Ang Maayo nga Pulong sang Dios

Ni Elder Francisco J. Viñas

Sang Kapitoan

Ang maayo nga pulong sang Dios nagapakita sa aton sang pagkinahanglan sang padayon nga paghinulsol sa aton mga kabuhi agud mapabilin naton ang impluwensya sang Balaan nga Espiritu.

Madamo sa aton nga nagatambong sa sining konperensya nagkari “sa pagpamati sa maayo nga pulong sang Dios, huo, ang pulong nga nagapaayo sa nasamaran nga kalag” (Jacob 2:8). Inang pulong ara sa mga kasulatan kag sa mga mensahi sang aton mga lider, nagadala sang paglaum kag kasulhay sa panahon sang kadulom sang kapipit-an.

Paagi sa aton inagihan sa kabuhi, nabal-an naton nga ang kasadya sa sining kalibutan indi lubos, apang sa kay JesuCristo ang aton kasadya lubos (lantawa D&C 101:36). Siya magahatag sa aton sang kabakod agud indi kita mag-antus sang mga kapipit-an luwas nga malutos ang mga ini sa Iya kalipay (lantawa Alma 31:38).

Masakit gid kaayo kon makit-an naton ang isa ka pinalangga nga nagaantus sang grabe nga balatian.

Ang pagtaliwan sang isa ka ginapalangga naton makahatag sang daku nga kasubo sa aton.

Kon ang pila sa aton mga anak nagsupak sa banas sang ebanghelyo, sarang naton basulon ang aton kaugalingon kag wala naton mabal-an ang padulongan nila sa walay katubtuban.

Ang paglaum nga makaangkon sang selestiyal nga pag-asawahay kag pagtukod sang pamilya sa sining kabuhi sarang nga magkubos samtang ang panahon nagalipas.

Ang pagmaltrato sang yadtong mga dapat kontani magpalangga sa aton sarang nga makahatag sang madalom nga mga pilas sa aton pagkatawo.

Ang pagluib sang isa ka tiayon makaguba sang relasyon nga ginalauman kontani naton nga mangin wala sang katapusan.

Ini kag iban pa nga mga kapipit-an sa sining kabuhi sang pagtilaw kon kaisa nagahimo sa aton nga magpamangkot subong sa pamangkot sang Propetang si Joseph Smith: “O Dios, diin ka na?” (D&C 121:1).

Sa mga mabudlay nga tion sang aton mga kabuhi, ang maayo nga pulong sang Dios nga nagapaayo sa nasamaran nga kalag nagadala sang masunod nga mensahi sang kasulhay sa aton tagipusuon kag hunahuna:

“Palinonga ang imo kaugalingon; ang pagtilaw kag mga kapipit-an mo malip-ut lamang;

“Kag kon antuson mo ini sing maayo, ang Dios magapakahimaya sa imo” (D&C 121:7–8).

Ang maayo nga pulong sang Dios nagahatag sa aton sang paglaum, bangud nabal-an naton nga yadtong mga himpit sa tion sang pag-antus magabaton sang mas daku nga padya sa ginharian sang langit kag “pagkatapos sang madamo nga pag-antus nagaabot ang mga bugay” (lantawa D&C 58:3–4).

Ang maayo nga pulong sang Dios, halin sa mga propeta, nagahatag sa aton sang kapat-oran nga ang walay katapusan nga paghugpong, ginsustener sang aton pagkahimpit sa diosnon nga mga promisa bangud sang aton maukod nga pag-alagad sa kawsa sang kamatuoran, magabugay sa aton kag sa aton kaliwatan (lantawa Orson F. Whitney, in Conference Report, Apr. 1929, 110).

Ini nagahatag man sa aton sang kapat-oran nga, pagkatapos sang himpit nga pagpangabuhi, wala sang bisan ano man nga bugay nga madula sa aton tungod wala naton mahimo ang pila ka mga butang kon kita wala gid sang oportunidad nga mahimo ang mga ini. Kon kita himpit tubtob sa aton kamatayon, kita “makaangkon sang tanan nga bugay, eksaltasyon, kag himaya sang bisan sin-o man nga tawo [nga may ara sang oportunidad] sa pag-angkon.” (Lantawa The Teachings of Lorenzo Snow, ed. Clyde J. Williams [1984], 138.)

