Jesus Preaching Sermon on the Mount [Si Jesus nga Nagawali sa Bukid], ni Gustave Doré

Pebrero 13–19

Mateo 5; Lucas 6

“Bulahan Kamo”

Hatagi sing atensyon ang mga pagpabatyag nga imo mabaton samtang imo ginabasa ang Mateo 5 kag Lucas 6, kag isulat ang mga ini sa sululatan sang mga tinun-an ukon sa iban pa nga paagi. Ining outline makabulig sa imo nga mahibal-an ang pila ka importante nga mga prinsipyo sa sining mga kapitulo, pero mangin bukas sa iban pa nga imo madiskubrehan sa imo pagtuon.

Isulat Ang Imo Mga Panghunahuna

Sa sining punto sang Iya pag-alagad, maathag nga ang mga pinanudlo ni Jesus indi mangin pareho sa kinaandan nga mabatian sang mga tawo sang Iya panahon. Ang imol magabaton sang ginharian sang Dios? Ang mapainubuson magapanubli sang duta? Bulahan ang mga ginahingabot? Ang mga eskriba kag mga Fariseo wala nagatudlo sang subong nga mga butang. Pero ang mga matuodtuod nga nakaintiendi sang layi sang Dios nakakita sang kamatuoran sa mga pulong sang Manluluwas. Ang “mata sa mata” kag “dumti ang imo kaaway” mas manubo nga mga layi (Mateo 5:38, 43). Pero si Jesucristo nag-abot agud itudlo ang mas mataas nga layi (tan-awa sa 3 Nefi 15:2–10), nga gindisenyo agud buligan kita nga sa pila ka adlaw mangin “himpit, subong nga himpit ang [aton] Amay nga yara sa langit” (Mateo 5:48).

Mga Ideya para sa Personal nga Pagtuon sang Balaan nga mga Kasulatan

Mateo 5:1–12; Lucas 6:20–26, 46–49

Ang nagadugay nga kalipay nagagikan sa pagpangabuhi sa paagi nga gintudlo ni Jesucristo.

Ang tanan gusto mangin malipayon, pero indi tanan ang nagapangita sang kalipayan sa pareho nga mga lugar. Ang pila nagapangita sini sa dutan-on nga gahum kag posisyon, ang iban sa manggad ukon sa pagpuno sang pisikal nga mga handum. Si Jesucristo nag-abot agud itudlo ang dalan padulong sa nagadugay nga kalipayan, agud itudlo kon ano ang matuod nga kahulugan sang mangin bulahan. Ano ang imo matun-an parte sa pag-angkon sang nagadugay nga kalipayan sa Mateo 5:1–12 kag Lucas 6:20–26? Paano ini nangin lain sa panan-aw sang kalibutan sa kalipayan?

Ano ang ginatudlo sining mga bersikulo sa imo, upod ang Lucas 6:46–49, parte sa pagkadisipulo ni Jesucristo? Ano ang nabatyagan mo nga dapat himuon para magpatubo sang mga kalidad nga ginalaragway sa sining mga bersikulo?

Mateo 5:13

“Kamo ang asin sang duta.”

Ang asin madugay na nga ginagamit sa pagpreserba, paghatag sabor, kag pagtinlo. Ang asin may relihiyoso man nga kahulugan sa mga Israelnon. May kaangtanan ini sa dumaan nga kagawian sang paghalad sang kasapatan sa idalom sang layi ni Moises (tan-awa sa Levitico 2:13; Numeros 18:19). Kon ang asin magtab-ang, indi na ini epektibo, ukon “wala na ini sing pulos” (Mateo 5:13). Nagakatabo ini kon nasamo ukon nalaktan ini sang iban pa nga mga elemento.

Tandai ini samtang imo ginabinagbinag ang Mateo 5:13. Paano mo tipigan ang imo sabor bilang disipulo ni Jesucristo? Paano mo tumanon ang imo nagapreserba kag nagatinlo nga buluhaton bilang asin sang duta?

Tan-awa man sa Doktrina kag mga Kasugtanan 103:9–10.

“Kamo ang asin sang duta” (Mateo 5:13).

Mateo 5:17–48; Lucas 6:27–35

Ang layi ni Cristo ang nagabulos sa layi ni Moises.

Ang mga disipulo mahimo nga nakibot sang mabatian si Jesus nga naghambal nga ang ila pagkamatarong kinahanglan nga magsobra pa sa mga eskriba kag Fariseo (tan-awa sa Mateo 5:20), nga ginapabugal gid ang ila mga kaugalingon kon daw ano nila kaistrikto nga ginasunod ang layi ni Moises.

