Si Jesus nagapakighambal kay Nicodemo

Pebrero 6–12

Juan 2–4

“Kinahanglan Kamo Matawo Liwat”

Samtang imo ginabasa ang Juan 2–4, ang Espiritu magatudlo sa imo sang mga butang parte sa imo kaugalingon nga pagkahaylo. Isulat ang Iya mga pagpabatyag. Mahimo nga makakita ka sang dugang nga espirituhanon nga mga panan-awan sa mga ideya sa pagtuon sa sining leksyon.

Isulat Ang Imo Mga Panghunahuna

Sa isa ka sinalu-salo sa kasal sa Cana, gintigbaylo ni Cristo ang tubig sa alak—isa ka hitabo nga gintawag ni Juan nga ang “nahauna sang mga [milagro]” (Juan 2:11). Matuod ina sa masobra isa ka kahulugan. Magluwas nga amo ini ang una nga milagro nga ginhimo ni Jesus sa publiko, mahimo nga nagasimbolo man ini sang isa pa ka milagroso nga panugod—ang proseso sang pagbaylo sang aton mga tagipusuon samtang nagapareho pa gid kita sa aton Manluluwas. Ang ining milagro sang bug-os nga kabuhi nagasugod sa desisyon nga sundon si Jesucristo, nga magbag-o kag magpangabuhi sang mas maayo nga kabuhi paagi sa Iya. Ining milagro mahimo nga makapabag-o gid sang kabuhi nga ang “matawo liwat” isa sa pinakamaayo nga paagi sa paglaragway sini (Juan 3:7). Pero ang pagkatawo liwat umpisa lamang sang dalan sang pagkadisipulo. Ang mga pulong ni Cristo sa babayi nga Samariahanon sa bubon nagapadumdom sa aton nga kon magpadayon kita sa sinang dalan, sa ulihi ang ebanghelyo mangin isa ka “tuburan” sa sulod naton, nga “nagaibwal sa kabuhi nga walay katapusan” (Juan 4:14).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Juan 2:1–11

Ang mga milagro ni Jesucristo “nagpahayag sang iya himaya.”

Samtang imo ginabasa ang parte sa pagbaylo sang Manluluwas sang tubig sa alak sa Juan 2:1–11, mahimo nga makabaton ka sang dugang nga ihibalo paagi sa pagbinagbinag sang mga panan-aw sang lainlain nga mga tawo nga ara didto, lakip na si Maria, ang mga disipulo, kag iban pa. Kon nasaksihan mo ang mga hitabo nga ginalaragway diri, ano ayhan ang imo mga panghunahuna parte kay Jesus? Ano ang ginatudlo sining milagro sa imo parte sa Iya?

Juan 3:1–21

Kinahanglan ko nga matawo liwat para makasulod sa ginharian sang Dios.

Sang si Nicodemo nagkadto kay Jesus sing sekreto, nangin mahinalungon sia nga nagpanilag. Ugaling sang ulihi, gindepensahan niya si Jesus sa publiko (tan-awa sa Juan 7:45–52) kag nag-upod sa mga tumuluo sa lubong sang Manluluwas (tan-awa sa Juan 19:38–40). Ano nga mga panudlo ang imo makita sa Juan 3:1–21 nga mahimo nag-inspirar kay Nicodemo nga magsunod kay Jesus kag matawo liwat?

Ang Propetang si Joseph Smith nagtudlo, “Ang matawo liwat, nagaabot paagi sa Espiritu sang Dios paagi sa mga ordinansa” (Teachings of Presidents of the Church: Joseph Smith [2007], 95). Ano ang nangin papel sang imo bunyag kag kumpirmasyon—ang “matawo sa tubig kag sa Espiritu” (Juan 3:5)—sa imo pagkabun-ag liwat? Ano ang imo ginahimo para padayunon ining proseso sang pagbag-o? (tan-awa sa Alma 5:11–14).

Tan-awa man sa Mosias 5:7; 27:25–26.

Juan 3:16–17

Ginapakita sang Amay nga Langitnon ang Iya pagpalangga sa akon paagi kay Jesucristo.

Si Elder Jeffrey R. Holland nagtudlo, “Ang unang dako nga kamatuoran sa tanan nga wala katapusan amo nga ang Dios nagapalangga sa aton upod ang tanan Niya nga tagipusuon, ikasarang, panghunahuna, kag kusog” (“Tomorrow the Lord Will Do Wonders among You,” Liahona, Mayo 2016, 127). Paano mo nabatyagan ang pagpalangga sang Dios paagi sa regalo sang Iya Anak?

Ang sakramento nagatigana sang tion para panumdumon ang pagpalangga sang Dios kag ang regalo sang Iya Anak. Ano nga pangsakramento nga mga himno ang nagabulig sa imo nga mabatyagan ang ini nga pagpalangga? Ano ang pwede mo himuon para himuon ang sakramento nga mas makahulugan?

