Magdangop sa Iya kag Ang Mga Sabat Magaabot

Ni Elder James B. Martino

Sang Kapitoan

Mangin masinulundon, dumdoma ang mga tion sa nagligad sang nabatyagan ninyo ang Balaan nga Espiritu, kag magpangayo nga may pagtuo. Ang sabat para sa inyo magaabot.

Sang ako batan-on, ang mga ginikanan ko nagbuylog sa Ang Simbahan ni JesuCristo sang Mga Santos sa Ulihing Mga Adlaw. Nabal-an namon nga sila ginatudloan sang mga misyonero, apang kami indi kaupod.

Pagkatapos sining wala ginapaabot nga anunsyo, ang mga utod ko nga lalaki kag ako nagsugod man sa pagpamati sa mga misyonero, kag sila nagbaton nga malipayon sa mensahi sang Pagpanumbalik. Bisan nga ako interesado, wala ako sing luyag nga magbag-o. Apang ginbaton ko ang panghangkat nga magpangamuyo kon ang Libro ni Mormon matuod nga pulong sang Dios. Wala ako makabaton sang sabat.

Basi magpamangkot kamo kon ngaa wala pagsabta sang Langitnon nga Amay ang akon pangamuyo; ako nagpamangkot man. Sang ulihi nabal-an ko nga ang promisa ni Moroni husto gid. Ang Dios nagasabat sang aton mga pangamuyo kon kita may “isa ka bunayag nga tagipusuon,” kag “may matuod nga tinutuyo.”¹ Wala Siya nagasabat bangud lang sang aton kuryosidad.

Basi may ara kamo nga pamangkot parte sa isa ka bagay sa inyo kabuhi. Basi may problema kamo nga wala ninyo mabal-an ang sabat. Karon nga adlaw luyag ko magpaambit sang pila ka mga panghunahuna nga makabulig sa inyo sa pag-angkon sang mga sabat ukon bulig nga inyo ginapangita. Ang proseso nagasugod sa pagkahaylo sa ebanghelyo ni JesuCristo.

Ang Pagbaton sang Bugna Nagasalig sa Kondisyon kag Tinutuyo sang Aton Mga Tagipusuon

Nahunahunaan ko ang mga istorya sang pila ka mga tawo sa mga kasulatan. Halimbawa, sanday Laman kag Lemuel. Subong kay Nephi, sila “nabun-ag sa maayo nga mga ginikanan” kag natudloan “sa tanan nga tinun-an sang [ila] amay.”² Apang sila nagkulomuron bangud ang ila amay mapalanan-awon nga tawo. Sa ila panan-aw, ang iya mga desisyon puro sayup, kay wala nila mabal-an ang mga butang sang Dios, kag busa sila wala nagapati.³

Makawiwiling notahan nga ang ila mga pagpili nagtugot sa ila sa pag-angkon sang makatukod sing pagtuo nga mga inagihan. Ginbiyaan nila ang ila puluy-an kag mga manggad. Sila nag-antus agi sa mga pagpanglakaton sa kamingawan. Sila, sang ulihi, nagbulig sa pagpasad sang barko, kag nagsugot sa pagbiyahe padulong sa duta nga wala nila mabal-an.

Si Nephi nag-agi man sa amo nga mga inagihan. Apang ini bala nga mga buhat nagtukod sa ila pagtuo? Ang pagtuo ni Nephi ginpabakod, apang sanday Laman kag Lemuel nangin mas kritiko kag maakigon. Ining mag-utod nakabati kag nakakita pa gani sang isa ka anghel, apang sa walay palad, nagpadayon sa pagduda.⁴

Ining kabuhi mabudlay sa aton tanan. Ari kita diri agud tilawan kag pamatud-an. Ang aton pag-atubang sa mga inagihan sang kabuhi masami daku nga makaimpluwensya sa aton mga pagpamatuod. Binagbinaga ang pila ka mga reaksyon nanday Laman kag Lemuel: Sila nagkulomuron sang ang ila amay nagpangabay sa ila nga maghimo sang mabudlay nga mga butang.⁵ Sila nagtinguha sa pagkuha sang mga lamina nga saway, kag sang nalugaw-an, sila nag-untat. Ang panindugan nila amo “Gintinguhaan namon; ano pa ang saran namon mahimo?”⁶

May ara gani sang tion nga sila nagkasubo bangud sang sayup nga ila nahimo kag nagpangayo sing pagpatawad.⁷ Nagpangamuyo sila kag sila ginpatawad. Apang ang mga kasulatan nagsiling nga sang ulihi sila nagbalik sa pagkulomuron kag indi na luyag magpangamuyo. Nagkadto sila kay Nephi kag nagsiling nga indi nila “mahangpan ang mga pulong sang [ila] amay [nga] ginhambal.”⁸ Si Nephi nagpamangkot sa ila kon sila bala “nagpamangkot sa Ginuo.”⁹ Talupangda ang ila sabat: “Wala; kay ang Ginuo wala nagapahibalo sang amo sina nga butang sa amon.”¹⁰

