Little Lamb [Gamay nga Carnero], ni Jenedy Paige

Disyembre 18–24

Paskwa

“Maayong Balita sang Dakong Kalipay”

Pamensara kon paano ang pagbinagbinag sang pagkabun-ag kag misyon sang Manluluwas makabulig dala sang espiritu sang paghidaet kag kasagrado sa panahon sang Paskwa.

Isulat Ang Imo Mga Panghunahuna

Ngaa bala nga ang pagkabun-ag sang isa ka lapsag nagadala sang dako nga kalipay? Siguro tungod nga ang bag-o nga lapsag sarang nga mangin isa ka simbolo sang paglaum. May kon ano sa bag-o nga kabuhi nga puno sang mga posibilidad nga nagaagda sa aton nga magpanumdom kon ano ayhan ang ginatigana sang kabuhi para sa sinang bata kag kon ano nga matahum nga mga butang ang iya malab-ot. Wala na sing mas matuod pa diri sangsa pagkabun-ag sang Anak sang Dios, nga si Jesucristo. Wala na sing may mas dako nga paglaum nga ginbutang sa isa ka bata, kag wala na sang may iban pa nga ginbun-ag nga may amo sini kadaku nga pangako.

Sang gin-agda sang anghel ang mga manugpahalab nga pangitaon ang bag-ong bun-ag nga lapsag sa pasungan, ginhatagan man niya sila sang mensahe parte sinang bata. Isa ato ka mensahe sang paglaum—nga ang ining lapsag nagkari sa kalibutan para tumanon ang isa ka sagrado nga misyon. Ang mensahe sang mga manugpahalab ila “ginpahibalo … kag ang tanan nga nakabati sini natingala sang mga pinamulong sa ila sang mga manugpahalab sang carnero. Apang gintipigan ni Maria ining tanan nga pulong, nga nagabinagbinag sini sa iya tagipusuon” (Lucas 2:17–19). Siguro manami nga sundon ang ehemplo ni Maria sining Paskwa: nga binagbinagon sa imo tagipusuon ang mga butang nga imo natun-an parte sa Manluluwas sini nga tuig. Paano Niya gintuman ang Iya misyon sang pagtubos sa mga istorya nga imo nabasa? Kag mas importante, paano ginbag-o sang Iya misyon ang imo kabuhi? Dayon basi mangin inspirado ka nga sundon ang ehemplo sang mga manugpahalab: paano mo “ipahibalo” kon ano ang ginhimo ni Jesucristo para sa imo?

Mga Ideya para sa Personal nga Pagtuon sang Balaan nga mga Kasulatan

Mateo 1:18–25; 2:1–12; Lucas 1:26–38; 2:1–20

Si Jesucristo nagpaubos para matawo upod sa aton sa duta.

Bisan kapila mo na nga nabasa ukon nabatian ang istorya sang pagkabun-ag ni Jesucristo, tun-i ini karon upod ining panghunahuna: “Ang Paskwa indi lamang selebrasyon sang kon paano nagkari si Jesus sa kalibutan kundi sang paghibalo man kon sin-o Sia—ang aton Ginuo kag Manluluwas, nga si Jesucristo—kag kon ngaa Sia nagkari” (Craig C. Christensen, “The Fulness of the Story of Christmas” [pang-Paskwa nga debosyonal sang Unang Pangulohan, Dis. 4, 2016], broadcasts.ChurchofJesusChrist.org

Ano ang imo nahibal-an parte sa kon sin-o si Jesucristo antes Sia mabun-ag? (tan-awa, halimbawa sa, Juan 17:5; Mosias 3:5; Doktrina kag mga Kasugtanan 76:13–14, 20–24; Moises 4:2). Paano nagaapekto ining ihibalo sa imo nabatyagan sa imo pagbasa parte sa Iya pagkabun-ag?

Ano ang imo nahibal-an sa kon ngaa nagkari si Jesucristo sa duta? (tan-awa, halimbawa sa, Lucas 4:16–21; Juan 3:16–17; 3 Nefi 27:13–16; Doktrina kag mga Kasugtanan 20:20–28). Paano nagaapekto ining ihibalo sa imo nabatyagan sa Manluluwas? Paano ini nagaapekto sa imo pagpangabuhi?

Tan-awa man sa 2 Mga Taga-Corinto 8:9; Mga Hebreo 2:7–18; 1 Nefi 11:13–33; Alma 7:10–13.

1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25

Gintuman ni Jesucristo ang Iya misyon kag ginhimo nga posible para sa akon ang magpanubli sang kabuhi nga wala katapusan.

