Disyembre 4–10

Bugna 1–5

“Himaya, kag Kagamhanan, Sa … Cordero sa Katuigan”

Pamensara nga isulat ang imo mga pamangkot parte sa imo ginabasa sa Bugna. Pwede mo dayon pangitaon ang mga sabat sa imo mga pamangkot ukon hambalan ang mga ini sa isa ka miyembro sang pamilya ukon sa mga klase sa Simbahan.

Isulat Ang Imo Mga Panghunahuna

Nakaagi ka na bala nga ginbudlayan sa paghambal sa iban sang imo nabatyagan sa isa ka mabaskog nga espirituhanon nga eksperiyensya? Ang pang-adlaw-adlaw nga lenggwahe mahimo nga kulang para ilaragway ang espirituhanon nga mga balatyagon ukon panghunahuna. Siguro amo ini ang rason kon ngaa naggamit si Juan sang madalom nga simbolismo kag imahe para ilaragway ang iya makahalawhaw nga rebelasyon. Pwede man lang niya kuntani nga isiling nga nakita niya si Jesucristo, pero agud nga buligan kita nga maintiendihan ang iya eksperiyensya, ginlaragway niya ang Manluluwas gamit ang mga tinaga nga pareho sa mga ini: “Ang iya mga mata subong sang dabdab sang kalayo,” “sa iya baba nagaguwa ang isa ka espada nga matalom nga duha sing sulab,” kag “ang iya nawong subong sang adlaw nga nagasilak sa iya bug-os nga kasanag” (Bugna 1:14–16). Samtang imo ginabasa ang libro sang Bugna, tinguhai nga diskubrehon ang mga mensahe nga gusto ni Juan nga imo matun-an kag mabatyagan, bisan pa nga indi mo maintiendihan ang kahulugan sang tagsa ka simbolo. Ngaa ayhan nga ginkumparar niya ang mga kongregasyon sang Simbahan sa kandelabra, si Satanas sa dragon, kag si Jesucristo sa carnero? Sa katapusan, indi mo kinahanglan nga maintiendihan ang tagsa ka simbolo sa Bugna para maintiendihan ang importante nga mga tema sini, lakip na ang pinakabantog nga tema: si Jesucristo kag ang Iya mga sumulunod magamadinalag-on batok sa mga ginharian sang tawo kag ni Satanas.

Mga Ideya para sa Personal nga Pagtuon sang Balaan nga mga Kasulatan

Ang panan-awon ni Juan nagatudlo parte sa plano sang Amay nga Langitnon para luwason ang Iya mga anak.

Ang libro sang

Isa ka paagi para tun-an ang Bugna amo ang pagpangita sang mga koneksyon sa plano sang kaluwasan. Ining pangkabilogan nga kasumahan mahimo nga makabulig sa imo:

• Ang mga kapitulo 5 kag 12 nagalaragway sang mga hitabo sa kabuhi antes sa kalibutan.

• Ang mga kapitulo 6–11, 13–14, 16–19 nagalaragway sang kabuhi sa duta kag sang mga hitabo sa kasaysayan sang kalibutan.

• Ang mga kapitulo 2–3, 15, 20–22 nagalaragway sang Katapusan nga Paghukom kag sang himaya nga nagahulat sa mga matinuohon.

Samtang nagabasa ka, pamangkuta ang imo kaugalingon, “Ano ang ginatudlo sini sa akon parte sa plano sang Dios? Ano ang ginhimo sang Dios para buligan ako nga malampuwasan ang kalainan kag magbalik sa Iya. Ano ang Iya mga promisa sa mga matinuohon?”

Basi makabulig man nga mahibal-an nga ang Doktrina kag mga Kasugtanan 77 nagapaathag sang pila ka mga simbolo nga gingamit sa Bugna. Dugang pa, ang Paglubad ni Joseph Smith nagaklaro sang pila ka mga dinalan sa Bugna.

 

Bugna 1

Si Jesucristo amo ang Buhi nga Anak sang Buhi nga Dios.

Ang una nga kapitulo sang Bugna nagalaragway sang pagpakita ni Jesucristo kay Juan sa isa ka panan-awon. Basi pwede ka maghimo sang listahan sang tanan nga ginasiling sining kapitulo parte kay Jesucristo, lakip na kon sin-o Sia, ano ang Iya ginahimo para sa aton, kag kon daw ano Sia.

Pila sa mga butang nga imo matun-an magahalin sa mga simbolo. Binagbinaga kon ano ang luyag sang Ginuo nga itudlo sa imo parte sa Iya Kaugalingon paagi sa sining mga simbolo. Halimbawa, pat-ini nga ginatawag sang Manluluwas ang Iya Kaugalingon nga “[ang ginsuguran kag ang katapusan]” kag “[ang una kag ang ulihi].” Ngaa sa banta mo nga may importansya ining mga titulo? Ano ang ginatudlo sa imo sining mga titulo parte sa Manluluwas?

