Pili-a ang Kasanag
Ni Elder Vern P. Stanfill
Sang Kapitoan
Dapat pilion naton nga magtuman sa manalagnaon nga laygay, magkilala kag maghulag sa espirituhanon nga mga pagpabatyag, magtuman sa mga sugo sang Dios, kag magtinguha sa pagbaton sang personal nga bugna.
Bag-o lang, kami sang asawa ko nagpamat-od nga makita sing lubos ang matahom nga lugar malapit sa amon puluy-an sa northwest Montana. Gindala namon ang amon mga bisekleta sa Hiawatha Trail, isa ka riles sang una nga nagatabok sa matahom nga Rocky Mountains sa tunga sang Montana kag Idaho. Ginlauman namon ang isa ka masadya nga adlaw upod ang mga abyan, kag makit-an ang katahom sang lugar.
Nabal-an namon nga ang amon pagbisekleta sa makakulunyag nga 24 kilometro nga banas magaagi sa taytay sang tren kag malawig nga mga tunnel sa idalom sang dalagku nga mga bukid. Gani kami naghanda sang mga suga sa amon helmet kag mga bisekleta.
Yadtong mga nag-agi antes sa amon nagpaandam sa amon nga ang mga tunnel madulom kag kinahanglan namon ang mabaskog nga mga suga. Samtang kami nagtililipon sa malapad nga batong ganhaan sang Taft Tunnel, ang manugbantay nagpaathag sang pila ka mga katalagman sang banas, kalakip ang madalom nga kanal sa mga kilid, batohon nga kilid, kag lubos nga kadulom. Nagadali kami nga nagsulod sa tunnel. Pagkatapos lamang sang pila ka minuto, ang ginhambal nga kasulom naglikup sa amon. Ang suga nga dala ko mahina, kag ang kadulom madali nga nagpierde sini. Hinali ako nga nagkabalaka, nagsalangisag, kag daw napunaw.
Nahuya ako nga akuon ang akon mga pagkabalaka sa mga abyan kag pamilya. Bisan ako batid nga siklesta, karon ang pamatyag ko daw sa indi ako kabalo magbisekleta. Nabudlayan ako nga magsige kag ang akon pagsalangisag nagdugang. Sang ulihi, pagkatapos nga ginsugid ko ang akon pamatyag sa mga kaupod ko, nagpalapit ako sa abyan nga may mas masanag nga suga. Sa pagkamatuod, ang bilog nga grupo nagporma sang sirkulo sa palibot niya. Paagi sa pagpabilin nga malapit sa iya kag sa pagsalig sa iya suga sinang tion kag sa kabilogan nga kasanag sang tanan, nagpadayon kami sang mas malayo sa kadulom sang tunnel.
Pagkatapos sang daw inoras nga pagbisekleta, may pintok sang kasanag ako nga nakit-an. Halos sa gilayon, nabatyagan ko ang pagpasalig nga ang tanan mangin maayo. Nagpadayon ako pasulong, nagasalig gihapon sa suga sang abyan kag sa nagadaku nga pintok sang kasanag. Ang kumpiyansa ko inanay nga nagbalik samtang ang kasanag nagdaku kag nangin mas masanag. Bisan nga malayo pa ang katapusan sang tunnel, wala na ako magsalig sa bulig sang mga abyan. Ang tanan nga pagkabalaka nadula samtang kami madasig nga nagpakadto sa kasanag. Kalmante ako kag may may kasulhay bisan antes kami naggwa sa kasanag sang kaagahon nga napuno sang kainit kag himaya.
Ara kita sa kalibutan kon diin maagyan naton ang mga pagtilaw sa aton pagtuo. Basi kumpiyansa kita sa pag-atubang sining mga pagtilaw—lamang masapwan nga ang aton paghanda kulang. Kag subong nga ako ginpaandaman sang abyan parte sa kadulom, kita ginpaandaman man karon nga adlaw. Ang mga mensahi sang mga Apostoles nagapadasig sa aton nga maghanda nga may gamhanan nga kasanag sang espirituhanon nga kabakod.
Kasubong, kita nahuya, di-masulhay, ukon nagasalangisag sa espiritu kon kita may pagtilaw sa aton pagtuo. Sa kabilogan, ang kabaskog kag kadugay sining mga balatyagon depende sa aton pag-atubang sa mga ini. Kon kita wala sang himuon, ang pagduda, bugal, kag sa ulihi paghalin sa kamatuoran ang magpalayas sa aton halin sa kasanag.
