Ang Kasadya sang Pagpangabuhi sang Cristohanon nga Kabuhi
Ni Elder Richard J. Maynes
Sang Pangulohan sang Kapitoan
Ang aton mga kabuhi dapat himpit nga Cristohanon kon luyag naton nga makaagum sang tunay nga kasadya kag paghidaet sa sining kabuhi.
Ang kalibutan karon labing nagaimpluwensya sa maayo nga katawhan bisan diin agud nga sila magpakubos ukon magsikway sang ila mga sulundan sang matarong nga pagpangabuhi. Apang, walay sapayan sa mga malaut kag mga pagsulay nga nagapalibot sa aton kada adlaw, makaagum kita sang tunay nga kasadya karon nga adlaw sa pagpangabuhi sang Cristohanon nga kabuhi.
Ang pagpatumod sang aton mga kabuhi kay JesuCristo kag sa Iya ebanghelyo magadala sang kapag-on kag kalipayan sa aton mga kabuhi, subong sa ginpakita sang masunod nga mga halimbawa.
Si Elder Taiichi Aoba sang Kapitoan, nga nagapuyo sa diutay nga baryo sa Shikoku, Japan, ginpangabay nga magtudlo sang isa ka klase sa isa ka youth conference. “Magtindog Kamo sa Balaan nga Mga Lugar” amo ang ginpili nga tema sa konperensya. Pagkatapos nga tun-an ang tema, si Elder Aoba nagdesisyon nga gamiton niya ang iya trabaho bilang gamit sa pagtudlo. Manughimo siya sang kolon kag iban pa nga gamit.
Si Elder Aoba nagsiling nga ang mga batan-on ginkunyagan gid sang makit-an nila kon paano siya nakasarang sa paghimo nga daw magic sang mga plato, yahong, kag mga tasa halin sa clay nga ara sa iya mga kamot. Pagkatapos sang iya pagpakita, ginpamangkot niya sila kon luyag nila magtilaw sa paghimo. Ang tanan nagbayaw sang ila kamot.
Gintugotan ni Elder Aoba ang pila ka mga batan-on nga magtilaw. Abi nila ini mahapos lang. Apang, wala sa ila ang madinalag-on nga makahimo sang bisan simple lang nga yahong. Sila nagtuad: “Indi ko mahimo ini!” “Ngaa nga ini tuman gid ka budlay?” “Ini indi gid mahapos.” Ining mga komentar natabo samtang ang clay nag-alagsik sa palibot sang kwarto.
Ginpamangkot niya ang batan-on kon ngaa nabudlayan gid sila sa paghimo sang pottery. Iba-iba ang ila mga sabat: “Wala ako sang eksperyensya,” “Wala ako matudloan,” ukon “Wala ako sang talento.” Suno sa resulta, matuod ang tanan nila nga sabat; apang, ang pinakaimportante nga rason sang ila pagkapaslaw amo nga wala nila mabutang sa sentro sang patiyogan ang clay. Ang batan-on naghunahuna nga nasentro nila ang clay, apang sa panan-aw sang batid, ini indi husto nga ara sa tunga. Dayon siya nagsiling sa ila, “Tilawan ta liwat sang kaisa pa.”
Sining tion, si Elder Aoba nagbutang sang clay sa tamang sentro sang patiyogan kag ginpatiyog ini, naghimo sang buho sa tunga sang clay. Ang pila ka mga batan-on nagtilaw liwat. Sining tion ang tanan nagpalakpak sang sila nagsiling: “Wow, wala ini nagatay-ug,” “Sarang ko mahimo ini,” ukon “Nahimo ko!” Huo, ang porma indi perpekto, apang ang resulta lubos nga tuhay kay sa una nga pagtilaw. Ang rason sang ila kadalag-an amo nga ang clay perpekto nga nasentro sa patiyogan.
Ang kalibutan nga aton ginapuy-an pareho sang patiyogan sang manughimo sang kolon, kag ang pagtiyog sini nagadasig. Subong sang clay sa patiyogan, dapat kita mabutang sa sentro man. Ang aton pinakatunga, ang sentro sang aton mga kabuhi, dapat amo si JesuCristo kag ang Iya ebanghelyo. Ang mangabuhi sang Cristohanon nga kabuhi nagakahulogan nga tun-an naton ang parte kay JesuCristo kag ang Iya ebanghelyo kag dayon sundon ang Iya halimbawa kag mga sugo sang himpit.
Ang propetang si Isaiah nagsiling, “Apang karon, O Ginuo, ikaw ang amon Amay; kami ang clay, kag ikaw ang tagahimo namon; kag kami tanan buhat sang imo kamot.”1
Kon ang aton mga kabuhi nasentro kay JesuCristo, madinalag-on Niya kita nga maporma suno sa kon ano kita dapat mangin agud makabalik kita sa Iya kag sa atubang sang Langitnon nga Amay sa ginharian selestiyal. Ang kasadya nga mabatyagan naton sa sining kabuhi direkta nga kaangay sa kadakuon sang kon paano ka maayo ang aton mga kabuhi nasentro sa mga panudlo, halimbawa, kag nagapasag-uli nga sakripisyo ni JesuCristo.
