“Hunyo 5–11. Juan 14–17: ‘Pabilin Kamo sa Akon Gugma,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)
“Hunyo 5–11. Juan 14–17,” Dali, Magsunod sa Akon—Para sa Mga Indibidwal kag Mga Pamilya: 2023
The Last Supper [Ang Katapusan nga Panyapon], ni William Henry Margetson
Hunyo 5–11
Juan 14–17
“Pabilin Kamo sa Akon Gugma”
Samtang imo ginabasa ang mga pinanudlo sang Manluluwas sa Juan 14–17, ang Balaan nga Espiritu magabulig sa imo nga hibaluon ang mga mensahe para sa imo. Isulat ang mga panghunahuna nga imo mabaton.
Isulat Ang Imo Mga Panghunahuna
Sa karon nga panahon ginatawag naton ini nga “Katapusan nga Panyapon,” pero wala kita makahibalo kon ang mga disipulo ni Jesus nakarealisar sing lubos, sang magtipon sila para sa tuigan nga piyesta sang Pascua, nga amo na ini ang ila katapusan nga pagkaon upod sa ila Manunudlo antes sang Iya kamatayon. Apang si Jesus, “nakahibalo nga nag-abot na ang iya takna” (Juan 13:1). Sa indi madugay atubangon na Niya ang pag-antos sa Getsemani, ang pagtraidor kag pagpanginwala sang Iya pinakalapit nga mga abyan, kag ang masakit nga kamatayon sa krus. Wala sapayan sining tanan nga nagahulat sa Iya, wala sa Iya Kaugalingon ang tutok ni Jesus kundi sa Iya mga disipulo. Ano ang kinahanglan nila nga mahibal-an sa palaabuton nga inadlaw kag tinuig? Ang mapinalanggaon nga mga pinanudlo ni Jesus sa Juan 14–17 nagapahayag sang kon ano ang Iya nabatyagan parte sa Iya mga disipulo, sadto kag karon. Lakip sa madamo nga makaulumpaw nga kamatuoran nga Iya ginpaambit amo ang pasalig nga, sa isa ka bahin, indi Niya kita pagbayaan. “Kon ginatuman ninyo ang akon mga sugo, magapabilin kamo sa akon gugma” (Juan 15:10).
Mga Ideya para sa Personal nga Pagtuon sang Balaan nga mga Kasulatan
Ginapakita ko ang akon gugma kay Jesucristo paagi sa pagtuman sang Iya kasuguan.
Samtang imo ginabasa ang Juan 14–15, pwede mo tandaan ukon markahan ang tagsa ka paggamit sang tinaga nga gugma. Matalupangdan mo ang tinaga nga mga kasuguan nga masami ginasulit may kaangtanan sa tinaga nga gugma sa sining mga kapitulo. Ano ang imo matun-an parte sa relasyon sang gugma kag mga kasuguan sa mga pinanudlo sang Manluluwas? Ano pa nga mga tinaga ukon dinalan ang imo makita nga masami ginaangot sa tinaga nga gugma sa sining mga kapitulo?
Binagbinaga kon paano ka naimpluwensyahan sang pagpalangga sang Manluluwas.
Tan-awa man sa Juan 13:34–35; D. Todd Christofferson, “Magpabilin sa Akon Gugma,” Liahona, Nob. 2016, 48–51.
The Last Supper [Ang Katapusan nga Panyapon], ni Clark Kelley Price
Ang Balaan nga Espiritu nagabulig sa akon nga tumanon ang akon katuyuan bilang disipulo ni Jesucristo.
Ayhan nangin masakit para sa mga disipulo ang mabatian nga ang ila tinion upod sa Manluluwas malapit na lang nga matapos. Mahimo nga nabalaka man sila kon paano sila magpadayon nga wala Sia. Samtang imo ginabasa ang Juan 14–16, pangitaa ang ginsiling sang Manluluwas para paumpawan sila. Partikular, tandai kon ano ang Iya gintudlo sa ila parte sa Balaan nga Espiritu. Ano ang imo matun-an parte sa Balaan nga Espiritu sa mga pulong sang Manluluwas sa masunod nga mga bersikulo?
Ngaa kinahanglan sang mga disipulo sang amo sini nga klase sang bulig halin sa Balaan nga Espiritu? Paano ang Balaan nga Espiritu nagtuman sining mga tulumanon para sa imo? Pamensara ang sarang mo himuon para mangin mas mabaskog ang Iya impluwensya sa imo kabuhi.
Tan-awa man sa 3 Nefi 19:9; 27:20; Doktrina kag mga Kasugtanan 11:12–14; Moises 6:61; Michelle D. Craig, “Espirituhanon nga Kapasidad,” Liahona, Nob. 2019, 19–21.
Kon ako magapabilin kay Cristo, magapamunga ako sing maayo.
Ano sa banta mo ang kahulugan sang “magpabilin kay [Cristo]”? (Juan 15:4). Ano ang imo “bunga” nga nagapakita nga naangot ka sa puno, nga nagarepresentar kay Jesucristo?
Si Jesucristo nagapatunga para sa Iya mga disipulo.
