“Isa ka Pinili nga Mananan-aw Ang Akon Pagatawgon”
Bangud si Joseph Smith isa ka propeta, may ara kita sang mas kapin sangsa isa ka talamwaan palangit—ang pinakaganhaan padulong sa mga walay katubtoban bukas para sa aton.
Sang si Moroni unang nagpakita kay Joseph Smith, sia nagpaandam nga “ang ngalan niya makilal-an sa maayo kag malain sang tanan nga mga nasyon.” Natuman inang panagna. Sa away sang maayo kag malain, ang Pagpanumbalik sang ebanghelyo paagi kay Propetang si Joseph Smith naghatag inspirasyon sa mga tumuluo nga nagsunod sa iya kag nagpaakig man sa mga kaaway nga mainit nga nagabato batok sa kawsa sang Zion kag sa kay Joseph mismo. Ining away indi bag-o. Ini nagsugod dayon pagkatapos nga nagkadto si Joseph sa Sagradong Kakahoyan kag nagapadayon karon nga adlaw may dugang nga pagkabansada sa internet.
Ang Ginuo nagsiling kay Joseph Smith:
“Ang bilog nga kalibutan mamangkot parte sa imo ngalan, kag ang buang nga mga tawo magahikay sa imo, kag ang impiyerno magabato batok sa imo;
“Apang ang tawo nga putli sa tagipusuon, ang maalam, ang dungganon, kag ang matinlo, dalayon nga mangayo sang laygay, kag awtoridad, kag mga bugay halin sa imo.”
Karon nga adlaw ginahalad ko ang akon pagpamatuod sa tanan nga luyag makahangop sang mas maayo parte sa sagradong misyon ni Joseph Smith Jr., ang Propeta sang Pagpanumbalik.
Indi kita dapat mahuya sa pagsaksi sa misyon ni Joseph bilang propeta, mananan-aw, kag manugbugna, kay ang Ginuo dalayon nga nagabuhat paagi sa mga propeta. Bangud sang mga kamatuoran nga ginpanumbalik paagi kay Joseph Smith, mas madamo kita sang nabal-an parte sa aton Langitnon nga Amay kag sa Manluluwas nga si JesuCristo. Nabal-an naton ang Ila diosnon nga mga kinaiya. Ang relasyon Nila sa kada isa kag sa aton, kag ang dakong plano sang pagtubos nga nagatugot sa aton nga makabalik Ila atubang.
Parte kay Joseph, si Presidente Brigham Young nagsiling: “Ini gintalana sa mga konseho sang walay katubtoban, sang madugay nga wala pa matukod ang sadsaran sang kalibutan, nga sia dapat ang tawo nga sa pinakaulihing dispensasyon sining kalibutan, magadala sang pulong sang Dios sa katawhan kag magbaton sang kabug-osan sang gahum sang Priesthood sang Anak sang Dios. Ginbantayan sia sang Ginuo … [kay sia] ang gin-ordinan sa walay katubtoban nga magpangulo sa sining ulihing dispensasyon.”
Sa paghanda sa sining dakong buluhaton, si Joseph ginbun-ag sa isa ka mapinalanggaon nga pamilya nga nag-agi sa madamo nga palas-anon kag pagtilaw sang matag-adlaw nga pagpangabuhi. Samtang si Joseph nagsugod nga mangin hamtong, ang mga balatyagon niya sa Dios “madalum kag masami makatalandog,” apang nagsalangisag sia parte sa nanuhaytuhay nga mga ideya sang relihiyon nga gintudlo sang mga manugwali sa iya panahon. Maayo lang, si Joseph wala magtugot sa iya mga pamangkot nga magpiyerde sa iya pagtuo. Nagpangita sia sang sabat sa Biblia kag nasapwan ining laygay: “Kon sin-o sa inyo ang kulang sang kaalam, magpangayo sa Dios, nga maalwan sa paghatag sa tanan nga katawhan, kag wala nagapangakig; kag ini igahatag sa iya.”
Gindumdom ni Joseph: “Wala gid sang bersikulo sang kasulatan nga nagtudok sing gamhanan sa tagipusuon sang tawo subong sa ginhimo sini sa akon sining tion. Daw sa nanalupsop ini nga may dakong kusog sa bug-os ko nga balatyagon. Paliwatliwat ko nga ginbinagbinag ini.”
May simple nga pagtuo, si Joseph nagbuhat suno sa sining espirituhanon nga mga pagpabatyag. Nagkadto sia sa isa ka maligwin nga lugar, nagluhod, kag “nagsugod sa paghalad sang mga handom sang [iya] tagipusuon sa Dios.” May dakong gahum ang paglaragway ni Joseph parte sa natabo:
“Nakit-an ko ang haligi sang kasanag sa ibabaw sang akon ulo, nga ang kasanag kapin sangsa adlaw, kag inanay nga nagpanaog ini tubtob nagtupa sa akon.
