Mga Tinugyanan sa Simbahan
Ginapangabay namon kamo bilang mga home teacher nga mangin tinugyanan sang Dios sang Iya mga anak, agud kamo magpalangga kag mag-amuma, kag magpangamuyo para sa katawhan nga gintalana sa inyo.
Bag-o lang ang sister nga walay bana, pagatawgon ko sia nga si Molly, nag-abot sa balay halin sa obra kag naabtan nga ang iya basement ginbahaan sang tubig nga duha ka pulgada (5 cm). Gilayon nabal-an niya nga ang iya mga kasilingan, nga pareho ang linya sang nagailig nga tubig sa iya balay, naggamit sing tuman ka madamo nga tubig sa pagpanglaba kag pagpaligo bangud nag-alalawas ang tubig balik sa iya tubo.
Pagkatapos nga nagtelepono si Molly sa iya abyan nga babayi, sila nagsugod sa pagsag-a kag paglimpyo. Samtang nagaobra sila, naghuni ang doorbell. Ang abyan niya nagsinggit, “Mga home teacher mo ina!”
Nagkadlaw si Molly. “Ini amo katapusan nga adlaw sang bulan,” sabat niya, “apang mapasalig ko ikaw indi ina mga home teacher ko.”
Nagatiil, basa ang pantalon, kag ang buhok ginhigtan sang bandana, kag may suksok nga matahum nga mga gwantes sang latex, si Molly nagkadto sa pwertahan. Ang di-kinaandan niya nga itsura indi mapaanggid sa di-kinaandan nga nakit-an niya sa iya atubang. Ato mga home teacher niya!
“Daw indi ko mapatihan ang akon nakit-an!” siling niya sa akon sang ulihi. “Milagro ini parte sa home teaching, ang sahi nga ginapaambit sang Brethren sa mga pamulong sa kabilogan nga konperensya!” Nagpadayon sia: “Apang sang ako nagapaminsar kon bala halokan ko sila ukon ihatag ang mop sa ila, sila nagsiling, ‘Oh, Molly, pasensyaha kami. Bal-an namon nga masako ka. Indi kami luyag nga maghuder; gani mabalik na lang kami sa sunod nga tiyempo.’ Kag naglakat sila.”
“Sin-o ato?” pamangkot sang iya abyan sa basement.
“Luyag ko tani magsiling, ‘Indi ato ang Tatlo ka Mga Nephites,’” gin-ako ni Molly, “apang nagpugong ako kag kalma nga nagsiling, ‘Mga home teacher ko, apang nabal-an nila nga indi ini ang husto nga tion agud ipaambit ang ila mensahi.’”
Mga kautoran, pwede bala nga usisaon naton sang malip-ut ang katungdanan sang priesthood nga ginalaragway bilang “Unang Kuluhaan sang Bulig sang Simbahan” para sa kada tawo kag mga pamilya sini. Ginsakripisyo ang bilog nga mga kagulangan para maghatag sang papel sa pag-organisar sini kag dayon liwat nga pag-organisar sini. Linibo ka mga pamulong ang ginhimo sa pagpadasig sini. Di mahanay ang mga kabasulanan nga gintuga sining halambalan. Apang sa gihapon ginabudlayan kita nga maangkon bisan ang malapit sa talaksan sang pagbuhat parte sa sugo sang Ginuo nga “bantayan sing dalayon ang simbahan” paagi sa priesthood home teaching.
Bahin sang kabudlay nga aton ginaatubang amo ang nagabag-o nga mga kinaiya sang miyembro sang Simbahan. Nabal-an namon ina nga sa aton membership nga nagalapta sa kapin sa 30 mil ka mga ward kag branch, nga ara sa 188 ka mga nasyon kag teritoryo, mas dugang nga mabudlay ang magbisita sa mga puluy-an sang aton mga kautoran sangsa naunang panahon sang Simbahan kon diin ang mga lapitanay nga mga miyembro nagbisitahay sa tawag nga “block teaching”.
Dugang pa, sa madamo nga mga unit sang Simbahan, limitado ang kadam-an sang mga nagaangkon sang priesthood nga sarang mag home teaching, gani yadtong nagaalagad may ara sang 18 ukon 20 ka pamilya—ukon sobra—nga balantayan. May ara man nga mga isyu parte sa tuman ka malayo nga pagbiyahe, mahal nga plete kag limitado nga mga salakyan, kag ang ginpalawig nga mga adlaw ukon simana sang pag-obra sa lugar. Idugang diri ang kultural nga mga pagdumili sa pagbisita kon wala gindapit kag ang mga isyu parte sa seguridad nga ara sa madamo nga bahin sang kalibutan—ti, makit-an naton ang kumplikasyon sang problema.
