Ginpabakod sang Pagpasag-uli ni JesuCristo
Ni Elder Dallin H. Oaks
Sang Korum sang Napulogduha ka Mga Apostoles
Bangud sang Iya Pagpasag-uli, ang Manluluwas may gahum sa pagsapopo—agud magbulig—sa kada mortal nga kasakit kag pag-antus.
Sa mortalidad pat-od kita sa kamatayon kag karga sang sala. Ang Pagpasag-uli ni JesuCristo nagkanselar sining duha ka kapat-oran sang mortal nga kabuhi. Apang luwas sa kamatayon kag sala, kita may madamo pa nga mga kabudlay samtang nagapadayon sa sining kabuhi. Bangud sinang amo man nga pagpasag-uli, ang Manluluwas makahatag sa aton sang kabakod agud malutos ining mortal nga mga kabudlay. Ina ang pagahambalan ko karon.
I.
Laban sang nasulat sa kasulatan sa Pagpasag-uli nagahambal parte sa pag-utod sang Manluluwas sa mga gapos sang kamatayon kag pag-antus sang aton mga sala. Sa iya wali sa Libro ni Mormon, si Alma nagtudlo sining naunang mga prinsipyo. Apang siya naghatag man sang pinakamaathag nga mga pagpasalig nga ang Manluluwas nagbatyag man sang mga sakit, balatian, kag kahuyangan sang Iya katawhan.
Si Alma naglaragway sining bahin sang Pagpasag-uli sang Manluluwas: “Kag magalakat siya, nagaantus sang mga kasakit kag mga kapipit-an kag mga pagsulay sang tagsa ka sahi; kag ini agud nga ang pulong matuman nga nagasiling, pagaakuon niya ang mga kasakit kag mga balatian sang iya katawhan” (Alma 7:11; lantawa man 2 Nephi 9:21).
Hunahunaa ini! Sa Pagpasag-uli sang Manluluwas, gin-antus Niya ang “mga kasakit kag mga kapipit-an kag mga pagsulay sang tagsa ka sahi.” Subong sa paathag ni President Boyd K. Packer: “Wala Siya sang utang nga dapat bayaran. Wala Siya sang nahimo nga sayup. Apang, ang tanan nga nasupot nga kabasulanan, ang kalisud kag kasubo, ang hapdi kag pagpakahuya, ang tanan nga pagpaantus nga nabal-an sang tawo sa isip, balatyagon, kag sa lawas—naagyan Niya ini tanan.”1
Ngaa gin-antus Niya ining mortal nga mga kabudlay “sa tagsa ka sahi”? Si Alma nagpaathag: “Kag akuon niya sa iya kaugalingon ang ila mga kahuyangan, agud ang iya balatyagon mapuno sang kalooy, suno sa lawas, nga mabal-an niya suno sa lawas kon paano magsapopo sa iya katawhan suno sa ila mga kahuyangan” (Alma 7:12).
Halimbawa, si Apostol Paul nagpahayag nga bangud ang Manluluwas “nag-agi sa pagsulay, makasarang siya magsapopo sa ila nga ginasulay” (Hebrews 2:18). Amo man, si Presidente James E. Faust nagtudlo: “Bangud ang Manluluwas nag-antus sang bisan ano kag sang tanan nga aton sarang mabatyagan ukon maagyan, Siya makabulig sa mahuyang nga mangin mas mabakod.”2
Ang aton Manluluwas nag-agi kag nag-antus sang kabug-osan sang tanan nga mga kabudlay “suno sa lawas” agud mabal-an Niya “suno sa lawas” kon paano “magsapopo [nagakahulogan paghatag sang kapahuwayan ukon tabang sa] iya katawhan suno sa ila mga kahuyangan.” Gani nabal-an Niya ang aton mga kabudlay, kalisud, pagsulay, kag pag-antus, kay Siya handa nga nag-agi sa tanan nga ini bilang kinahanglan nga bahin sang Iya Pagpasag-uli. Kag bangud sini, ang Iya Pagpasag-uli nagpakasarang sa Iya sa pagsapopo sa aton—nagahatag sa aton sang kabakod nga maantus ini tanan.
II.
