“Hulyo 10–16. Mga Binuhatan 6–9: “Ano ang Luyag Mo nga Himuon Ko?,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)
“Hulyo 10–16. Mga Binuhatan 6–9,” Dali, Magsunod sa Akon—Para sa Mga Indibidwal kag Mga Pamilya: 2023
Conversion on the Way to Damascus [Pagkahaylo sa Dalanon pa-Damasco], ni Michelangelo Merisi da Caravaggio
Hulyo 10–16
Mga Binuhatan 6–9
“Ano ang Luyag Mo nga Himuon Ko?”
Magsugod paagi sa pagbasa sang Mga Binuhatan 6–9. Ang mga panugyan sa sining outline makabulig sa imo nga mahibal-an ang pila ka importante nga mga prinsipyo sa sining mga kapitulo, bisan pa nga makakita ka man sang iban sa imo kaugalingon nga pagtuon.
Isulat Ang Imo Mga Panghunahuna
Kon may tawo nga daw malayo gid nga mangin kandidato sa pagbag-o, amo ini siguro si Pablo—isa ka Fariseo nga may reputasyon sang pagpamigos sang mga Cristohanon. Gani sang ginhambal sang Ginuo sa isa ka disipulo nga ginhingadlan Ananias nga pangitaon si Saul kag tanyagan sang bendisyon, natural nga nagpangalang-alang si Ananias. “Ginuo,” siling niya, “Nakabati ako sa madamo nahanungod sining tawo, kon daw ano nga kalautan ang ginhimo niya sa imo mga balaan” (Mga Binuhatan 9:13). Pero ang Ginuo nakahibalo sang tagipusuon ni Saul kag sang iya potensyal, kag may ginapamensar Sia nga misyon para kay Saul: “Sia galamiton nga pinili nakon sa pagdala sang akon ngalan sa atubangan sang mga Gentil kag mga hari kag sa mga anak sang Israel” (Mga Binuhatan 9:15). Gani nagtuman si Ananias, kag sang iya makita ining anay mamimigos, gintawag niya sia nga “Utod Saul” (Mga Binuhatan 9:17). Kon mahimo ni Saul nga magbag-o sing lubos kag ni Ananias nga abi-abihon sia sing hilway, dapat bala naton kabigon ang bisan sin-o nga daw malayo gid nga mangin kandidato sa pagbag-o—lakip na ang aton mga kaugalingon?
Mga Ideya para sa Personal nga Pagtuon sang Balaan nga mga Kasulatan
Ang akon tagipusuon kinahanglan mangin “matarong sa atubangan sang Dios.”
Ang nagadako nga simbahan nagakahulugan sang nagadako nga panginahanglan sang mga disipulo nga magserbisyo sa ginharian. Suno sa Mga Binuhatan 6:1–15, ano nga mga kinaiya ang ginapangita sang Dose ka Apostoles sa ila nga magaserbisyo upod sa ila? Samtang imo ginabasa ang Mga Binuhatan 6–8, tandai kon paano ining mga kalidad, kag ang iban pa, ginpakita sang mga tawo nga pareho nanday Esteban kag Felipe. Ano ang kulang kay Simon, kag ano ang aton matun-an sa iya parte sa kahanda nga magbag-o?
May ara ka bala nga nabatyagan nga dapat bag-uhon para masiguro nga ang imo tagipusuon “matarong sa atubangan sang Dios”? (Mga Binuhatan 8:21–22). Paano ayhan ang paghimo sining pagbag-o makabugay sa imo sa imo pagserbisyo sa Dios?
Ang pagpamatok sa Balaan nga Espiritu magadul-ong sa pagsikway sa Ginuo kag sa Iya mga alagad.
Ang Judio nga mga lider ang responsable sa paghanda sa katawhan para sa pagkari sang Mesias. Pero napaslawan sila nga makilala ang Mesias kag ginsikway Sia. Paano ini natabo? Ang bahin sang sabat mahimo makita sa mga pulong ni Esteban: “Nagasumpong kamo sa gihapon sa Espiritu Santo” (Mga Binuhatan 7:51). Ano sa banta mo ang kahulugan sang pagsumpong sa Espiritu Santo? Ngaa ang pagpamatok sa Balaan nga Espiritu nagadul-ong sa pagsikway sa Ginuo kag sa Iya mga alagad?
Samtang imo ginabasa ang Mga Binuhatan 6-7, magpangita sang iban pa nga mga mensahe nga ginpanudlo ni Esteban sa mga Judio. Ano nga mga pamatasan ang iya ginahambal nga bantayan? May natalupangdan ka bala nga pareho sini nga mga pamatasan sa imo kaugalingon? Ano ang ginatudlo sa imo sang mga pulong ni Esteban parte sa mga konsikwensya sang pagpamatok sa Balaan nga Espiritu? Paano ka mangin mas sensitibo kag mabinatyagon sa mga pagpadasig sang Balaan nga Espiritu sa imo kabuhi?
Ang Balaan nga Espiritu magabulig sa akon nga giyahan ang iban padulong kay Jesucristo.