Ang Nagapadayon nga Pagkamatinumanon Nagatugot sa Aton sa Pagbaton sang Mga Sabat

Ang sabat ni Nephi sa iya mga utod amo ang isa ka yabi para sa aton agud makabaton sang padayon nga mga sabat sa aton pangamuyo:

“Ngaa man nga wala kamo nagatuman sang mga sugo sang Ginuo? Ngaa man nga kamo madula, bangud sang katig-a sang inyo mga tagipusuon?

“Wala bala ninyo madumdomi ang mga butang nga ginsiling sang Ginuo?—Kon indi ninyo pagpatig-ahon ang inyo mga tagipusuon, kag mamangkot sa akon sa pagtuo, nagapati nga kamo magabaton, upod ang kaukod sa pagtuman sang akon mga sugo, pat-od nga ining mga butang [iga] pahibalo sa inyo.”¹¹

Nabal-an ko ang pila ka mga RMs nga may di-mahimutig nga espirituhanon nga mga inagihan, apang ang kakulangan sang pila ka mga espirituhanon nga mga pagginawi daw sa amo ang gintunaan sang ila pagkalimot sang mga tion nga ang Dios naghambal sa ila. Sa yadtong mga RMs kag sa aton tanan, kon kamo “nakabatyag sang huyog sa pag-amba sang kanta sang nagatubos nga gugma, mamangkot ako, mabatyagan bala ninyo karon?”¹² Kon wala ninyo mabatyagan ini karon, sarang ninyo mabatyagan ini liwat, apang tun-i ang laygay ni Nephi. Mangin matinumanon, dumdoma ang mga tion sa nagligad sang nabatyagan ninyo ang Balaan nga Espiritu, kag magpangayo nga may pagtuo. Ang sabat para sa inyo magaabot, kag mabatyagan ninyo ang pagpalangga kag paghidaet sang Manluluwas. Ini basi indi mag-abot sa gilayon ukon sa sahi nga luyag ninyo, apang ang sabat magaabot. Indi mag-untat! Indi gid mag-untat!

Ipaanggid naton sanday Laman kag Lemuel sa mga anak nga lalaki ni Mosiah. Angay ang grupo sang mga lalaki nga nagdaku sa matarong nga mga pamilya, apang angay nga nagtalang. Angay sila nga gintawag agud maghinulsol sang isa ka anghel, apang ano ang pagkatuhay sang inagihan sang mga anak ni Mosiah?

Ang Mga Pagtilaw Magatukod sang Pagtuo

Ang ila pangmisyonero nga kadalag-an di-malimtan. Linibo ang nahaylo sa mga gawi sang Ginuo. Apang, masami naton malimtan nga sang sila nagsugod sang ila mga misyon, ang ila “mga tagipusuon nagbatyag sang kawalay paglaum, kag [sila] naghana nga magbalik, [apang] ang Ginuo nagpasulhay sa [ila].” Sila ginlaygayan sang Ginuo nga “magbatas nga may pagpaumod sang [ila] mga kapipit-an.”¹³

Ang Pagtuon sang Mga Kasulatan Nagapahibalo sa Aton sang Pagbuot sang Dios

Ngaa ang mga pagtilaw sang mga anak ni Mosiah nagpabakod sang ila pagtuo kag panaad sa luyo nga ini maghimo sa ila nga magkulomuron ukon magduda? Ang sabat amo nga “nagbakod sila sa ihibalo sang kamatuoran; kay mga lalaki sila sang isa ka himpit nga paghangop kag nakasayasat sing maukod sang balaan nga mga kasulatan, agud mabal-an nila ang pulong sang Dios.”¹⁴ Kita tanan magaatubang sa mga pagtilaw kag mga pamangkot, apang dumdomon naton nga kita dapat “padayon nga nagahawid sing hugot sa barandilya nga salsalon.”¹⁵ “Ang mga pulong ni Cristo magahambal sa [aton] sang tanan nga mga butang nga [aton] dapat buhaton.”¹⁶ Dapat naton buhaton ang pagtuon sang kasulatan nga matag-adlaw nga bahin sang aton mga kabuhi, kay ini magabukas sang mga ganhaan sang bugna.

