Day of Pentecost [Adlaw sang Pentecostes], ni Sidney King

Hulyo 3–9

Mga Binuhatan 1–5

“Mangin Saksi Ko Kamo”

Sa imo pagtuon sang Mga Binuhatan 1–5, ang Balaan nga Espiritu makainspirar sa imo nga makita ang mga kamatuoran nga nagakaangay sa imo kabuhi. Tandai ang mga bersikulo nga nanamian mo, kag magpangita sang mga oportunidad para isugid ang imo natun-an.

Isulat Ang Imo Mga Panghunahuna

Nakapamangkot ka bala kon ano ayhan ang ginapamensar kag ginabatyag ni Pedro sang sia, upod ang iban pa nga mga Apostoles, “nagtulok sa langit” sang nagkayab si Jesus sa Iya Amay? (Mga Binuhatan 1:10). Ang Simbahan nga gintukod sang Anak sang Dios ara na karon sa pag-atipan ni Pedro. Ang buluhaton sang pagpanguna sang pagpaninguha nga “tudloan ang tanan nga kapungsuran” nagtupa na karon sa iya (Mateo 28:19). Pero kon nagabatyag sia sang kakulangan ukon kahadlok, wala kita sang makita nga ebidensya sina sa libro sang Mga Binuhatan. Ang makita naton amo ang mga halimbawa sang wala kahadlok nga panaksihon kag pagbag-o, milagroso nga mga pagpang-ayo, espirituhanon nga mga pagpakita, kag dako nga pagtubo sang Simbahan. Simbahan ini gihapon sang Manluluwas, ginapangunahan gihapon Niya. Ang matuod, ang libro nga Mga Binuhatan sang mga Apostoles sarang man tawgon nga Mga Binuhatan ni Jesucristo paagi sa Iya mga Apostoles. Nga ginagiyahan sang pagbubo sang Espiritu, si Pedro indi na ang wala sing tinapusan nga mangingisda nga nakita ni Jesus sa baybayon sang Dagat sang Galilea. Indi naman sia ang nagasalangisag nga tawo nga pila lang ka semana ang nagligad naganguyngoy sing hibi tungod iya ginpanginwala nga kilala niya si Jesus sang Nazaret.

Sa libro sang Mga Binuhatan, mabasa mo ang mabaskog nga mga pahayag parte kay Jesucristo kag sa Iya ebanghelyo. Makita mo man kon paano inang ebanghelyo sarang magbag-o sang mga tawo—lakip na sa imo—sa maisog nga mga disipulo nga nahibal-an sang Dios nga sarang mangin sila.

Mga Ideya para sa Personal nga Pagtuon sang Balaan nga mga Kasulatan

Mga Binuhatan 1:1–8, 15–26; 2:1–42; 4:1–13, 31–33

Si Jesucristo nagapamuno sang Iya Simbahan paagi sa Balaan nga Espiritu.

Ang libro sang Mga Binuhatan nagarekord sang mga pagpaninguha sang mga Apostoles nga tukuron ang Simbahan ni Jesucristo pagkatapos sang Pagkayab sang Manluluwas. Bisan pa nga wala na si Jesucristo sa duta, ginapamunuan Niya ang Simbahan paagi sa rebelasyon paagi sa Balaan nga Espiritu. Pamensara kon paano ang Balaan nga Espiritu naggiya sang bag-o nga mga lider sa Simbahan ni Cristo samtang imo ginarebyu ang masunod nga mga dinalan: Mga Binuhatan 1:1–8, 15–26; 2:1–42; 4:1–13, 31–33.

Bilang mga miyembro sang Simbahan ni Cristo sa karon, ang kada isa sa aton may responsibilidad sa pagpasakop sa buluhaton sang kaluwasan kag pagkahitaas—nga ipangabuhi ang ebanghelyo ni Jesucristo, atipanon ang mga nagakinahanglan, agdahon ang iban nga magpalapit kay Cristo, kag hugpungon ang mga pamilya sa wala katapusan (tan-awa sa General Handbook, 1.2). Ano ang imo matun-an sa sining nauna nga mga Apostoles parte sa kon paano ka magsalig sa Balaan nga Espiritu sa paggiya sang imo mga pagpaninguha?

 

Mga Binuhatan 2:36–47; 3:12–21

Ang mga prinsipyo kag mga ordinansa sang ebanghelyo nagabulig sa akon nga magkari kay Cristo.

Nakabatyag ka na bala nga “nasuntok sa [imo] tagipusuon,” pareho sang mga Judio sa adlaw sang Pentecostes? (Mga Binuhatan 2:37). Ayhan may nahimo ka nga ginahinulsulan mo, ukon basi gusto mo lang gid nga bag-uhon ang imo kabuhi. Ano ang dapat mo himuon kon makaangkon ka sang amo sini nga mga balatyagon? Ang laygay ni Pedro sa mga Judio makita sa Mga Binuhatan 2:38. Tandai kon paano ang una nga mga prinsipyo kag ordinansa sang ebanghelyo (lakip na ang pagtuo, paghinulsol, bunyag, kag ang regalo sang Balaan nga Espiritu—ukon ang ginatawag kon kaisa nga doktrina ni Cristo) nagaapekto sining mga hinaylo, pareho sa narekord sa Mga Binuhatan 2:37–47.

