Ang Paglutos sa Kalibutan
Ang paglutos sa kalibutan indi isa ka punto sang pagpakilala sa panahon sang kabuhi, apang mga higayon sa panahon sang kabuhi nga nagapakilala sa eternidad.
Sang madamo na nga tuig ang nagligad, si Presidente David O. McKay naghambal parte sa isa ka matahum nga inagihan sang sia nagasakay sa isa ka sakayan padulong sa Samoa. Pagkatapos nga natulogan, sia “nakit-an niya sa isa ka palanan-awon ang isa ka butang nga walay tupong sa himaya. Sa malayo,” siling niya, “Nakit-an ko ang matahum nga puting siudad. … Isa ka dakung kadam-an sang katawhan [ang] nagapalapit sa siudad. Ang kada isa nagabisti sa malaba nga puting panapton. … Sa gilayon ang akon atensyon … nagtumod sa ila pinuno, kag bisan nga nakit-an ko lamang ang korte niya … , nakilal-an ko sia gilayon bilang ang akon Manluluwas! Ang kasanag sang iya hitsura mahimayaon. … Ang kalinong nga nagapalibot sa iya … langitnon!”
Si Presidente McKay nagapadayon, “Ang siudad … iya … ang Siudad nga Walay Katapusan; kag ang mga katawhan nga nagasunod sa iya magapabilin didto sa paghidaet kag kalipay nga walay katapusan.
Si Presidente McKay nagpamangkot, “Sin-o sila? [Sin-o ining mga katawhan?]”
Ginapaathag niya ang sunod nga natabo:
“Subong nga daw sa nabal-an sang Manluluwas ang akon mga hunahuna, nagsabat sia paagi sa pagtudlo sa mga [tinaga sa] tunga-sirkulo nga … naggwa sa ibabaw [sang katawhan], … nga nasulat sa bulawan … :
“‘Amo Ini Sila Ang Naglutos sa Kalibutan—
“Nga Tunay Nga Nabun-ag Liwat!’”
Sa napulo ka mga tinuig, nadumduman ko ining mga pulong: “Amo ini sila ang naglutos sa kalibutan.”
Ang mga bugay nga ginpromisa sang Ginuo sa yadtong maglutos sa kalibutan makakulunyag. Sila paga “bistihan sang puti … kag [hinganlan sa] libro sang kabuhi.” Ang Ginuo “magatuad sang [ila mga ngalan] sa atubang [sang] Amay, kag sa atubang sang mga anghel.” Ang kada isa makaangkon sang isa ka “bahin sa unang pagkabanhaw,” kabuhing walay katapusan, kag “indi na maggwa” halin sa presensya sang Dios.
Posible bala ang maglutos sa kalibutan kag magbaton sining mga bugay? Huo, matuod ini.
Pagpalangga sa Manluluwas
Yadtong mga nakalutos sa kalibutan nakapalambo sang lubos nga pagpalangga sa aton Ginuo kag Manluluwas, si JesuCristo.
Ang Iya diosnon nga pagkabun-ag, ang perpekto Niya nga kabuhi, ang Iya walay dulonan nga Pagpasag-uli sa Gethsemane kag Golgotha nagpasalig sang Pagkabanhaw sang kada isa sa aton. Kag upod ang aton sinsero nga paghinulsol, Sia lamang ang makatinlo sa aton halin sa aton mga kasal-anan, nagatugot sa aton sa pagbalik sa presensya sang Dios. “Ginapalangga naton sia, bangud sia una nga nagpalangga sa aton.”
Si Jesus nagsiling, “Mangin masadya kamo; kay nalutos ko ang kalibutan.”
Sang ulihi dugang Niya, “Pagbuot ko nga lutuson ninyo ang kalibutan.”
Ang paglutos sa kalibutan indi isa ka punto sang pagpakilala sa panahon sang kabuhi, apang mga higayon sa panahon sang kabuhi nga nagapakilala sa eternidad.
Sarang ini magsugod samtang ang isa ka bata nagatuon sa pagpangamuyo kag maligdong nga nagaamba sang, “Nagatinguha ako nga mangin kasubong ni Jesus.” Ini nagapadayon samtang ang isa ka tawo nagatuon parte sa kabuhi sang Manluluwas sa Bag-ong Testamento kag nagabinagbinag sa gahum sang Pagpasag-uli sang Manluluwas sa Libro ni Mormon.
Ang pagpangamuyo, paghinulsol, kag pagsunod sa Manluluwas, kag pagbaton sang Iya grasya nagatuytoy sa aton nga makahangop sang mas maasyo kon ngaa ari kita diri kag kon sin-o kita magmangin.
