Ano Pa Bala ang Kulang sa Akon?

Ni Elder Larry R. Lawrence

Sang Kapitoan

Kon kita mapainubuson kag luyag nga matudloan, ang Balaan nga Espiritu magapabatyag sa aton agud mag-uswag kag magatuytoy sa aton nga magpauli, apang kinahanglan naton ang magpangayo sa Ginuo sang mga direksyon samtang kita nagapanglakaton.

Sang batan-on pa ako, nagsugod ako sa pag-usisa parte sa Simbahan. Sa una naganyat ako sa ebanghelyo bangud sa mga halimbawa sang mga abyan ko nga LDS, apang sa ulihi nabuyok ako sa pinasahi nga doktrina. Sang nabal-an ko nga ang mga himpit nga katawhan nagapadayon sa pag-uswag kag sa ulihi mangin kasubong sa aton langitnon nga mga ginikanan, tunay nga ginkunyagan ako. Naluyagan ko gid ang ideya; nabatyagan ko nga ini matuod.

Wala madugay pagkatapos sang akon bunyag, nagatuon ako parte sa Panudlo sa Bukid, kag nabal-an ko nga si Jesus nagtudlo sang amo man nga kamatuoran parte sa nagapadayon nga pag-uswag sa Biblia. Nagsiling Siya, “Gani magmangin himpit kamo, kaangay sang inyo Amay sa langit nga himpit.”¹

Nangin isa ka miyembro ako sang Simbahan karon sa kapin 40 anyos na, kag sa tion nga mabasa ko ining bersikulo sang kasulatan, madumdoman ko ang aton katuyoan diri sa kalibutan. Nagkari kita agud magtuon kag mag-uswag tubtob inanay nga mangin balaan ukon mangin himpit kay Cristo.

Ang pagpanakayon sang isa ka disipulo mabudlay. Ini gintawag nga isa ka “banas sang tayuyon nga pag-uswag.”² Samtang nagapanglakaton kita sa masipot kag makitid nga alagyan, ang Espiritu nagapadayon sa pagpadasig sa aton nga mangin mas maayo kag magsaka sing mas mataas. Ang Balaan nga Espiritu maayo gid nga kaupod sa pagbiyahe. Kon kita mapainubuson kag luyag magtuon, tuytoyan Niya kita kag buligan nga makapauli.

Apang kinahanglan naton nga magpangayo sang bulig sa Ginuo samtang kita nagalakat. Dapat kita magpamangkot sang mabudlay nga mga pamangkot, subong sang “Ano ang dapat ko bag-ohon?” “Paano ako mag-uswag?” “Ano nga kahuyangan ang dapat pabakoron?”

Tun-an naton ang istorya sang manggaranon kag batan-on nga manugdumala. Matarong siya nga ulitawo nga nagatuman na sang Napulo ka Mga Sugo, apang luyag niya nga mas mangin maayo. Ang kalab-uton niya amo ang kabuhing walay katapusan.

Sang makita niya ang Manluluwas, siya nagpamangkot, “Ano pa bala ang kulang sa akon?”³

Si Jesus gilayon nga nagsabat, naglaygay para gid sa manggaranon nga batan-on. “Si Jesus nagsiling sa iya, Kon luyag mo nga mangin himpit, magpauli ka kag ibaligya ang tanan mo nga mga pagkabutang, kag ang kwarta ipanagtag mo sa mga imol, kag … magbalik ka kag magsunod sa akon.”⁴

Ang ulitawo nakibot gid; wala niya ginapaabot ang amo nga pagsakripisyo. Nagakaigo ang iya pagpakubos agud magpamangkot sa Ginuo apang kulang sa pagtuo agud magsunod sa diosnon nga laygay nga ginhatag sa iya. Dapat luyag kita magtuman kon kita makabaton sang sabat.

Si Presidente Harold B. Lee nagtudlo, “Kada isa sa aton, kon luyag naton nga mangin himpit, dapat [sa] isa ka tion nagapamangkot kita sa aton mga kaugalingon sining pamangkot, ‘Ano pa bala ang kulang sa akon?’”⁵

Kilala ko ang isa ka matinuohon nga iloy nga nagpakubos kag nagpamangkot, “Ano ang nagapaiway sa akon agud magprogreso?” Sa sitwasyon niya, gilayon nagsabat ang Espiritu: “Untati ang pagreklamo.” Nakibot siya sa sabat; wala niya ginkabig nga siya palareklamo. Apang, maathag gid ang mensahi sang Balaan nga Espiritu. Sa mga adlaw nga nagsunod, nagbantay siya sa iya gawi nga nagareklamo. Nagapasalamat sa pagpabatyag agud mag-uswag, ginpat-od niya nga isipon ang iya mga bugay sa luyo sang iya mga pagtilaw. Sa sulod sang pila ka adlaw, nabatyagan niya nga ang Balaan nga Espiritu nalipay sa iya .