Mga kautoran, nabun-ag ako sa kapin sa isa ka henerasyon nga pamilya sang Santos sa Ulihing Mga Adlaw, gani ang mga bugay kag kasadya nga ara ang ebanghelyo ni JesuCristo bilang basihan sang amon panimalay nga kultura kabahin sang amon matag-adlaw nga kabuhi. Sa misyon ko lamang natukiban ang daku kag maayo nga impluwensya sang kabug-osan sang ebanghelyo ni JesuCristo sa yadtong wala pa gid makaangkon nga makatilaw sang mga bugay sini sa ila mga kabuhi. Ining bersikulo sa Matthew nagapakita sang proseso kon ano ang nabatyagan sang katawhan nga nahaylo sa ebanghelyo ni JesuCristo: “Ang ginharian sang langit kasubong sang manggad nga nalubong sa isa ka talamnan, nga natukiban sang isa ka tawo kag gintabonan; kag sa iya kalipay siya naglakat kag ginbaligya ang tanan nga ginapanag-iyahan kag ginbakal inang talamnan.”2
Ipaambit ko ang isa ka halimbawa sa Libro ni Mormon nga nagapakita kon ano ang luyag ibayad sang isa ka nahaylo agud mabaton ang kasadya nga naghalin sa pagkatukib sang manggad nga ginhambal ni Jesus sa paanggid sang manggad nga nalubong sa talamnan.
Dumdoma sa libro ni Alma chapter 20, si Ammon kag si Lamoni nagbiyahe padulong sa siyudad sang Middoni agud pangitaon kag hilwayon ang utod ni Ammon nga si Aaron paggwa sa bilanggoan. Sa ila pagbiyahe nasugata nila ang amay ni Lamoni, nga amo ang hari sang Lamanite sa bug-os nga duta.
Ang hari akig kaayo sa iya anak nga si Lamoni kay siya kaupod ni Ammon, isa ka Nephite nga misyonero, nga ginkabig niya nga kaaway. Luyag niya kontani nga ang iya anak nagtambong sa dakung salosalo nga iya ginhimo para sa iya mga anak nga lalaki kag sa iya katawhan. Tuman kaakig ang hari sang Lamanite nga ginmandoan si Lamoni nga patyon si Ammon paagi sa iya espada. Sang wala magpati si Lamoni, ang hari nagbunot sang iya espada agud patyon ang iya anak bangud sa iya paglapas; apang, si Ammon nagpatunga kag nagluwas sa kabuhi ni Lamoni. Nalutos niya sang ulihi ang hari kag sarang niya patyon siya kontani.
Ini ang ginsiling sang hari kay Ammon pagkatapos nga nasapwan niya ang iya kaugalingon sa ital-ital nga sitwasyon sang kabuhi kag kamatayon: “Kon kalooyan mo ako itugot ko sa imo ang bisan ano nga imo pangayuon, bisan ang katunga sang ginharian.”3
Gani ang hari luyag magbayad sang presyo nga katunga sang iya ginharian agud maluwas ang iya kabuhi. Siguro ang hari nakibot sang si Ammon nagpangayo lamang nga hilwayon ang iya utod nga si Aaron kag ang mga kaupod, kag ang anak sang hari nga si Lamoni magahawid sang iya ginharian.
Sang ulihi, bangud sining hitabo, ang utod ni Ammon nga si Aaron ginhilway sa prisohan sang Middoni. Pagkatapos sini siya may inspirasyon nga magbiyahe sa kon diin ang hari sang Lamanite nagginahum sa duta. Si Aaron ginpakilala sa hari kag gintudloan niya siya parte sa mga prinsipyo sang ebanghelyo ni JesuCristo, kalakip ang dakung plano sang pagtubos. Ang mga panudlo ni Aaron naghatag sing madalom nga inspirasyon sa hari.
Ang sabat sang hari sa mga panudlo ni Aaron masapwan sa verse 15 sang Alma chapter 22: “Kag natabo ini, nga pagkatapos matalastas ni Aaron ining mga butang sa iya, ang hari nagsiling: Ano ang akon pagahimuon agud maangkon ko ining kabuhing walay katapusan nga imo ginahambal? Huo, ano ang akon pagahimuon agud ako mabun-ag sa Dios, nga ining malaut nga espiritu magabot gikan sa akon dughan, kag makabaton sang iya Espiritu, agud mapuno ako sang kalipay, agud ako indi pagsikwayon sa katapusan nga adlaw? Yari karon, siling niya, ihatag ko ang tanan nga ari sa akon, huo, talikdan ko ang akon ginharian, agud mabaton ko ining dakung kalipay.”