Samtang ang mga panudlo ni Alma sa ikapito nga chapter amo ang solo nga pinakamaathag sa tanan nga mga kasulatan parte sa sining importante nga gahum sang Pagpasag-uli, ini gintudlo man sa bug-os balaan nga kasulatan.
Sa sinugoran sang Iya pagpangalagad, si Jesus nagpaathag nga Siya ginpadala “agud magpasulhay sa nagakalisud” (Luke 4:18). Ang Biblia masami nagahambal sa aton parte sa Iya pagpaayo sang katawhan “sang ila mga balatian” (Luke 5:15; 7:21). Ang Libro ni Mormon nagsulat parte sa Iya pagpaayo sang yadtong “nagaantus sa tagsa ka sahi” (3 Nephi 17:9). Ang ebanghelyo ni Matthew nagapaathag nga si Jesus nagpaayo sa katawhan agud “nga matuman ang ginhambal ni Esaias ang propeta, nagasiling, Sa Iya kaugalingon gin-ako ang aton mga kahuyangan, kag ang aton mga balatian” (Matthew 8:17).
Si Isaiah nagtudlo nga ang Messiah magadala sang aton “mga kalisud” kag sang aton “mga kasubo”(Isaiah 53:4). Siya nagtudlo man sang pagpabakod sang Messiah sa aton: “Indi magkahadlok; kaupod mo ako: indi madismaya; kay ako ang imo Dios: Pabakuron kita; huo, buligan ko ikaw”(Isaiah 41:10).
Gani, nagaamba kita:
Indi magkahadlok, kaupod mo ako; oh, indi madismaya,
Kay ako ang imo Dios kag magatabang sa imo.
Pabakuron ko ikaw, buligan ko ikaw, kag himuon nga indi mapukan, …
Gintib-ong sang matarong, gamhanan ko nga kamot.3
Nagahambal parte sa pila niya ka mga kabudlay sa sining kabuhi, si Apostol Paul nagsulat, “Sarang ko mahimo ang tanan nga mga butang paagi kay Cristo nga nagapabakod sa akon”(Philippians 4:13).
Gani mahangpan naton nga bangud sang Iya Pagpasag-uli, ang Manluluwas may gahum sa pagsapopo—agud magtabang—sa kada mortal nga kasakit kag pag-antus. Kon kaisa ang Iya gahum nagaayo sang isa ka balatian, apang ang mga kasulatan kag ang aton mga inagihan nagatudlo nga kon kaisa Siya nagatabang paagi sa paghatag sa aton sang kabakod, ukon pasensya sa pag-antus sang aton mga kahuyangan.4
III.
Ano ining mortal nga mga kasakit kag mga kapipit-an kag mga balatian nga inagyan kag gin-antus sang aton Manluluwas?
Kita tanan nakaangkon sang mga kasakit kag mga kapipit-an kag mga balatian sa isa ka tion ukon iban. Tuhay sa naagyan naton bangud sang aton mga sala, ang mortalidad napuno sang dalayon nga mga kabudlay, kasubo, kag pag-antus.
Kita kag yadtong palangga naton nagaantus sang balatian. Kon kaisa kita tanan nakaagi man sa sakit sang makahalalit nga mga samad ukon halin sa iban nga mga kabudlay sa lawas kag isip. Tanan kita nag-antus kag nagkalisud bangud sang pagtaliwan sang isa ka palangga. Kita tanan nakaagi sang kapaslawan sa aton kaugalingon nga mga responsibilidad, mga relasyon sa pamilya, ukon sa aton mga trabaho.
Kon ang isa ka tiayon ukon anak nagsikway sang nabal-an naton nga matuod kag nagtalang sa banas sang pagkamatarong, pinasahing kasakit ang aton ginabatyag, subong sa naagyan sang amay sang nadula nga anak sa halandumon nga paanggid ni Jesus (lantawa Luke 15:11–32).
Ang Salmista nagpahayag: “Madamo ang mga kapipit-an sang matarong nga tawo: apang ang Ginuo nagahilway sa iya paggwa sa sini tanan” (Psalm 34:19).
Gani, ang aton himno nagalakip sining matuod nga pagpasalig: “Ang kalibutan wala sang kasubo nga indi mabulong sang langit.”5 Ang nagabulong sa aton amo ang Manluluwas kag ang Iya Pagpasag-uli.