Mahimo nga nabunyagan ka na kag nakabaton sang regalo sang Balaan nga Espiritu, gani paano mo padayunon nga ipangabuhi ang doktrina ni Cristo? Pamensara sing maayo ining mga pulong ni Elder Dale G. Renlund: “Mahimo kita nga mahimpit paagi sa liwat-liwat … nga pagpakita sang pagtuo kay [Cristo], paghinulsol, pag-ambit sang sakramento sa pagbag-o sang aton mga kasugtanan kag mga bugay sang bunyag, kag pagbaton sang Balaan nga Espiritu sa mas dako pa nga bahin bilang isa ka nagapadayon nga kaupod. Samtang ini aton ginahimo, mas mangin pareho kita kay Cristo kag makapadayon tubtob sa katapusan, upod ang tanan nga ginakinahanglan sina”(“Ang mga Santos sa Ulihing mga Adlaw Nagapadayon nga Nagatinguha,” Liahona, Mayo 2015, 56).

Mga Binuhatan 3:19–21

Ano ang “mga panag-on sang pagpaumpaw” kag “tion sang pagpasag-uli sang tanan”?

“Ang mga panag-on sang pagpaumpaw” nagatumod sang Milenya, kon san-o si Jesucristo magabalik sa duta. “Ang tion sang pagpasag-uli sang tanan” nagatumod sa Pagpanumbalik sang ebanghelyo nga nagahanda sang kalibutan para sa Milenya.

Mga Binuhatan 3; 4:1–31; 5:12–42

Ang mga disipulo ni Jesucristo ginhatagan sang gahum para maghikot sang mga milagro sa Iya ngalan.

Ang tawo nga piang nagapaabot nga makabaton sang kwarta sa mga nagakaladto sa templo. Pero ang mga alagad sang Ginuo nagtanyag sa iya sang mas masobra pa. Samtang imo ginabasa ang Mga Binuhatan 3; 4:1–31 kag 5:12–42, pamensara kon paano ang nagsunod nga milagro nakaapekto sa sining mga tawo:

• Tawo nga piang

• Pedro kag Juan

• Mga saksi sa templo

• Mga mataas nga pari kag mga manugdumala

• Iban nga mga Santos

Such as I Have I Give Thee [Ang Yari sa Akon Ginahatag Ko sa Imo], ni Walter Rane

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Binuhatan 1:21–26.Ang pagbasa sang Mga Binuhatan 1:21–26 makabulig sa imo pamilya nga hambalan ang mga bugay nga nagaabot bangud sa pag-angkon sang mga Apostoles sa duta sa karon. Pwede nga iistorya sang mga miyembro sang pamilya kon paano sila nakabaton sang saksi nga ang mga apostoles kag mga propeta sa karon gintawag sang Dios. Ngaa importante nga makaangkon sining saksi?

Mga Binuhatan 2:37.Ano ayhan ang buot silingon sang dinalan nga “nasuntok sila sa ila tagipusuon”? Sang san-o kita nakabatyag sang pareho sini? Ngaa bala importante nga maghambal nga “Ano bala ang himuon naton?” kon makabatyag kita sang amo sina?

Mga Binuhatan 3:1–10.Mahimo nga masadyahan ang imo pamilya sa pagdrama-drama sang kasaysayan sa sining mga bersikulo.   Paano ginbugayan ang tawo sa templo sa lain nga paagi sangsa iya ginapaabot? Paano naton ginakabig ang mga bugay sang Amay nga Langitnon nga nagaabot sa aton sa wala ginapaabot nga mga paagi?

Mga Binuhatan 3:12–26; 4:1–21; 5:12–42.Ano ang nanamian mo sa katampad ni Pedro kag Juan? Paano kita mangin maisog sa aton mga testimonya kay Jesucristo? Pamensara ang pagbulig sa magagmay nga kabataan nga magpaambit sang ila mga testimonya.

Mga Binuhatan 4:31–5:4.Paano naton buligan ang aton pamilya, ward, ukon komunidad nga mangin mas pareho sa ginalaragway sa Mga Binuhatan 4:31–37? Ano ang buot silingon sang mangin “isa lamang ka tagipusuon kag kalag”? Sa ano nga mga paagi nga kon kaisa aton “ginatago ang iban” sang aton kontribusyon? Ngaa ang paghimo sina pareho lang sa “[pagbutig] sa Dios”? (Mga Binuhatan 5:2, 4). Paano makaapekto ang pagbinutig sa aton espiritwalidad?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga himno: “I Know That My Redeemer Lives [Buhi Gid ang Manunubos Ko],” Mga Himno kag mga Ambahanon sang Kabataan, no. 38.

Pagpauswag sang Aton Pagpanudlo

Magpili sang topiko. Pabulos-bulosa ang mga miyembro sang pamilya sa pagpili sang topiko sa Mga Binuhatan 1–5 nga tun-an sing ululupod.

The Ascension [Ang Pagkayab], ni Harry Anderson