“Mayo 8–14. Mateo 19–20; Marcos 10; Lucas 18: ‘Ano Pa Bala ang Nakulang sa Akon,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)
“Mayo 8–14. Mateo 19–20; Marcos 10; Lucas 18,” Dali, Magsunod sa Akon—Para sa Mga Indibidwal kag Mga Pamilya: 2023
Mayo 8–14
Mateo 19–20; Marcos 10; Lucas 18
“Ano Pa Bala ang Kulang sa Akon?”
Basaha kag hunahunaa sing maayo ang Mateo 19-20; Marcos 10; kag Lucas 18; nga ginahatagan sing atensyon ang mga pagpabatyag nga imo mabaton. Tandai ining mga pagpabatyag, kag pamensara kon paano mo aktuhan ang mga ini.
Isulat Ang Imo Mga Panghunahuna
Kon may oportunidad ka nga mamangkot sa Manluluwas, ano ang ipamangkot mo? Sang nakilala sang isa ka manggaranon nga pamatan-on ang Manluluwas sa una nga kahigayunan, namangkot sia, “Ano bala nga maayo nga butang ang buhaton ko, agud nga akon maangkon ang kabuhi nga walay katapusan?” (Mateo 19:16). Ang sabat sang Manluluwas nagpakita sang pareho nga pagdayaw sa maayo nga mga butang nga nahimo na sang pamatan-on kag ang mapinalanggaon nga pagpaisog nga dugangan pa. Kon pamensaron naton ang posibilidad sang kabuhi nga wala katapusan, pareho man kita nga nagakatingala kon may dapat pa bala kita nga himuon. Kon magpamangkot kita, sa aton kaugalingon nga paagi, “Ano pa bala ang nakulang sa akon?” Sa (Mateo 19:20), ang Ginuo makahatag sa aton sang mga sabat nga pareho kapersonal sang Iya sabat sa manggaranon nga pamatan-on. Bisan ano ang pangayuon sang Ginuo nga aton himuon, ang pag-akto sa Iya sabat nagapangayo pirme nga mas magsalig kita sa Iya sangsa sa aton kaugalingon nga pagkamatarong (tan-awa sa Lucas 18:9–14) kag nga aton “batunon ang ginharian sang Dios subong sang bata nga diutay” (Lucas 18:17; tan-awa man sa 3 Nefi 9:22).
Mga Ideya para sa Personal nga Pagtuon sang Balaan nga mga Kasulatan
Ang kasal sa tunga sang lalaki kag babayi gin-ordin sang Dios.
Ining pagsabtanay sa tunga sang Manluluwas kag sang mga Fariseo isa sa pila ka narekord nga tion sang ang Manluluwas nagpanudlo partikular parte sa kasal. Pagkatapos nga basahon ang Mateo 19:3–9 kag Marcos 10:2–12, maglista sang pila ka mga pahayag nga sa pamatyag mo nagapalip-ot sang panan-aw sang Ginuo sa kasal. Paano ang imo ihibalo sang plano sang kaluwasan sang Amay nakaapekto sa imo panghunahuna kag balatyagon parte sa pag-asawahay?
Gintudlo bala ni Jesus nga ang diborsyo indi mabaton ukon nga ang mga diborsyado indi na dapat magpakasal liwat?
Sa isa ka pamulong-pulong parte sa diborsyo, si Pangulong Dallin H. Oaks nagtudlo nga ginatuyo sang Amay nga Langitnon ang pag-asawahay nga mangin wala katapusan. Ugaling, naintiendihan man sang Dios nga kon kaisa kinahanglanon gid ang diborsyo. Si Pangulong Oaks nagpaathag nga ang Ginuo “nagatugot sa mga diborsyado nga makasal liwat nga wala sing mantsa sang imoralidad nga ginhambal sa mas mataas nga layi. Magluwas kon ang diborsyado nga miyembro naghimo sang seryoso nga mga sala, sia makabaton sang temple recommend sa idalom sang pareho nga mga sulukdan sang katakos nga ginagamit sa iban nga mga miyembro”(“Divorce,” Liahona, Mayo 2007, 70).
Mateo 19:16–22; Marcos 10:17–22; Lucas 18:18–23
Kon mamangkot ako sa Ginuo, tudloan Niya ako kon ano ang kinahanglan ko himuon agud makabaton sang kabuhi nga wala katapusan.
Ang istorya sang manggaranon nga pamatan-on makapadulog bisan sang madugay na nga matinuohon nga disipulo. Sa imo pagbasa sang Marcos 10:17–22, ano ang ebidensya nga imo nakita sa katutom kag kasinsero sang pamatan-on? Ano ang nabatyagan sang Ginuo tuhoy sa sining pamatan-on?