Pinasahing masakit sa mga tinedyer ang sikwayon sang mga kaupod nga nagbuylog sa malipayon nga mga relasyon kag aktibidades kag gintuyo nga sila indi pag-updon. Ang rasa kag linahi nga mga pagtamay nagabunga sang masakit nga mga pagsikway, sa batan-on kag mga may edad. Ang kabuhi may iban pa nga mga kabudlay, subong sang wala sing obra ukon pagkapaslaw sa aton mga plano.
Nagahambal pa gihapon ako parte sa mortal nga mga kasakit nga wala gintuga sang mga sala. Ang pila nabun-ag nga may kasablagan sa lawas ukon sa hunahuna nga gintunaan sang kaugalingon nga pag-antus ukon mga kabudlay sa yadtong nagapalangga kag nagaatipan sa ila. Sa kadam-an, ang sakit nga depresyon mahapdi ukon permanente nga makahalit. Ang isa pa ka masakit nga kapipit-an amo ang kahimtangan sang pagkasolo. Yadtong ara sa sining kahimtangan dapat magdumdom nga ang Manluluwas nag-agi man sa sining sahi sang kasakit, kag paagi sa Iya Pagpasag-uli, Siya nagahalad sang kabakod nga maantus ini.
Diutay nga mga kasablagan ang labing mahaliton sa aton kalibutanhon kag espirituhanon nga mga kabuhi sangsa mga adiksyon. Ang pila sa mga ini, kasubong sang adiksyon sa pornograpiya ukon mga druga, laban nga naghalin sa makasal-anan nga batasan. Bisan kon ina nga pamatasan nahinulsolan, ang adiksyon sarang magpabilin. Inang mahaliton nga pagkapyot sarang man malubad sang nagatapos nga kabakod nga ara sa Manluluwas. Gani amo man ang tuman ka mabudlay nga pagtilaw sang yadtong ginpriso bangud sang mga krimen. Isa ka bag-o nga sulat nagasaksi sa kabakod nga sarang mag-abot sa tawo sa sinang kahimtangan: “Nabal-an ko nga ang Manluluwas nagalakat sa sining mga pasilyo, kag masami ko mabatyagan ang pagpalangga ni Cristo sa sulod sining mga pader sang prisohan.”6
Naluyagan ko gid ang pagpamatuod sang aton manugbinalaybay kag abyan nga si Emma Lou Thayne. Sa mga pulong nga karon ginaamba naton bilang isa ka himno, siya nagsulat:
Sa diin ako magdangop para sa kalinong?
Diin ang akon pagpaumpaw?
Kon ang iban nga dalangpan nag-untat sa pagpaayo sa akon?
Kon ako may pilas sa tagipusuon, kaakig, ukon malain ang tuyo,
Ako nag-isahanon,
Nagsayasat sa akon kalag?
Sa diin, sang ang kasakit ko nagadugang,
Sa diin, sang ako nangin mahuyang,
Sa diin, sang kinahanglan ko nga mabal-an, sa diin ako makadto?
Diin ang haplos sang kamot nga magpakalma sang akon kalisud?
Sin-o, sin-o ang makahangop?
Siya, Siya lamang. 7
IV.
Sin-o ang masapopo kag mapabakod paagi sa Pagpasag-uli ni JesuCristo? Si Alma nagtudlo nga ang Manluluwas magaako sa Iya kaugalingon sang “mga kasakit kag mga balatian sang iya katawhan ” kag “magsapopo sang iya katawhan ” (Alma 7:11, 12; pagpatalupangod gindugang). Sin-o ang “iya katawhan” sa sining promisa? Ang tanan nga tawo bala—ang tanan nga mabanhaw paagi sa Pagpasag-uli? Ukon ang pila ka mga pinili nga mga alagad nga nangin takos paagi sa mga ordinansa kag mga kasugtanan?
Ang tinaga nga katawhan may madamo nga kahulogan sa kasulatan. Ang kahulogan nga labing nagakaigo para sa panudlo nga ang Manluluwas magasapopo sang “iya katawhan” amo ang kahulogan nga gingamit ni Ammon sang siya nagtudlo nga “ang Dios madinumdomon sang tagsa ka katawhan, sa bisan diin man nga duta nga ara sila” (Alma 26:37). Amo man ini ang buot silingon sang mga anghel sang sila nag-anunsyo sang pagkabun-ag sang batang si Cristo: “Maayong balita sang daku nga kalipay, sa tanan nga mga katawhan” (Luke 2:10).
