Ang Pag-atubang sa Mga Pagtilaw sang Kalibutan Karon nga Adlaw

Ni Elder Robert D. Hales

Sang Korum sang Napulogduha ka Mga Apostoles

Ang mga pagpili ninyo—mission, edukasyon, pag-asawahay, trabaho, kag pag-alagad sa Simbahan—magaporma sang inyo kapalaran sa walay katubtuban.

Madamo ang ginsulat kag ginhambal parte sa subong nga henerasyon sang batan-on nga mga ulitawo kag dalaga. Ang pagtuon nagapakita nga madamo sa ila ang nagapamatok sa na-organisar nga mga relihiyon. Madamo ang may utang kag wala sang obra. Ang kalabanan luyag sa ideya sang pagpangasawa, apang nahadlok maghimo sini. Ang nagadugang nga kadamuon indi luyag nga may mga bata. Kon wala ang ebanghelyo kag giya nga may inspirasyon, madamo ang nagatalang sa mga banas nga di-sunado kag nadula sa ila alagyan.

Sa maayo nga palad, ang batan-on nga mga miyembro sang Simbahan naulihi sa sining makatulublag nga mga huyog, kabahin bangud nabugayan sila sang plano sang ebanghelyo. Inang plano sa walay katubtoban nagalakip sa pagkapot sa barandilya nga salsalon—ang magpabilin nga himpit sa pulong sang Dios kag sang Iya mga propeta. Kinahanglan naton nga hugton ang aton pagkapyot sa barandilya nga nagatuytoy sa aton pabalik sa Iya. Karon amo ang “adlaw sang pagpili”¹ para sa aton tanan.

Bilang isa ka bata, sang ako hana nga maghimo sang di-maayo nga pagpili, ang akon amay kon kaisa magsiling, “Robert, magpahimunong ka kag maglupad sing tadlong!” Nakaagi man kamo sini. Subong sa iya maathag nga paghambal, luyag ko nga maghambal sing diretso sa batan-on—ang dungganon namon nga batan-on—kag sa dungganon nga batan-on nga mga dalaga kag soltero, bangud “ang akon kalag nagakalipay sa kaathagan… nga [kita] makatuon.”²

Ara kamo sa labing importanteng bahin sang inyo kabuhi. Ang mga pagpili nga nga inyo buhaton—mission, edukasyon, pagpangasawa, pagtrabaho, kag pag-alagad sa Simbahan—magaporma sang inyo kapalaran sa walay katubtuban. Ini nagakahulogan nga kamo padayon nga magaplano—magaplano sa palaaboton.

Bilang piloto sa air force, natun-an ko ining prinsipyo: indi gid hungod nga maglupad sa sulod sang panganod nga may kilat kag daguob. (Indi ko pag-isugid sa inyo kon paano ko nabal-an ina.) Sa luyo sini, maglupad palibot sini, mag-iba sang rota, ukon maghulat nga madula ang unos antes maghugpa.

Pinalangga nga batan-on nga mga kautoran, luyag ko buligan kamo nga “maglupad sing tadlong” sa panahon sang nagadulom nga mga unos sa ulihing mga adlaw. Kamo ang mga piloto. Responsable kamo sa pagpaminsar parte sa mga bunga sang inyo kada isa nga pagpili. Pangkota ang inyo kaugalingon, “Kon himoon ko ini nga pagpili, ano ang pinakamalala nga sarang matabo?” Ang matarong ninyo nga mga pagpili magapaiway sa inyo nga magtalang.

Hunahunaa ini: Kon kamo magpili nga indi mag-inom sang alak, indi kamo mangin palahubog! Kon kamo magpili nga indi gid mangutang, mapaiway ninyo ang posibilidad nga maputo!