Mga kautoran, sa pinakamaayong lugar kag sa mga kahimtangan nga ini mahimo, ang bulanan nga pagbisita amo sa gihapon ang ginatinguhaan sang Simbahan nga malab-ot. Apang nabal-an nga sa madamo nga lugar sang kalibutan, ang amo nga talaksan indi posible kag ginahimo naton yadtong mga kautoran nga magbatyag nga daw mga nalugaw-an kon ginapahimo sang mga pinuno ang indi nila sarang mahimo, ang Unang Pangulohan nagsulat sa mga lider sang priesthood sang Simbahan sang December 2001 naghatag sining may inspirasyon, kag labing makabulig nga laygay: “May ara sang mga lugar sa Simbahan,” sulat nila, “diin … ang home teaching sa kada puluy-an kada bulan basi indi posible bangud sa di nagakaigo nga kadam-an sang aktibong kautoran sa priesthood kag iban pa nga mga kabudlay nga lokal.” Ginhinambitan namon ang pila sa mga ini. “Kon ang amo nga mga kahimtangan nagapangibabaw,” padayon nila, “ang mga lider dapat maghimo sang ila pinakamaayong masarangan sa paggamit sang may ara sila sa pagbantay kag pagpabakod sa kada miyembro.”
Mga kautoran, kon sa ward ukon branch ko ining mga mabudlay nga mga kahimtangan ginaatubang ko, ang kaupod ko nga Aaronic Priesthood kag ako magagamit sining laygay sang Unang Pangulohan (nga karon sulundon sa handbook) sa sining paagi: Una, bisan pila pa ka bulan ang kinahanglan agud maagum ini, tumanon namon ang mando sa kasulatan nga “magbisita sa balay sang kada miyembro,” maghimo sang schedule nga makakadto kami sa yadtong mga puluy-an sa petsa nga sarang matuman kag suno sa sitwasyon. Kalakip sa sinang schedule amo ang paghimo sang ulonahon basi sa amon tion kag pagbisita sang yadtong labing nagakinahanglan sa amon—mga investigator nga ginatudloan sang mga misyonero, bag-o nabunyagan nga mga nahaylo, mga may sakit, nagakasubo, diutay-kaaktibo, mga pamilya nga may solo nga ginikanan kag may mga anak upod sa puluy-an, kag iban pa.
Samtang nagahimo sang schedule para sa amon pagbisita sa tanan nga puluy-an, nga basi madugayan, kami maghimo sang iban nga sahi sang pagkontak sa mga tawo kag mga pamilya sa amon listahan paagi sa mga butang nga ginhatag sang Ginuo. Pat-ud nga bantayan namon ang amon mga pamilya sa simbahan kag, subong sa ginahambal sa mga kasulatan, “makighambal sa kada isa parte sa kaayohan sang ila mga kalag.” Dugang pa, pwede kami magtawag sa telepono, magpadala sang mga emails kag mga mensahi sa text, kag mag-type sang panamyaw paagi sa isa sa madamo nga porma sang social media. Agud buligan yadtong may pinasahi nga mga kinahanglan, pwede kami magpadala sang isa kutlo halin sa kasulatan ukon linya sa pamulong sang kabilogan nga konperensya ukon Mormon Message halin sa madamo nga mga materyales sa LDS.org. Sa hambal sang Unang Pangulohan, himuon naton ang pinakamaayong masarangan naton suno sa mga kahimtangan nga ginaatubang naton kag suno sa may ara kita.
Mga kautoran, ang pangabay ko karon nga gab-i amo ang pagpataas sang inyo panan-awan parte sa home teaching. Palihog, sa bag-o, kag mas maayo nga mga paagi lantawa ang inyo mga kaugalingon bilang mga tinugyanan sang Ginuo para sa Iya mga anak. Ina nagakahulogan nga biyaan na naton ang nagadalidali, subong sa layi ni Moses, katapusan-sa-bulan nga petsa kon diin kamo nagadalagan nga maghatag sang ginsulat nga mensahi nga nabasa na sang pamilya. Sa luyo sini, ginalauman namon, nga magtukod kamo sang bag-ong panahon sang tunay, sentro sa ebanghelyo nga pagkabalaka sa mga miyembro, nagabantay kag nagaamuma sa kada isa nagabulig sa espirituhanon kag materyal nga mga pagkinahanglan sa bisan ano nga paagi nga makabulig.
Karon, kon parte sa kon ano ang pwede “isipon” bilang home teaching, ang kada maayo nga inyo ginahimo sarang “isipon” gani ireport ini tanan! Matuod, ang report nga labing importante amo ang kon paano ninyo ginbugayan kag gin-amuma yadtong mga gintugyan sa inyo, nga halos wala sang kahilabtanan sa petsa ukon partikular nga lugar. Ang importante amo nga palangga ninyo ang katawhan kag ginatuman ninyo ang sugo nga “magbantay sing dalayon sang simbahan.”
