Gintilawan kag Ginsulay—apang Ginbuligan

Ni Elder Hugo Montoya

Sang Kapitoan

Kita sarang magbinuligay bilang mga anak sang aton Langitnon nga Amay sa aton mga pagtilaw kag mga pagsulay.

Sa aton kabuhi, may ara sang pagtilaw kag pagsulay. May ara man kita sang oportunidad nga magpili kag mabinuligay. Ining mga kamatuoran bahin sang matahom kag perpekto nga plano sang aton Langitnon nga Amay.

Si Presidente John Taylor nagtudlo: “Nakabati ako kay Propeta Joseph nga nagasiling, sa Napulogduha sa isa ka okasyon: ‘Magaagi kamo sa tanan nga sahi sang mga pagtilaw. Kag kinahanglan gid nga kamo pagatilawan subong sadto kay Abraham kag iban pa nga mga alagad sang Dios, kag (siling niya) ang Dios magatilaw sa inyo, kag magakungkong sa inyo kag tilawan kamo sa tanan ninyo nga masarangan.’”¹

Sa tion nga malab-ot naton ang edad sang may salabton, ang mga pagtilaw kag mga pagsulay ara sa tanan. Kon kaisa ang mga ini mangin mabug-at nga mga palas-anon, apang makahatag man sang kabakod kag pag-uswag sa aton kon madinalag-on nga malutos naton ang mga ini.

Maayo lang kay ining mga palas-anon indi dapat lukdohon nga nagaisahanon. Si Alma nagtudlo, “Maluyag kamo nga magsulod sa panong sang Dios, kag tawagon nga iya katawhan, kag luyag nga magpas-an sang palas-anon sang isa kag isa, agud nga mangin mamag-an ang mga ini.”² Ining mga pulong nagasiling nga kita may ara sang responsibilidad sa pagbulig sa kada isa. Inang responsibilidad sarang mag-abot halin sa palangakuan sa Simbahan, sa isa ka pagtalana, ukon sa pagkaabyan, ukon bilang bahin sang aton diosnon nga katungdanan bilang mga ginikanan, mga magtiayon, ukon mga miyembro sang pamilya—ukon simple nga kabahin sang pamilya sang Dios.

Ilaragway ko ang apat ka mga paagi nga mangin mamag-an ang aton mga palas-anon samtang kita nagabinuligay.

1. Ang Manluluwas nagsiling, “Kon may soldado nga magpilit sa imo nga magpas-an sang iya karga sang isa ka kilometro, himoa nga duha.”³ Halimbawa, ginpangabay kita nga magtambong sa templo sing dalayon, suno sa aton matag-isa nga kahimtangan. Ang pagtambong sa templo nagakinahanglan sang pagsakripisyo sang tion kag kwarta, labi na sa mga yadtong nagakinahanglan magbiyahe sang malayo. Wala sapayan, ining sakripisyo sarang kabigon nga bahin sang unang kilometro.

Magsugod kita sa paglakat sa ikaduhang kilometro kon nahangpan naton ang mga pulong “pangitaa, kuhaa, tudloi,”⁴ kon kita nagapangita kag nagahanda sang mga pangalan sang aton mga katigulangan para sa mga ordinansa sang templo, kon kita nagabulig sa indexing, kon kita nagaalagad bilang mga temple worker, kag kon kita nagabulig sa iban nga maghimo sang ila pagtambong sa templo nga makahulogan.

Samtang nagaalagad ako bilang isa ka Area Seventy, isa sa mga stake nga sakop sa akon coordinating council ang nagpakigbuylog sa isa ka daku nga temple excursion. Ang templo nga gintambongan sang mga miyembro diutay, kag sa walay palad may pila ka mga miyembro nga nagbiyahe sang dose oras apang wala makasulod sa templo bangud naggilinutok.

Pila ka adlaw pagkalipas sining biyahe, nagbisita ako sa sining stake kag naghambal sa presidente kon pwede ako mag-istorya sa pila ka mga miyembro nga wala makatambong sa templo sinang adlaw. Isa sa mga miyembrong lalaki nga nabisita ko nagsiling sa akon: “Elder, indi magkabalaka. Ara ako sa balay sang Ginuo. Naglingkod ako didto sa hardin kag nagbinagbinag sa hunahuna ko sang mga ordinansa. Dayon makasulod na kontani ako, apang ginhatag ko sa isa ka brother nga bag-o lang nagkadto sa templo agud mahugpong sa iya asawa ang akon lugar. Sila nakatambong sa duha ka mga sesyon sinang adlaw. Kilala ako sang Ginuo, kag Siya nagbugay sa akon, kag okay lang kami.”

2. Yuhum. Ining diutay nga buhat sarang makabulig sa yadtong natam-an kag nabug-atan. Sa priesthood session sang nagligad nga kabilogan nga konperensya sang Abril, naglingkod ako sa entablado bilang isa sa lima ka bag-o lang gintawag nga mga General Authority. Naglingkod kami sa lugar kon diin ang mga sister nga mga pangulohan sang auxiliary sa karon nagalingkod. Ginkulbaan gid ako kag natam-an bangud sang bag-o ko nga palangakuan.