Ang Pangamuyo, Upod sa Pagpuasa, Nagadapit{nb sa Bugna

Sa mga anak ni Mosiah, “indi lamang ini; ginbuhos nila ang ila mga kaugalingon sa tuman nga pagpangamuyo, kag pagpuasa; gani nakaangkon sila sang espiritu sang panagna, kag sang espiritu sang bugna.”¹⁷ Ang pangamuyo kag pagpuasa nagatugot sa aton nga mangin mahapos magbaton sang espirituhanon nga mga pagpabatyag. Ang magpakig-ugyon sa aton Langitnon nga Amay samtang nagapuasa nga may katuyoan nagatugot sa aton nga “magpalos sang mga gapos sang kalautan [kag] magpamag-an sang mabug-at nga mga palas-anon.”¹⁸ Ang pangamuyo, upod ang pagpuasa, magahatag agud nga kon kita “magtawag, … ang Ginuo magasabat; … [kag kon kita] magsinggit, … magasiling siya, Ari ako.”¹⁹

Magdangop sa Iya

Ining mga personal relihiyosong pagginawi—pagkamatinumanon, pagtuon sang kasulatan, pangamuyo, kag pagpuasa—nagpabakod sa mga anak ni Mosiah. Ang pagkulang sining personal relihiyosong pagginawi amo ang dakung rason nga si Laman kag Lemuel nabilin nga mahuyang sa pagsulay nga magkulomuron kag magduda.

Kon kamo ginasulay nga magkulomuron, kon kamo may pagduda nga nagapadulong sa di-pagpati, kon ang mga pagtilaw daw sa kapin sangsa inyo maantus, magdangop sa Iya. Madumdoman bala ninyo sang Siya “naghambal sang paghidaet sa inyo hunahuna … ? Ano pa ang mas daku nga saksi ang sarang ninyo maangkon nga nagahalin sa Dios?”²⁰ Pangkota ang inyo kaugalingon, “Mas Cristohanon bala ako karon sangsa una?” Palihog, magdangop sa Iya.

Mabalik ako sa akon personal nga istorya. Sang ulihi ako nangin sinsero. Madumdoman ko sang ang misyonero nga nagatudlo sa akon nagpamangkot kon ako handa nga mabunyagan. Ako nagsabat nga may mga pamangkot pa ako. Ining maalam nga misyonero nagsiling sa akon nga masabat niya ang mga ini, apang sabton ko anay ang iya pamangkot. Ginpamangkot niya ako kon ang Libro ni Mormon matuod kag kon si Joseph Smith isa ka propeta. Ginhambalan ko siya nga wala ako makabalo, apang luyag ko nga mabal-an.

Ang akon mga pamangkot nagpadulong sa nagdugang nga pagtuo. Para sa akon, ang sabat wala nag-abot bilang isa ka hitabo apang is ka proseso. Namutikan ko nga sa akon “pag-eksperimento [sa] mga pulong” kag nagsugod sa “paggamit sang isa ka tipik sang pagtuo,” ang Libro ni Mormon nangin “manamit sa akon” kag ini “nagpasanag sang akon paghangop” kag matuod nga “nagpadaku sang akon kalag.” Sang ulihi nabatyagan ko inang ginlaragway sa mga kasulatan bilang isa ka pag-init sa sulod sang inyo dughan.²¹ Ini amo ang punto nga ako naghandom nga mabunyagan kag magpanaad sang akon kabuhi para kay JesuCristo.

Matuod ko nga nabal-an nga ang Libro ni Mormon tunay nga pulong sang Dios. Nabal-an ko nga si Joseph Smith isa ka propeta. Oh, may mga butang pa sa gihapon nga di ko mahangpan, apang ang akon pagpamatuod sa kamatuoran nagapahilapit sa akon sa Manluluwas kag nagatukod sang akon pagtuo.

Mga kautoran, dumdoma si Nephi kag ang mga anak ni Mosiah, nga may mga espirituhanon nga mga inagihan kag dayon nagbuhat sa pagtuo agud ang mga sabat mag-abot kag ang ila pagkamatinuohon naglambo. Ipaanggid ini kanday Laman kag Lemuel, nga nagduda kag nagkulomuron. Bisan nga sila kon kaisa nagbuhat sa maayo nga mga paagi, ang buhat nga wala sing pagtuo wala sing pulos. Dapat kita may pagtuo upod ang mga binuhatan agud makabaton sang sabat.

Ginalauman ko nga samtang kamo nagpamati kaina sang aga ang Espiritu nagpatalupangod sa inyo mga hunahuna kag mga tagipusuon sang bagay nga inyo sarang mahimo agud masabat ang inyo mga pamangkot ukon makasapo kamo sang may inspirasyon nga solusyon sa problema nga ginaatubang ninyo. Nagahatag ako sang maligdong nga saksi nga si Jesus amo ang Cristo. Magdangop sa Iya kag ang inyo mga pangamuyo pagasabton. Sa ngalan ni JesuCristo, amen.