Bisan pa nga ang istorya sang pagkabun-ag ni Cristo napalibutan sang milagroso nga mga hitabo, ang Iya pagkabun-ag mangin isa lamang sa madamo kon indi tungod sa dako nga buluhaton nga Iya natuman sa ulihi nga bahin sang Iya kabuhi. Kon si Pangulong Gordon B. Hinckley pa ang pahambalon, “Ang lapsag nga si Jesus sang Betlehem mangin isa lamang sa mga lapsag kon wala ang nagatubos nga Cristo sang Getsemani kag Kalbaryo, kag ang madinalag-on nga kamatuoran sang Pagkabanhaw” (The Wondrous and True Story of Christmas,” Ensign, Dis. 2000, 5).

Gethsemane [Getsemani], ni J. Kirk Richards

Ang ebidensya sang diosnon nga misyon sang Manluluwas kag sang Iya gamhanan nga gugma para sa iban makita sa bug-os nga Bag-ong Katipan. Ano nga mga dinalan ukon istorya ang nagasulod sa imo pamensaron? Pwede mo balikan ang ining manwal ukon ang imo sululatan sang mga tinun-an kag rebyuhon ang pila sa mga panghunahuna nga imo ginsulat. Pwede mo man basahon ang 1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25 kag pamensaron sang maayo kon paano ang Maluluwas kag ang Iya buluhaton nagbugay sa imo kabuhi. Ano ang imo nabatyagan nga bag-uhon sa imo kabuhi? Paano ka magsandig sa gahum sang Manluluwas?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 1:18–25; 2:1–12; Lucas 1:26–38; 2:1–20Paano mo iselebrar ang pagkabun-ag ni Jesucristo upod sang imo pamilya? Ari ang pila ka mga ideya, ukon pwede ka maghimo sang imo kaugalingon:

• Magbasa ukon magdrama-drama sang mga bahin sang istorya sang Pagkabun-ag sing ululupod.

• Magkanta sang mga himno sang Paskwa sing ululupod, ukon magpili sang mga kasilingan ukon mga abyan nga bisitahan kag kantahan sila (tan-awa sa Mga Himno kag mga Ambahanon sang Kabataan, nos. 52–53).

• Maghimo sang isa ka buhat sang pagserbisyo.

• Pangabaya ang mga miyembro sang pamilya nga magpangita sang mga detalye sa istorya sang Pagkabun-ag nga nagahatag sa ila sang ideya sa mga dekorasyon nga pwede nila himuon para pahanumdumon sila kay Jesucristo.

1 Mga Taga-Corinto 15:21–26; Mga Taga-Colosas 1:12–22; 1 Pedro 2:21–25.Ngaa nagapasalamat kita nga nabun-ag si Jesucristo? Ano nga mga regalo ang Iya nahatag sa aton? Paano naton mapakita sa Iya ang aton kapasalamatan? Pwede man nga magkanta ang inyo pamilya sang kalantahon nga nagatudlo parte sa Iya misyon, pareho sang “Redeemer of Israel [Manunubos sang Israel]” (Mga Himno kag mga Ambahanon sang Kabataan, 5).

“Ang Buhi nga Cristo: Ang Panaksihon sang mga Apostoles.”Kon gusto mo nga buligan ang imo pamilya nga magtutok sa Manluluwas sa tion sang Paskwa, basi pwede ka maghatag sang tiyempo sa pagbasa kag pagtuon sing ululupod sang “Ang Buhi nga Cristo: Ang Panaksihon sang mga Apostoles” (ChurchofJesusChrist.org). Basi pwede ninyo sauluhon ang mga dinalan sa “Ang Buhi nga Cristo” ukon magpangita sang mga paglaragway sang kabuhi sang Manluluwas sa Bag-ong Katipan nga nagasuporta sa mga pahayag diri. Mahimo mo imbitaron ang tagsa ka miyembro sang pamilya nga isulat ang iya kaugalingon nga testimonya kay Jesucristo kag, kon ginapabatyag, basahon ini sa pamilya.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Silent Night, Holy Night [Ang Gab-i nga Malinong],” Mga Himno kag mga Ambahanon sang Kabataan, 53.

Pagpauswag sang Personal nga Pagtuon

Pangitaa si Jesucristo. Ang balaan nga mga kasulatan nagatudlo sa aton nga ang tanan nga butang nagapamatuod kay Jesucristo (tan-awa sa Moses 6:62–63), gani dapat naton Sia pangitaon sa tanan nga butang. Samtang imo ginabasa ang balaan nga mga kasulatan, pamensara nga isulat ukon markahan ang mga bersikulo nga nagatudlo sa imo parte sa Iya. Maghatag sang tiyempo sa mga adlaw pakadto sa Paskwa sa pagpangita sang mga butang sa imo palibot nga nagapamatuod kay Jesucristo.

The Nativity [Ang Pagkabun-ag], ni Brian Call