Pagbalhin sang Dagway ni Cristo

The Transfiguration [Ang Pagbalhin sang Dagway], ni Carl Heinrich Bloch

Abril 10–16

Mateo 15–17; Marcos 7–9

“Ikaw ang Cristo”

Ang pagbasa sang balaan nga mga kasulatan nagaagda sang Balaan nga Espiritu sa imo kabuhi. Isa sa importante nga misyon sang Balaan nga Espiritu amo ang magpamatuod parte kay Jesucristo. Samtang imo ginabasa ang balaan nga mga kasulatan sini nga semana, tutoki ang espirituhanon nga mga balatyagon nga nagapabakod sang imo testimonya sang Manluluwas.

Isulat Ang Imo Mga Panghunahuna

Indi bala nga makatilingala nga ang mga Fariseo kag Saduceo magapangayo kay Jesus sang “tanda halin sa langit”? Kulang pa bala ang madamo nga bantug Niya nga mga milagro? Paano ang Iya mabaskog nga mga panudlo ukon ang nagkalainlain nga mga paagi nga Iya gintuman ang dumaan nga mga propesiya? Ang ila pagpangayo gintulod indi sang kakulang sang mga tanda kundi sang pagpamalibad nga “hangpon ang mga tanda” kag batunon ang mga ini. (Tan-awa sa Mateo 16:1–4.)

Si Pedro, pareho sa mga Fariseo kag mga Saduceo, nakasaksi sang mga milagro sang Manluluwas kag nakabati sang Iya mga panudlo. Pero ang pat-od nga panaksihon ni Pedro, “Ikaw ang Cristo, ang Anak sang Dios nga buhi,” wala naghalin sa iya pisikal nga igbalatyag—sa iya “unod kag dugo.” Ang iya testimonya ginpahayag sa iya sang aton “Amay nga yara sa langit.” Ang rebelasyon amo ang bato kon sa diin ginpasad sang Manluluwas ang Iya Simbahan sadto kag sa karon—rebelasyon halin sa langit sa Iya mga alagad. Kag amo ini ang bato nga sa ibabaw sini sarang naton mapasad ang aton pagkadisipulo—rebelasyon nga si Jesus amo ang Cristo kag ang Iya mga alagad nagakapot “sang mga yabi sang ginharian.” Kon napasad kita sa sining pundasyon, “ang mga gahum sang kamatayon indi makadaog sa [aton]” (Mateo 16:15–19).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Mateo 16:13–17

Ang panaksihon kay Jesucristo nagaabot paagi sa rebelasyon.

Kon pamangkuton ni Jesucristo ang mga tawo karon, “Sin-o bala siling sang mga tawo ang Anak sang Tawo?” ano ayhan ang ila isiling? Paano mo sabton kon pamangkuton ka ni Jesus, “Sin-o bala ako sa imo?” (Tan-awa sa Mateo 16:13–15.)

Hunahunaa sing maayo ang imo panaksihon parte sa Manluluwas kag kon paano mo ini nabaton. Ano ang imo matun-an sa Mateo 16:15–17 nga makabulig pabakod sini? Kon gusto mo nga magtuon sing dugang parte sa testimonya kag personal nga rebelasyon, tun-i ining balaan nga mga kasulatan: Juan 15:26; 2 Nefi 31:17–18; Alma 5:45–48; kag Doktrina kag mga Kasugtanan 8:2–3.

 

Mateo 16:13–19; 17:1–9; Marcos 9:2–9

“Ang mga yabi sang ginharian sang langit” ari sa duta karon.

Ang “mga yabi sang ginharian sang langit” nga ginpromisa sang Manluluwas kay Pedro amo ang mga yabi sang priesthood (

Iban pa nga mga balasahon nga makabulig sa imo nga makatuon parte sa mga yabi sang priesthood nagalakip sang Samtang ginatun-an ining mga balasahon, pamensara ang maghimo sang listahan sang imo natun-an parte sa mga yabi sang priesthood kag sang mga bugay nga nagaabot tungod sini. Ngaa sa banta mo nga yabi ang maayo nga simbolo para sa kinamatarong sa paggiya sang priesthood nga pag-alagad?

estatwa ni Pedro nga nagakapot sang mga yabi

Ang mga yabi sang priesthood amo ang awtoridad sa paggiya sang paggamit sang priesthood.

Mateo 17:14–21; Marcos 9:14–29

Kon nagapangita sang mas dako nga pagtuo, sarang ako nga magsugod sa pagtuo nga ara na ngadaan sa akon.

