Hulyo 17–23

Mga Binuhatan 10–15

“Ang Pulong Sang Dios Nagtubo kag Nagdugang”

Basaha ang Mga Binuhatan 10–15 sing maayo, nga ginahatagan sang oras ang Espiritu nga magpabatyag sa imo sang mga panghunahuna kag mga balatyagon. Ano ang mga dapat mo matun-an sa sining mga kapitulo?

Isulat Ang Imo Mga Panghunahuna

Sang tion sang Iya dutan-on nga pag-alagad, masami nga ginahangkat ni Jesucristo ang madugay na nga mga tradisyon kag mga ginapatihan sang mga tawo. Wala ini mag-untat sang nagkayab Sia sa langit, samtang padayon Niya nga ginagiyahan ang Iya Simbahan paagi sa rebelasyon. Halimbawa, sa tion sang kabuhi ni Jesus ang Iya mga disipulo nagpangwali sang ebanghelyo sa pareho lamang nila nga mga Judio. Pero wala magdugay pagkatapos mapatay ang Manluluwas kag si Pedro nangin lider sang Simbahan sa duta, ginpahayag ni Jesucristo kay Pedro nga husto na ang tion para ang ebanghelyo ipangwali na sa mga indi Judio. Ang ideya sang pagpaambit sang ebanghelyo sa mga Gentil indi na bag-o sa karon, gani ano ang leksyon sa sining istorya para sa aton? Siguro ang isa ka leksyon amo nga sa dumaan kag moderno nga Simbahan, ang mapinalanggaon nga Manluluwas nagagiya sang Iya pinili nga mga lider (tan-awa sa Amos 3:7; Doktrina kag mga Kasugtanan 1:38). Ang nagapadayon nga rebelasyon isa ka importante nga tanda sang matuod kag buhi nga Simbahan ni Jesucristo. Pareho kay Pedro, kinahanglan nga handa kita magbaton sang nagapadayon nga rebelasyon kag magpangabuhi “sa tagsa ka pulong sang Dios” (Lucas 4:4), lakip na ang “tanan nga [Iya] ginpahayag, tanan nga Iya ginapahayag karon” kag ang “madamo nga dalagko kag importante nga mga butang” nga Iya pa ipahayag “nahanungod sa Ginharian sang Dios” (Mga Artikulo sang Pagtuo 1:9).

Mga Ideya para sa Personal nga Pagtuon sang Balaan nga Mga Kasulatan

Mga Binuhatan 10

“Ang Dios walay ginapasulabi sa mga tawo.”

Sa madamo nga henerasyon, ang mga Judio nagapati nga ang pagka-“anak ni Abraham,” ukon literal nga pagkakaliwat ni Abraham, nagakahulugan nga ang isa ka tawo ginabaton kag pinili sang Dios (tan-awa sa Lucas 3:8). Ginakabig nila ang iban nga “mahigko” nga Gentil nga wala ginabaton sang Dios. Sa Mga Binuhatan 10, ano ang gintudlo sang Ginuo kay Pedro parte sa kon sin-o ang “nakapahamuot sa iya”? (Mga Binuhatan 10:35). Ano ang ebidensya nga imo makita sa sining kapitulo nga ang kabuhi ni Cornelio ginabaton sang Ginuo? Binagbinaga kon ano ang kahulugan sang pahayag nga “Ang Dios walay ginapasulabi sa mga tawo” (bersikulo 34; tan-awa man sa 1 Nefi 17:35). Ngaa importante sa imo nga mahibal-an ining kamatuoran?

Pareho sa mga Judio nga manubo ang panulok sa mga tawo nga indi kaliwat ni Abraham, nagakadakpan mo bala ang imo kaugalingon nga nagahimo sang masakit ukon wala-basehan nga paghaumhaom sa tawo nga lain sangsa imo? Paano mo malampuwasan ini nga huyog? Mahimo nga manami tilawan ang isa ka simple nga kahiwatan sa madason nga inadlaw: Kada makig-upod ka sa isa ka tawo, tinguhai nga pamensaron mo sa kaugalingon, “Ining tawo anak sang Dios.” Samtang ginahimo mo ini, ano nga mga pagbag-o ang imo natalupangdan sa imo panghunahuna kag pagpakig-upod sa iban?

Tan-awa man sa 1 Samuel 16:7; 2 Nefi 26:13, 33; Russell M. Nelson, “Tugoti ang Dios nga Magpangibabaw,” Liahona, Nob. 2020, 92–95.

Mga Binuhatan 10; 11:1–18; 15

Ang Amay nga Langitnon nagatudlo sa akon dinalan sa dinalan paagi sa rebelasyon.

Sang makita ni Pedro ang palanan-awon nga ginlaragway sa Mga Binuhatan 10, nabudlayan sia sang primero nga intiendihon ini kag “nagpalibog sa iya kaugalingon kon ano ang kahulugan [sini]” (bersikulo 17). Pero ang Ginuo naghatag kay Pedro sang mas dako nga paghangop sang ginpangayo ini ni Pedro. Samtang imo ginabasa ang Mga Binuhatan 10, 11, kag 15, bantayi kon paano nagdalom ang pag-intiendi ni Pedro sang iya palanan-awon sa kadugayan. Paano ka nagpangayo kag nakabaton sang dugang nga pag-intiendi halin sa Dios sang may mga pamangkot ka?