Samtang imo ginabasa ang Mateo 5:21–48 kag Lucas 6:27–35, pamensara nga markahan pareho ang mga pamatasan nga ginapangayo sa layi ni Moises (“Nabatian ninyo nga …”) kag kon ano ang gintudlo ni Jesus para pataason ining mga pamatasan. Ngaa sa banta mo nga ang pamaagi sang Manluluwas isa ka mas mataas nga layi?

Halimbawa, ano ang gintudlo ni Jesus sa Mateo 5:27–28 parte sa aton responsibilidad sa aton mga panghunahuna? Paano mo mas makontrol ang mga panghunahuna kag balatyagon nga nagasulod sa imo kaisipan kag tagipusuon? (tan-awa sa Doktrina kag mga Kasugtanan 121:45).

Mateo 5:48

Ginapaabot gid bala matuod sang Amay nga Langitnon nga mangin perpekto ako?

Si Pangulong Russell M. Nelson nagpanudlo:

“Ang tinaga nga perpekto ginlubad gikan sa Griyego teleios, nga buot silingon ‘kompleto.’ … Ang infinitive nga porma sang tinaga nga teleiono, nagakahulugan sang ‘paglab-ot sa malayo nga punta, mangin lubos nga nagtubo, mangin himpit, ukon magtapos.’ Tandai nga ining tinaga wala nagakahulugan sang ‘kahilwayan sa sayop’; nagakahulugan ini sang ‘paglab-ot sang tinutuyo nga yara sa malayo.’ …

“… Ang Ginuo nagpanudlo, ‘Indi kamo makabatas sang presensya sang Dios subong … ; gani, magpadayon nga may pagpasensya tubtob nga mangin perpekto kamo’ [Doktrina kag mga Kasugtanan 67:13].

“Indi naton kinahanglan madismaya kon ang aton matutom nga mga pagpaninguha nga mangin perpekto sa karon daw tama ka budlay kag wala sing katapusan. Ang pagkaperpekto nagahulat nga makompleto. Magaabot ini sing lubos pagkatapos lamang sang Pagkabanhaw kag paagi lamang sa Ginuo. Nagahulat ini sa tanan nga nagapalangga sa iya kag nagatuman sang iya mga kasuguan” (“Perfection Pending,” Ensign, Nob. 1995, 86, 88).

Tan-awa man sa 2 Pedro 1:3–11; Moroni 10:32–33; Doktrina kag mga Kasugtanan 76:69.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 5:1–9.Ano nga mga prinsipyo nga gintudlo sa Mateo 5:1–9 ang makabulig sa inyo puluy-an nga mangin mas malipayon nga lugar? Pwede kamo magpili sang isa ukon duha nga daw importante gid sa inyo pamilya. Halimbawa, ano nga mga panudlo ang makita naton nga makabulig sa aton nga mangin mga makigdaeton? (tan-awa sa Mateo 5:21–25, 38–44). Ano nga mga tinutuyo ang pwede naton ipahamtang? Paano naton ini sundan?

Mateo 5:13.Magkaon nga ululupod sang pila ka pagkaon nga gintimplahan sang asin kag sang pareho nga pagkaon nga wala sing asin. Ano ang kinalain nga aton natalupangdan? Ano ang buot silingon sang mangin “asin sang duta”? Paano naton himuon ini?

Mateo 5:14–16.Para buligan ang imo pamilya nga maintiendihan kon ano ang kahulugan sang mangin “suga sang kalibutan,” pwede ninyo istoryahan ang pila ka ginhalinan sang kasanag sa inyo puluy-an, sa inyo kasilingan, kag sa kalibutan. Basi makabulig ang ipakita kon ano ang matabo kon imo taguon ang kasanag. Ano ang buot silingon ni Jesus sang Sia nagsiling, “Kamo ang suga sang kalibutan”? (Mateo 5:14). Sin-o ang daw nangin suga sa aton pamilya? Paano kita mangin suga sa iban? (tan-awa sa 3 Nefi 18:16, 24–25).

Mateo 5:43–45.Samtang ginabasa sang inyo pamilya ang mga tinaga sang Manluluwas sa sining mga bersikulo, pwede ninyo nga hambalan kon sin-o, labi na gid, ang sa pamatyag ninyo pwede ninyo palanggaon, bendisyunan, kag pangamuyoan. Paano naton mapatubo ang aton pagpalangga sa ila?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Aton Pagpanudlo

Magpanilag. “Samtang inyo ginatutokan kon anong nagakatabo sa mga kabuhi sang inyo [mga anak], makakita kamo sang manami nga mga oportunidad sa pagtudlo. … Ang [ila] mga komento ukon mga pamangkot mahimo nga magdul-ong sang mga tinion sa pagtudlo (tan-awa sa Teaching in the Savior’s Way, 16).

“Kamo mga suga sang kalibutan” (Mateo 5:14).