“… Sang ang kasanag nagtupa sa akon nakit-an ko ang duha ka mga Persona, nga ang kasanag kag himaya di-mailaragway, nagatindog sa hangin sa ibabaw ko. Ang Isa sa ila naghambal sa akon, gintawag ang akon ngalan kag nagsiling, nagatudlo sa kaupod— Ini ang Pinalangga Ko nga Anak. Pamatii Siya!”
Nakit-an ni Joseph Smith ang Dios, ang Walay Katapusan nga Amay, kag si JesuCristo, ang Manluluwas kag Manunubos sang kalibutan. Ini ang Unang Panan-awon ni Joseph Smith. Sa nagsunod nga mga tuig, si Joseph naglubad sa Libro ni Mormon paagi sa dulot kag gahum sang Dios. Madamo nga anghel ang nagbisita sa iya, nagpanumbalik sang mga kamatuoran kag awtoridad nga nadula sa ginatos ka mga tuig. Ining diosnon nga mga pagpakig-ugyon kay Joseph Smith nagbukas sa mga bintana sang langit kag sa mga himaya sang walay katubtoban sa aton panan-aw. Ang kabuhi ni Joseph nagapamatuod nga kon sin-o sa aton ang kulang sa kaalam, makapamangkot kita sa Dios nga may pagtuo kag makabaton sang mga sabat—kon kaisa halin sa langitnon nga mga tinuga, apang mas masami paagi sa gahum sang Balaan nga Espiritu, nga nagahambal sa aton paagi sa may inspirasyon nga mga panghunahuna kag mga balatyagon. Paagi sa Balaan nga Espiritu sarang naton “mabal-an ang kamatuoran sang tanan nga butang.”
Sa madamo sa aton, ang saksi parte kay Propetang si Joseph Smith nagasugod samtang nagabasa kita sang Libro ni Mormon. Una ko nga ginbasa ang bilog nga Libro ni Mormon bilang batan-on nga estudyante sa kaagahon nga seminary. Gamit ang akon aktibong binatabata nga panghunahuna, nagbasa ako nga kuno ako si Joseph Smith, nagatukib sang mga kamatuoran sa Libro ni Mormon sa unang higayon. Dako ang impluwensya sadto sa akon kabuhi gani padayon ko nga ginabasa ang Libro ni Mormon sa amo sina gihapon nga paagi. Sa paghimo sini masami ko matalupangdan nga mas nagadako ang pagpasalamat ko kay Propetang Joseph kag sa mga kamatuoran nga ginpanumbalik sa sining bilidhon nga libro.
Halimbawa, hunahunaa ang mga balatyagon ni Joseph samtang nagalubad sang mga sinulat parte sa bunyag para sa kapatawaran sang mga sala. Si Joseph, nga ginhambalan nga indi magbuylog sa ano man nga simbahan sa iya panahon, siyempre may mga pamangkot parte sa sining makaluwas nga ordinansa. Ini, sa liwat, naghimo sa iya nga magpangamuyo, kag si John the Baptist nagpakita kag nagpanumbalik sang Aaronic Priesthood kag sang awtoridad nga magbunyag.
Ukon hunahunaa kon ano ang ginbatyag ni Joseph sang iya nabal-an sa unang higayon nga si JesuCristo nagbisita sa katawhan sang Western Hemisphere—nga Siya nagtudlo sa ila, nagpangamuyo para sa ila, nagpaayo sang ila masakiton, nagbugay sa ila mga anak, naghatag sang priesthood nga awtoridad, kag nag-alagad sang sacramento sa ila. Siguro sadto wala matalupangdan ni Joseph, apang ang mga natun-an niya parte sa mga ordinansa kag organisasyon sang dumaan nga Simbahan ni Cristo naghanda sa iya nga sa ulihi magbulig sa Ginuo sa pagpanumbalik sa amo man nga Simbahan sa kalibutan.
Sa paglubad sang Libro ni Mormon, si Joseph kag ang iya asawa, si Emma, nangalisud sa kamatayon sang ila lapsag nga lalaki. Sadtong panahon ang mga manugwali kinaandan nga nagtudlo nga ang mga bata nga nagtaliwan nga wala mabunyagan pagasilotan sa katubtoban. Sa sining panghunahuna, ano ayhan ang nabatyagan ni Joseph samtang sia naglubad sining mga tinaga halin sa propetang si Mormon: “Ang diutay nga mga bata wala nagakinahanglan sang paghinulsol, ukon bunyag. … [Kay] ang diutay nga mga bata buhi kay Cristo, bisan halin pa sa pagpasad sang kalibutan.”