Si Alma naglaragway sini sa sining paagi: “Isa ka mabakod nga pagbag-o [ang] natabo sa ila mga tagipusuon, kag sila [nagpakubos] sang ila mga kaugalingon kag naghatag sang ila pagsalig sa matuod kag nagakabuhi nga Dios … [nagapabilin] nga himpit tubtob sa katapusan.”
Yadtong mga nagalutos sa kalibutan nakabalo nga sila mangin may salabton sa ila Langitnon nga Amay. Ang sinsero nga pagbag-o kag paghinulsol sang mga sala indi na makapugong apang makahilway, samtang ang “mga sala [nga] mapula … [mangin] maputi kasubong sang niyebe.”
Ang pagka-may-salabton sa Dios
Yadtong ara sa kalibutan nabudlayan parte sa pagkamay-salabton sa Dios—kasubong sang isa ka bata nga naghiwat sang kasadyahan sa puluy-an sang iya mga ginikanan samtang wala sila, nalipay sa ginahud, wala nagahunahuna parte sa mga matabo kon ang mga ginikanan magpauli 24 oras sa maabot.
Ang kalibutan mas naluyag sa pagpagusto sa kinaandan nga tawo sangsa pagadumalahan ini.
Ang paglutos sa kalibutan indi isa ka kalibutanhon nga pagsalakay apang isa ka pribadong, kinaugalingon nga pag-away, nagakinahanglan sang mano-sa-mano nga pagbato sa aton mga kaaway sa sulod naton.
Ang paglutos sa kalibutan nagakahulogan sang pagpakabahandi sang pinakadakung sugo: “Palanggaon mo ang Ginuong Dios sa bug-os mo nga tagipusuon, sa bug-os mo nga kalag, kag sa bug-os mo nga kaisipan, kag sa bug-os mo nga kusog.”
Ang Kristiyanong manunulat nga si C. S. Lewis naglaragway sini: “Si Cristo nagasiling ‘Ihatag sa akon ang tanan. Indi ko luyag ang kabahin sang imo panahon kag kabahin sang imo kwarta kag kabahin sang imo buluhaton: Luyag ko Ikaw.’”
Ang paglutos sa kalibutan amo ang pagtuman sang aton mga promisa sa Dios—ang aton mga kasugtanan sa bunyag kag templo kag ang aton panumpa sang pagkahimpit sa aton kaupod sa katubtoban. Ang paglutos sa kalibutan nagatuytoy sa aton sa atubang sang lamisa sang sacramento nga may pagpakubos kada simana, nagapangayo sang kapatawaran kag nagapanaad sa “pagdumdum sa iya kag sa pagtuman sang iya mga sugo,” nga kita “dalayon nga makaangkon sang pag-upod sang Iya Espiritu sa [aton].”
Ang pagpalangga naton sa Adlaw nga Inugpahuway wala nagatapos sa pagsara sang mga ganhaan sang chapel apang sa luyo sini nagabukas sang mga ganhaan sang isa ka matahum nga adlaw sang pagpahuway halin sa kinaandan nga mga buluhaton, pagtuon, pagpangamuyo, kag pagdab-ut sa pamilya kag sa iban nga nagakinahanglan sang aton atensyon. Imbis nga malipay bangud natapos ang pagsimba, kag maabtik nga nagadalagan sa pagpangita sa gilayon sang TV antes magsugod ang football, tugoti ang aton panghunahuna nga magpabilin sa Manluluwas kag sa Iya balaan nga adlaw.
Ang kalibutan wala sing untat nga ginabutong sang madamo nga makagalanyat kag makasulolay nga mga tingog.
Ang paglutos sa kalibutan amo ang pagsalig sa isa ka tingog nga nagapaandam, nagapasulhay, nagapasanaaw, kag nagadala sang paghidaet “indi subong sa paghatag sang kalibutan.”
Ang pagka di-makinaugalingon
Ang paglutos sa kalibutan amo ang paghatag sang aton mga kaugalingon sa iban, nagadumdum sa ika-duhang sugo”: “Sia nga pinakapinuno ninyo dapat mangin alagad ninyo.” Ang kalipayan sang aton tiayon mas importante sangsa aton huyog. Ang pagbulig sa aton mga anak nga magpalangga sa Dios kag magtuman sa Iya mga sugo ginauna naton. Luyag kita magpaambit sang aton materyal nga mga bugay paagi sa ikapulo, puasang halad, kag paghatag sa mga nagakinahanglan. Kag kon kita padayon nga nagaampo sa Dios, ang Ginuo magagiya sa aton sa mga tawo nga sarang naton buligan.
