O Daw Ano Ka Dako ang Plano sang Aton Dios!
Ginapalibotan kita sang makatilingala nga manggad sang kasanag kag kamatuoran, gani nagapamangkot ako kon bala matuod nga nagapasalamat kita nga nabal-an naton ang mga ini.
Daw ano ka bulahan kita nga makatililipon liwat sa sining bug-os kalibutan nga konperensya sa idalum sang direksyon kag pagpangulo sang aton palangga nga propeta kag Presidente, si Thomas S. Monson. Presidente, ginapalangga ka namon kag kami nagasakdag sa imo sa amon bug-os nga tagipusuon!
Sa kabuhi ko bilang isa propesyonal nga piloto, tuman gid ako nga nagsalig sa labing maayong ikasarang sang mga sistema sang computer apang talagsa ako nga naggamit sang akon kaugalingon nga computer. Sa mga buluhaton ko sa opisina, bilang executive, may ara ako sang mga assistant kag mga secretarya nga nagbulig sing maayo sa akon.
Ini tanan nagbag-o sang 1994, sang gintawag ako nga isa ka General Authority. Ang palangakuan ko naglakip sang madamo nga maayong mga oportunidad sa pagpangalagad, apang ini naglakip man sang madamo nga buluhaton sa opisina sang Simbahan—kapin sangsa nahunahunaan ko nga posible.
Sa kakugmat ko, ang unang gamit ko agud mahimo ang akon obra amo ang kaugalingon nga computer.
Sa unang higayon sang akon kabuhi, kinahanglan ko nga matun-an kag maandan ining gamit sa trabaho.
Halin sa pagsugod, ang computer kag ako di maayo nga mag-abyan.
May mga batid nga tawo nga nagtudlo sa akon kon paano gamiton ang computer. Ara sila sa akon likod, ang mga butkon naglampuwas sa akon abaga, ang mga tudlo nila madasig nga nagadiin sa keyboard.
“Kita mo?” siling nila nga may pagpabugal. “Amo ina ang paghimo mo sini.”
Wala ko makit-an. Mabudlay ato nga pagtuon.
Ang pagtuon ko sa paggamit sang computer tuman gid ka budlay.
Nagkinahanglan ini sang malawig nga tion, paliwatliwat, pasensya, dako nga paglaum kag pagtuo, madamo nga mga pagpasalig halin sa akon asawa, kag linitro kadamo nga diet soda nga indi ko na lang paghinambitan.
Karon, 22 anyos ang nagligad, ginapalibotan ako sang teknolohiya pang-computer. May ara ako sang email address, Twitter account, kag Facebook. May ara ako isa ka smartphone, tablet, laptop, kag digital camera. Kag, samtang ang mga kahanasan ko medyo kulang pa sangsa kinaandan nga pito ka tuig nga bata, para sa sitentahon nga tawo, ok na ako.
Apang namutikan ko ang isa ka butang nga makawiwili. Samtang labi ako nga nangin batid sa teknolohiya, labi ko nga ginabaliwala ini.
Sa dakong bahin sang maragtas sang tawo, ang komunikasyon natabo sa kadasig sang isa ka kabayo. Ang pagpadala sang mensahi kag pagbalos sini sarang mag-abot sa inadlaw ukon binulan pa gani. Karon ang aton mga mensahi nagatabok sa linibo ka mga kilometro agi sa kahawaan ukon sa linibo ka metro sa idalum sang kadagatan agud malab-ot ang isa ka tawo sa pihak sang kalibutan, kag kon madugayan sa bisan pila lamang ka segundo, nagaugtas na kita kag wala sing pasensya.
Ini daw kinaiya gid sang tawo: samtang kita labi nga naanad sa isa ka butang, bisan milagroso kag dalayawon, kita nadulaan sang pagdayaw kag ginakabig naton ini nga ordinaryo.
Ginabaliwala Bala Naton ang Espirituhanon nga Mga Kamatuoran?
Ang pagbaliwala naton sa moderno nga mga teknolohiya kag mga gamit siguro isa ka diutay nga butang kon ipaanggid. Apang, makahalanusbo, kon kaisa kita may ara sang amo man nga batasan parte sa walay katapusan kag makapalambo sa kalag nga doktrina sang ebanghelyo ni JesuCristo. Sa Simbahan ni JesuCristo, ginhatagan kita sing labing tuman. Ginapalibotan kita sang makatilingala nga manggad sang kasanag kag kamatuoran, gani nagapamangkot ako kon bala matuod nga nagapasalamat kita nga nabal-an naton ang mga ini.
