“Abril 3–9. Paskwa sang Pagkabanhaw: ‘O Kamatayon, Diin Bala ang Imo Pagdaog?,’” Dali, Magsunod sa Akon—Para sa Mga Indibidwal kag Mga Pamilya: Bag-ong Katipan 2023 (2022)

“Abril 3–9. Paskwa sang Pagkabanhaw,” Dali, Magsunod sa Akon—Para sa Mga Indibidwal kag Mga Pamilya: 2023

Litrato

Lulubngan sa Hardin

Abril 3–9.

Paskwa sang Pagkabanhaw

“O Kamatayon, Diin Bala ang Imo Pagdaog?”

Samtang imo ginabasa ang mga panaksihon parte sa Pagkabanhaw sang Manluluwas sa sining outline, tandai ang mga balatyagon kag pagpabatyag nga nagaabot sa imo halin sa Balaan nga Espiritu.

Isulat Ang Imo Mga Panghunahuna

Sa katapusan nga semana sang kabuhi sang Manluluwas, madamo sa mga Judio sa Iya palibot ang nagapasakop sa mga tradisyon sang Pascua [Passover]. Nagahanda sila sang mga pagkaon, nagakinanta, kag nagatililipon para dumdumon ang pagkahilway sang panimalay ni Israel sa pagkaulipon sa mga Egiptohanon. Ang mga pamilya nagapamati sa istorya sang nagapanglaglag nga anghel nga ginligaran ang mga balay sang ila katigulangan nga nagmarka sang ila pwertahan sang dugo sang carnero. Sa tunga sining mga selebrasyon nga puno sang simbolismo sang pagpanghilway, diutay lang ang nakahibalo nga si Jesucristo, ang Cordero sang Dios, malapit na lang nga magahilway sa ila gikan sa pagkaulipon sa sala kag kamatayon—paagi sa Iya pag-antos, sa Iya kamatayon, kag sa Iya Pagkabanhaw. Wala sapayan sini, may mga tawo nga nakakilala kay Jesus bilang ila ginpromisa nga Mesias, ang ila wala katapusan nga Manughilway. Sugod sa adlaw nga ato, ang mga disipulo ni Jesucristo nagpamatuod sa bilog nga kalibutan “nga si Cristo napatay tungod sa aton mga sala … ; nga ginlubong sia, nga ginbanhaw sia sa ikatlong adlaw” (1 Mga Taga-Corinto 15:3–4).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mateo 21–28

Ginaluwas ako ni Jesucristo sa sala kag kamatayon, ginapabakod ako sa akon mga kahuyang, kag ginapaumpawan ako sa akon mga pagtilaw.

Isa ka paagi para tutokan ang mga bugay sang Pagbayad-Sala sang Manluluwas sining semana amo ang paghatag sang tion kada adlaw agud basahon ang parte sa katapusan nga semana sang kabuhi ni Jesus (nagasunod ang posible nga iskedyul sa pagbasa). Ano ang imo nakita sa sini nga mga kapitulo nga nagbulig sa imo nga mabatyagan ang pagpalangga sang Manluluwas? Binagbinaga kon ano ang ginatudlo sa imo sining mga kapitulo parte sa kon paano ka Niya maluwas halin sa sala, kamatayon, mga pagtilaw, kag mga kahuyang? Paano ka nagapakita sang pagtuo sa Iya gahum sa paghilway?

Domingo: Madinalag-on nga pagsulod sa Jerusalem (Mateo 21:6–11)
Lunes: Pagtinlo sang templo (Mateo 21:12–16)
Martes: Pagpanudlo sa Jerusalem (Mateo 21–23)
Miyerkules: Padayon nga pagpanudlo (Mateo 24–25)
Huwebes: Ang Pascua kag pag-antos ni Cristo sa Hardin sang Getsemani (Mateo 26)
Biyernes: Pagkaso, Paglansang, kag paglubong (Mateo 27:1–61)
Sabado: Ang lawas ni Cristo nagahamyang sa lulubngan (Mateo 27:62–66) samtang Sia nagapangalagad sa kalibutan sang mga espiritu (Doktrina kag mga Kasugtanan 138)
Domingo: Ang Pagkayab ni Jesucristo kag ang Iya pagpakita sa Iya mga disipulo (Mateo 28:1–10)

Tan-awa man sa Easter.ComeuntoChrist.org.

Crucifixion [Paglansang], ni Louise Parker

Mateo 28:1–10; Lucas 24:13–35; Juan 20:19–29; 1 Mga Taga-Corinto 15:1–8, 55

Madamo nga mga saksi ang nagpamatuod sang Pagkabanhaw ni Jesucristo.

Panumduma kon daw ano ayhan para sa mga disipulo ang tan-awon si Jesus nga ginayaguta, ginamaltrato, kag ginalansang. Nasaksihan nila ang Iya gahum, nabatyagan ang kamatuoran sang Iya mga pinanudlo, kag nakaangkon sang pagtuo nga Sia Anak sang Dios. Ang pagsaksi sang Iya kamatayon posible nga nakapabatyag sa Iya mga disipulo sang kasubo kag libog. Pero sa wala madugay nangin mga saksi sila sang dako nga milagro sang Iya Pagkabanhaw.