Ang amay nga ginmitlang sa Mateo 17 kag Marcos 9 may mga rason nga magpangduhaduha kon bala mapaayo ni Jesus ang iya anak. Ginpangabay na niya ang mga disipulo ni Jesus nga paayuhon ang iya anak, kag indi nila mahimo. Pero sang nangayo sia sa Manluluwas sang milagro, ginpili niya nga magpahayag sang pagtuo. “Ginuo, nagatuo ako,” siling niya. Dayon, sa pagkilala nga ang iya pagtuo indi perpekto, nagdugang, “Tabangi ang akon pagkadi-matinuohon.”

Ano ang ginatudlo sang Espiritu sa imo samtang imo ginabasa ang parte sining milagro? Paano ka ginbuligan sang Amay nga Langitnon nga dugangan ang imo pagtuo? Ano ang pwede mo himuon para dugangan ang pagtuo nga ara na ngadaan sa imo? Ayhan pwede ka maglista sang mga balaan nga kasulatan, mensahe sa komperensya, ukon mga eksperiyensya nga nagpabakod sang imo pagtuo.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 15:7–9; Marcos 7:6–7.Ano ang kinalain sang pagtahod sa Dios sa aton mga bibig, ukon mga pulong, kag pagtahod sa Iya sa bug-os naton nga tagipusuon?

Mateo 15:17–20; Marcos 7:18–23.Ngaa nagahalong kita parte sa kon ano nga ginapasulod naton sa aton mga baba? Base sa gintudlo ni Jesus sa sining mga bersikulo, ngaa nga dapat mas nagahalong kita sa kon ano ang nagagwa sa aton mga baba—kag nagagwa sa aton mga tagipusuon? Paano naton tipigan ang aton mga tagipusuon nga matinlo?

Mateo 16:15–17.Paano ginapahayag sang Dios sa aton nga si Jesus amo “ang Cristo, ang anak sang Dios nga buhi”? (bersikulo 16). Paano naton mahanda ang aton kaugalingon nga mabaton ining rebelasyon halin sa Iya?

Mateo 16:13–19; 17:1–9. Agud tudloan ang mga kabataan parte sa mga yabi sang priesthood, pwede mo sila pagamiton sang mga yabi para buksan ang balay, ang awto, ukon iban pa nga kandado. Pamensara nga magpakita sang litrato sang Pangulo sang Simbahan kag magpamatuod nga sia ang nagakapot sang tanan nga mga yabi sang priesthood, pareho kay Pedro sadto.

Mateo 17:20.Ang mga propeta upod ang pagtuo kay Jesucristo nag-idog sang literal nga mga bukid (tan-awa sa Jacob 4:6; Moises 7:13). Pero masami, indi ina ang milagro nga aton kinahanglan. Si Pangulong M. Russell Ballard nagtudlo: “Kon kita may pagtuo pareho kagamay sa isa ka binhi sang mustasa, ang Ginuo sarang magbulig sa aton nga [mag-idog] sang mga bukid sang [kaluya sang buot] kag pagduhaduha sa mga buluhaton nga ara sa aton atubang samtang nagaalagad kita sa mga anak sang Dios, kalakip ang mga miyembro sang pamilya, mga miyembro sang Simbahan, kag yadtong indi pa mga miyembro sang Simbahan” (“Ang Bilidhon nga mga Dulot Halin sa Dios,” Liahona, Mayo 2018, 10). Ano ang pila sa mga bukid sa aton kabuhi nga kinahanglan maidog? Paano naton ipakita ang pagtuo sa gahum sang Dios sa pagbulig sa aton nga idugon ining mga bukid?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Ginapanugyan nga kanta: “Ako Nahalawhaw Gid [I Stand All Amazed],” Mga Himno kag mga Ambahanon sang Kabataan, no. 22.

Pagpauswag sang Aton Pagpanudlo

Magtipon-tipon pirme. Si Pangulong Henry B. Eyring nagpanudlo: “Indi pagpaligara ang kahigayunan nga tipunon ang mga kabataan sa pagtuon sang doktrina ni Jesucristo. Inang mga tion tuman kalaka ikumparar sa mga pagpaninguha sang kaaway” (“The Power of Teaching Doctrine,” Ensign, Mayo 1999, 74).

tawo upod ang anak nga masakiton sa atubang ni Jesus

Master, I Have Brought unto Thee My Son [Manunudlo, Ginadala Ko sa Imo ang Akon Anak], ni Walter Rane