Karon, importanteng mahangpan nga ang pila ka mga pag-antus kag kapipit-an sarang maagyan sang aton mga kabuhi kon kita wala maghinulsol sing matuod sang aton mga sala. Si Presidente Marion G. Romney nagtudlo: “Ang pag-antus kag kasakit nga gin-antus sang katawhan sa sining kalibutan bunga sang wala mahinulsolan kag mapatawad nga sala. … Subong nga ang pag-antus kag kasubo bunga sang sala, amo man ang kalipay kag kasadya bunga sang kapatawaran sang mga sala” (sa Conference Report, Apr. 1959, 11).

Ngaa nga ang di-paghinulsol nagatuga sang pag-antus kag kasakit?

Ang isa ka posible nga sabat amo nga “isa ka silot [ang] gin-angot, kag isa ka matarong nga layi ang ginhatag, nga nagdala [sang] pagbasol sang konsiyensya” (Alma 42:18; lantawa man verse 16). Ang Propetang si Joseph Smith nagtudlo nga kita ang nagakondenar sa aton mga kaugalingon kag ang pagpaantus sang kapaslawan sa aton hunahuna amo ang nagahimo sini subong ka mainit sang nagadabdab nga linaw sang kalayo kag asupre (lantawa Teachings of Presidents of the Church: Joseph Smith [2007], 224).

Kon kita magtinguha sa pagpalinong sang aton konsiyensya paagi sa pagtinguha nga “magpasensya sang aton [mga kaugalingon] sa pinakadiutay nga rason bangud sang [aton] mga sala” (Alma 42:30) ukon paagi sa pagtinguha sa pagtago sang mga ini, isa lamang ka butang ang aton matuman, ang pagpalayas sang Balaan nga Espiritu (lantawa D&C 121:37) kag pagpadugay sang aton paghinulsol. Ining sahi sang kasulhay, wala sapayan nga agi lamang, sa ulihi magadala sang dugang nga kasakit kag kalisud sa aton mga kabuhi kag magapakubos sang posibilidad nga mapatawad ang aton mga sala.

Sa sining sahi sang pag-antus, ang maayo nga pulong sang Dios nagahatag man sang kasulhay kag paglaum; ini nagasiling sa aton nga may ara sang bulong sa kasakit nga naghalin sa mga bunga sang kasal-anan. Ining bulong ara sa nagapasag-uli nga halad ni JesuCristo kag naga-epekto kon kita magtuo sa Iya, maghinulsol, kag magtuman sa mga sugo Niya.

Importante nga mabal-an naton nga subong sang kapatawaran sang mga sala, ang paghinulsol isa ka proseso kag indi isa ka butang nga nagakatabo sa isa ka pinasahi nga higayon. Nagakinahanglan ini sang pagkalig-on sa kada bahin sini.

Halimbawa, kon kita nagaambit sang sacramento, ginapakita naton sa Ginuo nga kita dalayon nga magdumdom sa Iya kag magtuman sang mga sugo Niya. Ina pagpakita sang aton sinsero nga tuyo.

Sa tion nga nagasugod kita sa pagdumdom sa Iya kag magtuman sang mga sugo Niya sa matag-adlaw—kag indi lamang sa Adlaw nga Inugpahuway —amo kon san-o ang kapatawaran sang aton mga sala inanay nga naga-epekto kag ang promisa Niya nga maangkon naton ang Iya Espiritu upod sa aton nagasugod nga matuman.

Kon wala sang husto nga pagtuman nga dapat mag-upod sa aton tuyo, ang epekto sang pagpatawad madali nga madula kag ang pag-upod sang Espiritu magasugod sa pagpalayo. Kita nagarisgo sa pagpadungog sa Iya paagi sa aton mga bibig samtang ginapalayo naton ang aton mga tagipusuon halin sa Iya (lantawa 2 Nephi 27:25).

Dugang sa pagpasulhay sa aton, ang maayo nga pulong sang Dios nagapaandam sa aton nga ining proseso sang pagbaton sang kapatawaran sang aton mga sala mauntat kon kita mabuyo “sa mga huyog sang kalibutan,” kag ini magpadayon liwat paagi sa pagtuo kon kita sinsero nga maghinulsol kag magpakubos sang aton mga kaugalingon (lantawa D&C 20:5–6).

Ano ang pila ka mga huyog nga sarang makapauntat sa proseso sang pagbaton sang kapatawaran sang aton mga sala nga may kahilabtanan sa pagtuman sa Adlaw nga Inugpahuway?