Isa ka nagpakubos nga ulitawo nga daw indi makakita sang nagakadapat nga pangasaw-on nagpangamuyo sa Ginuo agud buligan: “Ano ang kulang ko agud mangin takos nga tiayon?” pamangkot niya. Ining sabat nag-abot sa iya hunahuna kag tagipusuon: “Tinloi ang imo paghambal.” Sa sinang higayon, nabal-an niya nga may pagkabastos ang pila niya ka mga paghambal, kag siya nagpanaad sa pagbag-o.

Isa ka dalaga ang isganan nga nagpamangkot: “Ano ang kinahanglan ko nga bag-ohon?” kag ang Espiritu naghutik sa iya, “Indi magsaligbat kon ang mga tawo nagahambal.” Ang Balaan nga Espiritu tunay gid nga nagahatag sang laygay para sa kada isa. Lubos siya ka matampad nga kaupod kag magahambal sa aton sang mga bagay nga wala mabal-an sang bisan sin-o ukon wala sang kaisog nga magsiling sa aton.

Isa ka RM ang nabudlayan gid sa iya masako nga schedule. Nagtinguha siya agud may panahon para sa obra, pag-eskwela, pamilya, kag palangakuan sa Simbahan. Nangayo sang laygay sa Ginuo: “Paano ako mangin malinong sa kadamoan sang mga buluhaton ko?” Ang sabat indi amo ang iya ginapaabot; nakabaton siya sang pagpabatyag nga dapat siya mangin mas mainandamon sa pagtuman sang Adlaw nga Inugpahuway kag pakabalaanon ini. Gindedikar niya ang Domingo para sa pag-alagad sa Dios—nga indi magtuon sa sinang adlaw kag sa tigaylo magtuon sang ebanghelyo. Ining diutay nga pagbag-o nagpalinong sa iya kag nagpakalma.

Sang nagligad nga mga tinuig, nabasa ko sa isa ka Church magazine ang istorya sang isa ka dalaga nga nagaistar malayo sa iya puluy-an kag naga-eskwela sa kolehiyo. Nagkulang siya sa iya mga klase, ang pagpakig-abyan nga kabuhi niya indi maayo, kag sa kabug-osan indi siya malipayon. Sang ulihi isa ka adlaw nagluhod siya kag nagpangamuyo, “Ano ang dapat ko buhaton agud magdelanto sa akon kabuhi?” Ang Balaan nga Espiritu naghutik, “Lakat kag tinloi ang imo kwarto.” Lubos nga nakibot gid siya sa sining pagpabatyag, apang ini ang ginakinahanglan niya agud magsugod. Pagkatapos nga siya nagaka-organisar kag nakay-o sang mga pagkabutang niya, nabatyagan niya Ang Espiritu sa iya kwarto kag nalipay siya.

Ang Balaan nga Espiritu wala nagahambal sa aton nga paayohon ang tanan nga butang sa gilayon. Kon himoon Niya, maluyahan kita kag indi na magsugod. Ang Espiritu nagabulig sa aton suno sa aton ikasarang, isa ka tikang sa isa ka tion, ukon subong sa gintudlo sang Ginuo, “dinalan sa dinalan, pagsulundan sa pagsulundan, … kag bulahan yadtong mga nagapamati sa akon mga pagsulundan, … kay sa iya nga magabaton magahatag ako sing dugang.”⁶ Halimbawa, kon ang Balaan nga Espiritu nagapabatyag sa inyo nga maghambal sang salamat sing mas masami, kag ginahimo ninyo ini, Siya magahatag sa inyo sang mas mabudlay nga pagabuhaton—subong sa paghambal sang, “Pasensyaha ako; sala ko ato.”

Ang husto nga tion agud magpamangkot, “Ano pa bala ang kulang sa akon?” amo nga kon kita nagaambit sang sacramento. Ang Apostoles nga si Paul nagtudlo nga ini ang tion para sa kada isa sa aton agud mag-usisa sang aton mga kaugalingon.⁷ Sa sining maligdong nga palibot, samtang ang aton mga hunahuna nagatamod sa langit, ang Ginuo malolo nga maghambal sa aton kon ano ang sunod naton nga buhaton.