Ang kalibutan makinaugalingon, bugalon nga nagasiling: “Tan-awa ako kumpara sa akon kasilingan! Tan-awa ang mga ginaangkon ko! Tan-awa kon daw ano ka importante ako!”
Ang kalibutan madali maakig, wala nagapasilabot, kag palapangayo, luyag ang mga pagdayaw sang kadam-an, samtang ang paglutos sa kalibutan nagadala sang pagpakubos, balatyagon para sa iban, pasensya, kag pagkamaloloy-on sa iban nga tuhay sangsa imo.
Kaluwasan sa mga Propeta
Ang paglutos sa kalibutan dalayon nga nagakahulogan nga kita may mga pagpati nga ginalango-lango sang kalibutan. Ang Manluluwas nagsiling:
“Kon ang kalibutan nagadumot sa inyo, nabal-an ninyo nga ini nagdumot sa akon antes nagdumot sa inyo
“Kon kamo pareho sang kalibutan, palanggaon kamo sini.”
Si Presidente Russell M. Nelson nagsiling sining aga, “Ang tunay nga mga disipulo ni JesuCristo luyag nga magpakita, magpahibalo, kag mangin tuhay sangsa katawhan sang kalibutan.”
Ang sumulunod ni Cristo wala nagakabalaka kon ang post sa Facebook parte sa iya pagtuo diutay lamang ang makagusto.
Ang maglutos sa kalibutan amo ang magkabalaka sing diutay parte sa aton mga online connection kag mas interesado sa aton langitnon nga kaangtanan sa Dios.
Ang Ginuo nagahatag sang kaluwasan sa aton samtang ginatuman naton ang paggiya sang Iya buhi nga mga propeta kag mga apostoles.
Si Presidente Thomas S. Monson nagasiling: “Ang kalibutan sarang nga mangin mabudlay. … [Samtang nagapatemplo kita], … mas masarangan naton ang kada pagtilaw kag malutos ang kada pagsulay. … Mangin mapagsik kita kag mabakod.”
Upod ang nagadugang nga mga pagsulay, pagkawili, kag pagpatiko, ang kalibutan nagatinguha sa pagtiplang sa himpit agud baliwalaon ang madamo nga espirituhanon nga mga inagihan sa nagligad, kag kabigon ang mga ini bilang katontohan nga mga pagtiplang.
Ang paglutos sa kalibutan amo ang pagdumdum, labi na gid kon kita nadulaan sang paglaum, sa mga tion nga nabatyagan naton ang gugma kag kapawa sang Manluluwas. Si Elder Neal A. Maxwell nagpaathag sang isa sa sining mga inagihan: “Ginbugayan ako, kag nabal-an ko nga nabal-an sang Dios nga nabal-an ko nga ako ginbugayan.” Kon kaisa umalagi nga mabatyagan naton nga kita ginkalimtan, apang kita wala malipat.
Ang paglutos sa kalibutan wala nagakahulogan sang pagpangabuhi nga malayo sa kalibutan, gin-amligan batok sa di-makatarungan kag mga kabudlay sang mortalidad. Dapat, ini nagahatag sang kasangkad sa pagtuo, nagaganyat sa aton padulong sa Manluluwas kag sa Iya mga promisa.
Samtang ang pagkaperpekto indi lubos sa sining kabuhi, ang paglutos sa kalibutan nagahimo sang aton paglaum nga nagadabdab nga sa isa ka adlaw kita “magatindog sa atubang sang [aton Manunubos]; [kag] malipayon nga makit-an sia,” kag mabatian ang Iya tingog: “Magkari, kamo nga ginpakamaayo sang akon Amay, panublia ang ginharian nga ginhanda para sa inyo.”
Ang halimbawa ni Elder Bruce D. Porter
Sang December 28 sining nagligad nga tuig, ang amon mahal nga abyan kag pinalangga nga General Authority si Elder Bruce D. Porter nagtapos sang iya mortalidad. Sia 64 anyos.
Una ko nga nakilala si Bruce sang kami mga estudyante sa Brigham Young University. Isa sia sa pinakamaayo kag pinakamaalam nga estudyante. Pagkatapos nga nabaton niya ang iya doctoral degree sa Harvard University, nga nagtumod sa mga kahilabtanan pangpubliko sang Russia, ang mga panghunahuna kag sinulat ni Bruce nagdala sang pagkabantug nga kontani sarang magpaiba sa iya direksyon, apang ang manggad kag ang pagdayaw sang kalibutan wala gid nagtabon sa iya panan-aw. Ang iya tagipusuon ara sa iya Manluluwas, nga si JesuCristo; sa iya kaupod sa katubtoban, si Susan; kag sa iya kabataan kag mga apo.