Bugna 2–3

Kilala ako ni Jesucristo sa personal kag buligan ako nga malampuwasan ang akon mga kabudlayan.

Ang mga pulong sang Manluluwas sa Bugna 2–3 nagapakita nga naintiendihan Niya ang mga kadalag-an kag mga kabudlayan nga pinasahi sa tagsa ka sanga sang Simbahan sa panahon ni Juan. Gindayaw Niya ang mga pagpanikasog sang mga Santos kag ginpaandaman man sila sang mga butang nga kinahanglan nila nga bag-uhon. Ano ang imo matun-an sa pagdayaw kag mga paandam sang Manluluwas?

Ang Manluluwas nakaintiendi man sang imo mga kadalag-an kag mga kabudlayan, kag gusto ka Niya nga buligan. Tandai ang masami nga mga promisa nga Iya ginatanyag sa mga magalampuwas. Ano ang nanamian mo sa sining mga promisa? Ano ayhan ang gusto sang Ginuo nga imo malampuwasan? Ano ang sarang mo himuon agud makabaton sang Iya bulig?

Bugna 4–5

Si Jesucristo lamang ang makahimo sang plano sang Amay nga Langitnon nga posible.

Ano ang imo matun-an parte sa Amay nga Langitnon sa Bugna 4 kag parte kay Jesucristo sa Bugna 5? Pamensara kon daw ano ayhan kon tanan kita nakahibalo nga si Jesucristo (ang “Cordero”) magahimo sang plano sang Amay nga Langitnon nga posible (ang Manluluwas sarang nga “magbukad sang libro, kag … maghukas sang pito ka selyo” [Bugna 5: 5]). Ngaa si Jesucristo lamang ang makahimo sini? Paano mo mapakita ang imo pagtuo sa Iya bilang imo Manluluwas?

Tan-awa man sa Job 38:4–7; Doktrina kag mga Kasugtanan 77:1–7.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Bugna 1:20.Ngaa ginkumparar ni Jesus ang Iya Simbahan sa mga kandelabra? (tan-awa sa Mateo 5:14–16).  

Bugna 2–3.Kuno abi ginpangabay si Juan nga maghatag sang mensahe sa imo pamilya pareho sa mga mensahe nga ginhatag niya sa mga simbahan sang iya tiyempo. Ano ayhan ang iya ihambal nga maayo nga nagakatabo? Paano kamo ayhan mag-uswag?”

Bugna 3:15–16.Pagkatapos nga basahon ining mga bersikulo, pwede nga mag-inom ang imo pamilya sang alabaab nga mas manamit kuntani kon mainit ukon mabugnaw. Ano ang buot silingon sang mangin alabaab sa espirituhanon?

Bugna 3:20Ipakita ang litrato sang Manluluwas nga nagapanuktok sa pwertahan (tan-awa sa katapusan sining outline) samtang ginabasa sang imo pamilya ang Bugna 3:20. Ngaa nagapanuktok si Jesus imbes nga magsulod na lang? Pwede nga magbulos-bulos ang mga miyembro sang pamilya sa pagpanuktok sa pwertahan. Dayon may isa sa pamilya nga maglawag sang paagi nga aton “buksan ang pwertahan” sa Manluluwas kag pasudlon ang miyembro sang pamilya. Ano ayhan ang pamatyagan nga makaupod ang Manluluwas sa sulod sang aton puluy-an?

Bugna 4:10–11.Ano ang buot silingon sang simbahon ang Amay nga Langitnon? Ano ang aton nahibal-an sa Iya nga nagatulod sa aton nga simbahon Sia?

Bugna 5:6, 12–13.Ngaa nga ginatawag si Jesucristo nga “Cordero”? Ano ang ginatudlo sining titulo sa aton parte sa Iya?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Manunubos sang Israel [Redeemer of Israel],” Mga Himno kag mga Ambahanon sang Kabataan, no. 5.

Pagpauswag sang Aton Pagpanudlo

Paisoga ang pagpamangkot. Ang pagpamangkot nagapakita nga ang mga miyembro sang pamilya handa magtuon kag nagahatag sang ideya kon paano sila nagasabat sa kon ano nga ginatudlo sa ila. Tudloi ang imo pamilya kon paano mangita sang mga sabat sa balaan nga mga kasulatan. (Tan-awa sa Teaching in the Savior’s Way, 25–26.)

Let Him In {Pasudla Sia], ni Greg K. Olsen