Wala Kamo Nagaisahanon sa Buluhaton
Ni President Henry B. Eyring
Unang Manuglaygay sa Unang Pangulohan
Samtang kamo nagasaylo halin sa isa ka pag-alagad padulong sa isa, makit-an ninyo ang Ginuo nga kaupod ninyo sa buluhaton.
Pinalangga kong mga kautoran, ginapasalamatan naton nga ang Ginuo nagtawag kanday Elder Ronald A. Rasband, Elder Gary E. Stevenson, kag Elder Dale G. Renlund bilang mga Apostoles sang Ginuong JesuCristo. Ang aton mga tagipusuon, mga pangamuyo, kag ang aton pagtuo nagasakdag sa ila.
Nabal-an namon ang ila dakung ikasarang. Apang, sila nagakinahanglan sang pagpasalig sa ila mga palangakuan, subong naton tanan, nga ang Ginuo kaupod nila sa Iya buluhaton. Ang pinakabag-o nga deacon nagakinahanglan sinang kumpiyansa, subong man sang pinakabatid nga high priest nga nakabaton sang bag-o nga pagtawag.
Inang kumpiyansa nagalambo samtang kamo makahangop nga kamo gintawag Niya paagi sa Iya mga alagad. Ang akon pagpadasig amo ang magbulig sa inyo nga makabalo nga kon buhaton ninyo ang inyo bahin, ang Ginuo nagadugang sang Iya gahum sa inyo mga pagtinguha.
Bisan ano nga palangakuan nga aton nabaton sa ginharian sang Ginuo nagakinahanglan sang mas kapin sa aton tawhanon nga paghusga kag kaugalingon nga mga ikasarang. Yadtong mga pagtawag nagakinahanglan sang bulig sa Ginuo, nga magaabot. Bisan ang bag-o nga deacon makatuon nga ina matuod, kag siya magapadayon sa pagtuon sa maabot nga mga tinuig.
Isa sa akon mga apo ari diri karon nga gab-i sa pagtambong sa iya unang sesyon sa priesthood. Siya gin-ordinan anum ka adlaw nga nagligad. Ginalauman niya nga ang una niya nga paghimo sang katungdanan sa priesthood amo ang magpasa sang sacramento sa masunod nga Domingo. Ang pangamuyo ko amo nga makit-an niya inang higayon kon ano gid ini.
Basi isipon niya nga ang buluhaton niya para sa Ginuo amo ang magpasa sang sacrament tray sa katawhan nga nagalingkod sa sacrament meeting. Apang ang katuyoan sang Ginuo indi lamang nga ang katawhan mag-ambit sang tinapay kag tubig. Ini amo nga sila magtuman sang kasugtanan nga makapadulong sa ila sa banas sang kabuhing walay katapusan. Kag agud ina matabo, ang Ginuo dapat maghatag sang espirituhanon nga inagihan sa tawo nga ginhatagan sang deacon sang sacramento.
Nakita ko ina sang kaisa sa balay sang mga tigulang sang and deacon nagdaho sang tray sa ubanon nga babayi. Ginlantaw niya ang tinapay nga daw ini bilidhon. Wala ko gid malimtan ang iya yuhum samtang siya nagkaon kag nagtandog sa ulo sang deacon, matunog nga naghambal, “Oh, salamat gid!”
Inang deacon yano nga nagbuhat sang iya katungdanan sa priesthood. Apang, ang Ginuo dayon nga nagpamuad sa buhat sang deacon. Makit-an sadto nga ang sister nakadumdom sa Manluluwas samtang siya sinsero nga nagapasalamat sa pag-alagad sang deacon. Siya ginpasalig liwat, samtang ang deacon naghatag sang sacramento sa iya, nga ang Espiritu mangin kaupod niya. Wala siya nagaisahanon sinang adlaw sa balay sang mga tigulang. Amo man nga ang deacon wala nagaisahanon sa iya diutay nga pag-alagad.
Ang isa ka batan-on nga teacher sa Aaronic Priesthood basi indi makabatyag, samtang siya nagalakat sa pagtudlo sang isa ka pamilya, nga siya kaupod sang Ginuo sa Iya buluhaton. Madumdoman ko pa gihapon ang yano nga pagpamatuod sang batan-on nga kaupod sa hometeaching nga nagbisita sa amon balay. Ang Espiritu nagkumpirma sa iya mga pulong sa akon kag sa akon pamilya. Nalipatan na niya siguro atong adlaw, apang madumdoman ko.