Si Bruce natawo nga may depekto sa batobato. Gin-operahan sia, apang sa paglakat sang panahon ang iya mga batobato nagpadayon sa paglain.
Wala madugay pagkatapos nga gintawag si Bruce bilang isa ka General Authority sang 1995, ululupod kami nga nag-alagad upod sa amon mga pamilya sa Frankfurt, Germany, kon diin ang iya buluhaton nagsentro sa Russia kag Eastern Europe.
Ang kabuhi kay Elder Porter daku nga nagbag-o sang 1997 sang ang iya batobato kag lawasnon nga ikaayo nagsugod sa pagkubos. Nagpauli ang pamilya Porter sa Salt Lake City.
Sa baynte-dos anyos nga pag-alagad niya sa Kapitoan, si Bruce na-hospital sa madamo nga beses, kalakip ang napulo ka mga operasyon. Ang mga doktor naghambal kay Susan sa duha ka okasyon nga si Bruce indi na maglawig sa kagab-ihon, apang nalampuwasan niya ini.
Kapin sa dose anyos sang iya pag-alagad bilang General Authority, si Bruce ara sa dialysis agud tinloan ang iya dugo. Sa kalabanan sinang tion, ang dialysis nagkuha sang lima ka gab-i kada simana kag apat ka oras kada bulong agud nga sia makaalagad sa adlaw kag makabaton sang mga pagtalana para sa konperensya sa mga katapusan simana. Sang sia wala mag-uswag pagkatapos sang pila ka mga priesthood blessing, si Bruce naligban, apang nabal-an niya kon kay sin-o sia nagsalig.
Sang 2010, si Bruce nakabaton sang isa ka batobato halin sa iya anak nga lalaki nga si David. Sining tion wala ginsikway sang iya lawas ang pagsaylo. Milagro ato, nga naghatag sang bag-o nga kabakod sa lawas kag sang ulihi nagtugot sa iya kag kay Susan nga makabalik sa ila pinalangga nga Russia, agud mag-alagad upod sa iya sa Area Presidency.
Sang December 26 sang nagligad nga tuig, pagkatapos nga magbato sa padayon nga mga infection sa hospital sa Salt Lake City, nagpangabay sia sa mga doktor nga maghalin sa kwarto. Si Bruce nagsiling kay Susan “nga nabal-an niya paagi sa Espiritu nga wala na sang mahimo ang mga doktor nga makaluwas sang iya kabuhi. Nabal-an niya … nga ang Langitnon nga Amay magakuha sa iya pauli. Napuno sia sang paghidaet.”
Sang December 28, si Bruce nagpauli sa puluy-an sang iya pamilya. Pila ka oras ang nagligad, ginpalibotan sang mga pinalangga, malinong sia nga nagbalik sa iya langitnon nga puluy-an.
Tinuig na ang nagligad, si Bruce Porter nagsulat sining mga pulong sa iya kabataan:
“Ang pagpamatuod nga naangkon ko parte sa katunayan kag pagpalangga ni JesuCristo amo ang giya sang akon kabuhi. … Ini [amo] ang putli, kag nagadabdab nga saksi sang Espiritu nga sia nagakabuhi, nga sia amo ang akon Manunubos kag Abyan sa kada tion sang pagkinahanglan.”
“Ang aton panghangkat … amo ang makakilala [ang Manluluwas} kag, paagi sa pagtuo sa iya, malutos naton ang tanan nga mga pagtilaw kag mga pagsulay sa sining kalibutan.”
“Tugoti nga kita mangin himpit kag matuod, nagasalig sa iya.”
Si Bruce Douglas Porter naglutos sa kalibutan.
Kabay nga kita magtinguha sang mas maayo nga maglutos sa kalibutan, wala nagapangatarungan sa seryosong mga kalapasan pero mapinasensyahon sa diutay nga mga sayup kag pagkapukan, maluyagon sa dugang nga pag-uswag kag maalwan sa pagbulig sa iban. Mas lubos nga nagasalig kamo sa Manluluwas, ginapromisa ko sa inyo ang mas dakung paghidaet sa sining kabuhi, kag pagpasalig para sa inyo nga padulongan sa katubtoban, sa ngalan ni JesuCristo, amen.