Kasubong ninyo, ako nakabaton sang madamo nga mga mensahe halin sa Balaan nga Espiritu sa mga tinuig nga nagligad nga nagtudlo sa akon kon paano ako mag-uswag. Tugoti nga iapaambit ko ang pila ka mga mensahi nga akon ginkabig nga importante. Ining mga pagpabatyag naglakip sang:

Indi ka mag-alsa boses.
Mag-organisar sang imo kaugalingon; listaha kada adlaw ang mga butang nga dapat mo buhaton.
Amligi ang imo lawas paagi sa pagkaon sang mas madamo nga mga prutas kag ulutanon.
Magtambong sa templo sing mas dugang.
Magkuha sang tion agud magbinagbinag antes magpangamuyo.
Magpangayo sang laygay sa imo asawa.
Kag mangin pasensyoso sa pagmaneho; indi magsobra sa kadasig nga gintalana. (Ginatinguhaan ko pa ining ulihi.)

Ang nagapasag-uli nga halad sang Manluluwas amo ang nagahimo sa pagkahimpit ukon pagkabalaan nga posible. Indi naton sarang nga malab-ot ini kon kita lang, apang ang grasya sang Dios nagakaigo agud buligan kita. Subong sa ginsiling ni Elder David A. Bednar sang kaisa: “Laban sa aton maathag nga nakahangop nga ang Pagpasag-uli para sa mga makasasala. Apang indi ako sigurado, kon nabal-an naton nga ang Pagpasag-uli para man sa mga santos—para sa maayong mga lalaki kag mga babayi nga matinumanon, takos, kag mainandamon kag nagatinguha nga mangin mas maayo.”⁸

Ginapanugyan ko nga ang kada isa sa inyo magpartisipar sa isa ka espirituhanon nga paghanas sa madali nga panahon, bisan pa karon sa gab-i samtang kamo nagapangamuyo. Magpamangkot sa Ginuo nga may pagpakubos: “Ano ang nagapugong sa akon nga mag-uswag?” Sa iban nga pulong: “Ano pa bala ang kulang sa akon?” Dayon maghulat sing mahipos para sa sabat. Kon kamo sinsero, ang sabat magaabot dayon nga maathag. Ini mangin bugna nga para lamang sa inyo.

Basi ang Espiritu magahambal sa inyo nga kinahanglan mo ang magpatawad sa isa ka tawo. Ukon hambalan kamo nga mangin mas mapili sa mga sine nga inyo ginalantaw ukon sa musika nga inyo ginapamatian. Ikaw basi makabatyag nga mangin mas matampad sa inyo negosyo ukon mangin mas maalwan sa inyo halad sa pagpuasa. Ang mga posibilidad wala sang katapusan.

Ang Espiritu sarang magpakita sa aton sang aton kahuyangan, apang sarang man Siya nga magpakita sang aton mga kabakod. Kon kaisa kinahanglan naton nga magpamangkot kon ano ang husto nga ginabuhat naton agud ang Ginuo makapatib-ong kag makapadasig sa aton. Kon ginabasa naton ang aton mga patriarchal blessing, ginapadumdom kita nga ang aton Langitnon nga Amay nakabalo sang diosnon naton nga ikasarang. Siya nagakasadya sa kada tion nga kita nagapasulong. Sa Iya, mas importante kon diin kita nagapadulong sangsa kon ano kita kadasig.

Maghimud-os mga kautoran, apang indi gid madulaan sang paglaum. Kinahanglan nga kita magtaliwan antes tunay nga malab-ut naton ang pagkahimpit, apang diri sa mortalidad sarang naton ipadapat ang sadsaran. “Ini katungdanan naton ang mangin mas maayo karon nga adlaw sangsa kahapon, kag mas maaayo sa buas sangsa karon nga adlaw.”⁹

Kon ang paglambo sa espiritu indi ulonahon sa aton mga kabuhi, kon kita wala sa banas sang tayuyon nga pag-uswag, indi naton mabaton ang importante nga mga inagihan nga luyag sang Dios ihatag sa aton.

Sang tinuig nga nagligad nabasa ko ang mga pulong ni Presidente Spencer W. Kimball, nga nakaimpluwensya sa akon sang padayon. Siling niya: “Natun-an ko nga kon may mapinangamuyuon nga tagipusuon, pagkaluyag sa pagkamatarong, pagsikway sang mga sala, kag pagtuman sa mga sugo sang Dios, ang Ginuo magabubo sang dugang kag dugang pa nga kapawa tubtob sa ulihi may ara sang gahum nga magbukas sang langitnon nga belo. ... Ang tawo nga may amo sang pagkamatarong may ara sang walay bili nga promisa nga sa isa ka adlaw makit-an niya ang nawong sang Ginuo kag makilal-an nga Siya buhi.”¹⁰

Pangamuyo ko nga ining pinakadakung ekperyensya mangin aton sa maabot nga adlaw samtang ginatugotan naton ang Balaan nga Espiritu sa pagtuytoy sa aton pauli. Sa ngalan ni JesuCristo, amen.