Ang Ginuo magapadaku liwat sa mga pagtinguha sang isa ka batan-on nga lalaki kon siya pagatawgon nga mangin isa ka priest. Ang unang bunyag nga buhaton niya, halimbawa, basi iya sang batan-on nga tawo nga di niya kilala. Sarang siya magkabalaka nga siya magsayup sa paghambal sang mga tinaga kag sa paghimo sang ordinansa nga husto.
Apang ang Ginuo, nga iya Agalon, magapadaku sang iya palangakuan. Ang tawo nga iya bunyagan nagpili nga magpadulong sa banas sang kabuhing walay katapusan. Ang Ginuo magabuhat sang Iya mas daku nga bahin. Ginhimo Niya ini sa akon sang kaisa sang ang batang lalaki nga akon ginbunyagan, may luha sa iya guya, naghutik sa akon, “Matinlo ako. Matinlo ako.”
Samtang kamo nagasaylo halin sa isa ka pag-alagad sa priesthood padulong sa isa, makit-an ninyo ang Ginuo sa buluhaton nga kaupod ninyo. Natun-an ko ini sang makilala ko ang isa ka elders quorum president sa isa ka stake conference tinuig nga nagligad. Sa konperensya may ara sang kapin sa 40 nga ngalan sang mga lalaki nga ginpresentar agud magbaton sang Melchizedek Priesthood.
Ang stake president naghutik sa akon, “Yadtong kalalakin-an mga di-tuman ka aktibong mga prospective elder.” Sa pagkatingala, nagpamangkot ako sa presidente kon ano ang iya programa sa pagluwas sining mga lalaki.
Gintudlo niya ang batan-on nga lalaki sa nalikod nga bahin sang chapel. Siling niya, “Ato siya. Ang kalabanan sining mga lalaki nagbalik bangud sinang elders quorum president.” Ato siya sa likod, simple ang pamisti, ang mga paa nakauntay kag ang mga napug-is nga mga bota nagtangdayanay sa iya atubang.
Ginhambalan ko ang stake president nga ipakilala ako sa iya pagkatapos sang miting. Sang kami nagkilalahay, ginhambalan ko ang batan-on nga lalaki nga nakibot gid ako sa iya nabuhat kag nagpamangkot kon paano niya ginhimo ini. Ginpakinhol niya ang iya mga abaga. Wala siya magkabig nga siya may ginhimo nga maayo agud dayawon.
Dayon nagsiling siya sang mahinay, “Kilala ko ang tanan nga di-aktibong mga tawo sa sining banwa. Kalabanan sa ila may mga pickup nga trak. May trak man ako. Nagahugas ako sang akon pickup kon diin sila nagapahugas sang ila. Sa kadugayan, nangin mga abyan ko sila.
“Dayon ako nagahulat tubtob sila may problema. Permi ini nagakatabo. Ginasugiran nila ako parte sini. Nagapamati ako kag wala ako nagapangita sang sayup. Dayon, kon sila magsiling, ‘May ara nga sayup sa akon kabuhi. Pat-od nga may ara sang mas maayo sangsa sini,’ Ginahambalan ko sila ko ano ang kulang kag kon diin nila masapwan ini. Kon kaisa sila nagapati sa akon, kag kon amo, ginaupod ko sila.”
Makit-an ninyo kon ngaa siya may pagpakubos. Ini bangud nabal-an niya nga siya nakahimo sang iya bahin nga diutay kag ang Ginuo naghimo sang nabilin. Ang Ginuo amo ang nagtandog sang mga tagipusuon sang yadtong mga lalaki nga may mga problema. Ang Ginuo ang nagpabatyag sa ila nga may ara sang mas maayo nga butang para sa ila kag may paglaum nga masapwan nila ini.
Ang batan-on nga lalaki, nga—kasubong ninyo—isa ka alagad sang Ginuo, yano nga nagpati nga kon himuon niya ang iya diutay nga bahin, ang Ginuo magabulig sa yadtong mga lalaki sa banas sang pagpauli kag sa kalipayan nga ang Ginuo lamang ang makahatag sa ila. Ining lalaki nakabalo man nga siya gintawag sang Ginuo bilang elders quorum president bangud himuon niya ang iya bahin.