Hunahunaa yadtong naunang mga disipulo nga nag-upod kag naghambal sa Manluluwas sa panahon sang Iya pagpangalagad diri sa duta. Mapinsaran bala ninyo ang pagpasalamat kag pagyaob nga nagpuno sa ila mga tagipusuon kag mga hunahuna sang makit-an nila nga Siya nabanhaw halin sa lulubngan, sang makaptan nila ang Iya mga pilas sa Iya mga kamot. Nagbag-o gid ang ila mga kabuhi!
Dumdoma ang naunang mga Santos sining dispensasyon nga nakakilala kay Propetang si Joseph Smith kag nakabati sa iya nga nagwali parte sa ginpanumbalik nga ebanghelyo. Mapinsaran bala ninyo kon ano ang balatyagon nila nga mabal-an nga ang belo sa tunga sang langit kag duta ginbuksan liwat, kag ang kasanag kag ihibalo nag-abot sa kalibutan halin sa aton langitnon nga puluy-an.
Apang labi sa tanan, hunahunaa ang inyo balatyagon sang una ninyo ginpatihan kag nahangpan nga kamo tunay nga anak sang Dios; nga si JesuCristo boluntad nga nag-antus para sa inyo mga sala agud kamo mapatawad liwat; nga ang gahum sang priesthood tunay kag sarang maghugpong sa inyo upod sa inyo mga pinalangga para sa tion kag sa tanan nga katubtoban; nga may ara sang buhi nga propeta sa duta karon nga adlaw. Indi bala matahum kag makakulunyag ina?
Sa pagbinagbinag sini tanan, paano ini natabo nga kita laban sa tanan nga katawhan wala nagakalipay sa aton pagsimba sa Simbahan? Ukon natak-an sa pagbasa sang balaan nga mga kasulatan? Ginabulobanta ko nga ini posible lamang kon ang mga tagipusuon naton nawad-an sang igbalatyag agud magpasalamat kag magdayaw sa sagrado kag langitnon nga mga dulot nga ginhatag sang Dios sa aton. Ang makapabag-o sang kinabuhi nga mga kamatuoran ara sa aton atubang kag sa punta sang aton mga tudlo, apang kon kaisa kita indi lubos nga nagalakat sa dalan sang pagkadisipulo. Masami ginatugotan naton ang aton mga kaugalingon nga maglingas, bangud sang mga kahuyangan sang aton mga kaupod nga mga miyembro, sa luyo nga sundon ang halimbawa sang aton Agalon. Nagalakat kita sa banas nga puno sang mga diamante, apang daw halos indi naton makilala ang mga ini nga tuhay sangsa kinaandan nga mga bato.
Kinaandan nga Mensahi
Sang ako batan-on pa, ang mga abyan ko nagapamangkot parte sa akon relihiyon. Masami magasugod ako sa pagpaathag parte sa mga pagkatuhay, subong sa “Word of Wisdom”. Sa iban nga tion ginapatalupangod ko ang mga pagkasubong sa iban nga mga relihiyon nga Kristiyano. Wala sa mga ini ang makapadayaw sing labing tuman sa ila. Apang kon maghambal ako parte sa dakong plano sang kalipayan sang aton Amay sa Langit para sa Iya mga anak, madasig gid sila magpamati.
Madumdoman ko ang magdrowing sang plano sang kaluwasan sa blackboard sang klasehan sang aton chapel sa Frankfurt, Germany. Naghimo ako sang mga sirkulo nga nagarepresentar sang kabuhi antes diri sa duta, sang mortalidad, kag sang pagbalik sa aton Langitnon nga mga Ginikanan pagkatapos sining kabuhi.
Bilang isa ka tinedyer, luyag ko gid magpaambit sining makakulunyag nga mensahi. Kon ginapaathag ko ining mga prinsipyo sa kaugalingon ko nga mga pulong, ang tagipusuon ko napuno gid sang pagpasalamat sa Dios nga nagapalangga sa Iya mga anak, kag sa Manluluwas nga nagtubos sa aton tanan halin sa kamatayon kag sa impiyerno. Ginpabugal ko gid ining mensahi sang pagpalangga, kasadya, kag paglaum.
Ang pila sa mga abyan ko nagsiling nga ining mensahi daw sa kinaandan, bisan nga ang mga ini wala matudlo sang ila relihiyon. Ang mga ini daw sa permi na nila nabal-an nga matuod, nga ako daw sa nagpasanaaw sa ila parte sa isa ka butang nga dalayon kag tudok nga ara na sa ila mga tagipusuon.