Samtang padayon mo nga ginabasa ang parte sa mga pinanudlo kag pag-alagad sang Manluluwas, pamangkuta ang imo kaugalingon kon paano ka ginabuligan sang imo mga ginabasa nga maintiendihan kag mabatyagan ang pagpalangga sang Dios.

Juan 4:24

Ang Dios bala espiritu?

Ang iban mahimo nga naglibog sa pahayag ni Jesus nga ang Dios espiritu. Ang Paglubad ni Joseph Smith sining bersikulo nagahatag sang importante nga pagpaathag: Kay sa ila ginsaad sang Dios ang iya Espiritu. Ang moderno nga rebelasyon nagatudlo man nga ang Dios may lawas sang unod kag mga tul-an (tan-awa sa Doktrina kag mga Kasugtanan 130:22–23; tan-awa man sa Genesis 5:1–3; Mga Hebreo 1:1–3).

Juan 4:5–26

Si Cristo nagatanyag sa akon sang Iya buhi nga tubig.

Ano ayhan ang buot silingon ni Jesus sang nagsiling Sia sa babaying Samariahanon nga kon sin-o man ang mag-inom sang tubig nga Iya ihatag indi na mauhaw? Paano ang ebanghelyo pareho sa buhi nga tubig?

nagailig nga tubig

Ang ebanghelyo ni Cristo amo ang buhi nga tubig nga nagapabaskog sang aton mga kalag.

Isa sa mga mensahe sang Manluluwas sa babaying Samariahanon amo ang kon paano kita magsimba mas importante sangsa kon diin kita nagasimba (tan-awa sa Juan 4:21–24). Ano ang imo ginahimo para “magsimba sa Amay sa espiritu kag sa kamatuoran”? (Juan 4:23).

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Juan 2–4.Sa pagbasa sang imo pamilya sining mga kapitulo sini nga semana, hatagi sang espesyal nga pagtalupangod kon paano gingamit sang Maluluwas ang pang-adlaw-adlaw nga mga butang—pagkabun-ag, hangin, tubig, kag pagkaon—para magtudlo sang espirituhanon nga mga kamatuoran. Ano nga mga bagay sa inyo balay ang imo magamit para magtudlo sang espirituhanon nga mga kamatuoran?

Juan 2:13–17.Ano nga mahigko nga mga impluwensya ang kinahanglan sang imo pamilya nga indi pagpasudlon sa inyo balay para mangin sagrado ini nga lugar—pareho sang templo? Ano ang inyo himuon para indi makasulod inang mga butang?

Juan 3:1–6.Hambali upod sa mga miyembro sang imo pamilya ang parte sa milagro sang pagbusong kag pagbun-ag—ang proseso sang pagtuga sang buhi, maalam nga tinuga. Gintudlo ni Jesus nga kinahanglan naton mabun-ag liwat antes magsulod sa ginharian sang Dios. Ngaa ang pagkabun-ag liwat isa ka maayo nga palaanggiran sang pagbag-o nga ginapangayo sa aton antes kita makasulod sa ginharian sang Dios? Paano naton maeksperiyensyahan ang proseso sang pagkabun-ag liwat sa espirituhanon?

Juan 3:16–17.Agdaha ang mga miyembro sang pamilya nga isaysay liwat ang ining mga bersikulo sa ila kaugalingon nga pulong nga daw ginapaathag nila ini sa isa ka abyan. Paano kita ginbuligan ni Jesucristo nga mabatyagan ang pagpalangga sang Dios?

Juan 4:5–15.Ano ang ginatudlo sang Manluluwas sa aton sang Iya ginkumparar ang Iya ebanghelyo sa buhi nga tubig? Basi pwede nga magtan-aw ang imo pamilya sa pila ka nagailig nga tubig kag ilaragway ang mga kalidad sang tubig. Ngaa kinahanglan naton nga mag-inom sang tubig adlaw-adlaw? Sa ano nga mga paagi nga ang ebanghelyo ni Jesucristo pareho sang “tuburan sang tubig nga nagaibwal sa kabuhi nga walay katapusan”? (Juan 4:14).

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

Pagpauswag sang Personal nga Pagtuon

Pangitaa ang mga simbolo. Ang balaan nga mga kasulatan masami nagagamit sang mga bagay, mga hitabo, ukon mga aksyon para magrepresentar sang espirituhanon nga mga kamatuoran. Ang ining mga simbolo mahimo magdugang sang imo pag-intiendi sang doktrina nga ginatudlo. Halimbawa, ang Manluluwas nagpaanggid sang pagbag-o sa pagkabun-ag liwat.

Si Jesus kag ang babaying Samariahanon sa bubon

Living Water [Buhi nga Tubig], ni Simon Dewey