The City Eternal [Ang Wala Katapusan nga Siyudad], ni Keith Larson

Disyembre 25–31

Bugna 15–22

“Sia nga Nagadaug Magapanubli sang Tanan nga Butang”

Kon kaisa ang pinakadako nga sablag sa pagtuon amo ang aton pagpati nga indi na naton kinahaglan nga magtuon—nga nakahibalo na kita. Samtang imo ginabasa ang balaan nga mga kasulatan, mangin bukas sa bag-o nga mga ideya nga gusto ihatag sa imo sang Ginuo.

Isulat Ang Imo Mga Panghunahuna

Sa imo matandaan, ang libro nga Bugna nagasugod sa Manluluwas nga nagadeklarar sang Iya Kaugalingon nga “ang ginsuguran kag ang katapusan” (Bugna 1:8). Bagay lang, nagtapos ini sa pulopareho nga mga tinaga: “Ako ang … nahauna kag ang naulihi” (Bugna 22:13). Pero ano ang buot silingon sina? Ang nahauna kag ang naulihi sang ano? Ang libro nga Bugna mabaskog nga nagapamatuod nga si Jesucristo amo ang nahauna kag ang naulihi sang tanan—sang dalagko, lapnagon nga mga hitabo sang tawhanon nga pagluntad kag kaluwasan. Sia “ang Cordero nga [ginpatay] sa wala pa mapasad ang kalibutan” (Bugna 13:8). Kag Sia ang Hari sang mga hari nga nagatapos sang kalainan, kasubo, kag bisan sang kamatayon mismo kag nagapasulod sang “bag-ong langit kag bag-ong duta” (Bugna 21:1).

Ugaling antes mag-abot ining bag-ong langit kag bag-ong duta, madamo pa kita sang dapat malampuwasan: mga pamalatian, mga giyera, malapnagon nga kalainan—tanan nga ginalaragway sang Bugna sing maathag. Pero si Jesucristo kaupod man naton sa sining bahin sang kasaysayan. Sia “ang masanag nga [bituon]” nga nagasiga sa madulom nga kalangitan bilang promisa nga ang pamanag-banag malapit na (Bugna 22:16). Kag ini matuod nga malapit na magaabot. Magaabot Sia. Bisan sang ginaimbitar Niya kita, “Kari sa akon” (Mateo 11:28), nagapalapit man Sia sa aton. “Magakari ako sing madasig,” siling Niya. Kag upod ang paglaum kag pagtuo nga gintinloan sa mga kalayo sang kabudlayan sa ulihing mga adlaw, magasabat kita, “Kabay pa. Kari, Ginuong Jesus” (Bugna 22:20).

Mga Ideya para sa Personal nga Pagtuon sang Balaan nga mga Kasulatan

Bugna 16–18; 21–22

Ang Manluluwas nagaimbitar sa akon nga magpalagyo halin sa Babilonia kag manubli “sang banwang balaan.”

Pagkatapos nga masaksihan ang kalaglagan kag mga peligro sa ulihing mga adlaw, nakita ni Juan ang palaabuton nga sarang sumahon sa deklarasyon sang Ginuo “Yari karon, ginabag-o ko ang tanan nga butang” (Bugna 21:5). Isa ka paagi para maintiendihan kon ano ang buot silingon sina amo nga ikumparar ang paglaragway ni Juan sang Babilonia, ang simbolo sang pagkakalibutanon kag kalainan (tan-awa sa Bugna 16–18), sa iya paglaragway sang bag-ong Jerusalem, nga nagasimbolo sang selestiyal nga himaya sa presensya sang Dios (tan-awa sa Bugna 21–22). Ang tsart sa idalom mahimo nga makabulig sa imo:

Babilonia	Bag-ong Jerusalem
Babilonia Bugna 16:3–6	Bag-ong Jerusalem Bugna 21:6; 22:1–2, 17
Babilonia Bugna 16:10; 18:23	Bag-ong Jerusalem Bugna 21:23–24; 22:5
Babilonia Bugna 17:1–5	Bag-ong Jerusalem Bugna 21:2
Babilonia Bugna 18:11, 15	Bag-ong Jerusalem Bugna 21:4
Babilonia Bugna 18:12–14	Bag-ong Jerusalem Bugna 21:18–21; 22:1–2

Ano pa nga mga kinalain ang imo makita?

Pwede mo man nga binagbinagon kon ano ang buot silingon para sa imo sang “[maggwa] ka sa” Babilonia (Bugna 18:4). Ano ang imo nakita sa Bugna 21–22 nga nagainspirar sa imo nga himuon ini?

The Last Judgement [Ang Katapusan nga Paghukom], ni John Scott

Bugna 20:12–15; 21:1–4

Ang tanan nga mga anak sang Dios pagahukman gikan sa libro sang kabuhi.

