Magsalig sa Dios nga Wala sing Pagduhaduha
Kon kita malig-on kag wala nagaduhaduha sa aton pagtuo, ang Ginuo magadugang sang aton kapasidad nga mangibabaw sa aton mga pagtilaw sa kabuhi.
Palangga kong mga kautoran, luyag ko magsugod sa akon mensahi paagi sa pagsaksi nga nabal-an ko nga si Presidente Thomas S. Monson propeta sang Dios sa aton panahon. Ang mga Manuglaygay niya sa Unang Pangulohan kag ang Napulog-duha ka Mga Apostoles, matuod man nga mga propeta, mga mananan-aw, kag mga manugbugna. Sila nagarepresentar kay Ginuong JesuCristo kag may pagkamatarung sa pagpahayag sang Iya kaisipan kag pagbuot samtang ini ginabugna sa ila. Nagasaksi ako nga may kaluwasan sa pagsunod sang mga laygay nila. Ang Ginuo nagahatag sang inspirasyon sa ila nga magpatalupangod sa pagpabakod sang aton pagtuo sa Langitnon nga Amay kag sa Iya Anak, si JesuCristo, kag sa Iya Pagpasag-uli agud indi kita magduhaduha kon kita nagaatubang sa mga pagtilaw sa aton panahon.
Sa Libro ni Mormon mabasa naton ang parte sa tawo nga si Ammon nga ginpadala halin sa duta sang Zarahemla padulong sa duta sang Lehi-Nephi agud magpangusisa parte sa iya mga kautoran. Didto nasapwan niya si Haring Limhi kag ang iya katawhan, nga ara sa pagkaulipon sa mga Lamanite. si Haring Limhi nahatagan sang paglaum bangud sang mga butang nga ginpaambit ni Ammon sa iya parte sa katawhan niya sa Zerahemla. Napuno gid ang iya tagipusuon sang dakung paglaum kag kasadya nga sia nagtipon sang iya katawhan sa templo kag nagsiling:
“Busa, indi na kamo magkasubo, kag magkinalipay kamo, kag magsalig sa Dios. …
“ … Kon kamo magaulikid sa Ginuo nga lubos ang tuyo sa tagipusuon, … kag magsalig sa iya, kag mag-alagad sa iya upod ang tanan nga kaukod sang inyo kaisipan, … kon himuon ninyo ini, pagabuhaton niya, suno sa iya kaugalingon nga pagbuot kag luyag, nga hilwayon kamo sa pagkaulipon.”
Ang pagtuo sang katawhan ni Limhi dakung naapektohan sang mga pulong ni Ammon nga sila naghimo sang kasugtanan sa Dios nga mag-alagad sa Iya kag magtuman sang Iya mga sugo, wala sapayan sa ila mabudlay nga mga kahimtangan. Bangud sang ila pagtuo, nakasarang sila magplano agud magpalagyo sa mga Lamanite.
Mga kautoran, palihog binagbinaga ang importansya sang pag-agda ni Haring Limhi sa iya katawhan kag ang pagkadapat sini sa aton. Siling niya, “Indi na kamo magkasubo, kag magkinalipay kamo, kag magsalig sa Dios.” Paagi sa sining mga pulong, si Limhi nag-agda sa iya katawhan nga magtan-aw sa palaaboton paagi sa mga mata sang pagtuo; baylohan ang ila kahadlok sang pagkamalaumon nga nabun-ag sa pagtuo; kag indi magduhaduha sa ila pagsalig sa Dios wala sapayan sa ila kahimtangan.
Ang mortal nga kabuhi panahon sang pagtilaw kon diin kita pagatilawan kon bala kita magtuman sa tanan nga mga butang nga igasugo sang Ginuong Dios sa aton. Ini nagakinahanglan sang malig-on nga pagtuo kay Cristo bisan sa mga panahon sang dalagku nga mga kabudlay. Ini nagakinahanglan nga kita magdutdot pasulong nga may mabakod nga pagtuo kag Cristo, ginagiyahan sang Espiritu kag nagasalig nga ang Dios magahatag sang aton mga kinahanglanon.
Sa katapusan sang Iya dutan-on nga pagpangalagad, antes lang gid Sia gindakop, ang Manluluwas nagtudlo sa Iya mga sumulunod: “Sa kalibutan kamo magaagi sa kapipit-an: apang mangin masadya; ginlutos ko ang kalibutan.”