Ang isa sa mga tuyo sang mga kasulatan amo ang magpakita sa aton kon paano ang matarong nga mga katawhan mag-atubang sa pagsulay kag sa malaut. Sa malip-ut nga pulong, ginalikawan nila ini! Si Joseph nagpalagyo sa asawa ni Potiphar.³ Si Lehi nagdala sa iya pamilya kag naghalin sa Jerusalem.⁴ Si Mary kag Joseph nagpalagyo padulong sa Egypt agud palagyohan ang malain nga tuyo ni Herod.⁵ Sa kada hitabo, ang Langitnon nga Amay nagpaandam sa sining mga tumuluo. Amo man, Siya magabulig sa aton nga makabalo kon bala kita dapat magbato, magpalagyo, ukon mag-upod sa nagabag-o naton nga mga kahimtangan. Siya magahambal sa aton paagi sa pangamuyo, mga kasulatan, mga panudlo sang mga buhi nga propeta, mga patriarchal blessing, laygay sang may inspirasyon nga mga ginikanan, mga lider sa priesthood kag auxiliary, kag labaw sa tanan, paagi sa matinong, kag diutay nga tingog sang Balaan nga Espiritu.

Ang Ginuo dalayon nga nagatuman sang Iya promisa: “Pagatuytoyan ko kamo sing dayon.”⁶ Ang pamangkot lamang amo, tugotan bala naton ang aton kaugalingon nga tuytoyan? Pamatian bala naton ang Iya tingog kag ang tingog sang Iya mga alagad?

Nagasaksi ako nga kon kamo ara dira para sa Ginuo, Siya mangin ara para sa inyo.⁷ Kon palangga ninyo Siya kag sundon ang Iya mga sugo, maangkon ninyo ang Iya Espiritu bilang kaupod kag maggiya sa inyo. “Magsalig sa sinang Espiritu nga nagatuytoy sa inyo sa paghimo sang maayo. … Paagi sini mabal-an ninyo, ang tanan nga mga butang … nga may kahilabtanan sa mga butang sang pagkamatarong.”⁸

Upod yadtong mga prinsipyo bilang sadsaran, pwede bala ako maghatag sa inyo sang pila ka mga laygay nga nagakadapat?

Madamo sa inyo henerasyon ang nagaatubang sa dalagku nga mga utang. Sang ako batan-on nga ulitawo, ang akon stake president isa ka investment banker sa Wall Street. Gintudloan niya ako, “Ikaw manggaranon kon sarang ka mangabuhi nga malipayon sa sulod sang imo mga ikasarang.” Paano ninyo sarang nga buhaton ini? Bayari ninyo ang inyo ikapulo kag magsupot! Kon nagdugang ang inyo kita, magsupot sing dugang. Indi magpaindis-indis sa iban sa pag-angkon sang malahalon nga mga hampanganan. Indi magbakal sang indi ninyo masarangan nga baklon.

Madamo sang mga batan-on sa kalibutan ang nagapangutang agud mag-eskwela, lamang matukiban sa ulihi nga ang bili sang ila pag-eskwela mas daku sangsa sarang nila bayaran. Magpangita sang mga scholarship, kag mga grant. Magpangita sang di-lubos panahon nga obra, kon posible, agud makabulig sa pagbayad para sa kaugalingon nga pagtuon. Ini nagakinahanglan sang diutay nga pagsakripisyo, apang makabulig ini sa inyo nga mangin madinalag-on.

Ang edukasyon nagahanda sa inyo nga makaangkon sang mas maayong oportunidad sa pagtrabaho. Ini nagabutang sa inyo sa mas maayo nga posisyon agud mag-alagad kag magbugay sa yadtong nagapalibot sa inyo. Ini magapahamtang sa inyo sa banas sang pagtuon sa bilog nga kabuhi. Ini magapabakod sa inyo sa pagbato batok sa pagkawalay hinalung-ong kag kasaypanan. Subong sa gintudlo ni Joseph Smith: “Ang tinun-an nagadula sa kadulom, pagkabalaka kag pagduda; kay ang mga ini indi magtuhaw kon ara ang tinun-an. … Sa tinun-an may ara sang gahum.”⁹ “Ang mga may tinun-an maayo kon mamati sila sa mga laygay sang Dios.”¹⁰ Ang edukasyon magahanda sa inyo sa palaaboton, kalakip ang pag-asawahay.