May mga panahon sa inyo pag-alagad nga kamo wala sang halangdon kag makit-an nga kadalag-an subong sa iya sinang batan-on nga elders quorum president. Ina amo ang tion nga kinahanglan ninyo ang kumpiyansa nga ang Ginuo, nagtawag sa inyo paagi sa Iya mga alagad nga may awtoridad. Ang pag-angkon sang pagtuo sa pagtawag sang mga alagad sang Ginuo importante sa misyonero nga pagpangalagad sang akon lolo sa tuhod nga si Henry Eyring.
Ginbunyagan siya sang Marso 11, 1855, sa St. Louis, Missouri. Si Erastus Snow nag-ordin sa iya sa palangakuan sang isa ka priest wala madugay pagkatapos sina. Ang presidente sang St. Louis Stake, si John H. Hart, nagtawag sa iya agud mag-alagad sa isa ka misyon sa Cherokee Nation sang Octubre 6.1 Gin-ordinan siya nga elder sang Octubre 11. Nagsakay siya sa kabayo agud magkadto sa Cherokee Mission sang Octubre 24. Siya 20 anyos kag nahaylo lamang sa pito ka bulan.
Kon may nagaangkon sang priesthood nga may rason agud magbatyag nga siya di-handa, ini amo si Henry Eyring. Ang rason lamang nga siya may kaisog nga maglakat amo nga nabal-an niya sa iya tagipusuon nga ang Dios nagtawag sa iya paagi sa Iya mga alagad nga may awtoridad. Nagpaisog ini sa iya. Ina ang dapat nga kuluhaan sang aton kaisog nga magpadayon, kon ano man ang aton mga palangakuan sa priesthood.
Pagkatapos nga si Elder Eyring nag-alagad sa mabudlay nga tatlo ka tuig kag sa pagtaliwan sang presidente sang mission, si Henry ginnominar kag ginsakdag bilang presidente sang mission sa isa ka miting nga ginhiwat sang Octubre 6, 1858. Nakibot siya kag daw indi makapati subong sang isa ka deacon. Nagsulat siya, “Wala ko gid ginpaabot nga matawag sa sinang responsable nga palangakuan apang ini pagbuot sang brethren kag malipayon nga ginbaton ko ini, nakabatyag sa amo man nga tion sang akon dakung kahuyangan kag kakulangan sang inagihan.”2
Ang karon nga si Presidente Eyring nagbiyahe sa Cherokee, Creek, kag Choctaw Nations sang 1859. Paagi sa iya mga pagtinguha, ang Ginuo “nagdugang,” subong sa ginsulat ni Henry, “sang isa ka kadam-an sa simbahan.” Nag-organisar siya sang duha ka branch apang nagtalupangod nga “diutay lamang ang buhi sa kawsa.”3
Sang masunod nga tuig, si Henry nag-atubang sa mabudlay nga kamatuoran nga ang mga lider sang gobyerno sa tunga sang katawhan nga iya ginaalagaran indi na magtugot sa LDS nga mga misyonero nga magpadayon sa ila buluhaton. Samtang ginbinagbinag niya kon ano ang dapat niya buhaton, nadumdoman niya ang instruksyon sang nagligad nga mission president nga nagpabalo sa iya nga dapat niya palawigon ang iya misyon tubtob sa 1859.4
Sang Octubre sinang tuig, si Henry nagsulat kay President Brigham Young para sa direksyon, apang wala siya makabaton sang sabat sa iya pamangkot. Si Henry nagsulat, “Tungod kay wala ako sang nabatian halin sa Pangulohan sang Simbahan, nagpangamuyo ako sa Ginuo, nagpangayo nga ibugna Niya sa akon ang Iya hunahuna kag pagbuot parte sa akon pagpalawig sang tion ukon pagkadto sa Zion.”
Siya nagpadayon: “Ang masunod nga damgo ginhatag sa akon bilang sabat sa akon pangamuyo. Nagdamgo ako nga ako nag-abot sa [Salt Lake] City kag gilayon nagkadto sa opisina ni [President Brigham] Young, kon diin nakita ko siya. Siling ko sa iya: ‘[President] Young nagtaliwan ako sa akon misyon, nagkari sa akon pagbuot, apang kon ini sayup, handa ako sa pagbalik kag magtapos sa akon misyon.’ [Sa damgo ang propeta] nagsabat: ‘Madugay ka na didto, ok lang.’”