Magbinagbinag kamo upod sa akon sang dali lang—si JesuCristo, ang Bugtong nga Anak sang Amay, nangabuhi nga wala sing sala kag naglutos sa tanan nga mga pagsulay, mga kasakit, mga pagtilaw, kag mga pag-antus sa kalibutan. Sia nagpaagay sang mga tulo sang dugo sa Gethsemane; nag-antus Sia sang terible nga kasakit nga kapin sa bisan ano nga gahum sang paglaragway. Gin-ako Niya ang tanan naton nga mga kasakit kag balatian. Handa Sia sa pagbulig—ang magbulig sa kada isa sa aton—sa kada palas-anon.Paagi sa Iya kabuhi, pag-antus, kamatayon, kag Pagkabanhaw, ginkuha Niya ang tanan nga sablag sa aton pagkinalipay kag pag-angkon sang paghidaet diri sa duta. Ang mga benepisyo sang Iya nagapasag-uli nga sakripisyo ginahatag sa tanan nga magbaton sa Iya kag magdumili sang ila mga kaugalingon kag sa yadtong magpas-an sang ila krus kag magsunod sa Iya bilang matuod nga mga sumulunod. Busa, samtang ginapakita naton ang pagtuo kay JesuCristo kag sa Iya Pagpasag-uli, pabakuron kita, ang aton mga palas-anon mangin mamag-an, kag paagi sa Iya malutos naton ang kalibutan.
Mga kautoran, samtang ginapainoino naton ang kusog kag paglaum nga sarang naton mabaton halin sa Manluluwas, may ara kita sang rason nga indi na magkasubo, magkinalipay, kag magdutdot pasulong sa pagtuo nga wala sing pagduhaduha, “kay sia nga nagaduhaduha kasubong sang isa ka balud sa dagat nga ginahuyup kag ginapalid sang hangin. … Ang nagaduhaduha nga tawo wala sang kasiguruhan sa tanan niya nga ginahimo.”
Si Haring Limhi nagpadasig man, “Mag-ulikid sa Ginuo nga lubos ang tuyo sa tagipusuon, … kag mag-alagad sa iya sa tanannga kaukod sang kaisipan, kon himuon ninyo ini, pagabuhaton niya, suno sa iya kaugalingon nga pagbuot kag luyag, nga hilwayon kamo sa pagkaulipon.”
Magpamati sa kaugalingon nga mga pulong sang Manluluwas samtang Sia nagapangabay sa aton:
“Tugoti nga indi matublag ang inyo tagipusuon: nagatuo kamo sa Dios, magtuo man kamo sa akon. …
“Kon palangga ninyo ako, magtuman kamo sang akon mga sugo. …
“Sia nga nagaangkon sang akon mga sugo, kag nagatuman sa mga ini, sia ina nga nagapalangga sa akon: kag sia nga nagapalangga sa akon pagapalanggaon sang akon Amay, kag palanggaon ko sia, kag magabisita ako sa iya.”
Ang Dios nagabugay sa aton suno sa aton pagtuo. Ang pagtuo amo ang ginatunaan sang pagpangabuhi nga may diosnon nga katuyoan kag panan-aw nga padayon. Ang pagtuo isa ka magamit nga prinsipyo nga nagahatag sang pagkaukod. Ini isa ka kinahanglanon, buhi nga pwersa nga makit-an sa aton pagkamalaumon nga ugali kag luyag nga magtuman sa tanan nga ginapangayo sang Dios kag ni JesuCristo sa aton. Ini nagahimo sa aton nga magluhod kag magpangayo sa Ginuo sang paggiya kag magtindog kag magbuhat nga may kumpiyansa sa pag-angkon sang mga butang nga upod sa Iya pagbuot.
Madamo na nga tuig ang nagligad samtang nag-alagad ako bilang mission president, nakabaton ako sang tawag sa telepono halin sa mga ginikanan sang isa namon ka pinalangga nga mga misyonero nagpabalo sa akon parte sa pagtaliwan sang iya utod nga babayi. Madumdoman ko, sa sinang higayon sang pagpalangga, inang misyonero kag ako naghambalanay parte sa matahum nga plano sang kaluwasan sang Dios para sa Iya mga anak kag kon paano ining ihibalo magpasulhay sa iya.
Bisan nga sia nagulpihan kag nasuboan sinang pag-antus, ining misyonero—paagi sa mga luha—nagkalipay sa kabuhi sang iya utod. Ginpautwas niya ang wala nagaduhaduha nga kumpiyansa sa malolo nga mga kalooy sang Ginuo. May determinasyon, ginhambal niya sa akon nga sia magpadayon sa pag-alagad sa iya mission upod ang tanan nga pagtuo kag kaukod agud mangin takus sa mga promisa sang Dios sa iya kag sa iya pamilya. Sa sining tion sang pagkinahanglan, inang himpit nga misyonero nag-ulikid sang iya tagipusuon sa Dios, nagbutang sang tanan nga pagsalig niya sa Iya, kag nagpanaad liwat nga mag-alagad sa Ginuo nga may pagtuo kag upod ang tanan nga kaukod.