Ano ang imo matun-an sa mga istorya sang mga nakasaksi sang Nabanhaw nga Manluluwas? Markahi ukon tandai ang eksperiyensya sang tagsa ka tawo sa Mateo 28:1–10; Lucas 24:13–35; Juan 20:19–29; kag 1 Mga Taga-Corinto 15:1–8, 55. (Ang iban pa nga mga saksi sang nabanhaw nga Cristo sarang makita sa 3 Nefi 11; Mormon 1:15; Eter 12:38–39; Doktrina kag mga Kasugtanan 76:19–24; 110:1–10; kag Joseph Smith—Kasaysayan 1:15–17). Ano ang nanamian mo sa mga testimonya sining mga saksi? Pagkatapos sang Pagkabanhaw sang Manluluwas, nabanhaw man ang iban kag nagpakita sa madamo (tan-awa sa Mateo 27:52–53; 3 Nefi 23:9). Paano ang imo pagtuo sa Manluluwas kag sa promisa sang pagkabanhaw nakaimpluwensya sa pamaagi sang imo pagpangabuhi?

1 Pedro 1:3–11

Si Jesucristo nagahatag sa akon sang paglaum kag kalipay.

Ano nga mga tinaga ukon mga dinalan sa 1 Pedro 1:3–11 ang nagahatag sa imo sang paglaum bangud kay Jesucristo? Sang san-o ka nakabatyag sang paglaum?

Si Elder Gerrit W. Gong nagpamatuod nga ang Pagkabanhaw “nagahatag sang paglaum sa ila nga nawad-an sang mga tiil; sa mga nawad-an sang ikasarang nga makakita, makabati, ukon maglakat; ukon ang mga ginakabig nga nadula tungod sa malala nga balatian, balatian sa pamensaron, ukon iban pa nga pagbuhin sa ikasarang. Pangitaon Niya kita. Himuon Niya kita nga kompleto. … [Dugang pa,] bangud ‘ang Dios mismo magapasag-uli para sa mga sala sang kalibutan’ [Alma 42:15], … sarang Niya, upod ang kaluoy, nga buligan kita suno sa aton mga kahuyangan. … Nagahinulsol kita kag nagahimo sang tanan naton nga masarangan. Iya kita ginalikupan sa wala katubtuban ‘sa mga butkon sang iya gugma’ [2 Nefi 1:15]” (“Hosana kag Aleluya—Ang Buhi nga Jesucristo: Ang Sentro sang Pagpanumbalik kag Paskwa sang Pagkabanhaw,” Liahona, Mayo 2020, 54).

Tan-awa man sa Alma 27:28; 36:1–24; 3 Nefi 9:11–17; Moroni 7:40–41.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

ComeuntoChrist.org.Ang Easter.ComeuntoChrist.org nagalakip sang pasunod sang mga hitabo kag sang paglaragway kon ano ang nagkalatabo sa tagsa ka adlaw sang katapusan nga semana sang kabuhi sang Manluluwas. Kada adlaw sang semana, pwede nga rebyuhon sang imo pamilya ining mga paglaragway para makita kon ano ang ginhimo sang Manluluwas sina nga adlaw, ukon pwede ninyo basahon bilang pamilya ang parte sa Iya katapusan nga semana sa balaan nga mga kasulatan (tan-awa ang panugyan nga lista sa seksyon sang “Mga Ideya para sa Personal nga Pagtuon sang Balaan nga mga Kasulatan” sa ibabaw).

Mga Himno kag mga Ambahanon sang Kabataan.Pamensara nga magkanta sang mga kalantahon sing ululupod parte sa Pagbayad-Sala sang Manluluwas kag sa Pagkabanhaw sining semana, lakip na ang pila nga indi gawa pamilyar sa inyo. Agud buligan ang mga miyembro sang pamilya nga matun-an ang mga kanta, pwede ka magpakita sang mga litrato nga nagabagay sa mga tinaga.

“Ang Buhi nga Cristo: Ang Panaksihon sang mga Apostoles.”Bilang pamilya, basaha ang “Ang Buhi nga Cristo: Ang Panaksihon sang mga Apostoles” (ChurchofJesusChrist.org). Agdaha ang tagsa ka miyembro sang pamilya nga magpili sang mensahe para sa Paskwa sang Pagkabanhaw halin sa sining testimonya para ipaambit sa iban. Halimbawa, pwede kamo maghimo sang mga poster nga ibutang sa social media, sa inyo pwertahan, ukon sa inyo balay.

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Nabanhaw ang Ginuo,” Mga Himno kag mga Ambahanon sang Kabataan, 54.

Pagpauswag sang Personal nga Pagtuon

Magplastar sang malab-ot nga mga katuyuan. Ang paghatag sang bisan pila lang ka minuto kada adlaw sa pagtuon sang balaan nga mga kasulatan magabugay sang imo kabuhi. Magpangako sa pagtuon kada adlaw, magpangita sang paagi nga pahanumdumon ang imo kaugalingon sang imo pangako, kag himoa ang tanan nga sundon ini. Kon nalimtan mo, indi magpangampo. Magsugod lang liwat.