Kuno abi may isa ka manunulat nga nagtanyag nga magsulat sang isa ka libro parte sa imo kabuhi. Ano nga mga detalye ukon eksperiyensya ang gusto mo ilakip? Kon nakahibalo ka nga isulat man ang imo mga aksyon sa palaabuton, paano mo atubangon ang imo kabuhi? Pamensara ini samtang imo ginabasa ang Bugna 20:12–15. Ano ang ginalauman mo nga isulat parte sa imo sa libro sang kabuhi? Paano mo ilaragway ang papel sang Manluluwas sa imo libro sang kabuhi? Sa imo opinyon, ngaa makahulugan nga gintawag ini nga “[libro] sang kabuhi sang Cordero”? (Bugna 21:27).

Kon ang maghunahuna nga magtindog sa atubang sang Dios para hukman makahaladlok para sa imo, pamensara nga basahon ang Bugna 21:1–4. Nga nagatumod sa sining mga bersikulo, si Elder Dieter F. Uchtdorf nagsiling:

“Inang Adlaw sang Paghukom mangin adlaw sang kaluoy kag pagpalangga—adlaw kon diin ang mga tagipusuon nga may kasakit paayuhon, kon diin ang mga luha sang kalisod mabuslan sang mga luha sang pagpasalamat, kon diin ang tanan pagahustuhon. Huo, may ara sang tudok nga kasubo bangud sang sala. Huo, may ara sang mga paghinulsol kag bisan kalisod bangud sang aton mga sayup, mga katontohan, kag pagkabat-ulan nga amo ang gintunaan nga indi naton mabaton ang mas dakong palaabuton.

“Apang may kompiyansa ako nga indi lamang naton maluyagan ang paghukom sang Dios; kundi makibot man kita kag daw sa indi magpati sa Iya walay dulonan nga grasya, kaluoy, kaalwan, kag gugma para sa aton, nga Iya mga anak” (“O Daw Ano Kadako ang Plano sang Aton Dios!,” Liahona, Nob. 2016, 21).

Ano ang epekto sining mga kamatuoran sa imo panan-aw sa Katapusan nga Paghukom? Ano ang ginainspirar sining mga kamatuoran sa imo nga bag-uhon sa imo kabuhi?

 

Bugna 22:18–19

Nagakahulugan bala sa sining mga bersikulo nga wala na sang dugang pa nga balaan nga mga kasulatan magluwas sa Biblia?

Pila ka mga tawo ang nagasambit sang Bugna 22:18–19 bilang rason para sikwayon ang Libro ni Mormon kag ang iban pa nga balaan nga mga kasulatan sa ulihing-mga-adlaw.  

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Bugna 15:2–4.Samtang ginahambalan sang imo pamilya ining mga bersikulo, nga nagatumod sa “ambahanon ni Moises” kag “ambahanon sang Cordero,” pwede mo nga basahon ang kanta ni Moises sa Exodo 15:1–19, upod sa iban pa nga mga kanta nga ginmitlang sa balaan nga mga kasulatan, pareho sang Doktrina kag mga Kasugtanan 84:98–102. Ngaa ayhan nga “ang mga nagdaug sang sapat” (Bugna 15:2) daw gusto nga magkanta sing pareho sini? Basi pwede ang inyo pamilya magkanta sang himno ukon pangbata nga kanta sang pagdayaw.

Bugna 19:7–9.Basi pwede kamo maglantaw sang mga litrato sa kasal halin sa kasaysayan sang inyo pamilya ukon maghambalanay parte sa tion nga nagkadto ang inyo pamilya sa isa ka selebrasyon sang kasal. Ngaa ang pag-asawahay maayo nga paanggid sang kasugtanan sang Ginuo sa Iya Simbahan? (Tan-awa man sa Mateo 22:1–14.)

Bugna 20:2–3.Paano makabulig sa aton ang 1 Nefi 22:26 nga maintiendihan kon ano ayhan ang kahulugan sang “magapos” si Satanas?

Bugna 22:1–4.Ano ayhan ang buot silingon sang pag-angkon sang ngalan sang Manluluwas “sa [aton] mga agtang”? (Bugna 22:4; tan-awa man sa Exodo 28:36–38; Mosias 5:7–9; Alma 5:14; Moroni 4:3; Doktrina kag mga Kasugtanan 109:22.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Aton Pagpanudlo

Magpamangkot parte sa mga imbitasyon sa pag-akto. “Kon magpamangkot ka parte sa isa ka imbitasyon sa pag-akto, ginapakita mo [sa mga miyembro sang imo pamilya] nga nagaulikid ka sa ila kag kon paano ang ebanghelyo nagabugay sa ila mga kabuhi. Ginahatagan mo man sila sing oportunidad nga iistorya ang ila mga eksperiyensya” (Teaching in the Savior’s Way, 35).

Si Cristo nga nakapula nga malaba nga panapton nga nagapungko sa puti nga kabayo.