Makatilingala matuod, ang pagkatuhay sang pagsikway sang katunga sang ginharian agud maluwas ang iya kabuhi, karon ang hari sang Lamanite luyag magsikway sang bug-os nga kaharian agud makabaton sang kalipay nga nagahalin sa paghangop, pagbaton, kag pagtuman sa ebanghelyo ni JesuCristo.
Ang asawa ko, si Nancy, isa man ka nahaylo sa Simbahan. Ginhambal niya sa akon sang madamo nga beses sa mga tinuig ang kalipay nga nabatyagan niya sa iya kabuhi sugod sang nasapwan, nabaton, kag natuman ang ebanghelyo ni JesuCristo. Ang masunod isa ka pagpainoino halin kay Sister Maynes parte sa iya inagihan:
“Bilang dalaga nga ara sa edad solo sobra baynte, ara ako sa punto sang akon kabuhi nga nabal-an ko nga may kinahanglan ako bag-ohon agud mangin mas malipayon nga tawo. Nabatyagan ko nga daw nagalutaw ako nga wala sang tunay nga katuyoan kag direksyon, kag wala ko mabal-an kon diin makadto agud masapwan ini. Pirme ko nabal-an nga ang Langitnon nga Amay ara kag kon kaisa sa bug-os ko nga kabuhi ako nakapangamuyo, nakabatyag nga Siya nagpamati.
“Sang nagsugod ako sa pagsayasat, nagtambong ako sa pila ka mga tuhay nga simbahan apang dalayon nga nagabalik sa amo nga mga balatyagon kag kawalay paglaum. Bulahan gid ako kay ang akon pangamuyo para sa direksyon kag katuyoan sa kabuhi sang ulihi ginsabat, kag ang kabug-osan sang ebanghelyo ni JesuCristo nag-abot sa akon kabuhi. Sa unang higayon nabatyagan ko nga ako may katuyoan, kag ang plano sang kalipayan nagdala sang tunay nga kalipay sa akon kabuhi.”
Ang isa pa ka inagihan sa Libro ni Mormon maathag nga nagapakita kon paano ang pagpangabuhi sang Cristohanon nga kabuhi sarang magpuno sa aton sang dakung kalipay bisan nga kita ginalikupan sang tuman nga mga kabudlay.
Pagkatapos nga ang propetang si Lehi kag ang iya pamilya nagtaliwan halin sa Jerusalem sang 600 b.c.,sila nagpanglakaton sang halos walo ka tuig sa kamingawan tubtob sila nag-abot sa duta nga ila gintawag Bountiful, nga malapit sa baybayon. Si Nephi naglaragway sang ila kabuhi sang kabudlay sa kamingawan paagi sini: “Nag-antus kami sang madamo nga mga kapitpit-an kag tuman nga kabudlay, … bisan sa pagkadamo nga indi namon masulat ang tanan nga mga ini.”4
Samtang ara sa Bountiful, si Nephi gintugyanan sang responsibilidad nga maghimo sang isa ka barko nga magadala sa ila tabok sa dagat padulong sa dutang ginsaad. Pagkatapos nga sila nag-abot sa dutang ginsaad, daku nga mga pag-ilinaway ang nagpadayon sa tunga sang katawhan nga nagpasentro sang ila kabuhi kay Cristo kag sa di-tumuluo nga nagsunod sa mga halimbawa nanday Laman kag Lemuel. Sa katapusan, ang risgo sang pagkinagamo sa tunga sang duha ka grupo nangin tuman nga si Nephi kag ang yadtong nagsunod sa mga panudlo sang Ginuo nagbulag sang ila mga kaugalingon kag nagpalagyo sa kamingawan para sa ila kaluwasan. Sining tion, mga 30 anyos nga nagligad pagkatapos nga si Lehi kag ang iya pamilya naghalin sa Jerusalem, si Nephi nagasulat sang may madamo nga suporta kag daw sa wala ginalauman nga pulong, labi na gid nga pagkatapos nga masulat sa kasulatan ang madamo nga mga kapipit-an kag mga kabudlay nga ila gin-atubang sing madugay. Ini ang iya mga pulong: “Kag natabo ini nga kami [nagpuyo] suno sa paagi sang kalipayan.”5 Wala sapayan sa ila mga kabudlay, nakasarang sila nga mangabuhi sa paagi sang kalipayan bangud sila nasentro kay Cristo kag sa Iya ebanghelyo.
Mga kautoran, subong sang clay sa patiyogan sang manughimo sang kolon, ang aton mga kabuhi dapat masentro sang himpit kay Cristo kon kita luyag nga makasapo sang tunay nga kalipay kag paghidaet sa sining kabuhi. Ang mga halimbawa sang hari sang Lamanite; sang akon asawa nga si Nancy; kag sang katawhan sang Nephite, ang tanan nagasuporta sining matuod nga prinsipyo.
Nagapamatuod ako karon nga adlaw nga kita man makasapo sinang paghidaet, kalipayan, kag tunay nga kasadya kon pilion naton nga mangabuhi sang Cristohanon nga mga kabuhi, sa ngalan ni JesuCristo, amen.