Ini nga sinulatan mahimo nga makapapamangkot sa imo, “Ano pa bala ang nakulang sa akon?” (Mateo 19:20). Paano kita ginabuligan sang Ginuo nga mapun-an ang aton kakulangan? (tan-awa sa Eter 12:27). Ano ang sarang naton himuon agud ihanda ang aton mga kaugalingon nga batunon ang Iya pagsaway kag bulig samtang ginatinguhaan naton nga mag-uswag?
Ang tanan sarang magbaton sang bugay sang kabuhi nga wala katapusan, wala sapayan kon san-o nila ginbaton ang ebanghelyo.
Maangot mo bala sa kaugalingon ang eksperiyensya sang bisan isa sa mga trabahador sa ulubasan? Ano nga mga leksyon ang imo makita para sa imo kaugalingon sa sining dinalan? Si Elder Jeffrey R. Holland nagtudlo nga ining paanggid “isa ka istorya sang kaayo sang Dios, sang Iya pasensya kag kapatawaran, kag sang Pagbayad-Sala sang Ginuong Jesucristo. Isa ini ka istorya sang kaalwan kag kaluoy. Isa ini ka istorya sang grasya “The Laborers in the Vineyard” (Liahona, Mayo 2012, 31–33). Ano nga dugang nga ihibalo ang imo naagom sa pinanudlo ni Elder Holland? Ano nga dugang nga mga pagpabatyag ang ginhatag sang Espiritu sa imo?
The Repentant Publican and the Self-Righteous Pharisee in the Temple [Ang Mahinulsulon nga Publikano kag ang Nagapakamatarong sang Kaugalingon nga Fariseo sa Templo], ni Frank Adams
Dapat ako magsalig sa kaluoy sang Dios, indi sa akon kaugalingon nga pagkamatarong.
Paano mo palip-uton ang kinalain sang duha ka mga pangamuyo sa sining paanggid? Binagbinaga kon ano ang dapat mo himuon para mangin mas pareho sa publikano sa sining istorya kag indi pareho sa Fariseo?
Tan-awa man sa Mga Taga-Filipos 4:11–13; Alma 31:12–23; 32:12–16.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Marcos 10:13–16; Lucas 18:15–17. Daw ano ayhan nga mangin isa sa kabataan nga ginbendisyunan ni Jesus? Ano ayhan ang buot silingon sang “magbaton sang ginharian sang Dios subong sang bata nga diutay”? (Marcos 10:15).
-
Marcos 10:23–27.Ano ang kinalain sang pag-angkon sang manggad kag pagsalig sa manggad? (tan-awa sa Marcos 10:23–24 Samtang inyo ginabasa ang bersikulo 27, mahimo mo tutokan ang Paglubad ni Joseph Smith nga nagasiling nga sa mga tawo nga nagasalig sa manggad, imposible; pero indi imposible sa mga tawo nga nagasalig sa Dios kag nagabiya sang tanan para sa akon, kay sa ila tanan ining mga butang posible” (Joseph Smith Translation, Marcos 10:26). Bilang pamilya, paano naton ginapakita nga mas nagasalig kita sa Dios sangsa materyal nga mga butang?
-
Mateo 20:1–16.Agud ipakita ang mga prinsipyo sa Mateo 20:1–16, pwede ka magpa-kontes, pareho sang malip-ot nga palumbaanay. Pagkatapos sang palumbaanay, premyuhi ang tanan sang palareho nga premyo, sugod sa tawo nga kulihot kag nagatapos sa tawo nga nauna. Ano ang ginatudlo sini sa aton parte sa nagabaton sang mga bugay sang wala katapusan nga kabuhi sa plano sang Amay nga Langitnon?
-
Mateo 20:25–28; Marcos 10:42–45.Ano ang kahulugan sang dinalan “ang bisan sin-o sa inyo nga buot mangin nahauna, mangin ulipon ninyo”? (Mateo 20:27). Paano ginpakita ni Jesucristo ang halimbawa sining prinsipyo? Paano naton sundon ang Iya ehemplo sa aton pamilya, sa aton ward ukon branch, kag sa aton kasilingan?
-
Lucas 18:1–14.Ano ang aton matun-an parte sa pangamuyo sa duha ka mga paanggid sa sining mga bersikulo?
Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.
Pagpauswag sang Personal nga Pagtuon
Magpangita sang oras nga bagay sa imo. Masami nga mas mahapos magtuon kon matun-an mo ang balaan nga mga kasulatan nga wala sang istorbo. Magpangita sang oras nga bagay sa imo, kag himoa ang tanan para tayuyon nga magtuon sa amo sina nga oras kada adlaw.
Christ and the Rich Young Ruler [Si Cristo kag ang Manggaranon nga Manugdumala nga Pamatan-on], ni Heinrich Hofmann