Bangud sang Iya nagapasag-uli nga inagihan sa mortalidad, ang aton Manluluwas sarang magpasulhay, magpaayo, kag magpabakod sang tanan nga mga tawo bisan diin, apang ako nagapati nga ginahimo Niya lamang ini sa yadtong nagapangita sa Iya kag nagapangayo sang Iya tabang. Ang Apostol James nagtudlo: “Ipakubos ang inyo mga kaugalingon sa atubang sang Ginuo, kag siya magatib-ong sa inyo” (James 4:10). May kinamatarong kita sa sinang bugay kon kita nagapati sa Iya kag nagapangayo sang Iya bulig.
Minilyon ang mga diosnon nga katawhan nga nagapangamuyo sa Dios agud makatibawas sa ila mga kapipit-an. Ang aton Manluluwas nagpahibalo nga Siya “nagdulhog sa idalom sang tanan nga mga butang” (D&C 88:6). Subong sa gintudlo ni Elder Neal A. Maxwell, “kay ‘nagdulhog sa idalom sang tanan nga mga butang,’ Siya nakahangop, sing lubos kag kinaugalingon, sang bug-os kalapad sang pag-antus sang tawo.”8 Sarang gani kita magsiling kay nagdulhog sa idalom sang tanan, ara Siya sa husto nga posisyon agud magtib-ong sa aton kag maghatag sang kabakod agud antuson ang aton mga kapipit-an. Kinahanglan lamang nga magpangayo kita.
Madamo nga beses sa modernong bugna, ang Ginuo nagapahayag, “Busa, kon ikaw magpangayo sa akon ikaw makabaton; kon ikaw magpanuktok ini pagabuksan sa imo” (halimbawa, D&C 6:5; 11:5; lantawa man Matthew 7:7). Matuod, bangud sang ila nagalakip-sa-tanan nga pagpalangga, ang aton Langitnon nga Amay kag ang Iya Pinalangga nga Anak, nga si Jesus Christ, nagapamati kag nagakaigo nga sabat sa mga pangamuyo sang tanan nga nagapangita sa Ila sa pagtuo. Subong sa ginsulat ni Apostol Paul, “Nagasalig kita sa buhi nga Dios, nga amo ang Manluluwas sang tanan nga tawo, labi na sa yadtong mga nagapati” (1 Timothy 4:10).
Nabal-an ko ining mga butang matuod. Ang Pagpasag-uli sang aton Manluluwas nagapasalig sa aton sang mas kapin sangsa imortalidad paagi sa pagkabanhaw sang tanan kag nagahatag sa aton sang oportunidad nga matinloan halin sa aton mga sala paagi sa paghinulsol kag bunyag. Ang Pagpasag-uli Niya nagahatag man sang oportunidad nga magtawag sa Iya nga nakaagi sa tanan naton nga mga kahuyangan, agud maghatag sa aton sang kabakod nga magkarga sang palas-anon sining kabuhi. Nabal-an Niya ang aton kalisud, kag Siya ara para sa aton. Subong sang maayong Samaritano, kon masapwan Niya kita nga nasamaran sa kilid sang alagyan, bugkosan Niya ang aton mga pilas kag tatapon kita (lantawa Luke 10:34). Ang makapaayo kag makapabakod nga gahum ni JesuCristo kag sang Iya Pagpasag-uli para sa aton tanan nga nagapangayo. Nagasaksi ako sina subong nga ako nagasaksi man sa aton Manluluwas, nga naghimo sini nga posible.
Sa isa ka adlaw ang tanan nga mga palas-anon sining kabuhi madula kag wala na sang kasakit (lantawa Revelation 21:4). Ginapangamuyo ko nga mahangpan naton ang paglaum kag kabakod sang Pagpasag-uli sang Manluluwas: ang pagpasalig sang imortalidad, ang oportunidad sang kabuhing walay katapusan, kag ang makasustener nga kabakod nga sarang naton mabaton kon kita lamang magpangayo, sa ngalan ni JesuCristo, amen.