Sang nagaamba kami sang bal-ut nga himno, nakabatyag ako sang mabaskog nga may nagatulok sa akon. Naghunahuna ako: “May kapin sa baynte mil ka mga tawo sa sining bilding, kag ang kalabanan nagaatubang sa akon. Ti matuod, may nagatulok sa akon.”

Samtang nagpadayon ako sa pag-amba, mabaskog nga nabatyagan ko liwat nga may nagatulok sa akon. Naglantaw ako sa idas kon diin ang Napulogduha ka Mga Apostoles nagalingkod kag nakita ko si Presidente Russell M. Nelson nga nagabalikid halin sa iya pulungkoan, nagatulok kon sa diin kami nahamtang. Nagtulokay kami, kag nagyuhum siya sing daku sa akon. Ato nga yuhum nagpakalma sa akon.

Pagkatapos sang Iya Pagkabanhaw, si JesuCristo nagbisita sa iban niya nga karnero. Siya nagtawag kag nag-ordin sang napulogduha kag mga disipulo, kag sa idalom sinang awtoridad, sila nag-alagad sa katawhan. Ang Ginuong JesuCristo nag-upod sa tunga nila. Ang Ginuo nagpangabay sa ila nga magluhod kag magpangamuyo. Indi ako sigurado kon ang bag-o gintawag kag naordinan nga dose ka mga disipulo natam-an sa ila palangakuan, apang ang mga kasulatan nagasiling, “Kag natabo ini, nga ginpakamaayo sila ni Jesus samtang nagapangamuyo sila sa iya; kag ang iya nawong nagyuhum sa ila, kag ang kasanag sang iya nawong nagsilak sa ila.”⁵ Sang ulihi nga kabilogan nga konperensya, isa ka yuhum ang nagpamag-an sang akon mga palas-anon sa gilayon kag pinasahi nga paagi.

3. Ipabutyag ang mga balatyagon sang kalooy para sa iban. Kon ikaw nagaangkon sang priesthood, palihog gamita ang imo gahum para sa mga anak sang Dios, paagi sa paghatag sang mga bugay. Maghambal sang mga pulong sang paglaum kag kasulhay sa mga tawo nga nagaantus ukon ara sa mga kapipit-an.

4. Ang sadsaran nga bato sang plano sang Dios amo ang Pagpasag-uli ni JesuCristo. Bisan kada simana lang, dapat kita magpainoino subong sa ginhimo ni Presidente Joseph F. Smith parte sa “daku kag matahom nga pagpalangga nga ginpakita sang Amay kag sang Anak sa pagkari sang Manunubos sa kalibutan.”⁶ Ang pagdapit sa iban nga magsimba kag mag-ambit nga takos sang sacramento magatugot sa mas madamo nga mga anak sang Langitnon nga Amay sa paghunahuna sang Pagpasag-uli. Kag, kon kita indi takos, sarang kita maghinulsol. Dumdoma nga ang Anak sang Pinakamataas nagdulhog sa idalom sang tanan kag nag-ako sang aton mga sayup, mga sala, mga paglapas, mga balatian, mga kasakit, mga kapipit-an, kag kasubo. Ang kasulatan nagatudlo sa aton nga si Cristo, “nagkayab sa kahitaasan, subong man nga siya nagdulhog sa idalom sang tanan nga mga butang, nga diin nahangpan niya ang tanan nga mga butang.”⁷

Bisan ano man ang aton personal nga mga kabudlay—bisan ang mga ini balatian ukon malawig nga pagpangasubo ukon pag-antus sang mga pagsulay kag mga pagtilaw sang kaaway—ang Maayong Pastor ara. Ginatawag Niya kita sa aton ngalan kag nagasiling, “Palapit kamo sa akon, tanan kamo nga ginabudlayan kag ginabug-atan, kag papahuwayon ko kamo.”⁸

Luyag ko sambiton ang apat ka mga punto:

Una—maghatag sang doble nga pag-alagad.

Ikaduha—palihog yuhum. Ang yuhum ninyo makabulig sa iban.Second—please smile. Your smile will help others.

Ikatatlo—magpabutyag sang kalooy.

Ikaapat—magdapit sa iban nga magsimba.

Ginahatag ko ang akon pagpamatuod parte sa Manluluwas. Si Jesus amo ang Cristo, ang Anak sang buhi nga Dios, kag Siya nagakabuhi. Nabal-an ko nga Siya nagasakdag, upod ang tanan Niya nga kabakod kag gahum, sa plano sang Amay. Nabal-an ko nga si Presidente Thomas S. Monson isa ka buhi nga propeta. Ginaangkon niya ang tanan nga yabi agud madinalag-on nga matuman ang buluhaton sang Dios sa kalibutan. Nabal-an ko nga kita sarang magbinuligay bilang mga anak sang aton Langitnon nga Amay sa aton mga pagtilaw kag mga pagsulay. Sa ngalan ni JesuCristo, amen.