Ang Mga Binuhatan 10, 11, kag 15 nagasugid sang mga tion sang ang Ginuo nagtudlo sa Iya mga alagad paagi sa rebelasyon. Mahimo nga makabulig ang pagsulat sang imo matun-an parte sa rebelasyon samtang ginabasa mo ining mga kapitulo. Sa ano nga mga paagi nagapakighambal ang Espiritu sa imo?

 

Mga Binuhatan 11:26

Isa ako ka Cristohanon tungod nagapati ako kag nagasunod kay Jesucristo.

Ano ang importansya sa tawo nga matawag nga Cristohanon? (tan-awa sa Mga Binuhatan 11:26). Ano ang kahulugan sa imo nga makilala bilang Kristiyano? Pamensara ang kaimportante sang mga ngalan. Halimbawa, ano ang kahulugan sang imo apelyido sa imo? Ngaa importante ang ngalan sang Simbahan sa imo? (tan-awa sa Doktrina kag mga Kasugtanan 115:4). Ano ang kahulugan sa imo sang pagdala sa imo kaugalingon sang ngalan ni Jesucristo paagi sa kasugtanan? (tan-awa sa Doktrina kag mga Kasugtanan 20:77).

Tan-awa man sa Mosias 5:7–15; Alma 46:13–15; 3 Nefi 27:3–8; Russell M. Nelson, “Ang Husto nga Ngalan sang Simbahan,” Liahona, Nob. 2018, 87–90.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Binuhatan 10:17, 20.Nakaangkon na bala kita sang espirituhanon nga mga eksperiyensya kag sang ulihi nagduda sa aton nabatyagan ukon natun-an? Ano nga laygay ang pwede naton ihatag sa kada isa nga makabulig sa aton lampuwas sang aton mga pagpangduhaduha?  

Mga Binuhatan 10:34–35.Paano mo tudloan ang imo pamilya nga “ang Dios walay ginapasulabi sa mga tawo”? (Mga Binuhatan 10:34). Basi pwede ka nga mag-display sang litrato sang mga tawo halin sa nagkalainlain nga mga estado sang kabuhi kag kultura samtang ginabasa sang imo pamilya ining mga bersikulo. Paano dapat mag-impluwensya ining mga kamatuoran sa sining mga bersikulo sa aton mga aksyon?

Mga Binuhatan 12:1–17.Pwede nga drama-dramahon sang imo pamilya ang kasaysayan ni Pedro nga ginasulod sa prisuhan kag ang mga miyembro sang Simbahan nagtililipon kag nagpangamuyo para sa iya. Sang san-o bala kita ginabugayan paagi sa pangamuyo? May tawo bala nga ginapabatyag sa aton nga aton ipangamuyo, pareho abi sang isa ka lider sang Simbahan ukon mahal sa kabuhi? Ano ang kahulugan sang magpangamuyo “sing hugot gid” (Mga Binuhatan 12:5; tan-awa man sa Alma 34:27).

Peter Delivered from Prison [Si Pedro nga Ginpagwa na sa Prisuhan], ni A. L. Noakes

Mga Binuhatan 14.Samtang ginabasa ninyo ining kapitulo sing ululupod, ang pila ka miyembro sang pamilya pwede magtanda sang mga bugay nga nag-abot sa mga disipulo kag sa Simbahan. Ang iban nga mga miyembro sang pamilya ang magtanda sang mga oposisyon ukon pagtilaw nga naeksperiyensyahan sang mga disipulo. Ngaa ginatugtan sang Dios nga matabo ang mabudlay nga mga butang sa matarong nga mga tawo?

Mga Binuhatan 15:1–21.Ining mga bersikulo nagalaragway sang pagbinaisay sa Simbahan parte sa kon bala ang mga hinaylo dapat magsunod sa layi ni Moises, lakip na ang pagpacircunsidar [circumcision]. Ano ang ginhimo sang mga Apostoles sa sining pagbinaisay? Ano ang aton matun-an sa sining halimbawa kon paano ginapangunahan sang mga lider sang Simbahan ang buluhaton sang Simbahan?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Aton Pagpanudlo

Magdrowing sang litrato. Ang mga litrato makabulig sa mga miyembro sang pamilya nga mapanan-aw ang mga pinanudlo kag mga istorya sa balaan nga kasulatan. Pwede ninyo hagaron ang mga miyembro sang pamilya sa pagdrowing sang mga litrato sang inyo ginabasa, pareho sang palanan-awon ni Pedro sa Mga Binuhatan 10.

Ang mga eksperiyensya nanday Pedro kag Cornelio nagapakita nga “ang Dios walay ginapasulabi sa mga tawo” (Mga Binuhatan 10:34).