatan

1 Juan; 2 Juan

Ang Dios kapawa, kag ang Dios gugma.

Kon papilion ka sang isa ukon duha ka tinaga para ilaragway ang Dios, ano ini? Sa iya mga sulat, masami nga gingamit ni Juan ang mga tinaga nga “kapawa” kag “gugma” (tan-awa halimbawa, sa 1 Juan 1:5; 2:8–11; 3:16, 23–24; 4:7–21). Samtang imo ginabasa ang primero nga duha ka sulat ni Juan, binagbinaga ang mga nangin eksperiyensya ni Juan sa kapawa kag gugma sang Manluluwas. Halimbawa, pamensara kon ano ang natun-an ni Juan sa mga pinanudlo ni Jesus sa Juan 3:16–17; 12:35–36, 46; 15:9–14; 19:25–27. May nakita ka bala nga pagpulopalareho sa sining mga pinanudlo kag sa ginatudlo sa 1 Juan parte sa kapawa kag gugma sang Dios? Ano nga mga eksperiyensya ang nagtudlo sa imo nga ang Dios kapawa kag gugma?

1 Juan 2–4; 2 Juan

“Kon maghigugmaanay kita, ang Dios nagapabilin sa aton.”

Makita mo man ang mga tinaga pareho sang “nagapabilin (abide)” kag “nagapabilin (dwell)” nga ginasulit sa mga sulat ni Juan. Pangitaa ining mga tinaga, ilabi na gid samtang imo ginabasa ang 1 Juan 2–4 kag 2 Juan. Ano sa banta mo ang buot silingon sang “magpabilin” ukon “[magtiner]” sa Dios kag sa Iya doktrina? (tan-awa sa 2 Juan 1:9). Ano ang buot silingon para sa imo sang ang Dios “magapabilin” sa imo?

1 Juan 2:24–3:3

Sarang ako mangin pareho kay Jesucristo.

Ang tuyo bala nga mangin pareho kay Cristo tama ka taas para sa imo? Pamensara ang nagapaisog nga laygay ni Juan: “Mga anak, magpabilin kamo sa iya; agud nga kon magpahayag sia, may pagsalig kita … [kag] mangin kaangay kita niya” (1 Juan 2:28; 3:2). Ano ang makita mo sa 1 Juan 2:24–3:3 nga nagahatag sa imo sang pagsalig kag kasulhayan bilang disipulo ni Jesucristo? Samtang imo ginatun-an ang mga sulat ni Juan, magpangita sang iban pa nga mga prinsipyo ukon laygay nga makabulig sa imo sa imo pagpaninguha nga mangin mas pareho kay Cristo.

Tan-awa man sa Moroni 7:48; Doktrina kag mga Kasugtanan 88:67–68; Scott D. Whiting, “Ang Mangin pareho sa Iya,” Liahona, Nob. 2020, 12–14.

1 Juan 4:12

Wala bala “sing tawo … nga nakakita sa Dios sa bisan san-o”?

Sa Paglubad ni Joseph Smith, ang Ang balaan nga mga kasulatan nagrekord sang pila ka mga kahigayunan nga ang Dios nga Amay nagpakita sang Iya Kaugalingon sa matinuohon nga mga indibidwal, lakip na kay Juan mismo (tan-awa sa Bugna 4; tan-awa man sa Mga Binuhatan 7:55–56; 1 Nefi 1:8; Doktrina kag mga Kasugtanan 76:23; Joseph Smith—Kasaysayan 1:16–17).

1 Juan 5

Kon magapakita ako sang pagtuo kay Jesucristo kag matawo liwat, mahimo ko nga madaog ang kalibutan.

Samtang imo ginabasa ang 1 Juan 5, pangitaa ang kinahanglan naton himuon para madaog ang kalibutan kag magbaton sang kabuhi nga wala katapusan. Daw ano ayhan tulukon ang pagdaog sang kalibutan sa imo kabuhi? Makakita ka man sang mga sabat ukon ideya sa mensahe ni Elder Neil L. Andersen “Ang Paglutos sang Kalibutan” (Liahona, Mayo 2017, 58–62).

Judas 1

“[Patuboa] ang inyo kaugalingon sa inyo labing balaan nga pagtuo.”

Ano ang ginatudlo sang Judas 1:10–19 sa imo parte sa mga nagapamatok sa Dios kag sa Iya buluhaton? Ano ang imo matun-an sa mga bersikulo 20–25 parte sa kon paano mo padayunon ang imo pagtuo kay Jesucristo nga mabakod?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

1 Juan 2:8–11.Agud buligan ang imo pamilya sa pagbinagbinag sang mga pinanudlo ni Juan, magtipon sa isa ka madulom nga kwarto agud maeksperiyensyahan sang mga miyembro sang pamilya ang kinalain sang maglakat “sa kadudulman” kag maglakat “sa kasanag.” Paano ang kaugot nagatuga sa aton nga maglakat sa kadulom kag masandad? Paano nagadala ang pagpalangga sa kada isa sang kasanag sa aton mga kabuhi?

1 Juan 3:21–22.Ano sa sining mga bersikulo ang nagapatubo sang aton “pagsalig” sa Dios kag sang aton ikasarang sa pagbaton sang mga sabat sa aton mga pangamuyo?

Ang pagtuman sang mga kasuguan sang Dios nagabulig sa aton nga madaog ang kalibutan.

1 Juan 5:2–3.May mga kasuguan bala nga ginakabig naton nga “mabug-at” ukon mabudlay sundon? Paano ginabag-o sang aton pagpalangga sa Dios ang aton nabatyagan sa Iya mga kasuguan?

3 Juan 1:4.Ano ang buot silingon sang “nagagawi sa kamatuoran”? Pwede mo kuhaon ining oportunidad para sugiran ang mga miyembro sang pamilya kon paano mo sila nakita nga nagagawi sa kamatuoran kag hambalan ang kalipay nga ginahatag sini sa imo. Mahimo nga masadyahan ang mga miyembro sang pamilya sa pagsulat parte sa ukon pagdrowing sang mga kamatuoran nga ila natun-an sa mga papel nga korte-tiil kag paggamit sang mga ini para maghimo sang alagyan nga pwede laktan sang inyo pamilya nga ululupod.

Judas 1:3–4.May mga espirituhanon nga katalagman bala nga “nagsulod sing tago” sa aton mga kabuhi kag pamilya? (Judas 1:4). Paano naton sundon ang laygay ni Judas nga “magpakigsuay tungod sang pagtuo” kag batuan ining mga peligro? (Judas 1:3). Ano ang pwede naton himuon para masiguro nga ang “paghidaet, kag gugma, [magmuad]” sa aton pamilya? (Judas 1:2).

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Personal nga Pagtuon

Pangitaa ang gugma sang Dios. Si Pangulong M. Russell Ballard nagtudlo, “[Ang] ebanghelyo isa ka ebanghelyo sang gugma—gugma para sa Dios kag gugma para sa isa kag isa” (“God’s Love for His Children,” Ensign, Mayo 1988, 59). Samtang imo ginabasa ang balaan nga mga kasulatan, pat-ini ukon markahi ang mga ebidensya sang pagpalangga sang Dios.

Walk with Me [Maglakat upod sa Akon], ni Greg K. Olsen