Si Maria kag si Elisabet

Enero 2–8

Mateo 1; Lucas 1

“Himuon Ini sa Akon Suno sa Imo Pulong”

Samtang imo ginabasa kag ginapamensar sing maayo ang Mateo 1 kag Lucas 1, isulat ang espirituhanon nga mga pagpabatyag nga imo mabaton. Ano nga mga kamatuoran sa doktrina ang imo makita? Ano nga mga mensahe ang mangin may bili para sa imo kag sa imo pamilya? Ang mga ideya sa pagtuon sa sining outline mahimo nga makabulig sa imo nga magdiskubre sang dugang pa nga mga ihibalo.

Isulat ang Imo Mga Panghunahuna

Sa dutan-on nga panan-awan, imposible ini. Ang birhen indi makabusong—amo man ang baw-as nga babayi nga lapaw na sa edad sang pagpamata. Pero ang Dios may plano para sa pagkabun-ag sang Iya Anak kag sa pagkabun-ag ni Juan Bautista, gani sanday Maria kag Elisabet, wala sapayan sang tanan nga sablag, nangin mga iloy. Mahimo nga makabulig ang pagpanumdom sang ila milagroso nga mga eksperiyensya sa tion nga nagaatubang kita sang butang nga daw ka imposible. Malampuwasan bala naton ang aton mga kahuyang? Matandog bala naton ang tagipusuon sang miyembro sang pamilya nga indi interesado sa ebanghelyo? Daw pareho lang nga nagahambal sa aton si Gabriel sang ginpadumdom niya si Maria, “Sa Dios walay bisan ano nga indi mahimo” (Lucas 1:37). Kag ang sabat ni Maria mahimo man naton isabat kon ang Dios magpahayag sang Iya pagbuot: “Himuon ini sa akon suno sa imo pulong” (Lucas 1:38).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Sin-o sanday Mateo kag Lucas?

Si Mateo isa ka Judio nga publikano, ukon manugsukot sang buhis, nga gintawag ni Jesus bilang isa sa Iya mga Apostoles (tan-awa sa Mateo 10:3). Ginsulat ni Mateo ang iya Ebanghelyo para gid sa pareho niya nga mga Judio; gani ginpili niya nga tutokan ang mga propesiya sa Daan nga Katipan parte sa Mesias nga natuman paagi sa kabuhi kag pag-alagad ni Jesus.

Si Lucas isa ka Gentil (indi-Judio) nga manugbulong nga nagbiyahe upod kay Apostoles Pablo. Ginsulat niya ang iya Ebanghelyo pagkatapos sang kamatayon sang Manluluwas para gid sa mga indi-Judio. Nagpamatuod sia parte kay Jesucristo bilang Manluluwas sang pareho mga Gentil kag mga Judio. Ginsulat niya ang mga panaysayon sang mismo mga nakakita sang mga hitabo sa kabuhi sang Manluluwas, kag naglakip sia sang mas madamo nga istorya sang mga babayi kon ikumparar sa iban pa nga mga Ebanghelyo.

 

Mateo 1:18–25; Lucas 1:26–35

Si Jesucristo natawo sa isa ka mortal nga iloy kag imortal nga Amay.

Sa Mateo 1:18–25 kag Lucas 1:26–35, tandai kon paano ginlaragway ni Mateo kag Lucas ang milagro sang pagbun-ag kay Jesus. Paano ginapabakod sang ila mga paglaragway ang imo pagtuo sa Manluluwas? Ngaa importante sa imo nga mahibaluan nga si Jesus pareho nga Anak sang Dios kag anak ni Maria?

Si Pangulong Russell M. Nelson nagpaathag nga ang Pagbayad-Sala ni Jesucristo “nagapangayo sang personal nga sakripisyo sang isa ka imortal nga tinuga nga wala nagapaidalom sa kamatayon. Apang kinahanglan Niya nga mapatay kag bangunon liwat ang Iya kaugalingon nga lawas. Ang Manluluwas lamang ang nagaisahanon nga makahimo sini. Sa Iya iloy ginpanubli Niya ang gahum nga mapatay. Sa Iya Amay naagom Niya ang gahum batok sa kamatayon” (“Constancy amid Change,” Ensign, Nob. 1993, 34).

Lucas 1:5–25, 57–80

Ang mga bugay sang Dios nagaabot sa Iya kaugalingon nga tion.

Kon nakita mo ang imo kaugalingon nga kinahanglan maghulat sang bugay ukon daw wala ginapamatian sang Dios ang imo mga pangamuyo, ang istorya nanday Elisabet kag Zacarias sarang nga mangin pahanumdom nga wala ka Niya ginkalimtan. Sa ginpromisa ni Elder Jeffrey R. Holland: “Samtang nagagiho kita kag nagahulat sing ululupod sa mga sabat sa pila naton ka mga pangamuyo, ginatanyag ko ang akon promisa bilang propeta nga nabatian ang mga ini kag ginasabat ang mga ini, ayhan indi sa tion kag sa paagi nga gusto naton. Pero ang mga ini pirme ginasabat sa tion kag sa pamaagi nga dapat ini sabton sang nakahibalo sang tanan kag maluluy-on sa walay katubtuban nga ginikanan” (“Waiting on the Lord,” Liahona, Nob. 2020, 115–16). Paano sanday Zacarias kag Elisabet nagpabilin nga matinuohon? (tan-awa sa Lucas 1:5–25, 57–80). Nakita mo bala ang imo kaugalingon nga nagahulat sang bugay? Ano sa banta mo ang ginapaabot sang Ginuo sa imo samtang ikaw nagahulat?

