Mas Masanag kag Mas Masanag tubtob sa Adlaw nga Perpekto
Bisan sa pinakalabing mabudlay kag pinakamadulum nga mga tion, may ara sang kasanag kag kaayo sa kalibutan.
Si Paul nagpaambit sining matahum nga mensahi sang paglaum sa mga Taga-Corinth:
“Ginpalibotan kami sang problema, apang may paghidaet; Naligban, apang may paglaum;
“Ginhingabut, apang wala pagpabay-i sang Dios; nagkalisud, apang wala malaglag.”
Sa diin naghalin ang paglaum ni Paul? Pamatii ang iya paathag: “Kay ang Dios, nga nagmando sa suga nga magsiga sa kadulum, nagpasanaaw sa aton mga tagipusuon, agud maghatag sang kapawa sang ihibalo parte sa himaya sang Dios sa atubang ni JesuCristo.”
Bisan sa pinakalabing mabudlay kag pinakamadulum nga mga tion, may ara sang kasanag kag kaayo sa kalibutan. Sang nagligad nga Oktubre, si Presidente Dieter F. Uchtdorf nagpahanumdom sa aton, “Ginapalibotan kita sang amo ka makatilingala nga manggad sang kapawa kag kamatuoran nga ako nagapamangkot kon bala tunay nga ginapasalamatan naton ang aton mga ginaangkon.”
Apang, ang kaaway mas luyag nga kita magtamod sa “alupuop sang kadudulman … nga nagabulag sa mga mata, … nagapatig-a … sa mga tagipusuon … , kag … nagapatalang.”
Walay sapayan, upod ang perpektong paghangop parte sa mga pagtilaw sang aton panahon, ang Ginuo nagapromisa, “Ina nga Iya sang Dios amo ang kapawa; kag sia nga nagabaton sang kapawa, kag nagapadayon sa Dios, nagabaton sing dugang nga kapawa; kag ina nga kapawa nagalambo nga mas masanag kag mas masanag tubtob sa adlaw nga perpekto.”
Kita mga anak sang Dios. Ang pagbaton sang kapawa, ang magpadayon sa Dios, kag pagbaton sang dugang nga kapawa amo ang tuyo kon ngaa gintuga kita. Halin sa pinaka sinugoran, nagsunod kita sa kapawa; nagsunod kita sa Langitnon nga Amay kag sa Iya plano. Ang pagpangita sang kapawa ara sa aton espirituhanon nga DNA.
Nabatian ko ining walay katapusan nga kamatuoran nga gintudlo sa wala ginalauman nga lugar. Samtang nagtrabaho ako sa isa ka daku nga bangko, gin-agda ako magtambong sa isa ka programa para sa mga pinuno sa University of Michigan. Sa panahon sang programa, si Professor Kim Cameron nagtudlo sining konsepto sang positibong pagpamuno kag sa bunga sini nga heliotrophic. Sia nagpaathag: “Ini nagatumod sa huyog sang tanan nga buhing sistema nga magpadulong sa positibong enerhiya [kasanag] kag magpalayo sa negatibong enerhiya [kadulum]. Halin sa simpleng orgnanismo padulong sa kumplikadong mga sistema sang tawo, ang tanan nga may kabuhi may ara sang kinaandan nga huyog nga magpadulong sa positibo kag magpalayo sa negatibo.”
Ginsuporta sang madamo nga pag-estudyo, sia nagtamod sa tatlo ka mga importanteng bahin sang isa ka madinalag-on nga kultura sang lugar trabahoan: pagkamaloloy-on, pagpatawad, kag pagpasalamat. Ini matuod gid nga samtang ang katawhan nagaulikid paatubang sa positibo (kasanag), ang mga kinaiya nga ginpakita sing lubos sang Kapawa sang Kalibutan, si JesuCristo, ara!