Sang Mayo 30 sang nagligad nga tuig, ang abyan ko nga si Troy Russell nag-drive sang iya pickup nga inanay paggwa sa iya garahe agud magdonate sang mga pagkabutang sa Deseret Industries. Nabatyagan niya nga may naligsa ang ruweda niya sa likod. Pinsar niya nga may nahulog nga butang, nanaog siya lamang agud masapwan ang iya nuebe-anyos nga batang lalaki nga si Austen, nagahapa sa semento. Ang mga siyagit, priesthood blessing, mga paramedic, kag tinawo sa ospital, —sila tanan, sa sining hitabo, wala makabulig. Si Austen nagtaliwan.
Indi makatulog kag wala sang kalinong, si Troy indi maoloolohan. Siling niya indi niya mabatas ang natabo kag simple nga indi sia makapadayon. Apang sa sinang alantuson nga tion nag-abot ang tatlo ka manugtubos nga mga pwersa.
Una, ang gugma kag nagapasalig nga espiritu sang aton Amay sa Langit, impluwensya nga ginpaabot sang Balaan nga Espiritu nga nagpasulhay kay Troy, nagtudlo sa iya, nagpalangga sa iya, kag naghutik nga ang Dios lubos nga nakahangop parte sa pagkadula sang isa ka matahum kag perpektong Anak. Ikaduha, ang iya asawa nga si Deedra, nga naghakos kag nagpalangga kag nagpadumdom sa iya nga sia man nadulaan sang anak nga lalaki kag determinado sia nga indi madulaan sang isa ka bana. Ikatatlo, ang istorya ni John Manning, home teacher nga labing pinasahi.
Prangka nga wala ko mabal-an kon ano nga schedule si John kag ang iya junior nga kaupod nagbisita sa puluy-an Russell, ukon ano ang mensahi nga mensahi ang ginhatag, ukon paano nila ginreport ang ila inagihan. Ang nabal-an ko amo nga sang nagligad nga spring si Brother Manning naglab-ot kag nagtib-ong kay Troy Russell halin sa trahedya sinang driveway subong nga sia nag-alsa mismo sa bata nga si Austen. Subong sa home teacher ukon manugbantay ukon utod sa ebanghelyo nga sia dapat mangin, si John simple nga nagbaton sang priesthood nga pag-amuma kag pagbantay para kay Troy Russell. Nagsugod sia paagi sa pagsiling, “Troy, luyag ni Austen nga magsugod ka liwat—kalakip sa basketbolan—gani makadto ako diri kada aga alas singko kinse. Maghanda ka tungod indi ako luyag nga apason ka agud bugtawon kag ako nakabalo nga si Deedra indi gusto nga buhaton ko man ina.”
“Wala ako sing luyag nga maglakat,” siling ni Troy sa akon sang ulihi, “bangud dalayon ko nga gin-upod si Austen sadtong mga aga kag nabal-an ko nga ang mga handurawan tuman ka masakit. Apang si John nagpamilit, gani nag-upod ako. Halin sa unang adlaw pabalik, nag-istoryahanay kami—ukon ako ang nag-istorya—kag si John nagpamati. Nagahambal ako sa iya pakadto sa simbahan kag pabalik sa balay. Kon kaisa nagaistorya ako samtang kami nagdulog sa driveway kag naglantaw sa nagabutlak nga adlaw sa Las Vegas. Sa una mabudlay ato, apang sa naglipas nga tion nakaagum ako sang kabakod halin sa tawo nga 6’ 2” apang bundol maghampang sang basketbol, kag lubos nga indi maayo mag-jump shot, nagpalangga sa akon kag nagpamati tubtob ang adlaw sang ulihi nagbutlak liwat sa akon kabuhi.”
Mga kautoran sa balaan nga priesthood, kon ginahambal naton ang home teaching ukon pagbantay ukon personal nga pagpangalagad sa priesthood—tawga ini sa luyag ninyo—amo ini ang aton ginahambalan. Ginapangabay namon kamo bilang mga home teacher nga mangin mga tinugyanan sang Dios sang Iya mga anak, magpalangga kag mag-amuma kag magpangamuyo para sa katawhan nga gintalana sa inyo, subong nga kami nagapalangga kag nagaamuma kag nagapangamuyo para sa inyo. Kabay nga kamo maayo gid magbantay sang panong sang Dios suno sa inyo mga kahimtangan, ginapangamuyo ko, sa ngalan sang Maayo nga Manugbantay naton tanan, nga ako Iya saksi, nga amo si Ginuong JesuCristo, amen.