Mga kautoran, kon kita wala naangot sa mabakod nga pagsalig sa Dios kag sa luyag nga mag-alagad sa Iya, ang masakit nga mga inagihan sang mortalidad sarang maghimo sa aton nga daw sa nabug-atan bangud sang isa ka mabug-at nga singkaw; kag sarang kita madulaan sang gusto nga magtuman sing lubos sa ebanghelyo. Kon wala sing pagtuo, maabtan naton ang madulaan sang pagpasalamat sa mga tuyo sang Dios nahanungod sa mga bagay nga matabo sa ulihi sa aton kabuhi.
Sa sining mga higayon sang pagtilaw, ang kaaway—nga padayon nga nagabantay—magtinguha sa paggamit sang aton isip kag pangin-rason batok sa aton. Magtinguha sia sa pagbuyok sa aton nga wala sing pulos ang magtuman sa mga prinsipyo sang ebanghelyo. Palihug dumdoma nga ang isip sang kinaandan nga tawo “wala nagabaton sa mga butang sang Espiritu sang Dios: kay ang mga ini katontohan sa iya.” Dumdoma nga si Satanas “isa ka kaaway [sang] Dios, kag [sia] nagabato sing padayon sa iya, kag nagaagda kag nagaganyat sa [aton] nga maghimo sang sala, kag maghimo sinang malaut nga padayon.” Indi naton sia dapat pagtugotan nga magtiplang sa aton; kay kon tugotan naton, mangin mahuyang kita sa aton pagtuo kag madulaan sang gahum nga maangkon ang mga bugay sang Dios.
Kon kita mabakod kag wala nagaduhaduha sa aton pagtuo, ang Ginuo magadugang sang aton kapasidad nga mangibabaw labaw sa aton mga pagtilaw sa kabuhi. Himuon kita nga makasarang sa paglutos sa di-maayong mga huyog kag makatukod kita sang kapasidad sa paglutos, sang bisan daw sa makit-an dalagku nga mga sablag. Ini ang nagpakasarang sa katawhan ni Haring Limhi nga milagrosong makapalagyo halin sa pagkaulipon sa mga Lamanite.
Mga kautoran, ginaagda ko kamo nga lubos nga magsalig sa Dios kag sa mga panudlo sang Iya mga propeta. Ginaagda ko kamo nga magbag-o liwat sang mga kasugtanan sa Dios, mag-alagad sa Iya sa bug-os ninyo nga tagipusuon, wala sapayan sa mabudlay nga mga sitwasyon sang kabuhi. Nagasaksi ako nga paagi sa gahum sang inyo wala nagaduhaduha nga pagtuo kay Cristo, mangin hilway kamo sa pagkaulipon sa sala, pagduhaduha, sa di-pagtuo, sa kasubo, kag pag-antus; kag mabaton ninyo ang tanan nga ginpromisa nga mga bugay halin sa mapinalanggaon nga Amay.
Nagasaksi ako nga ang Dios tunay, Nagakabuhi Sia. Nagapalangga Sia sa aton. Nagapamati Sia sa aton mga pangamuyo sa mga tion sang aton kalipay kag sa mga tion sang pagduhaduha, kasubo, kag pagkawalay paglaum. Nagasaksi ako nga si JesuCristo amo ang Manluluwas sang kalibutan. Sia ang Manunubos.
Tapuson ko ang akon mga pulong karon nga adlaw paagi sa mga tinaga sang himno “Indi Karon Apang Sa Maabot nga Mga Tinuig,” makit-an sa Portuguese nga libro sang mga himno:
Kon ang mga gal-um sa luyo sang adlaw ang nagatabon sa amon mga tagipusuon,
Kon ang kasakit nagapaantus sa amon, kalimti; sa indi madugay makilala namon kon sin-o Ikaw.
Si Jesus nagagiya sa aton paagi sa Iya kamot, kag Sia magapaathag sa aton kon ngaa;
Kon magpamati kita sa Iya tingog, Sia magahambal sa aton sa maabot nga panahon.
Magsalig sa Dios nga wala sing pagduhaduha, kag tugoti Sia nga magsakdag sa aton;
Ambahon sing padayon ang Iya himaya, kay sa ulihi Sia ang magpasanaaw.
Ginasiling ko ini tanan sa sagradong ngalan ni JesuCristo, amen.