Natun-an ko ang pila ka mga importanteng leksyon halin sa inagihan ko sa tunnel. Ipaambit ko ang pila sa mga ini.
Una, bisan ano ka mabaskog ang kadulom sang pagduda, kita ang nagapat-od kon ano kadugay kag sa ano kalapad nga tugotan naton ini sa pag-impluwensya sa aton. Dapat naton dumdomon kon daw ano kita ka palangga sang aton Langitnon nga Amay kag sang Iya Anak. Sila indi magbiya sa aton, ukon magtugot nga malutos kon kita magpangayo sang Ila tabang. Dumdoma ang inagihan ni Peter sa dalagku nga mga balud sang Dagat sang Galilee. Samtang si Peter ginlikupan sang malamig nga kadulom sa iya palibot, nabal-an niya ang iya katalagman kag sa gilayon nagtawag sang tabang. Wala siya magduda sa gahum sang Manluluwas nga makaluwas sa iya; nagsinggit lamang siya, “Ginuo, luwasa ako.”1
Sa aton mga kabuhi, ang nagatan-ay nga kamot sang Manluluwas sarang nga mangin bulig sang ginasaligan nga abyan, lider, ukon sang mapinalanggaon nga ginikanan. Samtang kita nabudlayan sa kadulom, indi malain ang magsalig sang agi sa kasanag sang yadtong nagapalangga sa aton kag nagahunahuna sang aton mga kaayohan.
Kon binagbinagon naton sang husto, ngaa nga magpamati kita sa di-kilala kag kritiko nga mga tingog sang yadtong ara sa daku kag maligwa nga mga bilding sa aton panahon, kag magbaliwala sa mga pangabay sang yadtong tunay nga nagapalangga sa aton? Ining permi nga mga maduhaduhaon mas luyag nga magguba sangsa magtukod kag magyaguta sangsa magdayaw. Ang pagpanghikay nila sarang magtudok sa aton mga kabuhi, masami sa isa ka kisap sang elektronikong butig, nga mainandamon kag gintuyo nga magguba sang aton pagtuo. Maalam bala ang magsalig sang aton walay katapusan nga kaayohan sa mga kamot sang dumuluong? Maalam bala ang magkuha sang pasanaaw halin sa yadtong wala sang kasanag nga ihatag ukon may ginatago nga tuyo nga wala naton mabal-an? Ining di-kilala nga mga tawo, kon matampad nga ipakilala sa aton, indi gid mahatagan sang bisan diutay nga tion naton, apang bangud sila nagagamit sang social media, nga wala mausisa, sila di-takos nga ginapatihan.
Ang pagpili naton nga magpamati sa yadtong nagayaguta sang sagradong mga butang magapalayo sa aton halin sa makaluwas kag makahatag-kabuhi nga kasanag sang Manluluwas. Si John nagsulat: “Dayon si Jesus naghambal liwat sa ila, nagasiling, Ako ang suga sang kalibutan: siya nga nagasunod sa akon indi maglakat sa kadulom, apang makaangkon sang kasanag sang kabuhi.”2 Dumdoma, yadtong tunay nga mga nagapalangga sa aton makabulig sa pagtukod sang aton pagtuo.
Subong nga ako nahuya sa tunnel, kita sarang man nga mahuya sing tuman nga magpangayo sang bulig kon nagaduda. Basi kita ang ginatangla sang iban para sa kabakod, kag karon kita ang nagakinahanglan sang bulig. Kon mabal-an naton nga ang kasanag kag ang kasulhay nga halin sa Manluluwas tuman ka bilidhon agud madula bangud sang bugal, ti, ang may inspirasyon nga mga lider sang Simbahan, mga ginikanan, kag masaligan nga mga abyan makabulig. Handa sila nga magbulig sa aton sa pagbaton sang espirituhanon nga mga pagpasalig nga makapabakod sa aton batok sa mga pagtilaw sang pagtuo.