Ang mga pulong ni Jesus sa Juan 17 ginakilala nga Pangamuyo sang Panabang. Sa sining pangamuyo, nagpangamuyo si Jesus para sa Iya mga Apostoles kag “tungod man sa mga magatuo sa [Iya] paagi sa ila pulong” (Juan 17:20). Buot silingon nagapangamuyo Sia para sa imo. Ano ang ginpangayo ni Jesus sa Iya Amay para sa imo kag sa iban pa nga tumuluo? Ano ang ginatudlo sina sa imo parte sa Iya mga nabatyagan para sa imo?
Ang ining pangamuyo nagatudlo man sang dalagko, wala katapusan nga mga kamatuoran. Ano nga mga kamatuoran ang imo nakita? Samtang imo ginabasa ining kapitulo, pamensara kon ano ang imo matun-an parte sa masunod:
-
Pangamuyo
-
Ang kaangtanan sang Manluluwas sa Iya Amay
-
Ang kaangtanan sang Manluluwas sa Iya mga disipulo
-
Kon ngaa kinahanglan sang mga disipulo nga mangin lain sangsa kalibutan
-
Iban pa nga mga kamatuoran nga nangibabaw gid para sa imo
Ang Amay nga Langitnon kag si Jesucristo perpekto nga nagaisa.
Sa Iya pangamuyo sa Juan 17, gintutokan ni Jesus ang Iya pag-isa sa Amay. Sa ano nga mga paagi nga ang Amay kag Anak “isa”? (Juan 17:11, 21–23). Pat-ini nga ang Manluluwas nagpangamuyo nga ang Iya mga disipulo mangin isa “subong nga”—ukon sa pareho nga paagi nga—Sia kag ang Iya Amay isa (Juan 17:22). Ano ang kahulugan sina para sa imo? Hunahunaa ang imo mga relasyon—halimbawa, sa imo tiayon ukon sa iban pa nga miyembro sang pamilya, sa mga miyembro sang ward, ukon sa mga isigka-Kristiyano. Paano mo paninguhaan ang inang klase sang pag-isa nga ara kay Jesus sa Amay?
Tan-awa man sa Quentin L. Cook, “Mga Tagipusuon nga Nabugkos sa Pagkamatarong kag Pag-isa,” Liahona, Nob. 2020, 18–22; Sharon Eubank, “Sa Paghiusa sang Balatyagon Makabaton Kita sang Gahum upod sa Dios,” Liahona, Nob. 2020, 55–57.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Juan 14:5–6.Mahimo nga masadyahan ang mga miyembro sang pamilya sa pagbulos-bulos panguna sang inyo pamilya sa paglakat sa isa ka banas. Sa ano si Jesus nangin “dalan”? Diin Niya kita ginadala?
-
Juan 14:26–27.Sa ano nangin lain ang paghidaet ni Jesucristo sa klase nga “[ginahatag] sang kalibutan”? Pwede mag-istorya ang mga miyembro sang pamilya kon paano sila nakakita sang kalinong kag kaumpawan paagi sa Balaan nga Espiritu.
-
Juan 15:1–8.Mahimo nga masadya nga basahon ining mga bersikulo sa gwa sa tupad sang balagon, kahoy, ukon isa pa ka tanom. Ano ang matabo sa sanga kon kakason ini sa tanom? Pwede ninyo hambalan kon sa ano kita nangin anggid sa mga sanga kag kon ano ang buot silingon sang “magpabilin” sa Manluluwas kag “magpamunga.”
-
Juan 15:17–27; 16:1–7.Ngaa sa banta mo nga ginpaandaman ni Jesucristo ang Iya mga disipulo parte sa pagpanghingabot? Paano ginahingabot ang mga disipulo ni Cristo sa karon nga panahon? Paano ang laygay sang Manluluwas sa sining mga bersikulo makabulig sa aton kon kita nagapangatubang sang pagpanghingabot?
-
Juan 16:33 Paano ni Jesucristo nadaog ang kalibutan? Paano ang Iya Pagbayad-Sala nagdala sa aton sang paghidaet kag kalipay? (tan-awa man sa Doktrina kag mga Kasugtanan 68:6).
-
Juan 17:21–23.Ano ang makabulig sa imo pamilya nga magtuon kon paano mangin mas nagaisa pareho kay Jesucristo kag sa Amay nga Langitnon? Basi pwede ninyo istoryahan ang parte sa inyo paborito nga grupo sa isport kag kon paano sila nagabuligay nga malab-ot ang ila tinutuyo. Ukon pwede kamo mamati sa koro ukon orkestra kag hambalan kon paano nagaisa ang mga musikero agud makaobra sang matahum nga musika.
Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.
Pagpauswag sang Aton Pagpanudlo
Basaha sing matunog. Samtang imo ginatudloan ang imo pamilya sang balaan nga mga kasulatan, ang pagbasa sang mga dinalan sing matunog makabulig pabuhi sang mga istorya sa balaan nga mga kasulatan. Mangin mabaskog gid ini labi na sa mga kapitulo pareho sang Juan 13–17 bangud ining mga kapitulo nagaunod sang madamo kaayo sa mga pulong sang Manluluwas.
Si Jesus nagpanudlo, “Ako amo ang puno sang ubas, kamo ang mga sanga” (Juan 15:5).