Si Henry nagsulat sa iya journal, “Kay may mga damgo ako nga natuman sang husto sang una ako may pagtuo sa pagpati, nga ini matabo man kag nagsugod ako sa gilayon nga maghanda sa pagbiyahe.”
Nag-abot siya sa Salt Lake City sang Agosto 29, 1860, nagpanglakaton kalabanan sa iya pagbiyahe. Pagkaligad sang duha adlaw, nagkadto siya sa opisina ni Presidente Brigham Young.5
Ginlaragway ni Henry ang natabo: “[Ako] nagtawag kay [President] Young, nga nagbaton sa [akon] sing labing maayo. Siling ko sa iya, ‘[President] Young nagkari ako nga wala pagsugoa, kon ako nakahimo sang sayup, handa ako sa pagbalik kag magtapos sang akon misyon.’ Si [Brigham Young] nagsabat: ‘Ok lang, ginapangita ka namon.”
Si Henry nagsulat sang iya kalipay, nagasiling, “Nian ang akon damgo natabo gid sang husto.”6
Ang kalipay niya naghalin sa kumpirmasyon nga ang Ginuo upod nga nagabuhat kag nagabantay sa iya. Natun-an niya ang matuod sa aton tanan—nga ang mga alagad sang Ginuo may inspirasyon nga mabal-an ang Iya pagbuot. Kag si Henry Eyring nagpamatuod sa akon man nabal-an: nga ang propeta, bilang presidente sang priesthood, may inspirasyon sa Dios agud magbantay kag mag-amlig sa mga alagad sang Ginuo kag magtawag sa ila.
Kon ano man ang inyo palangakuan sa priesthood, may mga tion nga kamo nagbatyag nga ang Langitnon nga Amay wala makatalupangod sa inyo. Sarang kamo mangamuyo agud mabal-an ang Iya pagbuot, kag upod ang matampad nga handom nga maghimo sang bisan ano nga luyag Niya ipabuhat sa inyo, kamo makabaton sang sabat.
Ang Langitnon nga Amay magatugot sa inyo nga makabatyag nga kilala Niya kamo, nga ginapasalamatan Niya ang inyo pag-alagad, nga kamo nagmangin takos sa panamyaw sang Ginuo nga luyag gid ninyo mabatian: “Maayo nga paghimo, but-anan kag himpit nga alagad; nangin himpit ka sa pila ka mga butang, himuon ko ikaw nga manuggahum sa madamo nga mga butang: mag-ambit ka sa kasadya sang imo ginuo.”7
Pangamuyo ko nga ang kada nagaangkon sang priesthood maglab-ot sa pagtuo agud magluwas sa kada kalag nga siya responsable. Ang Dios magadugang sang Iya gahum sa mga pagtinguha sang Iya mga alagad. Matandog ang mga tagipusuon sang katawhan agud magpili sa banas sang ebanghelyo padulong sa kalipayan kag malayo sa kalisud.
Pangamuyo ko man nga ang kada nagaangkon sang priesthood makabatyag sang mapinalanggaon kag nagabantay nga pag-amlig sang Langitnon nga Amay, sang Manluluwas, kag sang propeta sang Dios sa iya palangakuan sa priesthood.
Ginahatag ko ang pinasahi kong saksi nga kita ara sa pag-alagad sang nabanhaw nga Ginuong JesuCristo. Nagasaksi ako nga Siya nagtawag sa akon kag inyo sa Iya pag-alagad, nakabalo sang aton mga ikasarang kag bulig nga aton kinahanglan. Pakamaayohon Niya ang aton mga pagtinguha labaw gid sa labing maayo nga ginalauman naton samtang ginahatag naton ang aton tanan sa Iya pag-alagad. Nagasaksi ako nga ang propeta sang Dios, nga amo ang presidente sang tanan nga priesthood sa kalibutan, may inspirasyon sang Dios.
Nagapasalamat ako sa mga halimbawa sang himpit nga mga nagaangkon sang priesthood bisan diin man sila. Ang Langitnon nga Amay kag ang Manluluwas nagapasalamat sa inyo bahin. Kilala Nila kamo, Sila nagabantay sa inyo, kag Sila nagapalangga sa inyo. Sa ngalan ni JesuCristo, amen.