Mga kautoran, magpasulhay kamo nga may ara sang kapawa nga sarang naton mabaton. Tugoti ako nga magpanugyan sa tatlo ka lugar kon diin kita dalayon nga makasapo sang kapawa:
1. Ang Kapawa sang Simbahan
Ang Simbahan amo ang parola sang kapawa sa nagadulum nga kalibutan. Matahum gid ini nga tion agud mangin miyembro sang Ang Simbahan ni JesuCristo sang Mga Santos sa Ulihing Mga Adlaw! Ang Simbahan mas mabakod pa gid sangsa nagligad kag matuod nga nangin mas mabakod kada adlaw samtang bag-o nga mga katapo ang nagabuylog sa aton, bag-o nga mga kongregasyon ang natukod, bag-o nga mga misyonero ang gintawag, kag bag-o nga mga lugar ang ginbuksan para sa pagwali sang ebanghelyo. Makit-an naton yadtong mga nadula sa pila ka tion halin sa mga aktibidades sang Simbahan nga nagabalik samtang ang pagluwas nga ginpanan-aw ni Presidente Thomas S. Monson nagadala sang mga milagro kada adlaw.
Bag-o lang ako nagbisita sa batan-on sa Paraguay, Uruguay, Chile, kag Argentina sa panahon sang For the Strength of Youth nga mga konperensya. Linibo kag linibong batan-on nga mga lalaki kag mga babayi ang nagtambong sa isa ka simana nga pagpabakod sang ila gugma sa Manluluwas kag dayon nagpauli sa ila mga pamilya kag mga abyan nga nagakalipay, nagapakita sang kapawa kag gugma ni Cristo.
Ti, ang Simbahan dalayon nga may ara sang mga kritiko. Permi amo sini halin pa sa sinugoran kag magapadayon tubtob sa katapusan. Apang indi kita magpasugot nga ang amo nga mga pagbatikos magpadulum sang aton pagkaluyag sa kapawa nga sarang naton maangkon. Ang pagkilala sa kapawa kag ang pagpangita sini magahimo sa aton nga takus para sa dugang pa gid nga kapawa.
Sa nagadulum nga kalibutan, ang kapawa sang Simbahan magasilak nga mas masanag kag mas masanag tubtob sa adlaw nga perpekto.
2. Ang Kapawa sang Ebanghelyo
Ang kapawa sang ebanghelyo amo ang banas nga “nagasilak sing dugang kag dugang padulong sa adlaw nga perpekto,” kag ini nagasilak sing pinakalabing masanag sa aton mga pamilya kag sa mga templo sa bug-os nga kalibutan.
Ang Preach My Gospel nagasiling: “Paagi sa kapawa sang ebanghelyo, ang mga pamilya sarang magresolbar sang mga di-paghangpanay, pag-ilinaway, kag mga pagtilaw. Ang mga pamilya nga nagbululagay bangud sang pagsinuay sarang mapaayo paagi sa paghinulsol, pagpatawad, kag pagtuo sa gahum sang Pagpasag-uli ni JesuCristo.” Karon mas kapin pa gid sangsa nagligad, ang mga pamilya dapat mangin mga lugar sang dakung kapawa sa tanan nga nagapalibot sa aton. Ang mga pamilya nagadugang sa kapawa samtang sila nagadugang sa pagpalangga kag kabuot. Samtang nagatukod kita sang mga pamilya sang “pagtuo, … paghinulsol, pagpatawad, pagtahud, kag pagpalangga, [kag] pagkamaloloy-on,” mabatyagan naton ang nagadugang nga pagpalangga sa Manluluwas kag sa kada isa. Ang pamilya magalambo sang mas mabakod, kag ang kapawa sa kada isa sa aton magasilak nga mas masanag.
Mabasa naton sa Bible Dictionary, nga “ang puluy-an lamang ang sarang makaanggid sa templo sa pagkabalaan.” Karon may ara kita sang 155 ka mga templo nga nagabuhat kag may dugang pa nga magaabot sa indi madugay. Nagadamo kag nagadamo ang mga pamilya nga nahugpong para sa tion kag sa eternidad. Ang mga miyembro nagasumitir sang mas madamo kag mas madamo nga mga ngalan sang mga katigulangan sa templo agud himuon ang ila mga makaluwas nga mga ordinansa. Matuod gid nga mabatyagan naton ang dakung pagkinasadya kag pagsaulog angay sa duha ka bahin sang belo!
Sa nagadulum nga kalibutan, ang kapawa sang ebanghelyo magasilak nga mas masanag kag mas masanag tubtob sa adlaw nga perpekto.
