Composite nga art ni Eric Johnson: The Grand Council [Ang Dako nga Konseho], ni Robert T. Barrett; tumpok sang mga bituon sa maayong kabubut-on sang European Space Agency

Disyembre 11–17

Bugna 6–14

“Gindaog Nila … paagi sa Dugo sang Cordero”

Si Pangulong Boyd K. Packer naglaygay: “Kon ang lenggwahe sang balaan nga mga kasulatan daw masaw-a sa imo sa primero, padayuna lang ang pagbasa. Sa indi madugay makita mo ang katahum kag gahum nga masalapoan sa sina nga mga pahina” (“Ang Yabi sa Espirituhanon nga Proteksyon,” Liahona, Nob. 2013, 27).

Isulat Ang Imo Mga Panghunahuna

Hunahunaa ang isa ka babayi nga “ginasakitan, sa kasakit bangud sa pag-anak.” Karon hunahunaa “ang dakong dragon nga pula, nga may pito ka ulo kag napulo ka sungay” nga nagabantay sa babayi, nga nagahanda agud nga “malamon niya ang bata sa pag-anak sang babayi” (Bugna 12:2–4). Para maintiendihan ining mga bersikulo sang rebelasyon ni Juan, tandai nga ang ining mga imahe nagarepresentar sang Simbahan kag sang ginharian sang Dios kag ang peligro nga ila atubangon. Sa mga Santos nga nakaeksperiyensya sang sobra nga pagpamigos sa tiyempo ni Juan, ang pagdaog sa kalainan daw mabudlay malab-ot. Ining kadalag-an mabudlay man makita sa panahon pareho sa aton, nga ang kontra “nagapakig-away sa mga santos” kag may “gahum … sa tagsa ka kaliwatan, kag hinambalan, kag mga pungsod” (Bugna 13:7). Pero ang katapusan sang rebelasyon ni Juan mahimayaon nga nagapakita nga ang maayo magadaog sa malain. Malaglag ang Babilonia. Kag ang mga Santos “makaluwas sa dako nga paghingabot” nga may bayo nga puti—indi tungod wala gid mamantsahi ang ila mga bayo kundi nga ang mga Santos “[naglaba] sang ila mga panapton nga malaba kag ginpaputi sila sa dugo sang Cordero” (Bugna 7:14).

Mga Ideya para sa Personal nga Pagtuon sang Balaan nga mga Kasulatan

Bugna 6–11

Nakita ni Juan ang madamo nga mga hitabo sa kasaysayan sang kalibutan, ilabi na ang sa ulihing mga adlaw.

Sa sining mga kapitulo mabasahan mo ang parte sa libro nga may pito ka selyo. Kon nagapamangkot ka kon ano ang buot silingon sina, wala ka nagaisahanon. Namangkot man ang Propeta nga si Joseph Smith. Ginpahayag sang Ginuo kay Joseph nga ining libro kag ang mga selyo sini nagatiglawas sang istorya sang “dutan-on nga kadugayon” sang kalibutan, nga ang tagsa ka selyo nagatiglawas sang isa ka libo ka tuig (tan-awa sa Doktrina kag mga Kasugtanan 77:6–7). Mahimo nga mangin interesado ka nga mahibal-an nga ang mga hitabo sa primero nga apat ka mga selyo ginpalip-ot sa panan-awon ni Juan sa walo lamang ka bersikulo (Bugna 6:1–8). Ang madason nga tatlo ka mga bersikulo nagalaragway sang ikalima nga selyo (mga bersikulo 9–11). Ang mga hitabo sa nabilin nga duha ka mga selyo ang nagasakop sang kalabanan sa libro nga Bugna. Sa lain nga pulong, ang mayor nga tutok sang panan-awon ni Juan amo ang ulihing mga adlaw—ang aton panahon. Sa imo pagbasa, binagbinaga kon ngaa malahalon nga mahibal-an kon ano ang ginsulat ni Juan parte sa ulihing mga adlaw.

Samtang imo ginabasa ang parte sa mga hitabo nga ginpropesiya ni Juan, pamensara ang masunod nga mga panugyan kag mga pamangkot:

• Basaha ang Bugna 7 nga ginapamensar ang buluhaton sang pagtipon sang Israel. Ano ang mga panghunahuna mo parte sining buluhaton? (tan-awa man sa Doktrina kag mga Kasugtanan 77:8–11). Ano ang imo matun-an sa mga bersikulo 13–17 parte kay Jesucristo kag sa mga nagapalapit sa Iya?

• Ano ang ginatudlo sa imo sang mga kapitulo 8; 9; kag 11 parte sa mga hitabo sa ulihing mga adlaw? (tan-awa man sa Doktrina kag mga Kasugtanan 77:12–13, 15). Paano kita magpanghanda sa espirituhanon para sa sining mga hitabo?

• Ang Bugna 10 nagasugid parte sa libro nga ginahatag sang isa ka anghel kay Juan kag ginasugo sia nga kaunon ini. Ano ayhan ang ginasimbolo sini? (ta-awa sa Doktrina kag mga Kasugtanan 77:14).

Bugna 12–13

Ang Giyera sa Langit nagapadayon sa duta.

Diutay lang kaayo ang aton nahibal-an parte sa Giyera sa Langit, pero may maathag bisan pa nga malip-ot nga paglaragway sini sa Bugna 12:7–11. Samtang imo ginabasa ining mga bersikulo, pamensara ang imo kaugalingon nga kabahin sinang inaway antes sa kabuhi sa duta. Ano ang imo matun-an parte sa kon paano malampuwasan si Satanas? (tan-awa sa bersikulo 11).