Siguro nakibot gid sia sang mabasa sa Libro ni Mormon ni Joseph nga ara sa ika-tatlo nga kapitulo sang 2 Nephi. Ining kapitulo may ara sang dumaan nga panagna parte sa isa ka “pinili nga mananan-aw” nga pagatawgon sang Ginuo sa ulihing mga adlaw—mananan-aw nga ang ngalan Joseph, subong sa ngalan sang iya amay. Ining propeta sa palaaboton “kabigon sing mataas” kag magbuhat sang buluhaton nga “may dakong balor” sa iya katawhan. Sia “mangin bantog subong kay Moses” kag hatagan sang “gahum sa pagpagwa sa pulong sang [Dios].” Hunahunaa kon daw ano ang ginbatyag ni Joseph sang mabal-an niya nga ining panagna parte sa iya! Wala lamang sia nagalubad sang kasaysayan; nagalubad sia parte sa isa ka palanan-awon sa ulihing mga adlaw, sang milagrosong Pagpanumbalik sang ebanghelyo ni JesuCristo— kag si Joseph mismo ang magbulig sa pagtuman sini!
Karon nga adlaw, halos dos sientos ka tuig ang nagligad, mahapos makit-an nga ining panagna natuman. Nabal-an naton ang parte sa dalagkong mga butang nga nahimo ni Joseph bilang propeta sang Ginuo. Apang dumdomon naton nga sang naglubad si Joseph sining panagna, nahimo niya ang pila pa lamang ka mga butang nga gintagna sang mga propeta. Sia nagaedad pa lamang sa unang mga tuig sang pagkabaynte. Ang simbahan wala pa gid maorganisar. Wala sang mga ward, ukon mga branch, wala sang mga misyonero, kag mga templo. Karon lantawa ang dakong buhat sang Ginuo nga ginhimo paagi sa alagad Niya nga si Joseph, walay sapayan sa mga oposisyon batok sa iya. Indi bala ang katumanan sining panagna mabaskog nga ebidensya sang mapanagnaon nga palangakuan ni Joseph Smith?
Sa kay bisan sin-o nga nagaduda sa ila pagmatuod parte kay Joseph Smith ukon nabudlayan bangud sa mga sayup, makapatalang, ukon hapaw nga mga inpormasyon parte sa iya kabuhi kag pagpangalagad, ginadapit ko kamo nga magbinagbinag sa mga bunga—sa madamo nga mga bugay nga nag-abot sa aton paagi sa milagrosong misyon ni Joseph Smith, ang propeta sang Pagpanumbalik.
Bangud si Joseph isa ka propeta, ang mga bugna kag mga propeta indi na mga butang sang nagligad. Ang adlaw sang mga milagro—sang mga palanan-awon, mga pag-ayo, kag pagpangalagad sang mga anghel—wala mag-untat.
Bangud si Joseph isa ka propeta, ang kada isa sa aton makakuha sang gahum kag mga bugay sang balaan nga priesthood, kalakip ang bunyag, ang dulot sang Balaan nga Espiritu, kag ang sacramento.
Bangud si Joseph isa ka propeta, ginaangkon naton ang mga bugay kag ordinansa sang templo nga nagahugpong sa aton sa Dios, nagahimo sa aton nga Iya katawhan, kag nagapakita sa aton sang “gahum sang pagkadiosnon,” nagahimo nga sa isa ka adlaw sarang naton “makita ang nawong sang Dios, bisan pa ang Amay, kag mabuhi.”
Bangud si Joseph isa ka propeta, nabal-an naton nga ang pag-asawahay kag ang pamilya kinahanglanon sa plano sang Dios para sa kalipayan naton. Nabal-an naton nga paagi sa mga ordinansa sang templo kag mga kasugtanan, ang ginakahamut-an naton nga mga relasyon makalab-ot sa katubtoban.
Bangud si Joseph isa ka propeta, may kapin kita sangsa isa ka bintana sang langit—ang pinakaganhaan sang mga katubtoban bukas sa aton. Makilala naton ang “amo lamang nga matuod nga Dios, kag si JesuCristo, nga [Iya] ginpadala.” Ang kabuhing walay katapusan sarang nga mangin aton.
Labi sa tanan, bangud si Joseph isa ka propeta, madamo kita sang saksi, kag mga pagpamatuod, nga si JesuCristo Anak sang Dios kag Manluluwas sang kalibutan. Nagapadayon kag wala sing bal-ot ang pinasahing mga saksi ni JesuCristo, kalakip ang aton propeta karon nga adlaw, si Presidente Thomas S. Monson, ang mga manuglaygay sa Unang Pangulohan, kag ang mga miyembro sang Korum sang Napulogduha ka Mga Apostoles. Sa ila mga saksi, ginadugang ko ang akon kubos apang pat-ud nga pagpamatuod: Si JesuCristo buhi kag nagapamuno sang Iya Simbahan. Si Joseph Smith amo ang Propeta sang Pagpanumbalik. Ang priesthood kag awtoridad sang Dios ara liwat sa duta. Kabay nga maisog naton nga ipahayag ang aton saksi kag ang aton pagpasalamat sa sining maayo nga propeta, mananan-aw, kag manugbugna sang Ginuo amo ang akon pangamuyo sa sagradong ngalan ni JesuCristo, amen.