Ang pila ka mga halimbawa nagalakip sang pag-abot sa sacrament meeting nga ulihi nga wala sang husto nga rason; pagtambong nga wala sang pag-usisa sang aton mga kaugalingon, pag-ambit sang tinapay kag tubig nga indi takos (lantawa 1 Corinthians 11:28); kag pagtambong nga wala anay magkonpesar sang aton mga sala kag magpangayo sang pagpatawad sa Dios.

Iban pa nga mga halimbawa: ang di-pagkamaligdong paagi sa pagpadala kag pagbaton sang mga mensahi sa aton mga gamit elektroniko, paglakat pagkatapos nga magkaon sang sacramento, kag pagbuhat sang mga buluhaton sa aton mga puluy-an nga indi nagakaangay para sa sinang sagradong adlaw.

Ano ang isa sa mga rason kon ngaa kita, bisan nakabalo sining mga butang, masami mapaslawan sa paghimo sa Adlaw nga Inugpahuway nga balaan?

Sa libro ni Isaiah, ara ang sabat, bisan nga may kaangtanan sa Adlaw sang Pagpahuway, nagakadapat man sa iban nga mga sugo nga dapat naton tumanon: “Ipahilayo ang imo tiil sa Adlaw nga Inugpahuway, sa indi paghimo sang imo luyag sa balaan ko nga adlaw” (Isaiah 58:13).

Ang importante nga mga tinaga amo “pagsikway...sa pagbuhat sang imo naluyagan,” ukon sa iban nga pulong, pagbuhat sang pagbuot sang Dios. Masami, ang pagbuot naton—ginporma sang aton mga handom, gana, kag balatyagon sang kinaandan nga tawo—batok sa pagbuot sang Dios. Ang propetang si Brigham Young nagtudlo nga “kon ang pagbuot, mga balatyagon, kag mga ginabatyag sang isa ka tawo lubos nga nagapaidalom sa Dios kag sa mga ginapangayo niya, ina nga tawo ginpakabalaan.—Ini amo nga kon ang pagbuot ko gindumalahan sang pagbuot sang Dios, ina magatuytoy sa akon padulong sa tanan nga kaayo, kag sa ulihi magakorona sa akon sang imortalidad kag mga kabuhing walay katapusan” (Deseret News, Sept. 7, 1854, 1).

Ang maayong pulong sang Dios nagadapit sa aton nga maggamit sang gahum sang Pagpasag-uli agud ipadapat sa aton mga kaugalingon kag mangin isa sa Iya pagbuot—kag indi sa pagbuot sang yawa kag sang lawas—agud nga kita, paagi sa Iya grasya, sarang nga maluwas (lantawa 2 Nephi 10:24–25).

Ang maayong pulong sang Dios nga ginapaambit naton karon nga adlaw nagapakita sa aton sang pagkinahanglan sang padayon nga paghinulsol sa aton mga kabuhi agud nga mapabilin naton ang impluwensya sang Balaan nga Espiritu tubtob nga ini posible.

Ang pag-angkon sa pag-upod sang Espiritu magahimo sa aton nga mas maayo nga katawhan. Ini “magahutik sang paghidaet kag kasadya sa [aton] mga kalag, … ini magakuha sang malisya, kaugot, kahisa, pag-inaway, kag tanan nga malaut halin sa [aton] mga tagipusuon; kag ang [aton] bilog nga handom amo ang maghimo sang maayo, magbunga sang matarong, kag magtukod sa ginharian sang Dios” (lantawa Teachings: Joseph Smith, 98).

Upod ang impluwensya sang Balaan nga Espiritu, indi kita masaklaw, ukon makapalain sa buot sang iban; mas mangin malipayon kita, kag ang aton mga hunahuna mangin mas maputli. Ang pagpalangga naton sa iban magadugang. Mas mangin luyag naton ang magpatawad kag magpaambit sang kalipayan sa mga kasilingan naton.

Nagapasalamat kita sa pag-uswag sang iban, kag makit-an naton ang kaayo sang iban nga tawo.

Pangamuyo ko nga mabatyagan naton ang kasadya nga nagahalin sa pagtinguha sa pagpangabuhi sing matarong kag kabay nga mapabilin naton ang pag-upod sang Balaan nga Espiritu sa aton mga kabuhi paagi sa sinsero kag nagapadayon nga paghinulsol. Mangin mas maayo kita nga katawhan, kag ang aton mga pamilya pagabugayan. Sa sining mga prinsipyo ako nagapamatuod sa sagradong ngalan ni JesuCristo, amen.