Ang giyera nga nagsugod sa langit nagapadayon sa duta, samtang nagapadayon si Satanas sa “pagpakig-away sa [mga tawo nga] may testimonya kay Jesucristo” (Bugna 12:17). Ano ang imo matun-an sa Bugna 13 parte sa kon paano sia nagapakig-away sa karon nga panahon? Paano ang “dugo sang Cordero” kag “ang pulong sang [imo] pamatuod” (Bugna 12:11) nagapadayon sa pagbulig sa imo sa sining giyera?

Tan-awa man sa 1 Nefi 14:12–14; Moroni 7:12–13; Moises 4:1–4; Doktrina kag mga Kasugtanan 29:36–37.

Bugna 14:6–7

“Nakita ko ang isa naman ka [anghel] … nga may maayong balita.”

Isa ka katumanan sang propesiya sa sining mga bersikulo natabo sang nagpakita si Moroni kay Joseph Smith kag gingiyahan sia sa mga rekord nga iya ginlubad kag gin-imprinta bilang ang Libro ni Mormon. Ang ini nga libro nagaunod sang “maayong balita nga dayon” nga ginsugo sa aton nga iwali sa “tagsa ka pungsod, kag [kaliwatan], kag hinambalan, kag katawhan” (Bugna 14:6).

Para magtuon parte sa iban pa nga mga anghel nga nagpartisipar sa pagpanumbalik sang wala katapusan nga ebanghelyo, ta-awa sa Doktrina kag mga Kasugtanan 13; 27:5–13; 110:11–16; 128:20–21.

Tan-awa man sa “Ang Pagpanumbalik sang Kabug-osan sang Ebanghelyo ni Jesucristo: Ika-duha ka Gatos ka Tuig nga Anibersaryo nga Proklamasyon sa Kalibutan,” ChurchofJesusChrist.org.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Bugna 7:9, 13–15.Ano ang matudlo sining mga bersikulo sa aton kon ngaa nagasuksok kita sang puti sa bunyag kag sa mga ordinansa sa templo?

Bugna 7:14–17 Pamensara nga imbitaron ang mga miyembro sang pamilya sa pag-istorya sang ila mga balatyagon parte sa mga promisa sang Ginuo sa sining mga bersikulo. Paano makabulig sa aton ang Iya mga promisa kon ara kita sa “dako nga paghingabot”? (bersikulo 14).

Bugna 12:7–11; 14:6.Mahimo nga masadyahan ang pila ka mga miyembro sang pamilya sa pagdrowing sang mga litrato sang mga palanan-awon nga ginlaragway sa Bugna. Halimbawa, ang pagdrowing sang mga litrato base sa Bugna 12 mahimo nga magpadulong sa paghinambalanay parte sa Giyera sa Langit (tan-awa sa mga bersikulo 7–11). Ang mga litrato base sa Bugna 14:6 mahimo nga magpadulong sa paghinambalanay parte sa Pagpanumbalik sang ebanghelyo.

Pagkatapos nga basahon ang Bugna 14:6 sing ululupod, pamensara nga magpakita sang mga litrato ni anghel Moroni kag sang iban pa nga mga anghel nga nagbulig sa pagpanumbalik sang ebanghelyo sa aton panahon (tan-awa ag mga litrato sa katapusan sining outline). Basi pwede magbulos-bulos ang mga miyembro sang pamilya sa pagkapyot sang isa sang mga litrato kag sa pagpaambit sang mga rason nga nagapasalamat sila nga nag-abot ang mga anghel “nga may maayong balita nga dayon nga ibantala sa [aton].”

Bugna 12:11 Ano ayhan ang buot silingon sang dinalan nga “pulong sang ila pamatuod”? Paano ang aton mga testimonya kay Jesucristo nagabulig sa aton kag sa iban nga madaog si Satanas?

Bugna 13:11–14.Ano ang mga panghunahuna sang mga miyembro sang imo pamilya parte sa nagapangdaya nga sapat? Paano naton mahibal-an kag malikawan ang mga pagpangdaya nga makita naton sa kalibutan sa karon?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Dare to Do Right [Magmaisog],” Mga Himno kag mga Ambahanon sang Kabataan, 64.

Pagpauswag sang Personal nga Pagtuon

Magpaayaw sa balaan nga mga kasulatan. Si Pangulong Russell M. Nelson nagtudlo, “Ang adlaw-adlaw nga pagpaayaw sa pulong sang Dios importante para sa espirituhanon nga pagkabuhi, ilabi na sa sining panahon sang nagadako nga kabudlayan” (“Pamatii Sia,” Liahona, Mayo 2020, 89). Ano ang buot silingon sang “magpaayaw sa pulong sang Dios” sa imo?

Pa-tuo halin sa wala sa ibabaw: Moroni Delivering the Golden Plates [Si Moroni nga Nagatugyan sang Bulawan nga mga Lamina], ni Gary L. Kapp; Upon You My Fellow Servants [Sa Inyo nga Isigkaalagad Ko], ni Linda Curley Christensen kag Michael T. Malm (John the Baptist confers the Aaronic Priesthood on Joseph Smith [Si Juan Bautista nagahatag sag Pagkapari ni Aaron kay Joseph Smith]); Keys of the Kingdom [Mga Yabi sang Ginharian], ni Linda Curley Christensen kag Michael T. Malm (Peter, James, and John confer the Melchizedek Priesthood on Joseph Smith [Si Pedro, Santiago, kag Juan nagahatag sang Pagkapari ni Melquisedec kay Joseph Smith]; Vision in the Kirtland Temple [Panan-awon sa Templo sang Kirtland], ni Gary E. Smith (Moses, Elias, and Elijah appear to Joseph Smith and Sidney Rigdon [Si Moises, Elias, kag Elias nagapakita kay Joseph Smith kag Sidney Rigdon]).