Si Elisabet kag Zacarias upod ang lapsag nga si Juan

Pagkatapos nga maghulat sing mapinasensyahon, sanday Elisabet kag Zacarias ginbugayan sang anak nga lalaki.

Mateo 1:18–25; Lucas 1:26–38

Ang matinuohon nagapaidalom sa pagbuot sang Dios.

Pareho kay Maria, kon kaisa makita naton nga ang mga plano sang Dios para sa aton kabuhi lain sangsa aton ginplano. Ano ang imo matun-an kay Maria parte sa pagbaton sang pagbuot sang Dios? Sa masunod nga mga kahon, isulat ang mga pahayag sang anghel kag ni Maria (tan-awa sa Lucas 1:26–38), upod ang mga mensahe nga imo makita sa ila mga pahayag:

Ang mga pulong sang anghel kay Maria	Mensahe para sa akon
Ang mga pulong sang anghel kay Maria “Ang Ginuo kaupod nimo” (bersikulo 28).	Mensahe para sa akon Ang Ginuo nakahibalo sang akon sitwasyon kag mga kabudlayan.
Ang mga pulong sang anghel kay Maria	Mensahe para sa akon
Ang mga pulong sang anghel kay Maria	Mensahe para sa akon

Mga reaksyon ni Maria	Mensahe para sa akon
Mga reaksyon ni Maria “Paano bala ang pagkahimo sini?” (bersikulo 34).	Mensahe para sa akon OK lang ang magpamangkot para mas maintiendihan ang pagbuot sang Dios.
Mga reaksyon ni Maria	Mensahe para sa akon
Mga reaksyon ni Maria	Mensahe para sa akon

Samtang imo ginabasa ang parte sa matarong nga halimbawa ni Jose sa Mateo 1:18–25, ano ang imo matun-an parte sa pagbaton sang pagbuot sang Dios? Ano ang dugang nga mga ideya ang imo matun-an sa mga eksperiyensya ni Zacarias kag Elisabet? (tan-awa sa Lucas 1).

Tan-awa man sa Lucas 22:42;

Lucas 1:46–55

Si Maria nagpamatuod sang misyon ni Jesucristo.

Ang mga pulong ni Maria sa Lucas 1:46–55 nagapahayag sang mga aspeto sang misyon sang Manluluwas. Ano ang imo matun-an parte kay Jesucristo sa mga pahayag ni Maria? Pwede mo ikumparar ining mga bersikulo sa mga pulong ni Ana sa 1 Samuel 2:1–10 kag sa Kabulahanan ni Jesus sa Mateo 5:3–12. Ano ang ginatudlo sang Espiritu sa imo samtang imo ginapamensar sang maayo ining mga bersikulo?

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mateo 1:1–17.Samtang ginabasa sang inyo pamilya ang listahan sang kaliwatan ni Jesus, mahimo ninyo nga hambalan ang inyo kaugalingon nga family history kag mag-istorya sang mga sugilanon parte sa imo mga katigulangan. Paano ginbugayan ang imo pamilya sang paghibalo parte sa inyo kasaysayan sang pamilya?  

Mateo 1:20; Lucas 1:11–13, 30.Ngaa ayhan nga ang mga tawo sa sining mga bersikulo ginahadlukan? Ano ang nagatulod sa aton nga makabatyag sang kahadlok? Paano kita ginaagda sang Dios nga “indi mahadlok”?

Lucas 1:37.Agud buligan ang imo pamilya nga magpatubo sang pagtuo nga “sa Dios walay bisan ano nga indi mahimo,” pwede ninyo basahon ang Lucas 1 sing ululupod kag pangitaon ang mga butang nga ginhimo sang Dios nga mahimo ginakabig nga imposible. Ano pa nga mga istorya ang pwede naton masugid—halin sa balaan nga mga kasulatan ukon sa aton mismo mga kabuhi—kon sa diin ang Dios naghimo sang daw ka imposible nga mga butang? Ang pagpangita sa Libro sang mga Larawan nga Pang-Ebanghelyo mahimo nga makahatag sang mga ideya.

Lucas 1:46–55.Ano ang pila sa “dalagkong mga butang” nga ginhimo sang Manluluwas para sa aton? Ano ayhan ang buot silingon sang aton kalag nga “nagapadako sang Ginuo”?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Aton Pagpanudlo

Gamita ang balaan nga mga kasulatan sa imo kabuhi. Pagkatapos magbasa sang isa ka dinalan sa balaan nga kasulatan, imbitara ang mga miyembro sang pamilya nga himuon nila ini sa ila mga kabuhi (tan-awa sa Teaching in the Savior’s Way, 21). Halimbawa, paano magamit sang mga miyembro sang pamilya ang ila natun-an sa Mateo 1 kag Lucas 1 parte sa pagsabat sa tawag sang Ginuo?

Si Gabriel nagapakita kay Maria

Blessed Art Thou among Women [Bulahan Ka sa Tanan nga mga Babayi], ni Walter Rane