May Ara Kita sang Mga Sabat!
Nagapati ako nga ang kada tawo may ara sa ila tagipusuon sang pila ka mga nahaunang pamangkot parte sa kabuhi mismo. Diin ako naghalin? Ngaa ari ako diri? Ano ang matabo pagkatapos ako magtaliwan?
Ining sahi sang mga pamangkot ginpamangkot sang katawhan sugod pa sa kaagahon sang panahon. Ang mga pilosopo, mga mangin-alamon, kag mga batid naggamit sang ila mga kabuhi kag mga manggad sa pagpangita sa mga sabat.
Nagapasalamat ako nga ang ginpanumbalik nga ebanghelyo ni JesuCristo may ara sang sabat sa labing kumplikadong mga pamangkot parte sa kabuhi. Ining mga sabat ginatudlo sa Ang Simbahan ni JesuCristo sang Mga Santos sa Ulihing Mga Adlaw. Ang mga ini matuod, maathag, diretso, kag mahapos mahangpan. Ang mga ini may inspirasyon, kag ginatudlo naton sa mga bata nga tatlo ka tuig ang edad sa Sunbeam class.
Mga kautoran, kita mga tinuga nga walay katapusan, wala sang sinugoran kag wala sang katapusan. Dalayon kita nga nagtuhaw. Kita matuodtuod nga mga anak sa espiritu sang diosnon, walay kamatayon, kag makagagahum nga Langitnon nga mga Ginikanan!
Naghalin kita sa langitnon nga mga palasyo sang Ginuo nga aton Dios. Naghalin kita sa harianon nga puluy-an ni Elohim, ang Labing Pinakamataas nga Dios. Kaupod naton Siya sa aton kabuhi antes diri sa duta. Nabatian naton Sia, nasaksihan naton ang Iya pagkahari, natun-an naton ang Iya mga pagginawi.
Kita nagpartisipar sa Dakong Konseho kon diin ang pinalangga nga Amay nagpresentar sang Iya plano para sa aton—nga kita makadto sa kalibutan, magbaton sang mortal nga lawas, manuto sa pagpili sang maayo kag malain, kag mag-uswag sa mga paagi nga indi sarang matabo didto.
Sang kita nag-agi sa belo kag nabun-ag diri, nabal-an naton nga kita malimot sa aton kabuhi didto. Dapat may ara sang oposisyon, kabudlay, kag pagsulay. Apang nabal-an man naton nga ang pag-angkon sang mortal nga lawas labing importante para sa aton. Oh, daw ano nga ginlauman naton nga kita manuto sing madasig nga magpili sing husto, mabatas ang mga pagsulay ni Satanas, kag sa ulihi makapauli upod sa aton pinalangga nga mga Ginikanan sa Langit.
Nabal-an naton nga kita makasala kag makahimo sing mga sayup—basi ang pila sini seryoso. Apang nabal-an man naton nga si JesuCristo, ang Manluluwas, nagpanaad nga makadto sa kalibutan, mangabuhi nga wala sing sala, kag boluntad nga maghatad sang Iya kabuhi sa Pagpasag-uli. Nabal-an naton nga kon ihatag naton ang aton tagipusuon sa Iya, magsalig sa Iya, kag magtinguha sing lubos naton nga masarangan nga magsunod sa Iya, mapatawad kita kag liwat makabalik sa atubang sang pinalangga naton nga Amay sa Langit.
Gani, upod ang pagtuo sa sakripisyo ni JesuCristo, kita, paagi sa aton pagbuot, nagbaton sa plano sang Langitnon nga Amay.
Ina ang rason kon ngaa ari kita diri sa sining matahum nga kalibutan—bangud ang Dios naghalad sa aton sang oportunidad, kag ginbaton naton ini. Ang kabuhing mortal naton, bisan paano, agi lamang kag matapos sa kamatayon sang aton lawas. Ang aton mga espiritu magapadayon kag maghulat sa Pagkabanhaw—libre nga dulot sa tanan sang aton mapinalanggaon nga Langitnon nga Amay kag sang Iya Anak nga si JesusCristo. Sa Pagkabanhaw, ang mga espiritu kag mga lawas naton magabalikay, hilway sa sakit kag lawasnon nga mga kahuyangan.