Liwat, pwede bala ako maghambal sing prangka? Ang riles nga nagapadulong sa pag-asawahay nagaagi sa alagyan sang ginatawag nga “dating”! Ang pag-date isa ka oportunidad para sa malawig nga mga paghambalanay. Kon kamo mag-date, tun-i ang tanan nga sarang matun-an parte sa kada isa. Kilalaha ang kada pamilya ninyo kon ini posible. Ang inyo mga kalab-uton kaanggid bala? Pareho bala ang inyo mga balatyagon parte sa mga sugo, sa Manluluwas, sa priesthood, sa templo, sa pagkaginikanan, mga palangakuan sa Simbahan, kag sa pag-alagad sa iban? Naobserbahan bala ninyo ang kada isa sa tion sang kabudlay, pag-atubang sa kadalag-an kag kapaslawan, pagdumala sa kaakig, kag pag-atubang sa mga kapiyerdihan? Ang tawo bala nga inyo ginadate nagatum-ok sa iban ukon nagahambal sing maayo parte sa ila? Ang iya bala batasan kag linggwahe kag pagginawi amo ang luyag mo sa kaupod mo kada adlaw?

Kay nahambal ina, wala sa aton ang makapangasawa ukon makapamana sang pagkahimpit; ginakasal kita sa sarang nga mangin. Ang husto nga pag-asawahay indi lamang parte sa kon ano ang luyag ko; kondi ini parte man sa kon ano luyag niya—nga mangin tiayon ko— ako nga magmangin.

Sa maathag nga hambal, palihog indi magdate sa bug-os ninyo nga bayntehon nga edad agud lang makaangkon sang “masadya nga tion,” nian nagapadugay sang pag-asawahay sa baylo sang iban nga mga kahuyogan kag kahiwatan. Ngaa? Bangud ang pagdate kag pag-asawahay indi amo ang katapusan nga mga padulongan. Ang mga ini ganhaan sang kon diin sa ulihi luyag ninyo nga magkadto. “Gani ang isa ka lalaki magabiya sa iya amay kag iloy, kag magpabilin nga upod sa iya asawa.”¹¹

Ang responsibilidad ninyo karon amo ang mangin takos nga tawo para sa inyo luyag nga mangin tiayon. Kon luyag ninyo nga makasal sa isa ka tawo nga maayo, matahom, matampad, malipayon, mapisan, kag diosnon, mangin subong sina nga tawo. Kon ikaw amo sina nga tawo kag wala pa kamo sang tiayon, maghulat. Maglaum sa Ginuo. Nagasaksi ako nga ang Ginuo nakabalo sang inyo mga handom kag palangga Niya kamo sa inyo himpit nga debosyon sa Iya. May ara Siya sang plano para sa inyo diri ukon sa pihak nga kabuhi. Pamatii ang Iya Espiritu. “Indi pagtinguhai ang maglaygay sa Ginuo, kundi ang magbaton sang laygay halin sa iya kamot.”¹² Sa sining kabuhi ukon sa masunod, ang mga promisa Niya matuman. “Kon kamo handa indi kamo magkahadlok.”¹³

Kon diutay lang ang inyo kwarta, indi magkabalaka. Isa ka maayo nga miyembro sang Simbahan ang bag-o lang naghambal sa akon, “Wala ko ginpadaku ang akon mga anak sa kwarta; ginpadaku ko sila sa pagtuo.” May dakung kamatuoran ina. Magsugod sa paghanas sang inyo pagtuo sa tanan nga bahin sang inyo kabuhi. Kon indi ninyo pagbuhaton ini, magmasakit kamo sang ginatawag ko nga “nagpalangluya nga pagtuo.” Ang tunay nga kabakod nga ginakinahanglan sa paghanas sang aton pagtuo mabuhinan. Gani maghanas sang inyo pagtuo sa kada adlaw, kag kamo mangin “mas mabakod kag mas mabakod … kag mas malig-on kag mas malig-on sa pagtuo kay Cristo.”¹⁴

Agud mangin handa sa pag-asawahay, siguradohon nga kamo takos sa pag-ambit sang sacramento kag mag-angkon sang temple recommend. Magkadto sa templo sang dalayon. Mag-alagad sa Simbahan. Dugang sa pag-alagad sa mga palangakuan sa Simbahan, magsunod sa halimbawa sang Manluluwas, nga basta lang “naglibot sa paghimo sang maayo.”¹⁵