3. Ang Kapawa ni Cristo
Indi kamo sarang maghambal parte sa kapawa sa kalibutan nga wala nagahambal parte sa Kapawa sang Kalibutan, si JesuCristo. Isa ka ebidensya sang isa ka mapinalanggaon nga Langitnon nga Amay amo nga ang kada tawo nga nabun-ag sa sining kabuhi ginbugayan sang Kapawa ni Cristo agud buligan sila nga makapauli. Si Presidente Boyd K. Packer nagtudlo: “Ang Kapawa ni Cristo dalayon nga ara. … Ang Kapawa ni Cristo ara sa tanan kasubong sang silak sang adlaw mismo. Kon diin may ara sang tawhanon nga kabuhi, may ara sang Espiritu ni Cristo.” Ang kapawa ni Cristo “nagaagda kag nagaganyat nga padayon nga maghimo sing maayo” kag nagahanda sa tanan nga nagapangita sang kaayohan kag kamatuoran nga magbaton sang Balaan nga Espiritu.
Ang Manluluwas nagatudlo nga Sia ang kapawa nga “nagapasanaaw sa mga mata,” “nagapaalisto sang inyo mga paghangop,” kag “nagahatag sang kabuhi sa tanan nga mga butang.” Ang Kapawa ni Cristo magabulig sa aton nga maghangop sa iban nga tawo paagi sa mga mata sang Manluluwas. Mangin mapinalanggaon kag mahinangpanon kita parte sa mga kabudlay sang iban.Ini magabulig sa aton nga mangin mas pasensyoso sa yadtong wala nagasimba ukon nagaalagad kasubong naton. Makabulig ini sa aton sa paghangop sing mas lubos sa dakung plano sang kalipayan kag kon paano kita tanan kabahin sinang daku kag mapinalanggaon nga plano. Ini nagahatag sang kabuhi, kahulogan, kag katuyoan sa tanan naton nga ginabuhat. Karon, upod ang tanan nga kalipayan nga sarang mag-abot sa aton samtang kita nagahangop sing mas lubos sa Kapawa ni Cristo, ini indi makaanggid sa kasadya nga aton mabatyagan kon makit-an naton ang Kapawa ni Cristo nga nagabuhat sa iban: sa pamilya, mga abyan, kag bisan pa sa lubos nga mga dumuluong.
Nabatyagan ko inang kasadya sang nabatian ko ang mga pagtinguha sang maisog nga hubon sang mga bombero nga nagtinguha nga luwason ang nasunog nga stake center sa Southern California sang 2015. Samtang ang kalayo nagadabdab, ang battalion commander nagtawag sa abyan niya nga LDS agud magpamangkot kon diin ang sagradong mga butang kag mga sacrament cups natago agud ang mga ini masalbar. Ang iya abyan nagpasalig sa iya nga wala sang sagradong mga butang kag ang mga sacrament cups sarang maislan sing tuman ka madali. Apang ang commander nakabatyag nga maghimo pa sing mas kapin, gani ginpadala niya ang iya mga tinawo balik sa nagakalayo nga bilding agud kuhaon ang tanan nga dibuho ni Cristo halin sa mga dingding agud ang mga ini maamligan. Ginbutang pa gani nila ang isa sa firetruck, nagalaum nga ang mga bombero pagabantayan sini. Natandog gid ako sa kabuot, kaayo, kag kaluyag sa Kapawa sining commander labi na sa panahon sang katalagman kag kabudlay.
Sa nagadulum nga kalibutan, ang Kapawa niCristo magasilak nga mas masanag kag mas masanag tubtob sa adlaw nga perpekto!
Liwat suliton ko ang mga pulong ni Paul: “Tugoti nga isuksok naton ang panaming sang kasanag.” Nagasaksi ako parte kay Cristo. Sia ang Kapawa sang Kalibutan. Kabay nga pabakuron kita sang kapawa nga sarang naton maangkon paagi sa mas lubos nga pagpartisipar sa simbahan kag pagtuman sa mga prinsipyo sang ebanghelyo sa aton mga pamilya. Kabay nga makit-an naton sing dalayon ang Kapawa ni Cristo sa iban kag buligan sila nga sila mismo ang makakita. Samtang ginabaton naton inang kapawa, bugayan kita sang dugang nga kapawa, tubtob sa adlaw nga perpekto kon diin makita naton “ang Amay sang mga kapawa,” ang aton Langitnon nga Amay. Nagasaksi gid ako sa balaan nga ngalan sang Kapawa sang Kalibutan, nga amo gid si JesuCristo, amen.