Pagkatapos sang Pagkabanhaw, maabot ang Adlaw sang Paghukom. Samtang ang tanan sa ulihi maluwas kag makapanubli sang ginharian sang himaya, yadtong mga nagsalig sa Dios kag nagtinguha sa pagtuman sang Iya mga layi kag mga ordinansa magapanubli sang mga kabuhi sa walay katubtuban nga di-mahanduraw sa himaya kag di-matupongan nga pagkaharianon.
Inang Adlaw sang Paghukom mangin adlaw sang kalooy kag pagpalangga—adlaw kon diin ang mga tagipusuon nga may kasakit paayohon, kon diin ang mga luha sang kalisud mabuslan sang mga luha sang pagpasalamat, kon diin ang tanan pagahustohon.
Huo, may ara sang tudok nga kasubo bangud sang sala. Huo, may ara sang mga paghinulsol kag bisan kalisud bangud sang aton mga sayup, mga katontohan, kag pagkabat-ulan nga amo ang gintunaan nga di naton mabaton ang mas dakong palaaboton.
Apang may kumpiyansa ako nga indi lamang naton maluyagan ang paghukom sang Dios; kondi makibot man kita kag daw sa indi magpati sa Iya walay dulonan nga grasya, kalooy, kaalwan, kag gugma para sa aton, nga Iya mga anak. Kon ang aton mga handom kag binuhatan maayo, kon kita may pagtuo sa buhi nga Dios, pat-ud nga paaboton naton ang gintawag ni Moroni nga “makapahamuot nga hukmanan sang dakong si Jehovah, ang Walay Katapusan nga Hukom.”
Pro Tanto Quid Retribuamus
Palangga kong mga kautoran, mahal nga mga abyan, indi bala ini nagapuno sang aton mga tagipusuon kag mga hunahuna sang pagkatingala kag pagdayaw kon binagbinagon naton ang dakong plano sang kalipayan nga ginhanda sang aton Langitnon nga Amay para sa aton? Wala bala ini nagapuno sa aton sang di-matungkad nga kasadya nga mabal-an ang mahimayaon nga palaaboton nga ginhanda para sa mga nagalaum sa Ginuo?
Kon wala ninyo mabatyagan ining pagkatingala kag kasadya, ginadapit ko kamo sa pagsiyasat, pagtuon, kag pagbinagbinag sa simple apang madalum nga mga kamatuoran sang ginpanumbalik nga ebanghelyo. “Tugoti ang mga kahiwatan sang walay katubtoban nga ara sing dalayon sa inyo mga hunahuna.” Tugoti ang mga ini nga magpamatuod sa inyo sang diosnon nga plano sang kaluwasan.
Kon nabatyagan ninyo ining mga butang sang una, ginapamangkot ko kamo karon nga adlaw, “Mabatyagan bala [ninyo] karon?”
Bag-o lang, nagkadto ako sa Belfast, Northern Ireland. Samtang didto, natalupangdan ko ang “Belfast Coat of Arms”, nga nagalakip sining moto “Pro tanto quid retribuamus,” ukon “Ano ang ibalos naton para sa tuman nga ginhatag sa aton?”
Ginadapit ko ang kada isa sa aton sa pagbinagbinag sining pamangkot. Ano ang dapat naton ibalos sa bugana nga kasanag kag kamatuoran nga ginpaulan sang Dios sa aton?
Ang aton palangga nga Amay simple nga nagapangayo nga kita magtuman sa kamatuoran nga aton nabaton, kag sundon naton ang banas nga Iya ginhanda. Gani, mangin maisog kita, kag magtuo sa paggiya sang Espiritu. Magpaambit kita sa pulong kag sa binuhatan sang halangdon kag dalayawon nga plano sang kalipayan sang Dios. Kabay nga ang motibo naton amo ang gugma naton sa Dios kag sa Iya mga anak, bangud sila mga kautoran naton. Ini ang sinugoran sang aton balos sa tuman nga ginhatag sa aton.
Sa pila ka adlaw “ang kada tuhod magaluhod, ang kada dila magatuad” nga ang mga pagginawi sang Dios matarong kag ang Iya plano perpekto. Para sa aton, tugoti inang adlaw nga mangin karon nga adlaw. Magpahayag kita subong kay Jacob sang dumaan, “O daw ano kadako sang plano sang aton Dios!”
Sa sini ako nagapamatuod nga may tudok nga pagpasalamat sa aton Langitnon nga Amay, samtang ginabugayan ko kamo, sa ngalan ni JesuCristo, amen.