Ano ang imo matun-an parte sa pagpaambit sang ebanghelyo sa istorya sa Mga Binuhatan 8:26–39? Paano ginbuligan sang Balaan nga Espiritu si Felipe? Paano ang pagpaambit sang ebanghelyo sa iban nagapareho sa paggiya? (tan-awa sa Mga Binuhatan 8:31).
Si Elder Ulisses Soares nagsiling nga ang ining sinulatan “isa ka pahanumdom sang diosnon nga mandato nga kinahanglan naton tanan tun-an kag tudloan ang kada isa sang ebanghelyo ni Jesucristo. … Kon kaisa pareho kita sa taga-Etiopia—kinahanglan naton ang bulig sang matinuohon kag inspirado nga manunudlo; kag kon kaisa pareho kita kay Felipe—kinahanglan naton nga tudloan kag pabakuron ang iban sa ila pagkahaylo” (“Paano Ko Maintiendihan?,” Liahona, Mayo 2019, 6). Binagbinaga kon paano ang Balaan nga Espiritu makabulig sa imo nga mangin mas maayo nga estudyante kag manunudlo sang ebanghelyo.
Kon magpaidalom ako sa pagbuot sang Ginuo, sarang ako mangin instrumento sa Iya mga kamot.
Ang pagbag-o ni Saul daw tama ka gulpi; naglakat sia gilayon halin sa pagpangpriso sang mga Cristohanon pakadto sa pagpangwali parte kay Cristo sa mga sinagoga. Samtang imo ginabasa ang iya istorya, pamensara sang maayo kon ngaa nga nangin handa sia sa pagbag-o. (Agud basahon ang kaugalingon nga paglaragway ni Saul sang iya pagbag-o, tan-awa sa Mga Binuhatan 22:1–16 kag 26:9–18. Tandai nga sa sining mga sinulatan, si Saul ginakilala na nga Pablo [tan-awa sa Mga Binuhatan 13:9].)
Bisan matuod nga pinasahi ang eksperiyensya ni Saul—para sa kalabanan, ang pagbag-o mas madugay nga proseso—may ara ka bala sang matun-an kay Saul parte sa pagbag-o? Ano ang imo matun-an sa reaksyon ni Ananias kag sang iban pa nga mga disipulo sa pagbag-o ni Saul? Ano ang imo himuon para gamiton ining mga leksyon sa imo kabuhi? Mahimo ka nga magsugod paagi sa pagpamangkot sa pangamuyo, pareho sang ginhimo ni Saul, “Ano ang luyag mo nga himuon ko?”
Samtang imo ginabasa ang Mga Binuhatan 9:36–42, pamensara kon paano si Tabita nangin instrumento sa mga kamot sang Dios. Ano ang ginainspirar sa imo sang iya ehemplo?
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Mga Binuhatan 6:8; 7:51–60.Ikumparar ang mga istorya parte kay Esteban sa Mga Binuhatan 6:8 kag Mga Binuhatan 7:51–60 sa mga istorya parte sa Manluluwas sa Lucas 23:1–46. Paano ginsunod ni Esteban ang ehemplo sang Manluluwas?
-
Mga Binuhatan 7:51–60.Paano ginbugayan sang Balaan nga Espiritu si Esteban sang sia ginapigos? Sang san-o kita nakabaton sang kusog halin sa Balaan nga Espiritu sa tion sang kabudlayan?
-
Mga Binuhatan 9:5.Ang prick amo ang matalom nga bangkaw nga ginagamit para tabugon ang mga sapat. Sa masami ang mga sapat nagabalos sipa kon matuslok, nga nangin rason nga ang bangkaw maglubong pa gid sa lawas sang sapat. Paano ayhan kon kaisa magamit ang ining paanggid sa aton? Ano ang pwede naton himuon para mas magbaton sang pagsaway sang Ginuo?
Tabitha Arise [Tabita Bangon Ka], ni Sandy Freckleton Gagon
-
Mga Binuhatan 9:32–43.Hunahunaa nga imbitahon ang mga miyembro sang imo pamilya nga magdrowing sang mga litrato sang mga istorya sa Mga Binuhatan 9:32–43. Ano ang aton matun-an parte sa tunay nga pagkadisipulo sa sining mga istorya? Paano ang tawo nga “puno sang maayong buhat,” pareho kay Tabita, makabulig sa iban nga magpati sa Ginuo? (tan-awa sa Mga Binuhatan 9:36).
Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.
Ginapanugyan nga kanta: “Indi sa Kataas sang Bukid [I’ll Go Where You Want Me to Go],” Mga Himno kag mga Ambahanon sang Kabataan, no. 46.
Pagpauswag sang Personal nga Pagtuon
Ipaanggid ang balaan nga mga kasulatan sa imo kabuhi. Samtang nagabasa ka, pamensara kon paano magamit ang mga istorya kag mga pinanudlo sa balaan nga mga kasulatan sa imo kabuhi. Halimbawa, ano nga mga oportunitad ang ara sa imo para magbulig sa iban, pareho sa ginhimo ni Tabita sa Mga Binuhatan 9:36–39?