Karon, basi may importante kamo nga mga pamangkot parte sa mga pagpili sa palaaboton. Sa batan-on ko nga mga tuig, nagpangita ako sang laygay halin sa akon mga ginikanan kag sa matinuohon, kag masaligan nga mga manuglaygay. Isa amo ang akon pinuno sa priesthood; isa pa amo ang manunudlo nga nagasalig sa akon. Angay sila nga nagsiling sa akon, “Kon luyag mo ang laygay ko, mangin handa ka sa pagbaton sini.” Nahangpan ko ang buot silingon sina. May pangamuyo nga magpili kamo sang mga manuglaygay nga ang ginahunahuna nila amo ang inyo espirituhanon nga kaayohan. Mag-andam sa pagbaton sang laygay halin sa inyo mga kaupod. Kon luyag ninyo ang mas kapin sa inyo ginaangkon karon, magdab-ot sa ibabaw, indi sa tabok!¹⁶

Dumdoma, wala sang makadab-ut paibabaw para sa inyo luyo. Lamang ang inyo pagtuo kag mga pangamuyo ang magatib-ong sa inyo kaugalingon kag mag-angkon sang dakung pagbag-o sa tagipusuon. Lamang ang inyo panaad nga mangin masinulundon ang makapabag-o sang inyo kabuhi. Bangud sa nagapasag-uli nga halad sang Manluluwas para sa inyo, ang gahum yara sa inyo¹⁷ Ara ang inyo pagpili, mabakod ang inyo mga pagpamatuod kon kamo matinumanon, kag sarang ninyo sundon ang Espiritu na nagagiya sa inyo.

Bag-o lang, isa ka batan-on nga manughimo sang sine ang nagsiling nga nabatyagan niya nga siya bahin sang isa ka “henerasyon sang mga nadula”—isa ka henerasyon nga “nagapangita sang paglaum kag kasadya kag katumanan, apang nagapangita sa tanan nga sayup nga mga lugar kag sa sayup nga mga paagi.”¹⁸

Sa paanggid sang Manluluwas parte sa nadula nga Anak, ang anak may madamo nga mga bugay nga nagahulat sa iya, apang antes niya mabaton ang mga ini, dapat anay siya maid-id nga magtalupangod sa iya kabuhi, sa iya mga pagpili, kag sa iya mga kahimtangan. Ang Milagro nga sunod natabo ginlaragway sa mga kasulatan paagi sa yano nga pulong: “Nakatalupangod siya sa iya kaugalingon.”¹⁹ Sarang ko bala kamo padasigon sa pagtalupangod sa inyo kaugalingon? Sa Simbahan, kon ang importanteng mga desisyon dapat buhaton, masami kami maghiwat sang mga miting sa konseho. Ang konseho sa pamilya may amo man nga tuyo. Basi luyag ninyo maghiwat sang ginatawag ko nga isa ka “kinaugalingon nga konseho.” Pagkatapos nga magpangamuyo, tilawi nga mag-isahanon. Hunahunaa ang palaaboton. Pangkota ang imo kaugalingon: “Ano nga bahin sang akon kabuhi ang luyag ko pabakuron agud nga mapabakod ko ang iban? Diin ko luyag nga ara ako sa masunod nga tuig halin karon? sa duha ka tuig halin karon? Ano nga mga pagpili ang akon buhaton agud makalab-ot didto?” Dumdoma lang, ikaw isa ka piloto kag ikaw ang nagadumala. Nagasaksi ako nga samtang nagatalupangod ikaw sa imo kaugalingon, ang Langitnon mo nga Amay magakari sa imo. Paagi sa nagapasulhay nga kamot sang Balaan nga Espiritu, Siya magabulig sa imo sing dayon.

Nagapamatuod ako nga ang Dios nagakabuhi. Ginahatag ko ang pinasahi ko nga saksi nga ang Manluluwas nagapalangga sa inyo. “Indi bala kita magpadayon sa [Iya dakung] kawsa? Maglakat sing pasulong kag indi sing paatras.”²⁰ Samtang kamo nagasunod sa Iya, pabakuron Niya kag sakdagon kamo. Dalhon Niya kamo pasaka sa inyo pinakamataas nga puluy-an. Sa ngalan ni JesuCristo, amen.