Ikaduha, dapat kita magsalig sa Ginuo agud makatukod sang espirituhanon nga kabakod sa sulod sang aton mga kaugalingon. Indi kita makasalig sa suga sang iban nga padayon. Nabal-an ko nga ang kadulom sang tunnel indi magdugay kon ako padayon nga magsikad sa tupad sang akon abyan kag upod sa kaluwasan nga ara sa grupo. Apang nagapaabot ako nga magpadayon sa akon kaugalingon sa tion nga makit-an ko ang kasanag. Ang Ginuo nagatudlo sa aton, “Magkari palapit sa akon kag ako magapalapit sa inyo; pangitaa ako sing maukod kag masapwan ninyo ako; magpangayo, kag kamo pagahatagan; magpanuktok, kag ang ganhaan pagabuksan sa inyo.”3 Dapat kita magbuhat, nagapaabot nga ang Ginuo magatuman sang Iya promisa nga magtib-ong sa aton halin sa kadulom kon kita magapalapit sa Iya. Ang kaaway, bisan paano, magatinguha sa pagbuyok sa aton nga wala gid naton mabatyagan ang impluwensya sang Espiritu kag mas mahapos na lamang ang mag-untat sa pagtinguha.
Si Presidente Dieter F. Uchtdorf nagalaygay sa aton nga “magduda sa inyo mga pagduhaduha antes kamo magduda sa inyo pagtuo.”4 Sa akon home ward, isa ka batan-on nga lalaki ang bag-o lang nagsiling, “May ara sang mga butang nga nabatyagon ko nga di-mapaathag luwas nga ang mga ini iya sang Dios.” Ini ang espirituhanon nga pagkamatampad.
Kon kita nagaatubang sa mga pamangkot ukon ginsulay agud magduda, dapat naton dumdomon ang mga espirituhanon nga mga bugay kag balatyagon nga nagtudok sa aton mga tagipusuon kag kabuhi sa nagligad, kag nagbutang sang aton pagtuo sa aton Langitnon nga Amay kag sa Iya Anak, nga si JesuCristo. Ginadumdom ko ang laygay nga ara sa naandan nga himno: “Di-magduda sa Ginuo ukon sa iya kaayo [kay] napamatud-an naton siya sa mga adlaw nga nagligad.”5 Ang magbaliwala kag maghimutig sang nagligad nga espirituhanon nga mga inagihan makapalayo sa aton halin sa Dios.
Ang aton pagpangita sa kasanag mangin mahapos kon kita luyag magkilala kon ini ara sa aton mga kabuhi. Ang moderno nga kasulatan nagapaathag parte sa kasanag kag nagapromisa sa yadtong nagabaton sini: “Inang iya sang Dios amo ang kasanag; kag siya nga nagabaton sang kasanag, kag nagapadayon sa Dios, nagabaton sang dugang nga kasanag; kag ina nga kasanag nagalambo sing mas masanag kag mas masanag tubtob sa himpit nga adlaw.”6 Subong nga kita nagapadayon sa pagsikad padulong sa kasanag, kon mas maukod kita, mas masanag ang impluwensya Niya sa aton mga kabuhi. Subong sa kasanag sa katapusan sang tunnel, ang impluwensya Niya magadala sa aton sang kumpiyansa, determinasyon, kasulhay, kag—labing importante—sang saksi nga Siya buhi.
Ikatatlo, wala sing kadulom nga tuman, tuman nga makahaladlok, ukon tuman ka mabudlay nga ini indi malutos sang kasanag. Si Elder Neil L. Andersen bag-o lang nagtudlo: “Samtang nagadugang ang malaut sa kalibutan, may ara sang nagadugang nga espirituhanon nga gahum para sa matarong. Samtang ang kalibutan napalos sa iya espirituhanon nga mga angkla, ang Ginuo naghanda sang banas sa yadtong nagapangita sa Iya, nagahalad sa ila sang mas dakung kumpiyansa sa espirituhanon nga direksyon nga ila ginasundan. Ang dulot sang Balaan nga Espiritu nangin isa ka mas masanag nga suga sa kasisidmon.”7
Mga kautoran, wala kita ginbiyaan nga nagaisahanon agud maimpluwensya sang tanan nga ideya kag pagbag-o sa panan-aw sang kalibutan, apang may gahum kita sa pagpili sang pagpati labaw sa pagduda. Agud maangkon ang ginsaad nga nagadugang nga espirituhanon nga gahum, dapat kita magpili nga magtuman sang manalagnaon nga laygay, magkilala kag maghulag sa espirituhanon nga mga pagpabatyag, magsunod sa mga sugo sang Dios, kag magpangita sa personal nga bugna. Dapat kita magpili. Kabay nga pilion naton ang suga sang Manluluwas. Sa ngalan ni JesuCristo, amen.